Isaías
54 Chau Jehová feipi: “Eimi, domo nienolu püñeñ, ayühun mu huirarnge.
Eimi, domo turpu cutrancaunolu püñeñün mu, ayüunge, ayühunquechi huirarnge.
Ti quisucünungeelchi domo doi fentren püñeñ nieai tati fütangelu mu”.
2 “Doi alürupacünufinge tami tolto ruca.*
Ünifcünufinge* ti pañu tacuniefilu tami afmatufal tolto ruca.
Catrütuuquilnge tami femal, doi alücünufinge ti llasu tami tolto ruca mu
ca cüme elcünufinge tañi fillque estaca.
3 Tami mapu doi üye püle puhuai man püle ca huele püle.
Tami cüpanche ngünenieafi troquiñche
ca müleputuai huellilechi huaria mu.
4 Llicaquilnge, yehuelcangelayaimi.
Illamcangelu troquiuquilnge, chem tami maneluuquen huechutripayai.
Ngoimanentuafimi* yehuen dungu tami rupan üllchangen mu.
Ca loncontucuhuelayaimi cutrancahun tami rupan tami lantu domongen mu.
5 Fütra Chau Dios tami deumaeteu tami füta reque felei.
Jehová Ñidolcülelu pu hueichafe mu* pingei.
Israel ñi Lifngechi Ngünechen ngillanentueimu.
Tati Dios ngelu com mapu mu pingeai.
6 Chau Jehová mütrümeimu,* fei quiñe quisucünungeelchi domo reque felefuimi, rume hueñancülelu niehuenon mu füta.
Quiñe üllcha domo reque felefuimi ñi illamcaeteu tañi füta” pi tami Chau Dios.
7 “Pichiñma mu quisucünueyu,
huelu tañi fütra cutranpiuqueyechen mu huiño cüpaltuayu.
8 Rume illculefun,* feimu pichiñma mu ellcacünun* tañi ange eimi mu.
Huelu tañi piuqueyechen mu* turpu afquenolu cutranpiuqueyeayu” pi Chau Jehová, tami ngillanentueteu.
9 “Iñche mu tüfachi dungu trürümngei Noé ñi antü reque.
Feichi mu feipicünun nga ñi tacuhuenoafiel ti mapu co mu.
Feimu feula ca feipicünuayu illcutuhuelayayu ca cutrancalayayu.
10 Ñamrumetule ti mahuida
ca nengümcangele rume ti huincul,
turpu aflayai iñche tami rume piuqueyefiel.*
Eldungucünun tami füreneafiel, fei tañi eldungu nengümcangelayai reque” pi Chau Jehová, tami cutranpiuqueyeteu.
11 “Ahuem, eimi, domo, cutrancaumequeimi cürüftucu mahun mu ca yafültucungelaimi.
Pünantucuafiñ tami cura cemento engu,
safiro cura mu deumayan cheu tami anücünungeal.
12 Huechuñ tami nehuen-ngechi cura malal deumayafiñ rubi cura mu.
Huilüfcülechi cura mu deumayan tami puerta.
Cüme adngechi cura mu deumayan com ti fütraque cura malal huallpalelu eimi mu.
13 Chau Jehová quimeltuafi com tami pu püñeñ
ca rume tüngcüleaingün.*
14 Nor dungu mu anücünungeaimi.
Inei no rume ahucalayaimu.
Chem no rume llicalcalayaimu, pellquelayaimi chem mu no rume,
chem llicanca dungu rume puñmalayaimu.
15 Chem che rume hueichaelmu,
iñche huercülafiñ tati.
Inei rume hueichaelmu, hueulayai tati”.
16 “Iñche deumafiñ ti huentru cüdauquelu pañillhue mu.*
Quisu pimuquei üicülechi ailen mu
ca tañi cüdau mu deumaquei hueichahue.
Iñche deumacünufiñ ti huentru apümcaquelu tañi hueichahue mu.
17 Chem hueichahue rume deumangele tami huesalcayaeteu, chumlayaimu rume.
Chem che rume dalluntucuelmu juicio mu, quimfalcünuaimi ñi coilatumequen engün.
Tüfachi cümeque dungu llohuai Chau Jehová tañi pu cüdaufe.
Nor che troquiniefiñ engün” pi Chau Jehová.