Números

13 Chau Jehová dungufi ta Moisés, feipifi: 2 “Caque quiñeque troquiñche Israel meu dulliaimi quiñe loncolelu. Fei huercüafimi engün ñi lloftumeafiel* Canaán mapu. Feichi mapu iñche eluafiñ pu Israel che”.

3 Mülerquefuingün Parán huellin mapu,* fei Moisés huercüfi engün Chau Jehová ñi feipin mu. Com tüfachi pu huentru loncolerquei pu Israel che mu. 4 Tüfa tañi üi engün: Rubén tañi troquiñche mu amui Samúa, Zacur ñi fotüm. 5 Simeón tañi troquiñche mu amui Safat, Horí tañi fotüm. 6 Judá tañi troquiñche mu amui Caleb, Jefuné tañi fotüm. 7 Isacar tañi troquiñche mu amui Igal, José tañi fotüm. 8 Efraín tañi troquiñche mu amui Hosea, Nun tañi fotüm. 9 Benjamín tañi troquiñche mu amui Paltí, Rafú tañi fotüm. 10 Zabulón tañi troquiñche mu amui Gadiel, Sodí tañi fotüm. 11 José tañi troquiñche fei ta Manasés ñi troquiñche, feiti mu amui Gaddí, Susí tañi fotüm. 12 Dan tañi troquiñche mu amui Amiel, Guemalí tañi fotüm. 13 Aser tañi troquiñche mu amui Setur, Miguel tañi fotüm. 14 Neftalí tañi troquiñche mu amui Nahbí, Vofsí ñi fotüm. 15 Ca Gad tañi troquiñche mu amui Gueuel, Makí tañi fotüm. 16 Tüfa tañi üi feitichi pu huentru Moisés ñi huercüfiel lloftumeafiel ti mapu. Moisés ca üituculelfi ta Hosea, Nun ñi fotüm, Josué* üituculelfi.

17 Moisés huercüfilu pu huentru ñi lloftumeafiel Canaán mapu, feipifi: “Amuaimün Négueb mapu mu, fei hula pürapuaimün mahuida mu. 18 Ngüneduamafimün chumngechilei ti mapu, ñi nehuen-ngen cam no, ti pu che mülelu fei mu, peaimün ñi alün-ngen cam ñi alün-ngenon, 19 cüme mapungei cam cüme mapungelai. Ca ngüneduamafimün tati huaria üye mu müleyelu, niele cura malal cam nielai. 20 Ngüneduamafimün ñi cümepen mai ti mapu ñi cüdahuafiel cam no, ñi niepen mai anümca cam ñi nienon. Fütra piuquecünuhuaimün ca cüpalaimün fün feiti mapu meu”. Feichi antü meu hue afülerquei ofad.

21 Fei amuingün ñi lloftumeafiel ti mapu, ngüneduamfingün Zin huellin mapu ñi puhual Rehob mapu meu, fülcülerquei* ta Lebó-Hamat* mapu mu. 22 Amulu engün Négueb mapu mu puhuingün ta Hebrón huaria mu, üye mu mülerquei Ahimán, Sesái ca Talmái, pu Anac che. Hebrón deumangerquei regle tripantu petu ñi deumangenon Zoan huaria Egipto mapu meu. 23 Puulu engün Escol laf mapu mu catrüfingün quiñe rou* nielu ofad, tucungei quiñe moncol mamüll meu, fei epu huentru yefingün. Ca yenieingün granada ca higo. 24 Üye mu pu Israel che entufingün ti catrün ofad, feimu Escol* laf mapu üitufingün.

25 Rupalu hula 40 antü, huiñotuingün. 26 Fei amuingün cheu ñi mülen Moisés, Aarón ca com pu Israel che Parán huellin mapu meu, Cadés mu. Com quimelelfingün tati pu che ca pengelelfingün ti fün ñi hulün ti mapu. 27 Fei tüfa feipifingün ta Moisés: “Coniyiñ ti mapu cheu tami huercümufiel, rüfcünu mai mülei fentren lichi ca miel,* tüfa tañi fün. 28 Huelu tati pu che mülelu fei mu rume nehuen-ngei, fütraque huaria nieingün cura malal nielu. Cafei pefiyiñ pu Anac che. 29 Pu Amalec che müleingün Négueb mapu meu. Pu Het che,* pu jebuseo che ca pu amorreo che müleingün mahuida mu. Ca pu Canaán che müleingün ina lafquen ca inafül Jordán leufü meu”.

30 Caleb ayülei ñi tüngduamelafiel* pu che, femngechi ñi allcütuafiel engün ta Moisés, feimu feipi: “Amuaiñ müten, nüpuafiyiñ feichi mapu. Rüfcünu llemai hueutripayaiñ”. 31 Huelu pu huentru ñi compañnieteu, feipingün: “Hueichamelayafuiñ* tüfachi pu che, doi nehuen nieingün ta iñchiñ meu”. 32 Fei engün feipiniefingün huesaque dungu pu Israel che feichi mapu mu ñi lloftumefiel engün. Feipingün: “Feichi mapu taiñ lloftumefiel apümcaquefi tati pu che. Tati pu che mülelu üye mu fütraque huentrungeingün. 33 Üye mu pefiyiñ pu nefilim, Anac tañi pu fotüm, pu nefilim tuhurqueingün. Iñchiñ pichique saltamonte reque* troquihuiyiñ tañi adquiñ meu, tüfa engün ca femngechi troquinieiñmeu”.