1 Crónicas

5 Tüfa Rubén ñi pu fotüm, Israel ñi hunen fotüm. Tüfa hunen fotümngefui, huelu cudui tañi chau ñi ca domo engu,* feimu lloulai chem tañi llohuafel tañi hunen fotümngen mu, tüfa ta elungei José tañi pu fotüm. José fei ta Israel ñi fotüm. Rubén tañi üi mülei ti huirintucun pengelquelu tañi familia ñi tuhun, huelu feipilei ñi llounon chem tañi llohuafel tañi hunen fotümngen mu. 2 Judá doicülei tañi pu peñi mu ca tañi cüpanche mu tuhui ti loncolealu, huelu José mai elungei chem ñi llohuafel ti hunen fotüm. 3 Rubén fei ta Israel ñi hunen fotüm. Tüfa ta Rubén ñi pu fotüm: Hanok, Palú, Hezrón ca Carmí. 4 Tüfa Joel ñi pu fotüm: tañi fotüm Semaya, tañi fotüm Gog, tañi fotüm Simeí, 5 tañi fotüm Miqueas, tañi fotüm Reayá, tañi fotüm Baal 6 ca tañi fotüm Beerá. Asiria ñi lonco ülmen, Tilgat-Pilnéser pingelu, camapu yefi ta Beerá. Tüfa loncolefui pu Rubén che. 7 Tüfa Beerá ñi pu pariente, tañi üi engün mülei ti huirintucun pengelquelu tañi familia ñi tuhun. Tüfa ti loncolelu Jeiel, Zacarías 8 ca Bela, tüfa Azaz ñi fotüm, Sema ñi lacu,* Joel ñi bisnieto.* Bela mülefui ti troquiñ mapu mülelu Aroer mu puulu ta Nebo ca Baal-Meón. 9 Galaad mapu mu doi alün-ngerpui Bela tañi quechan culliñ, feimu tripahue antü püle Bela mülenagi ti mapu mu cheu ñi conpun ti huellin mapu,* inafül Éufrates leufü püle. 10 Saúl ñi antü mu, tüfa engün hueichafi* ca hueufingün pu hagrita che ca nüñmafingün tañi tolto ruca* mülelu com mapu mu Galaad ñi tripahue antü püle.

11 Inafül pu Rubén che mülefuingün Gad ñi pu cüpanche, Basán mapu mu puulu Salecá huaria mu. 12 Basán mapu mu Joel loncolefui, Safam inalei tañi loncolen, ca mülefui Janái ca Safat. 13 Tañi pu pariente fei ta Miguel, Mesulam, Seba, Jorái, Jacán, Zía ca Éber. Tüfa ta 7 che. 14 Tüfa engün chauyefi ta Abihail, tüfa Hurí ñi fotüm, Jaróah ñi fotüm, Galaad ñi fotüm, Miguel ñi fotüm, Jesisái ñi fotüm, Jahdó ñi fotüm, Buz ñi fotüm. 15 Ti huentru Ahí pingelu loncolefui tañi pu pariente mu, tüfa Abdiel ñi fotüm, Guní ñi lacu. 16 Fei engün müleingün Galaad mapu mu, Basán mapu ca tañi püllelechi huaria, cafei com lelfün cachu mülelu Sarón mapu puulu cheu tunte puhui* feichi mapu. 17 Com tañi üi engün mülei ti huirintucun pengelquelu tañi familia ñi tuhun. Femngei tüfa Jotán ñi antü mu, Judá ñi lonco ülmen ca Jeroboán* ñi antü mu, Israel ñi lonco ülmen.

18 Pu Rubén che, pu Gad che ca Manasés ñi rangiñ troquiñche niefuingün 44 mil 760 nehuen-ngechi soltau tañi troquiñ hueichafe mu. Tüfa engün yenieingün escudo, fütra cuchillo ca nünieingün arco.* Pepicaucüleingün ñi hueichayal. 19 Hueichafingün pu hagrita che, Jetur che, Nafís che ca pu Nodab che. 20 Cafei llellipufingün ta Chau Ngünechen tañi quelluaeteu hueichan mu. Fei engün maneluulu cai Chau Dios mu, fei huiñoldungueyu* tañi llellipun. Feimu quellungei hueichan mu ca elungei ñi huehuafiel pu hagrita che ca com pu che mülelu fei engün meu. 21 Yeñmafingün ñi quechan culliñ engün: 50 mil camello, 250 mil ufisa ca 2 mil burro, cafei 100 mil che. 22 Chau Ngünechen* hueichai, feimu fentren che lai. Feichi pu che ñi mapu mu mülenagingün camapu yengetulu hula.

23 Pu che tuulu Manasés ñi rangiñ troquiñche mu mülenagingün feichi mapu mülelu Basán puulu Baal-Hermón mu, Senir ca Hermón huincul mu. Rume fentreleingün. 24 Tüfachi pu huentru loncolefui tañi pu pariente mu: Éfer, Isí, Eliel, Azriel, Jeremías, Hodavías ca Jahdiel. Nehuen-ngechi hueichafengefuingün, rume quimniengefuingün ca loncolefuingün tañi pu pariente mu. 25 Huelu püntütripaingün* tañi pu cuifiqueche ñi Chau Ngünechen. Fei engün eluhui ñi poyeafiel mapu müleyechi troquiñche ñi pu dios,* tüfachi pu troquiñche Chau Ngünechen deu apümcaeyu fei engün ñi adquiñ mu. 26 Asiria mapu mu lonco ülmencülefui Pul, tüfa Tilgat-Pilnéser ca pingei. Fei Israel ñi Chau Ngünechen adniefi tüfachi lonco ülmen ñi camapu yetuafiel pu Rubén che, pu Gad che ca Manasés ñi rangiñ troquiñche. Yefi engün ta Halá, Habor, Hará ca Gozán leufü mu. Fantepu mu petu müleingün tiye mu.