Isaías
29 “¡Ahuem, Ariel,* Ariel! ¡Tati huaria cheu ñi elcünun David tañi tolto ruca!*
Fillque tripantu
femngepe ti fillque fiesta.
2 Huelu eluhuan ñi cutrantupiuquelafiel ta Ariel,
müleai layeluhun ca hueñancün,
ca ti altar ñi cütralhue reque troquinieafiñ.
3 Huall püle cheu tami mülen elcünuan tañi tolto ruca tami quehuayafiel,
malaltucuayu yungechi mamüll mu,
ca huelurentrücünuafiñ mapu tami malocontuafiel.
4 Illamcangeaimi, ütrüfnacümngeaimi mapu mu,
üye mu dunguaimi,
ti trufür catrütuaimu tami dungual.
Tami dungun mapu mu tripayai,
quiñe che reque ramtuquefilu pu la.
Cafcülen mu* tripayai tami feipin trufür mu.
5 Fentren-ngeingün tami pu caiñe,* huelu trufürngetuaingün reque.
Fentren-ngeingün pu huesalcachequelu, huelu müpütripachi pinungetuaingün reque.*
Matu müten ruparumeai tüfa.
6 Chau Jehová Ñidolcülelu pu hueichafe mu* lifrenentuaimu.
Femle, müleai tralcan, fütraque nüyün, fütraque trünün,
fütraque cürüftucu mahun ca üicülechi fütra cütral”.
7 Fentren troquiñche quehuamequefi ta Ariel.
Alüpürachi ruca reque hualloñmamequefi* tañi malocontuafiel,
ca mülei che huesalcamequefilu.
Com pu quehuamequefilu ta Ariel,
quiñe peuma reque feleai pun meu.
8 Felei, quiñe ngüñülechi che reque feleafui, peumai tañi imequen,
huelu nepelu petu ngüñülei.
Cam quiñe huihulechi che reque feleafui, peuma meu pütocomequei,
huelu nepelu ürcülei ca huihulei.
Ca femngechi reque rupayaingün com pu troquiñche
ñi quehuamequefiel Sion huincul.
9 Afmatulehueaimün, nengümuulayaimün,
umercünuafimün tamün nge, femngechi tamün penoal.
Fei engün ngollileingün, huelu pulcu ñi duam mu no,
Cülülen trecaleingün, huelu feiti chem ngollilcachequelu ñi duam mu no.
10 Eimün pu huerquen, fütra umahuleimünmeu Chau Jehová,
umercünuñmaeimünmeu tamün nge.
Ca eimün, pu huentru pequefilu afmatun dungu, tacueimünmeu tamün lonco.
11 Com ti afmatun dungu tamün pefiel quiñe racümcülechi lifru reque* feleai eimün mu. Elufilmün quiñe che quim papeltulu, feipiafimün: “Nehuentu papeltuaimi, füreneen”. Huelu quisu feipiai: “Femlayafun, racümcülei tati”. 12 Ca elufilmün ti lifru quiñe che quim papeltunolu, feipiafimün: “Papeltufinge, füreneen”. Huelu quisu huiñoldunguai:* “Quim papeltulan”.
13 Chau Jehová feipi: “Tüfachi troquiñche feipiquei tañi fülmanieteu
ca püramyenieneu re hun meu müten,
huelu tañi piuque engün alü camapulei iñche mu.
Yamnieneu engün,* huelu re inaqueingün fillque huercün dungu ñi quimeltuqueel pu huentru.
14 Iñche afmatulafiñ tüfachi troquiñche,
fillque afmatun dungu feman.
Tañi pu quimche engün quimün niehuelayaingün.
Tañi pu manelfalngechi huentru ñi adümuhun ngehuelayai”.
15 ¡Aungeai tati pu che cüpa ellcacünumequefilu* ñi femal* Chau Jehová ñi adquiñ meu!
Dumiñ mu femqueingün tañi ayüqueel,
feipiqueingün: “¿Inei am peafeiñmu?
¿Inei am quimniei taiñ femmequen?”.
16 ¡Fente hueluraquiduamnieimün!*
Ti cüdauquelu rag mu,* ¿trürngepei mai feitichi fotra mu?
Tati deumangelu, ¿feipipeafui mai tañi deumaeteu mu
“Quisu deumalaeneu”?
Tati metahue, ¿feipipeafui mai tañi deumaeteu mu
“Quisu chem rume quimlai”?
17 Pichiñma mu tati Líbano quiñe tucucancünuhuai,
ca ti tucucan mahuidantu troquingetuai.
18 Feichi antü mu pu pilungelu allcütuaingün ñi feipin ti lifru,
pu trauma pelotuaingün lifrecünungelu ti dumiñ mu.
19 Pu ñomngechi che rume ayühuaingün Chau Jehová ñi duam meu,
pu fillalelu rume ayühuaingün Israel tañi Lifngechi Ngünechen ñi duam mu.
20 Pu huesalcachequelu ngehuelayaingün,
pu mallma piuquengelu afai,
com pu rumel pepicaucülelu ñi huesalcacheal apümcangeaingün.
21 Cafei apümcangeaingün pu coila dungu mu culpantucuchequelu,
com pu ngünencamequefilu tati pu che incañpemequefilu tañi dungu tati huaria ñi puerta mu,
ca pu coilaque dungu feipiquelu ñi cüme juzgangenoal ti nor che.
22 Feimu Chau Jehová, montulfilu ta Abrahán, feipifi ta Jacob ñi pu cüpanche:
“Jacob yehuehuelayai,
ca tañi ange pengelcünulayai tañi yehuelen.
23 Iñche ñi cuhu mu deumafiñ Jacob tañi pu yall.*
Fei Jacob pefile engün ñi hualloñmanieteu,
tüfa engün eluhuaingün ñi püramyeafiel iñche tañi üi.
Felei, püramyeafingün Jacob ñi Lifngechi Ngünechen,
yamnieafingün Israel ñi Ngünechen.
24 Pu hueluraquiduamcülelu nierpuaingün quimün,
pu huesa dungumequelu eluhuaingün ñi quimeltungeal”.