Isaías
55 Com eimün pu huihulelu, ¡cüpamün! ¡Pütocopamün!
Eimün pu nienolu plata, ¡cüpamün, tüfa tamün iyael!
Felei, cüpamün, nienolmün rume ta plata, yepamün pulcu ca lichi, cullilayaimün chem no rume.
2 ¿Chumngelu* cullimequeimün tamün nieal rüfngenochi iyael?
¿Chumngelu hulqueimün tamün plata tamün huedanoal?
Cüme allcütumuchi, fei iyaimün cümeque iyael
ca ayühuelaimünmeu ti doi cümeque iyael.
3 Ngüneduamcülemün, cüpamün iñche mu.
Allcütumün, fei mongeleaimün.
Feipicünufiñ ta David tañi rume piuqueyeafiel.*
Fei ca eldungucünuleluhuaiñ ta eimün. Tüfachi eldungu rumel müleai ca manelfalngei.
4 Elcünufiñ ñi huldungulelafiel fillque troquiñche.
Ñidolcünufiñ ca loncocünufiñ pu troquiñche mu.
5 Mütrümafimi* quiñe troquiñche tami quimnofiel.*
Fei quiñe troquiñche tami quimnoeteu lefcülen cüpayai eimi mu
tami Chau Dios Jehová ñi duam mu, Israel ñi Lifngechi Ngünechen.
Quisu ta püramyeaimu.
6 Quintufimün ta Chau Jehová petu ñi pefalngen.
Mütrümfimün petu ñi fülcülen.*
7 Ti huesa che famtripape tañi huesa rüpü mu,
ca ti huesaque dungu femquelu fentecünupe ñi huesaque raquiduam.
Huiñotupe Chau Jehová mu, quisu cutranpiuqueyeayu.
Huiñotupe taiñ Chau Dios mu, quisu rulpacünuñmayayu com tañi huesa femün.
8 Chau Jehová feipi: “Tañi raquiduam trürlai tamün raquiduam mu,
tañi femquen trürlai tamün femquen mu.
9 Ti huenu doi alüpüralei ti mapu mu.
Ca femngechi tañi femquen doicülei tamün femquen mu,
ca tañi raquiduam doicülei tamün raquiduam mu.
10 Mahun ca pire nagpaquei huenu mu.
Petu ñi huiñotunon huenu mu, hune cülchafquefi* ti mapu, femngechi ñi huefpayal ca tremal fillque fün.
Fei hulquei fün ñi ngan-ngeal ca cofque ñi ingeal.
11 Ca femngechi femai iñche tañi dungun tañi hun mu tripalu.
Petu ñi huiñotunon iñche mu, hune huechutriparpuai.
Com rupayai chumngechi ñi feipiel* iñche,
ca tañi feipin com femtripayai.
12 Ayühunquechi tripayaimün,
fei huiño cüpalngetuaimün tüngcülen mu.*
Huincul ca mahuida ayühuaingün tamün adquiñ mu, ayühunquechi huiraraingün.
Com pu anümca lelfün mu cultrafcultraftuai reque ñi cuhu engün.
13 Tremlayai troltro, huelu mai enebro.
Tremlayai curi, huelu mai mirto.
Tüfachi dungu mu huall püle quimngeai ta Jehová.
Tüfa rumel pengelai chem ñi pepi femquen iñche”.