Isaías
3 ¡Tüfei! Tati Ñidol,* Chau Jehová Ñidolcülelu pu hueichafe mu,*
müntuñmayafi* Jerusalén ca Judá com tañi quellu,
com ti co ca ti iyael.
2 Müntuñmayafi ti nehuen-ngechi huentru ca ti hueichafe,
ti juez ca ti huerquen, ti pelontuchefe ca ti loncolelu.
3 Müntuñmayafi tati loncolelu 50 che mu, ti falin huentru ca ti ngülamtufe,
tati adümuhun-ngechi calcu che ca ti ngüneniefilu ti filu calcu dungu mu.
4 Femcünuan huechequeche müten ñi principengeal fei engün meu,
ca ngünenieayu engün ti che caletulelu ñi raquiduam.
5 Tati pu che hueluquentu huesalcahuaingün,
caque quiñeque engün huesalcayafi tañi chafche.*
Ti hueche hulelcayafi ti füchache,
ca ti pecan huentru chaftuafi ti yamfalngelu.
6 Caque quiñeque engün tañi chau ñi ruca mu nüafi tañi peñi, fei feipiafi:
“Eimi nieimi quiñe tacun, feimu ngüneniemuaiñ.
Ngüneniefinge com tüfa ñi teifücalen”.
7 Huelu feichi antü quisu chaftudunguai, feipiai:
Loncocünumulayan tüfachi troquiñche mu”.
8 Jerusalén mutruri,
Judá trananagi.
Tañi feipin ca tañi femün meu chaftumequefingün ta Chau Jehová.
Tati afmatufalngelu ñi adquiñ mu, caiñetuhun dungu mu concüleingün.
9 Tañi ange mu quisutu dalluntucumequehuingün.
¡Aungeaingün! Quisutu huesalcaumequeingün.
10 Feipiafimün pu nor che ñi cüme feleal engün,
cümelcangeaingün tañi femmequen meu.
11 ¡Aungeai ti huesa che!
Huesa dunguñmayai,
huiñolelngetuai tañi femün.
12 Tañi troquiñche huesalcaqueyu pu loncolelu cüdau mu,
pu domo ngüneniemequefingün pu che.
Iñche tañi pu che, tamün pu loncolelu nampiyahulnieimünmeu,*
femcünuingün ñi quimfalngenoal ti rüpü tamün miyahual.
13 Chau Jehová pepicaumequei ñi juzgacheal,
huitrapürai ñi juiciantucuafiel tañi pu che.
14 Chau Jehová juiciantucuafi pu loncolelu ca pu principe tañi troquiñche mu.
Feipiafi engün: “Eimün lüpümtucufimün ti ofadentu,
ca tamün ruca mu nieimün chem tamün hueñeñmafiel pu pofre”.
15 Ti Doi Fütra Ñidol, Chau Jehová Ñidolcülelu pu hueichafe mu, feipi:
“¿Chem troquiuqueimün am tamün cutrancayafiel tañi pu che?
¿Chumngelu am* trufür püle rulpacamequefimün pu pofre ñi ange?”.
16 Chau Jehová ca feipi: “Sion ñi pu püñeñ mallma chengeingün,
trecayaulu norümentuqueingün ñi pel,
ñiquefñiquefmequeingün ñi illulcatucheal, nufincauquei tañi trecan
ca sililcamequefingün* ñi pichique cadenita tañi namun mu.
17 Feimu Chau Jehová ancülechi pitru mu apolafi ñi lonco Sion tañi pu püñeñ.
Cafei Chau Jehová trailefcünuafi ñi lonco engün.*
18 Feichi antü Chau Jehová femcünuai ñi cüme adngehuenoal engün.
Müntuñmayafi ti pichique cadenita tañi namun mu,
ti peshquin tañi lonco mu ca ti llancatu hue cüyen adngelu,
19 tati chahuai, brazalete ca ti pañu tacuquelu ñi ange,
20 itrofill llancatu tañi lonco mu, pichique cadenita tañi namun mu ca adelcalechi trarihue,
ti fotilla nielu cüme nümün-ngechi aceite ca ti pichique fillem pünequelu ñi üñfitungenoal,
21 ti yihul cuhu* ca yihul tucungelu yu mu,*
22 tati falinque tacun, ti huente tacun, ti ücülla ca ti pichique folson,
23 pichique comütuhue,* lino tacun,
munulonco ca ti pañu tacuquelu ange.
24 Nielayaingün aceite balsamico,* huelu mai funa nümün nieaingün.
Nielayaingün trarihue, huelu mai quiñe llasu.
Nielayaingün adelcalechi chapetu, huelu mai trailefcületuai tañi lonco engün.*
Nielayaingün falinque tacun, huelu mai sacu tacun.
Adelcalelayaingün, huelu mai allfen* nieaingün.
25 Fütra cuchillo mu langümngeai tami pu huentru,
ca hueichan meu langümngeai tami pu nehuen-ngechi hueichafe.
26 Tati huaria ñi conhue quiñe domo reque feleai eyütumequelu ca hueñancülelu layeluhun dungu mu,
aungen piai ca anücünuhuai mapu mu”.