1 Crónicas

20 Ellaconlu ti tripantu,* pu lonco ülmen tripaingün ñi hueichayal.* Fei Joab loncolefui quiñe troquiñ hueichafe ca huesalcafi pu Ammón che ñi mapu. Joab amui ca hualloñmafi Rabá,* huelu David mülenagi Jerusalén huaria mu. Joab lefcontufi Rabá ca apümcafi. 2 Fei David müntuñmafi* ti corona Malcam* ñi lonco meu. Ngüneduami ti corona fanei 34 kilo* oro,* ca nierquei falinque cura, ca tuculelngei David tañi lonco mu. Cafei yetui rume fentren fillem mülelu ti huaria mu. 3 Ca entufi tati pu che mülelu huaria mu, fei ñi cüdahual engün tañi catrücayafiel cura, cüdahual toqui meu ca caquelu yungechi pañillhue.* Femngechi David femfi com pu Ammón che ñi huaria. Af meu David ca com pu hueichafe huiñotuingün Jerusalén huaria mu.

4 Rupalu tüfa, pu Israel che hueichafi pu Filistea che Guézer huaria mu. Feichi mu Sibecái, ti Husá che, langümfi ta Sipái, tüfa pu refaím che meu tuhui. Fei pu Filistea che hueungei.

5 Pu Israel che ca huiño hueichafingün pu Filistea che. Fei Jaír ñi fotüm Elhanán pingelu, langümfi ta Lahmí, tüfa Goliat ñi peñi, ti Gat huentru. Tüfa nierquei quiñe huaiqui* ca cülou reque trüri ti mamüll cheu ñi nüngequen tañi huaiqui.

6 Ca mületui hueichan Gat huaria mu. Tiye mu mülefui quiñe alüpürachi huentru. Quisuque ñi cuhu mu niefui 6 changüll ca quisuque ñi namun mu niefui 6 changüll, nierquei 24 changüll. Tüfachi huentru ca tuhurquei pu refaím che mu. 7 Fente ñi ayentufiel pu Israel che, Jonatán langümeyu. Jonatán chauyefi ta Simeá, tüfa David ñi peñi.

8 Tüfachi huentru tuhuingün pu refaím che mülelu Gat huaria mu, fei David ca ñi pu cüdaufe langümeyu engün.