Isaías
44 Tüfa hula allcünge, ahuem, Jacob, saquin cüdaufe,
ca eimi, ahuem, Israel, iñche tañi dullifiel.
2 Tüfa ñi feipin Chau Jehová,
tami deumaeteu,
ca tami quellunieteu tami choyüngen mu müten:
‘Llicaquilnge, saquin cüdaufe Jacob,
eimi cafei, Jesurún,* iñche tañi dullifiel.
Ca pachügnacümafiñ reque tañi nehuen tami pu yall mu*
ca tañi cümelcan tami pu cüpanche mu.
4 Fei huefaingün rangiñ carü cachu mu reque,
alamo anümca reque ina huitrunco mu.
5 Quiñe che feipiai: “Chau Jehová ngen-ngei iñche mu”.
Cangelu che quisutu üitucuhuai Jacob.
Cangelu cai huirintucuai tañi cuhu mu: “Jehová ngen-ngei iñche mu”.
Fei quisutu üitucuhuai Israel’.
6 Chau Jehová Ñidolcülei pu hueichafe mu,* fei Israel ñi Lonco Ülmen ca ñi ngillanentueteu.
Tüfa ñi feipin Chau Jehová:
‘Iñche hunen-ngen ca inan-ngen.
Ngelai cangelu Dios, iñche müten.
7 ¿Inei am iñche reque femngei?
Dungupe, feipipe, fei pengelelechimu.
Feipipe chem ñi cüpalen
ca chem ñi rupayal cüpalechi antü mu.
Iñche deu femngechi femün elcünufilu nga tati cuifi troquiñche.
8 Pellquelequilmün*
ca huitracünuuquilmün llican mu.
¿Deu feipicünuupelaiñ ama caque quiñeque eimün? ¿Huldungucünupelan ama?
Eimün dunguqueimün iñche mu.
¿Mülepei mai cangelu Dios iñche reque?
Mülelai, ngelai cangelu Fütra Cura, quimlafiñ ta cangelu’”.
9 Pu deumaquefilu adentun,* com engün falilai.
Ca tañi fillem ñi falintuquefiel duamfalngelayai.
Feiti pu adentun chem no rume pequelaingün ca quimquelaingün, feimu dunguñpelayafuingün inei no rume.
Feimu tañi pu deumaeteu yehuelcangeaingün.
10 ¿Inei am fente hueluduamcüleafui ñi deumayal pañillhue mu* quiñe dios cam quiñe adentun
turpu falinolu?
11 ¡Tüfei! ¡Com tañi pu chaf cüdaufe* yehuelcangeaingün!
Pu artesano re chengeingün müten.
Com trahuluupe engün, caque quiñeque mülepe tañi mülehue mu.
Pellquelehueaingün, com quiñentrür yehuelcangeaingün.
12 Ti cüdaufe cofimquefi* ti pañillhue ailen cütral mu.
Fei martillo mu cupafcaquefi ñi cüme elcünutuafiel.
Tañi nehuen-ngechi lipang mu cüme adcünuquefi.
Ngüñüquei, fei yafüngehuequelai.
Pütocoquelai, fei ürcüquei.
13 Ti cüdauquelu mamüll ünifcünuquefi* ti llasu ñi medial.
Quelü tiza mu marcacünuquei chumngechi ñi deumayafiel.
Cincel mu adentucünuquefi ca compas mu marcaniefi.
Cüme adngechi huentrucünuquefi reque,
fei ñi elcünuafiel quiñe ruca mu.*
14 Mülei quiñe huentru catrüquelu cedro anümca.
Anümfi quiñe trihue, mahun ta tremümeyu.
15 Fei quiñe huentru cütraltuquei feitichi mamüll mu.
Quiñe troquiñ mamüll mu eñumtuquei,
cütraltuquei ca afümquefi cofque.
Huelu cafei deumaquei quiñe dios ca poyequefi.
