Isaías
32 ¡Tüfei! Quiñe lonco ülmen nor ngünenieai
ca pu principe ngünenieaingün nor dungu mu.
2 Caque quiñeque engün quiñe ellcaupeyüm reque feleaingün cürüf mu,
quiñe chellcomtuhue* tati cürüftucu mahun meu.
Quiñe huitrunco reque feleaingün ancülechi mapu meu,
ca quiñe fütra cura ñi llaufeñ reque* rume ancülechi mapu meu.
3 Pu pequelu doi cüme peaingün,
ca pu allcütuquelu doi cüme allcütuaingün.
4 Tati pu quim ngüneuquenolu ñi piuque cüme ngüneduamafingün chem ñi quimürpuel engün,
ca tati pu quetroquetrotu dunguquelu* cüme ca matu dunguai.
5 Tati huesa che, cüme che feipingehuelayai.
Ca tati norngenolu, cüme piuquengelu feipingehuelayai.
6 Ti huesa che huesaque dungu feipiai,
ca huesaque dungu raquiduamai tañi piuque mu.
Femngechi ngüchaltucucheai ñi püntütripayal Jehová mu ca huesa dunguyeafi.
Cafei femcünuai tati ngüñülelu ñi inoal
ca tati huihulelu ñi pütoconoal.
7 Ti huentru norngenolu re huesaque dungu femquei,
ngüchaltucuquefi ta che ñi conal yehuen dungu meu,
femngechi ñi huesalcayafiel coila dungu mu ti pofre ca ti hueñancülelu,
rüf dungu niele rume engün.
8 Ti cüme che ayüniei ñi cüme femal,
fentecünuquelai tañi fürenechequen.
9 “¡Eimün, pu domo maneluucülelu, huitrapüramün, allcütumün tañi feipin!
¡Eimün, Sion tañi pu püñeñ, chem no rume raquiduamcülelaimün! ¡Huelu ngüneduamfimün tañi feipin!
10 Eimün duamcülelaimün, huelu quiñe tripantu rupale ca pichin, müllmüllcüleaimün.
Fentepuule hula ñi tungeel ofad, quimtucuaimün chem ofad no rume ñi tungenoel.
11 Eimün, pu domo rume maneluucülelu, ¡müllmüllcülemün!
Eimün, pu chem no rume raquiduamquenolu, ¡trüntrüncülemün!
Entumün tamün tacun
ca traricünuafimün sacu tacun tamün cintura püle.
12 Hueñancülen meu* ngümacahuaimün,
ñi chumlerpun mu ti cüme mapu ca anüm ofad.
13 Tañi pu che ñi mapu taculeai troltro mu,
tacuafi com ti ruca cheu ñi mülen fentren ayühun,
ti huaria rume ayüucülequelu.
14 Ti alüpürachi ruca nehuencülelu quisucünungeai.
Ti huaria huaqueñcülelu elcünungeai.
Ofel ca ti alüpürachi ruca ñi llihuatuleal* huellicünugeai rumel mu,
üyeu aucantuaingün pu auca cahuellu,*
ca ütayaingün pu quechan ufisa.
15 Femngechi feletuai ti dungu cüpale hula Chau Dios ñi nehuen inchiñ meu,
fei hula ti huellin mapu tucucancünungetuai
ca ti tucucan mahuidantu troquingetuai.
16 Ti huellin mapu mu* ca ti tucucan mu müleai nor dungu.
17 Ti rüfngechi nor dungu ñi duam mu müleai tüngün,* com cüme feleaingün
ca cümelcaleaingün rumel mu.
18 Tañi pu che tüngcülechi mapu mu müleaingün,
cuñihun dungu mu rupalayaingün ñi ruca mu ca tüngcüleaingün cheu ñi ürcütual engün.
19 Huelu ti pire* apümcayafi ti mahuidantu,
ca ti huaria com teifücaleai.
20 Ayüucüleaimün eimün pu nganlu inafül co meu,
ca pu neicümcünufilu ti toro ca burro”.