Isaías
22 Tüfachi juician dungu feipicünulelngei tati laf mapu cheu ñi pengelngequen afmatun dungu:*
¿Chumimün am? ¿Chumngelu* com eimün püraimün huente ruca mu?
2 Tami huaria mu mülequefui fentren pofolcahun.
Huaqueñcülequefui tati pu che ca rume mallmauquefui.
Tami pu la langümngelaingün fütra cuchillo mu
ca lalaingün hueichan meu.*
3 Com tami pu huesaque ngünenielu quiñentrür lefmahuingün.
Huelu presungerqueingün fei ñi pünengenon rume arco.
Inei rume perumengelu, presuyengerqueingün
camapu lefmaulu rume.
4 Feimu feipin: “Lelimuquilchi, cañpüle adquintumün.
Fütra ngümacahuan.
Calli, yafültucumuquilchi
tañi pu che ñi apümcangen meu.
5 Feichi antü tati laf mapu mu cheu ñi pengelngequen afmatun dungu
pu che quimlayai ñi chumal, müleai apümcahun dungu ca llican dungu
tati Doi Fütra Ñidol Jehová ñi duam mu, ti Ñidolcülelu pu hueichafe mu.
Ti fütra cura malal* teifücamequengei
ca huirarelmequengei ti fütra huincul.
6 Elam nüniefi tañi pu flecha,
compañnieyu pu huentru püralelu carretela mu* ca pu cahuellutun.
Quir pepicaniefi ti escudo.
7 Tami doi cümeque laf mapu
apoleai hueichan carretela mu,
tati pu cahuellutun müleaingün cheu ñi elcünungeel inafül puerta mu.
8 Entungeai ti cura malal cuñiutucuquefilu ta Judá.
Feichi antü maneluhuaimi tati hueichahue mu mülelu Mahuidantu Ruca pingelu. 9 Fei peaimün ñi triralen fill püle ti cura malal David ñi Huaria mu. Fei lloutuafimün ti co cheu ñi ngülümngequen nageltu mu. 10 Raquirucayaimün Jerusalén mu, fei teifücayafimün ñi cüme elcünutuafiel ti fütra cura malal. 11 Rangiñ ti 2 cura malal mu deumayaimün cheu ñi ngülümngeal ti co mülefulu ti cuifi ngülümcopeyüm mu. Huelu maneluulayaimün ti Fütra Chau Dios mu ñi femün tüfa ca raquiduamtuculayafimün inei ñi elcünuel tüfa fütra cuifi.
12 Feichi antü tati Doi Fütra Ñidol, Chau Jehová Ñidolcülelu pu hueichafe mu,
feipiaimünmeu tamün ngümacahual ca hueñancüleal,
cafei ñi cupiluhual com tamün lonco ca tamün tucutuhual sacu tacun mu.
13 Huelu fiestamequeimün ca cüme rupaleimün,
langümqueimün huaca ca ufisa,
ilotumequeimün ca putumequeimün.*
Feipiaimün: ‘Iyaiñ ca putuaiñ müten, hule cai larquealu ta iñchiñ’”.
14 Tüfa quimeleleneu Chau Jehová Ñidolcülelu pu hueichafe mu: “‘Deu lalmün, rulpacünuñmangeaimün tamün culpan’* feipi tati Doi Fütra Ñidol, Chau Jehová Ñidolcülelu pu hueichafe mu”.
15 Tüfa feipi tati Doi Fütra Ñidol, Chau Jehová Ñidolcülelu pu hueichafe mu: “Pemefinge feichi huentru autoridadcülelu, Sebná, quisu adniefi tati lonco ülmen ñi ruca. Feipifinge: 16 ‘¿Chem am ta nieimi tüfa mu? ¿Inei am ta niefimi tüfa mu? ¿Chumngelu am* deumamequeimi tami eltun tüfa meu?’. Quisu quiñe alüpüralechi mülehue mu deumamequei tañi eltun, quiñe fütra cura mu deumamequei cheu ñi rüngaltucungeal. 17 Ca feipifinge: ‘¡Tüfei! Chau Jehová nehuentu nüaimu ca ütrüfnacümaimu illculen mu’.* 18 Rüfcünu cüme moncolcünuaimu quiñe füngüll reque.* Fei ütrüfentuaimu quiñe fütra lelfün mu. Üyeu layaimi, fei afai tami afmatufalchi carretela. Yehuen dungungeai tami ñidol ñi pu che mu. 19 Iñche entuayu cheu tami elcünungeel ca müntuñmayayu tami cüdau.
20 Feichi antü mütrümafiñ tañi cüdaufe Eliaquim, Hilquías ñi fotüm. 21 Fei tuculelafiñ tami tacun ca cüme trarintuculelafiñ ti trarihue tami yenieel. Eluafiñ tami nieelchi autoridad. Fei quiñe chaungeai reque pu Jerusalén che mu ca pu Judá che meu. 22 Elfalcünulelafiñ ti llafe ñi nieel pu lonco ülmen David mu cüpalu.* Quisu ñi nülacünufiel, inei no rume racümtuculayafi.* Quisu ñi racümtucufiel, inei no rume nülanentulayafi. 23 Clafantucuafiñ quiñe clafu reque cheu ñi mücüfcüleal. Quiñe ülmen huancungeai reque ñi püramyengeal tañi chau ñi pu che. 24 Clafu mu pültrülequei pichique posillu, fütraque posillu ca fütraque metahue. Ca femngechi Eliaquim mu pültrüleai reque ñi afmatufalngen tañi chau ñi pu che ca com pu cüpanche.
25 Chau Jehová Ñidolcülelu pu hueichafe mu feipi: ‘Feichi antü ti clafu ñi cüme mücüfcünungeel entungeai, catrüngeai, fei trananagai. Tati pültrülelu fei mu trafocahuai, femngechi feipilu cai Chau Jehová’”.