Miqueas
6 Fürenemuchi, allcütumün Chau Jehová ñi feipin.
Huitrapüramün, pu mahuida ñi adquiñ mu entudungumün* tamün juician dungu.
Ti pu huincul allcütupe tamün dungun.
2 Ahuem, pu mahuida, allcütufimün Chau Jehová ñi juician dungu.
Ca femngechi femaimün, eimün pu nehuen-ngechi cura mapu meu.
Chau Jehová juician dungu nielelfi tañi pu che.
Dalluntucuafi ta Israel:
3 “Saquin troquiñche, ¿chumeyu am?
¿Chumngechi ürcülpeyu am?
Entudungunge tati.
4 Iñche entueyu Egipto mapu mu,
iñche montuleyu cheu tami esclavoyengefel.
Huercüfiñ ñi huneleal eimi mu ta Moisés, Aarón ca Míriam.
5 Saquin troquiñche, füreneen, ngoimalayaimi* chem ñi feipicünuel Balac, Moab ñi lonco ülmen,
ca chem ñi huiñoldunguleteu* Balaam, Beor ñi fotüm.
Ngoimalayaimi chem ñi rupan Sitim ca Guilgal mapu mu,
femngechi quimaimi Chau Jehová ñi nor femquen”.
6 ¿Chem yelelafiñ ta Chau Jehová?
Chau Dios alüpüralei, fei amuli ñi pochongnagal* tañi adquiñ mu, ¿chem yelelafiñ?
¿Yelelafiñ lüpümngeelchi chalintucun?*
¿Pichi culliñ quiñe tripantu nielu müten?
7 Chau Jehová, ¿ayüucülepeafui mai ñi elungeal rume fentrenque caniru*
ca rume fentren aceite?
¿Hulpeafun mai tañi hunen fotüm iñche tañi huesaque femün meu?
¿Hulpeafun mai tañi fotüm iñche tañi culpan meu?*
8 Chau Jehová feipieimu chem tañi cümen.
Fei, ¿chem ayülei tami femal?*
Tüfa müten: nor dungu femaimi,* piuqueyechefengeaimi*
ca ñom piuquengeaimi tami Chau Dios ñi adquiñ mu.
Ngüneduamfimün ti cutrancahun ñi cüpalen ca inei ñi femcünufiel.
10 Pu huesaque che nor femlaingün ñi nieal falinque fillem.
¿Petu mülepei mai feichi fillem tañi ruca mu engün?
¿Petu mülepei mai ti cajon nor fanefanetuquenolu* Chau Dios ñi üdequefiel?
11 ¿Lif che troquingeafun nieli quiñe romana nor fanefanetuquenolu
cam nieli quiñe cura pesa tañi ngünencacheal?
12 Pu ülmenque huentru huaria mu rume quehuafe chengeingün.
Tati pu che coilatuqueingün
ca ngünencachequeingün.
13 “Feimu llemai hulelcayayu allfülehuelmi hula.
Femcünuayu tami quisucünungeal tami culpan mu.*
14 Iyaimi, huelu tuduamlayaimi.
Ngüñülehueaimi.
Chem rume entulmi, yeñmutulayaimi tami nieafiel.
Huelu yeñmutucafulmi rume, eluafiñ tami pu caiñe.
15 Nganaimi, huelu püramlayaimi.*
Pünoafimi aceituna, huelu pünelayafimi ti aceite.
Pünoafimi ofad, huelu putulayaimi* ti pulcu.
16 Eimün inaniefimün Omrí ñi huercün dungu, fillque huimtun ñi nieel Acab ñi pu cüpanche.
Ca inanieñmafimün tañi ngülam.
Feimu cutrancayayu. Rume huesalcayayu, feimu pu che pellquelehueai.*
Ca tati pu huaria che femcünuafiñ ñi ayentungeal.
Pu troquiñche illamcayaimünmeu, huelu eimün eluhuaimün müten”.