Isaías
45 Iñche, Chau Jehová, dullifiñ ta Ciro.
Nünieñmafiñ tañi man cuhu,
ñi ngünenieafiel troquiñche quisu tañi adquiñ mu,
ñi müntuñmayafiel* ñi hueichahue* pu lonco ülmen,*
ñi nülanentuafiel tañi adquiñ mu conhue nielu epu rume nüucülechi puerta,
femngechi ñi racümcülenoal* ti huaria ñi conhue.
Tüfa tañi feipifiel:
2 “Iñche hunelean eimi mu,
Fei lafcünuafiñ pu huincul.
Trafocayafiñ ti cobre puerta
ca triracayafiñ ti tranca pañillhuengelu.*
3 Eluayu ti falinque fillem dumiñ mu mülelu
ca ti falinque fillem ellcalelu* cheu ñi pengenoal.
Femngechi quimaimi iñche ta Jehová, Israel ñi Chau Ngünechen.
Tami üi mu mütrümmequeyu.*
4 Jacob iñche ñi cüdaufe, Israel iñche ñi dullifiel.
Fei ñi duam mu mütrümmequeyu tami üi meu.
Quimquelaen rume, huelu eluayu quiñe yamfal üi.*
5 Iñche ta Chau Jehová, mülelai cangelu.
Ngelai cangelu Dios, iñche müten.
Quimquelaen rume, huelu eluayu nehuen.
6 Femngechi com pu che mülelu tripahue antü püle
ca conhue antü püle
quimai ñi mülenon cangelu Dios, iñche müten.
Iñche ta Jehová, ngelai cangelu.
7 Iñche deumafiñ pelon ca dumiñ,
cüpalquen tüngün* ca cutrancahun.
Iñche, Jehová, femquen com tüfachi dungu.
8 Eimi huenu, nacümfinge mahun.
Tromü mu mahunnagpe nor dungu.
Ti mapu lloupe mahun, hulpe montuluhun,
ca huefpe nor dungu.
Iñche, Chau Jehová, femcünun ñi rupayal tüfa”.
9 ¡Aungeai tati chaftudunguniefilu* tañi deumaeteu!
Pichin triran afümngechi fotra cai tati*
mapu müleyechi triran meu.
Ti fotra, ¿“chummequeimi” pipeafui mai tati cüdauquefilu ti fotra?*
Tami deumafiel, ¿feipipeafeimu “nielaimi cuhu”?
10 ¡Aungeai feiti feipiquefilu tañi chau “¿Chumngelu am* fotümyeen?”,
ca feiti feipiquefilu ñi ñuque “¿Chumngelu am choyüen?”!
11 Tüfa ñi feipin Chau Jehová, tati deumafilu ta Israel, quisu ñi Lifngechi Ngünechen:
“¿Rüfcünu llemai ramtucadungumuan cüpalechi dungu meu?
¿Feipimuan chem ñi femafiel tañi pu yall ca ñi deumael tañi cuhu meu?
12 Iñche deumafiñ ti mapu ca tati pu che ñi mülen fei mu.
13 Chau Jehová Ñidolcülelu pu hueichafe mu feipi:
“Tañi norngen mu pepicafiñ quiñe huentru,
norümcünuñmayafiñ com tañi rüpü.
Quisu deumayai iñche tañi huaria,
lifrecünuafi tañi pu che cañpüle yengetulu, cullingelayai ca ellca lloulayai cullitu”.
14 Tüfa ñi feipin Chau Jehová:
“Cüpayai eimi mu pu Egipto che ñi huehuel,* ca chem ñi fendequeel* pu Etiopía che ca ti alüpürachi che Sebá mu tuulu,
fei ngen-ngeaimi fei engün meu.
Trarileaingün cadena mu, fei inaleaingün eimi mu.
Cüpayaingün, pochongnagaingün* tami adquiñ meu.
Fei llellipulen mu feipiaimu: ‘Quimfali Chau Dios ñi mülen eimi mu,
ngelai cangelu Dios, quiñe no rume’”.
15 Ahuem, Israel ñi Chau Ngünechen, tati Montulchequelu.
Eimi, Chau Dios, quimfalcünuquelaimi com tami femqueel.
16 Com tati pu che yehuelcangeaingün ca illamcangeaingün,
pu deumaquefilu adentun* yehuenquechi amutuaingün.
17 Huelu Chau Jehová montulafi pu Israel che rumel mu.
Eimün chumcaunorume yehuelcangelayaimün ca illamcangelayaimün.
18 Chau Jehová, tati deumafilu ti huenu,
ti rüfngechi Ngünechen,
deumafi ti mapu ca cüme anümcünufi, ngünam deumalafi,*
huelu mai deumafi ñi müleal tati pu che.
Tüfa ñi feipin:
“Iñche ta Chau Jehová, ngelai cangelu.
19 Dungulan quiñe ellcalechi mülehue mu, quiñe dumiñcülechi mapu meu.
Feipilafiñ Jacob tañi cüpanche:
‘Ngünam* quintumuchi’.
Iñche ta Chau Jehová, tati feipiquelu chem ñi norngen ca tati huldunguquelu chem ñi rüfngen.
20 Trahuluumün ca cüpamün.
Eimün pu lefmaumequelu fillque troquiñche meu, quiñentrür fülconpamün.*
Chem no rume quimlaingün pu yenielu fillque adentun,
pu ngillatuquefilu quiñe dios ñi pepi montulquenoeteu.
21 Entudungumün* ca quimfalcünuafimün.
Hueluquentu ramtuupe engün.
¿Inei am fütra cuifi feipicünui ca huldungucünui tüfa?
¿Iñche no am, Chau Jehová?
Ngelai cangelu Dios, iñche müten,
quiñe Dios norngelu ca montulchequelu.
Ngelai cangelu, iñche müten.
22 Eimün, pu mülelu cheu ñi afpun ti mapu,
cüpamün iñche meu, fei montuaimün.
Iñche ta Chau Dios, ngelai cangelu.
23 Iñche tañi Ngünechen ngen mu eldungucünun.
Chem ñi feipin tañi hun mu rüfngei,
mupitripayai llemai:
com che lucutunagai tañi adquiñ meu,
ca eldungucünuaingün tañi püntütripanoal* iñche meu.
24 Fei feipiaingün: ‘Chau Jehová rumel nor dungu femquei ca nehuen-ngei.
Com tañi pu illcutunieteu* yehuenquechi müleaingün tañi adquiñ meu.
25 Jehová ñi duam mu quimfalcünungeai ñi cüme femün Israel tañi pu cüpanche,
fei quisu ñi duam meu, mallmaucülen mu dunguaingün’”.