1 Crónicas

9 Com pu Israel che ñi üi mülei ti huirintucun pengelquelu tañi familia ñi tuhun ca huirintuculei Israel ñi pu Lonco Ülmen tañi Lifru mu. Pu Judá che tañi culpan mu engün* camapu yengei Babilonia mu. 2 Quiñeque Israel che, pu sacerdote, pu Leví che ca pu che cüdauquelu* Chau Ngünechen ñi ruca mu* hune huiñotuingün tañi mapu quisu tañi huaria mu. 3 Ca quiñeque che cüpalu Judá, Benjamín, Efraín ca Manasés ñi troquiñche mu mülenagingün Jerusalén mu. Tüfa tati pu huentru: 4 Utái, tüfa Amihud ñi fotüm, Amihud fei ta Omrí ñi fotüm, Omrí fei ta Imrí ñi fotüm, Imrí fei ta Baní ñi fotüm. Com tüfa ta Pérez ñi cüpanche, tüfa Judá ñi fotüm. 5 Asaya ca tañi pu fotüm. Tüfa engün Selah tañi cüpanche. Asaya fei tati hunen fotüm tañi chau ñi familia mu. 6 Ca huiñotui Jerusalén mu Jeuel, Zérah ñi cüpanche. Ca huiñotui 690 tañi pu huentru pariente.

7 Benjamín ñi cüpanche mu huiñotui Salú, Mesulam ñi fotüm, Hodavías ñi lacu,* Hasenuá ñi bisnieto.* 8 Ibneyá, Jeroham ñi fotüm. Elá, Uzí ñi fotüm, Micrí ñi lacu. Ca Mesulam, Sefatías ñi fotüm, Reuel ñi lacu, Ibniya ñi bisnieto. 9 Chumngechi pengeli tañi tuhun engün, Jerusalén mu mülenagi tüfachi pu huentru ca 956 Benjamín ñi cüpanche. Com tüfachi pu huentru loncolei tañi familia mu.

10 Ca huiñotui pu sacerdote, tüfa ta Jedayá, Jehoiarib, Jakín, 11 Azarías, tüfa Hilquías ñi fotüm, Mesulam ñi fotüm, Sadoc ñi fotüm, Merayot ñi fotüm, Ahitub ñi fotüm, tüfa quiñe loncolelu Chau Ngünechen ñi ruca mu. 12 Ca huiñotui Adaya ca Maasái. Adaya fei ta Jeroham ñi fotüm, Pasjur ñi fotüm, Malkiya ñi fotüm. Maasái fei ta Adiel ñi fotüm, Jahzerá ñi fotüm, Mesulam ñi fotüm, Mesilemit ñi fotüm, Imer ñi fotüm. 13 Cafei huiñotui tañi pu peñi engün, loncolelu tañi familia mu, tüfa ta mil 760 huentru nehuen-ngelu, adümuucülelu ca eluucülelu ñi cüdahual Chau Ngünechen ñi ruca mu.

14 Ca pu Leví che meu mülei Semaya, tüfa Hasub ñi fotüm, Azricam ñi fotüm, Hasabías ñi fotüm. Merarí ñi cüpanchengei engün. 15 Ca mülei Bacbacar, Héresh, Galal, Matanías, tüfa Micá ñi fotüm, Zicrí ñi fotüm, Asaf ñi fotüm. 16 Ca mülei Abdías ca Berekías. Abdías fei ta Semaya ñi fotüm, Galal ñi fotüm, Jedutún ñi fotüm. Berekías fei ta Asá ñi fotüm, Elcaná ñi fotüm. Tüfa mülefui pu Netofá che ñi pichique huaria mu.

17 Pu cuidaquelu puerta fei ta Salum, Acub, Talmón, Ahimán ca tañi peñi engün, Salum, tati loncolelu. 18 Feichi mu Salum mülequefui ti lonco ülmen ñi puerta püle tripahue antü mu. Tüfachi pu huentru cuidaquefui ti puerta cheu ñi mülen pu Leví che ñi tolto ruca mu.* 19 Cafei Salum, Coré ñi fotüm, Ebiasaf ñi lacu, Coré ñi bisnieto, ca tañi pu peñi tañi chau ñi familia mu cüpalu, tüfa pu Coré che,* elfalcünungei ñi ngüneduamal ti cüdau femquelu pu cuidaquelu puerta tolto ruca mu. Tañi chau engün elfalcünungefui ñi cuidayal conhue püle Chau Jehová ñi tolto ruca mu. 20 Cuifi, Finehás, tüfa Eleazar ñi fotüm, loncolefui quisu engün meu ca Chau Jehová afcadinieyu. 21 Zacarías, Meselemías ñi fotüm, cuidaquefui ti trahunhue tolto ruca ñi conhue.

