Deuteronomio
33 Moisés, Chau Ngünechen* ñi cüdaufe, tüfachi cümeque dungu feipifi pu Israel che petu tañi lanon. 2 Feipi:
“Sinaí mu cüpai Chau Jehová,
Seír mu huilüfi huente quisu engün meu.
Parán ñi mahuidantu mu afmatufalngen mu huilüfi.
Quisu mu ca mülerquei fentren cümeque püllü,
tañi man püle mülerquei tañi pu hueichafe.*
3 Chau Dios piuqueyefi tañi pu che.
Tami cuhu meu mülei com pu lif chengelu.
Tami namun püle anülerqueingün,
fei eluhuingün ñi allcütuafiel tami feipin.
4 Moisés elueiñmu quiñe huercün dungu, quiñe ley
Jacob tañi pu che* ñi ngen-ngeel.
5 Trahuluulu pu loncolelu tati pu che meu
com pu Israel ñi troquiñche meu,
Chau Dios lonco ülmen-ngerpui Jesurún mu.*
6 Rubén mongelepe ca laquilpe,
tañi pu huentru pichilehuequilpe”.
7 Fei Moisés feipifi tüfachi cümeque dungu ta Judá:
“Ahuem Jehová, allcütuñmafinge Judá ñi dungun,
huiño cüpaltuafimi tañi troquiñche mu.
Tañi nehuen mu incañpefi tañi ngen-ngeel.
Quelluafimi ñi quehuayafiel tañi pu caiñe”.
8 Leví mu feipi:
“Feiti huentru tami* piuqueyenieteu ngen-ngeai tami Tumim ca tami Urim mu.
Eimi ngüneduamfimi Masá mu.
Eluhuimi tami chaftuafiel inafül Meribá ñi co meu.
9 Pu Leví che huentru feipifingün tañi chau ca ñuque: ‘Duamtuulaiñ’.
Tañi pu peñi quimhuetulafingün,
ca quiñeulai tañi pu fotüm engün.
Fei engün inaniefingün tami feipin
ca huechunenturpuingün tami eldungu.
10 Fei engün quimelelafi ta Jacob tami huercün dungu
ca quimelelafingün ta Israel tami ley dungu.
Chalintucupe engün incienso,* rume cüme nümün-ngeai eimi mu
ca hulpe engün com ti chalintucun* tami altar meu.
11 Ahuem, Jehová, cümelcafinge tañi nehuen,
cüme lloumafinge com tañi femquen.
Trafolmafinge ñi chang* tañi pu chaftuqueteu,
femngechi huitrapürahuelayai tañi pu üdequeteu”.
12 Benjamín mu feipi:
“Chau Jehová ñi saquin cüme felepe quisu engu.
Com antü cuñiutucunieafi,
fei tañi llanca foro mu* müleai”.
13 José mu feipi:
“Chau Jehová cümelcape tañi mapu,
eluafi huenu mu cüpachi cümeque dungu,
ti ilhuen* ca ti co tripalu hufco* miñche mapu mu,
14 ti cümeque fillem ñi tremümquefiel antü
ca ti cümeque fün ñi huefpaquen fillque cüyen,
15 ti doi cümeque fillem tripalu cuifique huincul mu*
ca ti cümeque fillem tripalu rumel mülequechi mahuida mu,
16 cümeque fillem mülelu mapu mu ca com ñi hulquen,
ca ñi füreneeteu tati peufaluulu zarza mu.
José dullingei rangi tañi pu peñi meu,
fei com tüfachi dungu cüpape tañi lonco mu, quisu tañi huechuñ lonco mu.
17 Afmatufali quiñe toro reque hune choyüngelu,
tañi müta, auca toro* ñi müta reque.
Tañi müta mu quiñentrür ültrenieafi* fillque troquiñche,
yeafi cheu ñi afpun ti mapu.
Ti müta, feita Efraín ñi fentren huaranca hueichafe*
ca Manasés ñi huarancaquechi hueichafe”.
18 Zabulón mu feipi:
“Ahuem, Zabulón, ayüunge tripan mu eimi.
Isacar cai, ayüunge tami tolto ruca mu.*
19 Fei engün mütrümafingün* pu troquiñche ñi amual mahuida mu.
Üye mu hulaingün pu nor che ñi chalintucun.
Entuaingün fentren falinque fillem lafquen meu
ca ti falinque fillem ellcalelu* cuyüm mu”.
20 Gad mu feipi:
“Cümelcangepe tati doi amultucuquefilu cheu ñi puhun Gad.
Pochongnagquei* üye mu quiñe trapial reque,
pepicaucülei ñi catrünentuafiel ti lipang ca ti lonco.
21 Quisu dulliafi ti hunen troquiñ,
feiti troquiñ ñi püntücünufiel* tati hulquelu ley.
Pu loncolelu ti pu che mu trahuluhuaingün.
Chau Jehová ñi duam mu quisu femai nor dungu
ca inanieafi tañi ley quiñentrür pu Israel che engün”.
22 Dan mu feipi:
“Dan quiñe pichi trapialngei.
Rincütripayai Basán mu”.
23 Neftalí mu feipi:
“Neftalí tuduamcülei Chau Jehová ñi füreneeteu mu,
apolei tañi cümeque dungu meu.
Nüfi ti mapu mülelu conhue antü püle ca sur püle”.*
24 Aser mu feipi:
“Aser cümelcangei fentren fotüm mu.
Tañi pu peñi füreneayu
ca cüchape* tañi namun aceite mu.
26 Inei no rume trürlai Jesurún ñi Chau Ngünechen mu.
Püracahuelluyahui huenu mu tami quelluaeteu
ca tañi afmatufalngen mu püracahuelluyahui huente tromü.
27 Cuifi ñi ellcaupeyümngen Chau Ngünechen.
Quisu quelluaimu ca cuñiutucuaimu rumel mu.
Tami adquiñ mu huemünentuafi* tami pu caiñe,
fei feipiai: ‘¡Apümcafinge!’.
28 Israel rupalayai cuñihun dungu mu,
Jacob ñi pu cüpanche püntücünungeaingün,*
fei müleaingün quiñe mapu mu cheu ñi mülen fillque fün ca hue pulcu,
huenu mu tüicünagpayai* ilhuen.
29 ¡Ahuem, Israel, ayüucüleimi!
Chau Jehová montuleimu,
fei tati escudo tami cuñiutucuqueteu,
tami afmatufalchi fütra cuchillo.
Feimu, ¿inei am trüri eimi mu?
Tami pu caiñe huingüdcülen cüpayaingün eimi mu,
fei eimi pünonacümmayafimi ñi furi”.*