1 Crónicas

11 Rupachi antü, com pu Israel che trahuluhuingün David engün Hebrón huaria mu. Feipifingün: “¡Tüfa mu müleiñ! Peñihuen-ngeiñ. 2 Cuifi, lonco ülmen-ngelu Saúl, eimi adniequefuimi pu Israel che ñi quehuayal. Fei tami Chau Ngünechen Jehová feipieimu: ‘Eimi camañafimi* tañi pu che Israel ca loncoleaimi tañi pu che Israel’”. 3 Femngechi com pu Israel loncolelu pepafingün ti lonco ülmen Hebrón huaria mu. Tüfachi huaria mu David eldungucünui fei engün meu Chau Jehová ñi adquiñ mu. Fei hula üitufingün ta David* ñi lonco ülmencüleal Israel mu chumngechi Chau Jehová feipifi ta Samuel.

4 Fei hula David ca com pu Israel che amuingün Jerusalén mu, tüfa ta Jebús. Tiye mu mülefui pu jebuseo che. 5 Huelu pu jebuseo che ayentufingün ta David ca feipifingün: “¡Turpu conpalayaimi tüfa mu!”. Huelu David nüfi ti fütra cura malal* Sion mu mülelu. Feula David ñi Huaria pingetui. 6 David feipi: “Ti hunen huentru hueichafile* pu jebuseo che loncoleai ca principengeai”. Joab, Zeruyá ñi püñeñ, hune amui, fei loncolerpui. 7 Fei David mülenagi ti huaria mu nielu fütra cura malal, feimu David ñi Huaria pingei. 8 Huente ti pichi huinculcülechi mapu,* tañi huall püle ca com püle huaria mu David eluhui ñi deumarucayal ca deumai fütraque cura malal. Joab huiño deumatufi caquelu troquiñ huaria. 9 David amulei ñi doi nehuen-ngerpun, fei Chau Jehová, tati Ñidolcülelu pu hueichafe mu quelluqueyu.

10 Mülefui huentru loncolefulu David ñi pu nehuen-ngechi hueichafe mu. Tüfa engün quiñentrür com pu Israel che quelluntucufi ta David ñi ngünenieal. Chumngechi ñi feipifiel Chau Jehová ti pu Israel che, quellufingün ta David ñi lonco ülmen-ngeal. 11 Tüfa ta David ñi nehuen-ngechi hueichafe huirintuculelu: Jasobeam, quiñe Hacmoní che ñi fotüm, loncolei 3 hueichafe mu. Quiñe rupa langümfi 300 huentru tañi huaiqui mu.* 12 Ca inalefui Eleazar, tüfa Dodó ñi fotüm, ti Ahohí che. Tüfa ca coneltulefui ti 3 nehuen-ngechi hueichafe mu. 13 Mülefui David engu Pas-Damim mu, cheu ñi trahulen pu Filistea che tañi hueichayal. Tiye mu mülefui quiñe lelfün ngancülelu cahuella mu.* Fei pu hueichafe lefmahuingün pu Filistea che ñi duam mu. 14 Huelu Eleazar mülenagi rangi lelfün mu ca incaeyu. Langümfi pu Filistea che. Femngechi Chau Jehová hueufi pu Filistea che.

15 Mülefui 30 loncolelu, fei 3 huentru fütra cura püle nagingün ca pemefingün ta David quiñe lolo meu Adulam huaria mülelu. Feichi mu quiñe troquiñ Filistea hueichafe anümi ñi tolto ruca* Refaím ñi laf mapu mu.* 16 David ellcaucülefui* ca Belén huaria mu mülefui quiñe troquiñ Filistea hueichafe. 17 Fei David feipi chem tañi ayüel: “¡Pichin co fel! ¡Co entungelu ti rünganco* mülelu inafül Belén ñi puerta püle!”. 18 Rupalu tüfa, ti 3 hueichafe maloconpuingün cheu ñi mülen pu Filistea che ñi tolto ruca. Fei inafül Belén ñi puerta püle ti rünganco mu entucoingün ca yelelfingün ta David. Huelu David pilai ñi pütocoafiel, fei hutrulelfi ta Chau Jehová. 19 Feipi: “Iñche rume yamniefiñ* ta Chau Ngünechen, feimu ¡turpu femlayan tüfachi dungu! Tüfachi pu huentru cuñihun mu tucuingün ñi mongen, ¿pütocopeafun mai fei engün ñi mollfüñ? Cuñihun mu tucuingün ñi mongen tañi yemeal co”. Feimu pilai ñi pütocoafiel. Tüfachi dungu femingün tañi 3 nehuen-ngechi hueichafe.

