Miqueas
2 “¡Aungeai tati pu pepicauquelu ñi huesalcayal
ca tati pu raquiduamquelu ñi cahuitu mu chumngechi ñi huesa femal!
Hunlu müten femqueingün tañi raquiduamqueel
pepi femquelu engün cai tati.
2 Ayüniefingün lelfün, fei ngencauqueingün müten.
Ayüniefingün quiñe ruca, fei nüquefingün müten.
Ngünencan dungu mu müntuñmaquefingün* quiñe huentru ñi ruca
ca müntuñmaquefingün ñi mapu quiñe huentru.
3 Feimu llemai tüfa ñi feipin Chau Jehová:
‘Raquiduamcülen ñi cüpalelafiel tüfachi pu che cutrancahun, montulayaimün.
Femngechi mallma piuquengehuelayaimün cüpayalu cai cutrancahun.
4 Feichi mu pu che nütramyeaimünmeu.
Cutrantupiuqueleaingün, aungeiñ piaingün eimün tamün duam meu.
Fei feipiaingün: “¡Rume huesalcaleiñ!
Quisu müntuñmaeiñmeu taiñ mapu, fei elufi caquelu che.
Elufi quiñe troquiñche tañi poyenienoeteu”.
5 Fei inei no rume ünifcünulayafi* ti llasu ñi medial.
Ca mülelayai inei no rume ñi hudamafiel ti mapu Chau Jehová ñi trahunche mu.
6 “Fentecünumün tamün huldungun” piqueingün.
“Ngelai ñi huldungungeal tüfachi dungu.
Illamcangelayaiñ tati”.
7 Ahuem, Jacob ñi pu cüpanche, pu che feipiyahuingün:
“¿Afeluupei mai Chau Jehová?
¿Tüfa tañi femquen am chi?” piqueingün.
¿Quimlaimün am iñche ñi cümelcayafiel pu nor femquelu?
8 Huelu tañi pu che caiñe reque chaftumequeneu.
Maneluucülen rupaquei che hueichafe reque* huiñomequelu hueichan meu.
Huelu eimün entuñmaquefimün müten tañi falinque fillem ñi nieel tañi tacun mu.
9 Eimün quechanentuquefimün tañi cümeque ruca mu pu domo iñche tañi troquiñche mu.
Cümeque dungu elufiñ tañi pu püñeñ engün, huelu eimün müntuñmaquefimün.
10 Huitrapüramün, amutumün, tüfa mu ngelai tamün ürcütual.
Lifngenon mu mülei apümcahun, felei, rume huesa apümcahun.
11 Quiñe huentru ngünamquiyahuafui chi, ngünencacheafui, tüfachi coila dungu feipimequeafui chi:
“Rume nieaimün pulcu ca ngollilcachequelu”.
Fei tüfa queta Chau Dios ñi huerquen feipifemaimün.
12 Ahuem, Jacob, rüfcünu trahuluhuaiñ com eimün.
Felei llemai, trahulafiñ pu mülehuelu Israel mu.
13 Tati deumaquelu ti rüpü huneleai quisu engün meu.
Fei quisu engün lifretripayaingün, rumeaingün puerta püle, fei tripayaingün.
Ñi lonco ülmen rupayai tañi adquiñ püle,
Chau Jehová adnieafi engün”.