Isaías
60 “Ahuem, eimi, domo, huitrapürange, alofnge, tami pelon deu eluhui ñi huilüfal.
Chau Jehová ñi pelon huilüfcülei eimi mu.
2 Dumiñ tacuafi ti mapu,
ca rume dumiñcüleai pu troquiñche.
Huelu huente eimi mu Chau Jehová huilüfai,
huente eimi mu pengeai tañi pelon.
3 Fillque troquiñche cüpayaingün tami pelon mu,
ca fillque lonco ülmen cüpayaingün tami huilüfcülechi pelon mu.
4 Püraquintunge, ca huall püle adquintunge.
Com engün trahulngei, eimi mu cüpaleingün.
Tami pu huentru püñeñ camapu cüpaleingün,
ca tami pu domo püñeñ meta cüpalniengeingün.
5 Feichi mu peaimi tüfa, fei alofcüleaimi reque fente tami ayühun.
Tami piuque trefcütrefcüngeai ca rume ayüucüleai.
Eimi mu cüpayai ti falin-ngelu lafquen meu.
Pu troquiñche ñi nieel tañi mongeluhuam cüpayai eimi mu.
6 Fentren camello apolafingün tami mapu,
hueque camello cüpalu Madián ca Efá mu.
Com pu che mülelu Saba mu cüpayaingün,
cüpalaingün oro* ca olibano,
pu che ñi adquiñ mu püramyeafingün ta Chau Jehová.
7 Trahulelngeaimi Quedar ñi pu quechan.
Cüpalelngeaimi Nebayot ñi pu caniru.*
Tañi altar mu chalintucungeaingün, fei lloungeaingün.
Fei adelcacünuafiñ tañi afmatufalchi ruca.
8 ¿Inei engün am feichi tromü reque amulelu?
Paloma reque müpülen amuleingün tañi ruca mu.
9 Pu che huapi mu mülelu maneluhuaingün iñche mu.
Pu farcu Tarsis mu cüpalu hunelen amuleingün,
fei ñi cüpalafiel tami pu püñeñ camapulelu.
Cafei cüpalaingün plata ca oro,
femngechi ñi püramyengeal tami Chau Dios Jehová ñi üi, Israel ñi Lifngechi Ngünechen.
Quisu püramyeaimu.
10 Ca cüpanche deumayaingün tami fütraque cura malal,*
fei engün ñi pu lonco ülmen cüdahuelaimu.
Illcunquechi* cutrancafeyu nga,
huelu füreneayu ca cutranpiuqueyeayu.
11 Rumel nülaleai tami puerta,
antü ca pun no rume cerralelayai.
Femngechi cüpalelngeaimi tati pu troquiñche ñi nieel tañi mongeluhuam.
Tañi pu lonco ülmen hunelepayaingün.
12 Chem troquiñche cam gobierno rume serfinoelmu, ngehuetulayai.
Pu troquiñche com apümcangeai.
13 Ti doi cümeque anümca ñi mülen Líbano mu cüpalelngeaimi,
enebro, fresno ca cipres, com.
Femngechi adelcacünuafiñ tañi yamfal mülehue.*
Femcünuan ñi yamfalngeal cheu tañi pünoquen.
14 Tañi pu fotüm tami pu cutrancaqueteu cüpayaingün, pochongnagaingün* eimi mu.
Com tami pu illamcaeteu pochongnagaingün tami namun püle.
Fei femngechi feipiaimu engün: Chau Jehová ñi huaria,
Sion, Israel ñi Lifngechi Ngünechen ñi huaria.
15 Quisucünueyu, üdengeimi ca inei no rume rupaquelai eimi mu.
Huelu eluayu tami rumel püramyeaeteu pu che,
com pu cüpanche rumel ayühuaingün eimi mu.
16 Chumngechi quiñe ñuque moyolquefi tañi pichiche,
ca femngechi pu troquiñche ca pu lonco ülmen eluaimu chem rume tami duamnieel.
Fei rüfcünu quimaimi tüfa: iñche, Chau Jehová, montuleyu.
Jacob ñi nehuen-ngechi Chau Dios ngillanentueimu.
17 Cobre mülei, huelu oro cüpalafiñ.
Pañillhue* mülei, huelu plata cüpalafiñ.
Trafla mülei, huelu cobre cüpalafiñ.
Cura mülei, huelu pañillhue cüpalafiñ.
Elcünuafiñ ti tüngün* tami ngüneduamnieaeteu,
ca ti nor dungu ñi loncoleal eimi mu.
18 Mülehuelayai pofolcahun tami mapu mu,
mülehuelayai apümcahun ca teifücahun cheu ñi puhun tami mapu.
Com pu che mülelu ponhui tami fütraque cura malal mu montuaingün
ca com ñi mülen ponhuitu tami puerta mu püramyeafingün ta Chau Dios.
19 Ti antü pelontuhuelayaimu
ca ti cüyen ñi ale* huilüfcülehuelayai eimi mu.
Huelu Chau Jehová pelontunieaimu rumel mu,
tami Chau Dios huilüfcüleai eimi mu ca adelcacünuaimu.*
20 Tami antü conlayai
ca tami cüyen af huilüflayai.
Chau Jehová pelontunieaimu rumel mu
ca tami hueñancün afai.
21 Com tami pu che norngeai,
rumel mu ngen-ngeaingün tüfachi mapu mu.
Fei engün ti choyün* iñche ñi anümcafiel,
iñche tañi deumafiel ñi püramyengeal.
22 Pichin che, mil chengerpuai.
Ca ti troquiñche falin-ngenolu, nehuen-ngerpuai.
Iñche, Chau Jehová, femcünuan ñi matu rupayal tüfa puuchi antü mu”.