Mamüll mu deumaquei quiñe adentun ca pochongnagquei* tañi adquiñ mu.
16 Rangiñ feitichi mamüll cütraltuquefi,
cancatuquefi ilo, iquefi ca tuduamquei.
Cafei eñumtuquei ca feipiquei:
“Petu ñi leliniefiel ti cütral eñumtumequen. ¡Müna cüme dungu!”.
17 Mülehuechi mamüll mu deumaquei quiñe dios, quiñe adentun.
Pochonagquei tañi adquiñ mu ca poyequefi.
Llellipun mu feipiquefi:
“Eimi iñche tañi dios, montulen”.
18 Ti pu adentun turpu quimquelaingün, adümquelaingün chem no rume.
Tañi nge taculei ca pelolaingün.
Tañi piuque mu quim ngüneduamquelaingün.
19 Inei no rume raquiduamquelai tañi piuque mu
ca nielai quimün ca adümuhun no rume tañi feipial:
“Rangiñ mamüll cütraltufiñ,
tañi ailen mu afümfiñ cofque ca cancan ilo ñi iyafiel.
¿Deumapeafulu am iñche quiñe ünufalchi chemcün* mülehuechi mamüll mu?
¿Poyepeafulu am iñche quiñe triran mamüll?”.
20 Iquei trufquen.
Ngünencangei tañi piuque , fei tüfa huelulcaqueyu.
Quisutu montuluulayafui, ca ramtuuquelai:
“¿Ngünencan dungu no am tañi nieel man cuhu mu?”.
21 “Ahuem, Jacob, ahuem, Israel, raquiduamtucuniefinge tüfachi dungu.
Eimi iñche tañi cüdaufe.
Iñche deumaeyu, eimi iñche tañi cüdaufe.
Ahuem, Israel, ngoimanentulayayu.*
22 Eluhuan ñi ngehuetunoal tami huelulcan ca tami culpan,*
taculeai quiñe tromü mu reque.
Huiñotunge iñche mu, ngillanentuayu.
23 Chau Jehová femi tañi pin.
Feimu eimi, huenu, ayühun mu huirarnge.
Eimi, nageltu mapu, huehun mu huirarnge.
Eimün pu huincul, mahuidantu
ca com tami pu anümca, ayühun mu huirarmün.
Chau Jehová ngillanentufi ta Jacob.
Ca, Israel ñi duam mu, pengelquei ñi afmatufalngen”.
24 Chau Jehová ngillanentueimu, deumaeimu petu tami mülen tami ñuque ñi pütra meu.
Tüfa tañi feipin:
“Iñche ta Jehová, tati deumalu itrocom.
Iñche müten ünifcünufiñ ti huenu
ca deumafiñ ti mapu.*
¿Inei am ta quellueneu?
25 Iñche catrütuquefiñ chem ñi pengelqueel pu feipiquelu falinochi dungu.*
Ca huedhuedcünuquefiñ pu pelontuchequelu.
Hueluraquiduamelquefiñ pu quimche
ca huedhued dungu reque elcünuquefiñ tañi quimün engün.
26 Femcünuquen ñi femtripayal tañi cüdaufe ñi feipin.
Ca com huechunentuquen tañi pu huerquen ñi feipicünuel.
Jerusalén mu feipiquen: ‘Üye mu müleai che’.
Judá ñi fillque huaria mu feipiquen: ‘Huiño deumangetuai
ca cüme elcünungetuai chem ñi teifücalen’.
27 Feipiquefiñ llufü co: ‘Arcünge.*
Ancümafiñ com tami leufü’.
28 Feipiquen Ciro mu: ‘Fei iñche ñi dullifielchi camañfe,
huechunentuai com tañi ayünieel iñche’.
Jerusalén mu feipiquen: ‘Huiño deumangetuai’.
Ti ngillatuhue ruca mu feipiquen: ‘Pepicangeai cheu ñi anücünungeal’”.