1 Crónicas

18 Rupalu ta antü, David hueufi ca ngüneniefi pu Filistea che. Cafei müntuñmafi* ñi cuhu mu Gat huaria ca tañi püllelechi huaria. 2 Fei hula hueufi ta Moab. Fei pu Moab che eluhuingün ñi cüdahuelafiel ta David ca culliquefingün impuesto.

3 Inafül Hamat huaria mu David hueufi Hadadézer, tüfa Zobá ñi lonco ülmen. Hadadézer petu amulefui tañi ngünenieal ti mapu mülelu Éufrates leufü püle. 4 David nürpui mil carretela,* 7 mil huentru püracahuellulelu ca 20 mil tañi pu hueichafe* namuntu amulelu. Cafei cüntrocünufi com pu cahuellu yenielu carretela, huelu femngechi femlafi 100 cahuellu. 5 Pu Siria che cüpalu Damasco huaria mu quellupafingün ti lonco ülmen Hadadézer, Zobá huaria mu tuulu. Huelu David langümfi 22 mil Siria che. 6 Fei David elcünui hueichafe Damasco mu Siria mapu mülelu. Pu Siria che eluhuingün ñi cüdahuelafiel ta David ca cullifingün impuesto. Cheu rume amufule David, Chau Jehová quellueyu ñi huehual.* 7 Cafei David müntuñmafi Hadadézer ñi pu cüdaufe tañi oro* escudo chincülcülelu,* fei Jerusalén huaria mu yefi. 8 Cafei Tibhat ca Cun huaria mu David entui rume fentren cobre, tüfa ta Hadadézer ñi huaria. Feichi cobre mu Salomón deumai ti Lafquen pingechi cobre lafatorio, tati fütraque orcon ca itrofill cobre chemcün.*

9 Hamat ñi lonco ülmen, Tou pingelu, allcüi David ñi hueufiel com pu hueichafe ñi nieel Zobá ñi lonco ülmen, Hadadézer pingelu. 10 Feica müten Tou huercüi tañi fotüm Hadoram ñi pemeafiel ti lonco ülmen David ca tañi ramtuafiel ñi chumlen. Cafei saquifi ñi hueichafiel ta Hadadézer ca ñi hueufiel. Fei Hadadézer fentren rupa hueichaquefui ta Tou. Hadoram yelelfi ta David itrofill chemcün oro, plata ca cobrengelu. 11 Ti lonco ülmen David huichucünulelfi feiti chemcün ta Chau Jehová, chumngechi huichucünulelfi ti plata ca ti oro yeñmafilu com troquiñche mu: tüfa pu Edom che, pu Moab che, pu Ammón che, pu Filistea che ca pu Amalec che.

12 Zeruyá ñi püñeñ, Abisái pingelu, langümfi 18 mil Edom che Chadi laf mapu mu.* 13 Elcünui hueichafe Edom mapu mu ca com pu Edom che cüdahuelfingün ta David. Cheu rume amufule David, Chau Jehová quellueyu ñi huehual.* 14 David amulei ñi ngüneniefiel com pu Israel che. Fei nor dungu mu juzgafi com tañi pu che. 15 Zeruyá ñi püñeñ, Joab pingelu, loncolefui pu hueichafe mu. Fei Ahilud ñi fotüm, Jehosafat pingelu, huirintucuquefui chem ñi rupan ti troquiñ mapu. 16 Ahitub ñi fotüm fei ta Sadoc, ca Abiatar ñi fotüm fei ta Ahimélec. Fei engu sacerdotengefui. Ca Savsá secretariongefui. 17 Benaya, tüfa Jehoiadá ñi fotüm, loncolefui pu keretita ca pu peletita che. Cafei David ñi pu fotüm loncolefuingün David ñi adquiñ mu.