Isaías
25 Ahuem, eimi, Jehová, iñche tañi Chau Dios.
Püramyeayu, püramyeñmayayu tami üi,
Afmatufali tami femün.
Fütra cuifi feman pimi,
fei huechunenturpufimi ca pengelimi tami manelfalngen.
2 Curantucünufimi quiñe huaria.
Quiñe nehuen-ngechi huaria teifünacümfimi.
Pu ca cüpanche ñi huaria, huaria reque felehuetulai,
chumcaunorume huiño deumangetulayai.
3 Feimu quiñe nehuen-ngechi troquiñche püramyeaimu,
llicanieaimu ti huaria ñi nieel pu troquiñche cutrancachequelu.
4 Eimi quiñe ellcaupeyüm ñi lefmahual ti cuñifallcülelu,
quiñe ellcaupeyüm ñi amual ti pofre cutrancaumequelu,
cheu ñi chellcomtuam* che cürüftucu mahun meu,
cheu ñi llaufeñtual* che are antü mu.
Pu huesalcachequelu rume illcuqueingün* quiñe cürüftucu mahun reque ñi cultrafmequefiel* quiñe cura malal, huelu eimi cuñiutucuchequeimi.
5 Chumngechi fentecünuquefimi ti are ancüngechi mapu meu,
ca femngechi fentecünuñmayafimi pu ca cüpanche ñi pofolcamequen.
Cafei chumngechi ti tromü ñi llaufeñ* fentecünuquefi ti are,
ca femngechi eimi fentecünuafimi pu huesalcachequelu ñi ülcantun.
6 Chau Jehová Ñidolcülelu pu hueichafe mu* tüfachi huincul mu pepicacünulelafi com pu troquiñche
fentren cümeque iyael,
fentren cüme pulcu,
cümeque iyael apolelu matra foro mu,
ca cüme pulcu chaitulelu.
7 Tüfachi huincul mu quisu apümcayafi* ti tacun impolniefilu* com pu troquiñche
ca ti ngüren tacuniefilu com pu troquiñche.
8 Quisu apümcayafi* ti lan dungu, turpu ngehuetulayai.
Tati Doi Fütra Ñidol Jehová ancümüñmayafi com pu che ñi cülleñu.
Chau Dios ñi pu che com mapu mu yehuelcangequei,
huelu quisu fentecünuafi, femngechi feipicünui Chau Jehová.
9 Feichi antü feipiaingün:
“¡Tüfei! ¡Tüfa taiñ Chau Dios!
Quisu mu maneluucüleiñ,
fei montulaiñmu.
¡Tüfa ta Chau Jehová!
Quisu mu maneluucüleiñ.
Pürapapiuqueleaiñ ca ayüucüleaiñ quisu am taiñ montuleteu”.
10 Chau Jehová ñi cuhu cuñiutucuafi tüfachi huincul,*
huelu Moab pünocangeai tañi mapu mu
chumngechi ñi pünocangequen pinu* trapümcülechi me mu.
11 Chau Dios fampuhulai ñi cuhu ñi cultrafcayafiel ta Moab
quiñe hueyelmequelu reque cultrafmequefilu* ti co tañi cuhu mu.
Cüme nengümafi tañi cuhu ñi cultrafcayafiel,
femngechi famnacümüñmayafi ñi mallmangen.
12 Ca ti nehuen-ngechi fütraque cura malal* nielu tañi incañpehual,
Chau Dios teifünacümafi,
famnacümafi mapu mu, trufür mu llemai.