Filemón
1 Iñche ta Pablo, presulen tañi feyentufiel ta Cristo Jesús. Tayu peñi Timoteo iñchiu müleyu. Fei poyen compañ Filemón, huirintucueyu tüfachi carta. 2 Ca huirintuculelfiñ taiñ lamngen Apfia ca Arquipo, tüfa Cristo tañi soltaungei iñchiñ reque. Ca huirintuculelfiñ com pu trahuluuquelu eimi tami ruca meu.
3 Llellipuqueiñ tamün rume cutranpiuqueyeaeteu ca tamün eluaeteu cüme felen taiñ Chau Ngünechen ca taiñ Ñidol Jesucristo.
4 Peñi Filemón, iñche llellipun mu tuculpaqueyu.* Feimu rumel mañumniefiñ ta Chau Ngünechen. 5 Iñche quimniequen tami feyentulen ca tami piuqueyefiel taiñ Ñidol Jesús ca Chau Ngünechen ñi pu che.* 6 Eimi ca tami pu chafche* feyentuquelu quiñeucüleimün feyentun mu. Feimu llellipuquen tami quelluaeteu tüfachi feyentun, femngechi ngüneduamaimi com cümeque dungu taiñ llohun Cristo meu. 7 Peñi Filemón, eimi yafültucuñmafimi ñi piuque taiñ Chau Ngünechen ñi pu che.* Quimün tami piuqueyefiel pu peñi ca pu lamngen. Tüfa rume ayühueleneu ca cüme duameleneu.
8 Cristo tañi apostol cai ta iñche,* ngencülen tami huercüafiel ñi femal nor dungu. 9 Huelu iñche Pablo, quimnien tami piuqueyechen, feimu llellipumequeyu, füchalelu cai iñche ca presulen tañi feyentun ta Cristo Jesús meu. 10 Llellipumequeyu tami füreneafiel tañi fotüm Onésimo, chauyerpueneu ta iñche tañi carcelconcülen mu. 11 Cuifi cüme esclavongelafui, huelu feula quelluayumu ta iñchiu. 12 Feula huiñoleltuayu ta Onésimo, iñche tañi piuqueyenieel.
13 Quimeltuchequen ti cümeque dungu, feimu presulen. Fei ayüfun ta Onésimo ñi mülecayal, femngechi quelluafeneu chumngechi eimi quelluafen iñche. 14 Huelu pinolmi, chem no rume femlayan. Femngechi femlayaimi tüfachi cüme dungu tami obligaeteu,* huelu eimi quisu tami pin mu femaimi. 15 Tüfachi dungu meu peno Onésimo pichiñma hudatripatueimu: tamu huiño mületual rumel meu, 16 tami esclavongen müten no, huelu mai quiñe poyen peñi reque troquinietuafimi. Tüfa ta doi fali. Iñche rume piuqueyefiñ, eimi doi piuqueyeafimi, tami esclavongelu cai ca trür feyentuquelu Jesús meu. 17 Feimu, hueni troquieli, cüme llohuafimi ta Onésimo iñche tami lloumequefiel reque. 18 Doi mai, huesalcaelmu cam defenieelmu, iñche culliayu. 19 Iñche Pablo, huirintucueyu tüfachi carta ca feipicünueyu: culliayu Onésimo ñi defen. Huelu eimi cüme quimnieimi, defenieen tami mongen. 20 Felei peñi, füreneen tüfachi dungu mu, iñchiu inaniequefilu cai ta Ñidol. Cristo ñi duam meu cüme duamelen tañi piuque.
21 Rüf maneluucülen tami femal tüfa. Quimnien tami doi femürpual iñche tañi feipin mu. Feimu huirintucueyu tüfachi carta. 22 Fente tamün llellipuquen, neicümngetuafun, femngechi tamün pemeafiel. Feimu pepicange cheu tañi mülenagal iñche.
23 Epafras, tañi compañ presulelu ñi feyentufiel ta Cristo Jesús, lemoria* pieimu. 24 Cafei tañi pu compañ Marcos, Aristarco, Demas ca Lucas, lemoria pieimu.
25 Ayüfun tamün rume cutranpiuqueyeaeteu taiñ Ñidol Jesucristo, cüme duam nielu cai eimün.