22 Com pu che dullingelu ñi cuidayal ti puerta conhue püle fei ta 212 che. Tüfa engün mülenagingün tañi pichique huaria mu chumngechi feipi ti huirintucun pengelquelu tañi familia ñi tuhun. David ca ti huentru pequelu afmatun dungu, Samuel pingelu, üitufi feichi pu huentru ñi elungeal tüfachi elfal cüdau. 23 Fei engün ca tañi pu fotüm elfalcünungei ñi cuidayal ti puerta Chau Jehová ñi ruca mu. Feichi mu ti ruca quiñe tolto rucangefui. 24 Pu cuidaquelu puerta mülefui meli troquiñ püle ruca mu: tripahue antü, conhue antü, norte* ca sur.* 25 Quiñeque rupa tañi pu peñi mülefui ñi elcünual tañi pichique huaria, fei ñi cüdaupayal quisu engün mu 7 antü. 26 Mülefui 4 falin huentru* cuidaquelu puerta. Manelfalngefuingün, Leví chengefui ca adniequefuingün cheu ñi iquen che ca cheu ñi ngülümel falinque fillem Chau Ngünechen ñi ruca mu. 27 Rulpapunqueingün cheu tañi elcünungeel huall püle Chau Ngünechen ñi ruca mu, elfalcünungelu cai ñi cuidayal. Niequefuingün ti llafe ca fill pulihuen nülaquefuingün ti ruca.

28 Quiñeque engün elfalcünulelngei chemcün* ñi poyeafiel ta Chau Dios. Cüpalfiel mu ca entufiel mu raquiquefingün ti chemcün. 29 Quiñeque engün elfalcünulelngei ti chemcün, com ti yamfal* chemcün, cüme rüngo, pulcu, aceite, olibano* ca aceite balsamico. 30 Quiñeque tati sacerdote ñi pu fotüm pepicaingün cüme nümün-ngechi aceite ti aceite balsamico mu. 31 Matitías niefui quiñe elfal cüdau, fei ñi ngüneduamal chem ñi afümngequen sarten mu. Matitías Leví chengei, Salum ñi hunen fotüm, tüfa ti Coré che. 32 Quiñeque tañi pu peñi, pu Cohat che, fill ürcütun antü mu* elfalcünulelngei ñi huelurentrücunuafiel cofque.*

33 Tüfa tati pu ülcantufe, loncolelu pu Leví che ñi familia mu. Tüfa engün mülefui cheu ñi iquen che, huelu ngelafui ñi femal caquelu cüdau. Fei engün mülefui ñi cüdahual antü ca pun meu. 34 Chumngechi pengeli tañi tuhun engün, tüfachi pu huentru loncolefui pu Leví che ñi familia mu. Loncolefui engün ca Jerusalén mu mülefuingün.

35 Jeiel, Gabaón ñi chau, mülefui Gabaón huaria mu. Maacá pingefui tañi domo. 36 Tañi hunen fotüm fei ta Abdón, fei hula nierpui ta Zur, Quis, Baal, Ner, Nadab, 37 Guedor, Ahió, Zacarías ca Miclot. 38 Miclot fei ta Simeam ñi chau. Com engün pülle mülefui tañi pu peñi engün Jerusalén mu, quiñentrür caquelu tañi pu peñi engün. 39 Ner fotümyefi ta Quis. Quis fotümyefi ta Saúl. Saúl fotümyefi ta Jonatán, Malki-Súa, Abinadab ca Esbaal. 40 Jonatán ñi fotüm fei ta Merib-Baal. Merib-Baal fotümyefi ta Miqueas. 41 Miqueas ñi pu fotüm fei ta Pitón, Mélec, Tahrea ca Acaz. 42 Acaz fotümyefi ta Jará. Jará fotümyefi ta Alémet, Azmávet ca Zimrí. Zimrí fotümyefi ta Mozá. 43 Mozá fotümyefi ta Bineá, tañi fotüm Refayá, tañi fotüm Eleasá, tañi fotüm Azel. 44 Azel niefui 6 fotüm. Tüfa tañi üi engün: Azricam, Bocrú, Ismael, Searías, Abdías ca Hanán. Tüfa engün Azel ñi pu fotüm.