20 Abisái, Joab ñi peñi, loncolerpui caquelu 3 huentru mu. Quisu langümi 300 huentru tañi huaiqui mu. Cüme quimngerquei ti hunen 3 huentru reque. 21 Tüfachi caquelu 3 huentru mu, Abisái doi quimfaluuquei tañi 2 chaf hueichafe mu* ca loncolefui, huelu trürümfal-lai ti hunen 3 huentru mu.

22 Benaya, Jehoiadá ñi fotüm, nehuen piuquengefui.* Tüfachi huentru femi fentren fütraque dungu Cabzeel huaria mu. Langümfi Ariel ñi 2 fotüm Moab mu tuulu. Ca quiñe antü piremequelu coni quiñe rünganco mu, fei langümfi quiñe trapial. 23 Cafei langümfi quiñe alüpürachi Egipto huentru, tüfa doi 2 metro alüpürai.* Benaya quiñe caroti müten yeniei, huelu ti Egipto huentru tañi cuhu mu yeniei quiñe huaiqui cülou reque felelu. Femlu rume, Benaya chaftufi ti Egipto huentru, müntuñmafi* tañi huaiqui ca quisu tañi huaiqui mu langümfi. 24 Tüfachi dungu femi Benaya, Jehoiadá ñi fotüm. Cüme quimngerquei tati 3 nehuen-ngechi hueichafe reque. 25 Doi quimfaluuquei tati 30 huentru mu, huelu trürümfal-lai ti hunen 3 huentru mu. Femfulu rume, David elcünufi ta Benaya ñi loncoleal pu soltau tañi cuidanieteu.

26 Ti troquiñ hueichafe mu mülequefui tüfachi nehuen-ngechi soltau: Asahel, tüfa Joab ñi peñi. Elhanán, tüfa Dodó ñi fotüm, Belén mu tuhui. 27 Samot, tüfa ti Harod che. Hélez, tüfa ti pelonita che. 28 Irá, tüfa Iqués ñi fotüm, ti Tecoa che. Abí-Ézer, tüfa ti Anatot che. 29 Sibecái, tüfa ti Husá che. Ilái, tüfa ti Ahohí che. 30 Maharái, tüfa ti Netofá che. Héled, tüfa Baaná ñi fotüm, ti Netofá che. 31 Itái, Ribái ñi fotüm, Guibeá huaria tuhui, Benjamín ñi mapu mu. Benaya, tüfa quiñe Piratón che. 32 Hurái, tüfa cüpai Gaas huincul lil püle. Abiel, tüfa ti Bet-Arabá che. 33 Azmávet, tüfa ti Bahurim che. Eliahbá, tüfa ti Saalbim che. 34 Hasem ñi pu fotüm, tüfa ti guizonita che. Jonatán, tüfa Sagué ñi fotüm, ti hararita che. 35 Ahiam, tüfa Sacar ñi fotüm, ti hararita che. Elifal, tüfa Ur ñi fotüm. 36 Héfer, tüfa ti mekeratita che. Ahíya, tüfa ti pelonita che. 37 Hezró, tüfa ti Carmelo che. Naarái, tüfa Ezbái ñi fotüm. 38 Joel, tüfa Natán ñi peñi. Mibhar, tüfa Hagrí ñi fotüm. 39 Zélec, tüfa ti Ammón che. Naharái, tüfa ti Beerot che, tüfa ti hueichafe yenielu Joab ñi escudo, Zeruyá ñi püñeñ. 40 Irá, tüfa ti itrita che. Gareb, tüfa ti itrita che. 41 Urías, tüfa ti Het che.* Zabad, tüfa Ahlái ñi fotüm. 42 Adiná, tüfa Sizá ñi fotüm, ti Rubén che, loncolei pu Rubén che ca compañeyu 30 huentru. 43 Hanán, tüfa Maacá ñi fotüm. Josafat, tüfa ti mitnita che. 44 Uzía, tüfa ti Astarot che. Sama ca Jeiel, tüfa engu Hotam ñi fotüm, ti Aroer che. 45 Jediael, tüfa Simrí ñi fotüm ca tañi peñi Johá, tüfa ti tizita che. 46 Eliel, tüfa ti mahavita che. Jeribái ca Josavías, tüfa engu Elnaam ñi fotüm. Itmá, tüfa ti Moab che. 47 Eliel, Obed ca Jaasiel, tüfa ti mezobaíta che.*