Isaías
61 Ti Doi Fütra Ñidol Jehová elueneu ñi nehuen,
Chau Jehová dullieneu ñi huldungulelafiel cümeque dungu tati pu ñom che.
Huercüeneu ñi tremoltuafiel* pu cutrantupiuquelelu.
Huercüeneu ñi huldungulelafiel pu presu cañpüle yengelu ñi lifretripayal engün,
ca ñi pelotual pu presu.
2 Huercüeneu ñi huldungual deu acui chi antü Chau Jehová ñi cutranpiuqueyeafiel pu ñom piuquengelu,
ca acui chi antü Chau Dios ñi huiñoleltuafiel ñi huesa femün tañi pu caiñe.
Huercüeneu ñi yafültucuafiel com pu hueñancülelu
3 ca ñi cuñiutucuafiel pu ngümamequeyefilu ta Sion.
Nieingün trüfquen lonco mu, huelu tuculelafiñ itrofill llancatu.
Hueñancüleingün, huelu eluafiñ aceite ñi ayüucüleal engün.
Ngañhuadcüleingün, huelu eluafiñ quiñe tacun tañi püramyeaeteu engün.
Fentren nor dungu femaingün, feimu fütraque anümca pingeaingün,
Chau Jehová ñi pu anümca tañi püramyengeal.
4 Huiño deumatuafingün ti cuifi mu teifücalelu,
cüme elcünuatuafingün ti mülehue apümcangelu cuifi mu,
tati huaria teifücalelu
ca feitichi mülehue fentreñma tañi apümcangeel.
5 “Quimnoelchi che cüpayai ca camañnieafi* tamün pu quechan.
Ca cüpanche cüdahuelaimünmeu tamün mapu ca tamün anüm ofad.
6 Eimün Chau Jehová ñi pu sacerdote pingeaimün.
Taiñ Chau Ngünechen ñi pu cüdaufe feipingeaimün.
Eimün püneafimün pu troquiñche ñi itrofillem.
Falinque chemcün* llohuaimün fei engün meu, feimu ayühunquechi dunguaimün tüfa mu.
7 Yehuelcangelayaimün, huelu mai epuchi cümelcangeaimün.
Tañi troquiñche illamcangelayai, doi mai ayühun mu huirarai tañi llohuel meu.
Felei, tañi mapu mu epuchi elungeai.
Rumel ayüucüleaingün.
8 Iñche, Chau Jehová, piuqueyefiñ ti nor dungu.
Üdequefiñ hueñen dungu ca norngenochi dungu.
Nor dungu feman, fei culliafiñ engün.
Eldungucünulelafiñ engün rumel mu.
9 Tañi pu yall,* com pu troquiñche quimayu.
Tañi pu cüpanche, com pu che quimayu.
Tuchi pefile engün, ti cüpanche Chau Jehová ñi cümelcaeteu piaingün”.
10 Chau Jehová ñi duam mu rume ayüucülean.
Com piuque mu ayüucülean tañi Chau Dios ñi duam mu.
Tuculeneu quiñe tacun reque, tüfa tati montuluhun.
Impoleneu* quiñe tacun mu reque,* tüfa tati nor dungu,
quiñe novio reque yenielu sacerdote ñi munulonco,
quiñe novia reque cüme adelcaucülelu.*
11 Mapu mu choyüquei anümca
ca cüme lelfün mu huefquei chem ñi ngantucungeel.
Ca femngechi ti Doi Fütra Ñidol Jehová
com pu troquiñche ñi adquiñ mu femcünuai ñi cüpayal nor dungu ca ñi püramyeaeteu pu che.