Isaías
53 ¿Inei am feyentui taiñ huercün dungu mu?*
Ca, ¿inei am pengelcünulelngei Chau Jehová ñi lipang?
2 Quisu* ñi adquiñ mu tati cüdaufe huefpayai quiñe pichi rou reque,* quiñe folil reque ancülechi mapu mu.
Quiñe ülmen che reque felelai, afmatufal-lai rume.
Taiñ pefiel mu, ayüfal-lai tañi ad.
3 Pu che illamcaeyu ca quiñepülecünueyu.
Quisu quimafui ti cutrancahun ca ti cutran.
Tañi ange ellcalefui reque* iñchiñ mu.*
Illamcangei, falinolu troquifiyiñ.
4 Rüfcünu quisu yefi taiñ fillque cutran
ca meñcu yefi taiñ cutrancahun.
Chau Dios castigaeyu, hulelcaeyu ca cutrancaeyu feipiyiñ taiñ raquiduam mu.
5 Huelu allfülcangei iñchiñ taiñ culpan mu,*
trañmacangei taiñ huelulcan mu.
Cutrancangei iñchiñ taiñ tüngcüleal.*
Quisu tañi allfen mu, iñchiñ tremolngetuiñ.*
6 Com iñchiñ ufisa reque ñamquiyauquefuiñ,
caque quiñeque inai tañi rüpü.
Chau Jehová elcünui taiñ fillque huelulcan quisu mu.
7 Cutrancangei ca eluhui ñi hulelcangeal,
huelu chem pilai rume.
Yengei quiñe ufisa reque ñi langümngeal.
Quisu chem pilai rume
ufisa reque memequenolu tañi quediñngeal.
8 Nor juiciantucungelai,* fei yengei.
¿Inei am ayüafui ñi cüme quimal chumngechi mongen ñi yeniequen?
Cheu ñi mülen pu mongelelu entungei ñi apümngeal.
Iñche tañi troquiñche ñi culpan mu* langümngei.
9 Adcünungefui ñi rüngaltucungeal pu huesaque che engün.
Huelu lalu rüngaltucungei pu ülmenque che engün.
Quisu turpu huesa femlafui
ca ngünencadungulai rume.
10 Huelu Chau Jehová, tañi pin mu, cutrancafi, ca elufi ñi cutranal.
Eimi, Chau Dios, hulcünufilmi tañi mongen chalintucun reque* huelulcan mu,
fei peai tañi cüpanche ca alüñma mongeleai.
Quisu ñi duam mu femtripayai Chau Jehová ñi ayünieel.
11 Fente ñi cutrancahun peai ñi femün, fei ayüucüleai.
Tañi cüdaufe, feiti nor chengelu, quisu tañi quimürpuel mu*
femcünuai fentren che ñi nor troquingeal.
Fei yenieñmayafi tañi huelulcan engün fanechi chemcün reque.*
12 Feimu llemai eluafiñ ñi coneltual chem ñi elungeal fentren che.
Chem ñi müntuñmangeel* pu caiñe, quisu hudamafi pu nehuen-ngelu engün.
Hulcünui ñi mongen,
culpafe* troquingei.
Yefi fentren che ñi culpan,
ca rangiñelhueletui pu culpafe mu.