Isaías
62 Sion ñi duam mu ñücüfcülelayan.*
Jerusalén ñi duam mu tüngcülelayan,*
alofcülele hula huilüf pelon reque tañi nor dungu,
ca tañi montuluhun üicülele hula cütral reque.
2 “Ahuem, domo, pu troquiñche peaingün tami femquen nor dungu.
Pu lonco ülmen peaingün tami afmatufalngen.
Hue üi tuculelngeaimi,
Chau Jehová llemai feipiai chem üi.
3 Chau Jehová ñi cuhu mu ayüfalchi coronangeaimi.
Lonco ülmen ñi munuloncongeaimi tami Chau Dios ñi cuhu mu.
4 Quisucünungeelchi domo pingehuelayaimi,
ca tami mapu huellilei pingehuelayai.
Doi mai, Tañi Ayüfielchi Domo pingeaimi,
ca tami mapu Fütangechi Domo pingeai.
Chau Jehová ayüucüleai eimi mu
ca tami mapu fütangechi domongeai reque.
5 Quiñe hueche niefilu quiñe üllcha domo,*
ca femngechi nieaimu tami pu huaria che.
Ti novia ayühuelquefi tañi novio,
ca femngechi eimi ayühuelafimi tami Chau Dios.
6 Ahuem, Jerusalén, huente tami fütraque cura malal* elcünun soltau ñi adquintuleal.
Ngelai ñi ñücüfcüleal engün antü mu, pun no rume, turpu.
Eimün, dunguquelu Chau Jehová mu,
ürcütulayaimün.
7 Ngillatunieafimün cüme anücünufile hula ta Jerusalén.
Felei, femcünufile hula ñi püramyengeal huall mapu püle”.
8 Chau Jehová huitrañpürami ñi man cuhu, tañi nehuen-ngechi lipang, fei eldungucünui:
“Tami fillque fün eluhuelayafiñ tami pu caiñe ñi iyafiel.
Pu ca cüpanche putulayaingün* tami hue pulcu fente tami cüdahun mu.
9 Doi mai, inei rume püramfile ti fillque fün, fei iñmuai ca püramyeafi ta Chau Jehová.
Ca inei rume tumefile ti ofad, putuai ti pulcu tañi yamfal* lepün meu”.
10 Rupamün, rupamün puerta mu.
Liftufimün ti rüpü ñi rupayal ti troquiñche.
Deumamün, deumamün ti rüpü.
Entufimün ti cura.
Huitracünufimün quiñe orcon ñi peaeteu pu troquiñche.
11 Cheu ñi afpun ti mapu puhui Chau Jehová ñi feipin:
“Feipiafimün Sion ñi püñeñ:
‘¡Tüfei! Deu cüpalei tami montulngeal.
Yeniei ti cullitu ñi hulal.
Tañi adquiñ mu niei chem ñi cullial’”.
12 Fei engün üitungeai lifngechi troquiñche, Chau Jehová ñi ngillanentuel.
Eimi cai Ayüfalngelu pingeaimi, Huaria Quisucünungenolu.