Isaías
10 ¡Aungeai tati pu elcünuquelu ley ñi huesalcacheal,
tati pu rumel huirintucuquelu huercün dungu ñi cutrancacheal!
2 Famentuquefingün* chem ñi feipintucuqueel pu pofre juician dungu mu,
piquelaingün nor juzgayafiel tati pu duamnielu ñi quellungeal tañi troquiñche mu,
müntuñmaquefingün* ñi nieel pu lantu domo
ca com müntuñmaquefingün pu cuñifall.*
3 ¿Chumaimün cai puule ti antü tamün juiciantucungeal,*
camapu cüpale inei tamün apümcayaeteu?
Lefmahun mu, ¿inei utuafimün* tamün quellungeal?
¿Cheu am elcünuaimün tamün falinque fillem?
4 Ngelayai tamün chumal, re pochongnagaimün* rangi pu presu meu
cam trananacümuhuaimün rangi pu layelu meu.
Rupan mu com tüfa, tünglai tañi illcun,*
doi mai fampuhulniefi ñi cuhu tañi cutrancacheal.
5 “¡Tüfei! Tati Asiria huentru,
ti fara reque felei ñi pengelal tañi illculen.
Tañi cuhu mu niei tati retrü ñi cutrancacheal iñche tañi duam mu.
6 Huercüafiñ ñi hueichayafiel* quiñe troquiñche tañi chaftunieteu iñche,
feichi troquiñche tañi illculcaeteu.
Feipiafiñ ñi müntuñmayafiel com tañi nieel, ñi yetuafiel fentren falinque fillem
ca ñi pünocayafiel engün rüpü mu mülechi fotra reque.*
7 Huelu quisu ayülafui ñi femngechi femal,
tañi piuque mu raquiduamlai tüfachi dungu.
Quisu ñi piuque mu ayülei ñi apümcayafiel,
teifücayafiel fentren troquiñche, quiñeque müten no.
8 Quisu ta feipi:
‘¿Lonco ülmen no am com tañi pu principe?
9 Calnó huaria, ¿trürlai am Carquemis mu?
Hamat, ¿trürlai am Arpad mu?
Samaria, ¿trürlai am Damasco mu?
10 Tañi cuhu mu deu nüniefiñ pu gobierno nielu falinochi dios,
doi nierquefuingün adentun* ta Jerusalén ca Samaria mu.
11 ¿Femlayafiñ am ta Jerusalén ca tañi pu adentun
chem ñi femfiel ta Samaria ca tañi pu falinochi dios?’.
12 Chau Jehová huechunentufile ñi cüdau Sion huincul mu ca Jerusalén meu, cutrancayafi* Asiria ñi lonco ülmen yamquenolu cai,* checahun-ngelu ca mallma piuquengelu. 13 Quisu ta feipi:
‘Tañi nehuen-ngechi cuhu meu ca tañi quimün mu feman tüfa,
quimchengelu am ta iñche.
Apümcayafiñ cheu ñi puhun caque quiñeque troquiñche ñi mapu,
müntuñmayafiñ ñi falinque fillem
ca quiñe nehuen-ngechi hueichafe reque ngünenieafiñ tati pu che mülelu üye mu.
14 Pu troquiñche quiñe dañe reque* feleingün.
Nüñmayafiñ com tañi falinque fillem,
felei llemai, elcünuelchi curam reque nüñmayafiñ com tañi mapu.
Quiñe üñüm no rume* nengümlayai ñi müpü,
nülalayaingün ñi hun ca quish pilayaingün rume’”.
15 Ti toqui, ¿doicülelu troquihuafui am tañi pünequeteu mu ñi catrümamüllal?
Ti serrucho, ¿doicülelu troquihuafui am tañi pünequeteu mu?
Quiñe retrü, ¿epuñpüle nengümafui am inei tañi huitrañpüramnieteu?
Ti fara cai, ¿huitrañpüramafui am inei tañi nünieteu?
16 Feimu llemai tati Ñidol, Chau Jehová Ñidolcülelu pu hueichafe mu,
re forocünuafi tañi pu motrinque huentru.*
Cütral mu lüpümafi reque ta Asiria, tüfa nehuen-ngehuelayai.
17 Israel tañi Pelon cütralngetuai,
ca tañi Lifngelu hueihuiñ cütralngetuai.*
Leuleucületuai,* quiñe antü mu müten com lüpümafi ti huesa cachu ca ti troltro ñi nieel ti Asiria huentru.
18 Quisu com apümcayafi ti Asiria huentru ñi afmatufalchi mahuidantu ca tucucan.
Quiñe cutran huentru reque feleai doyelcülerpulu ñi huesalcalen.
19 Pichilehuai anümca tañi mahuidantu mu,
quiñe pichi huentru llemai raquiafui.
20 Feichi antü pu mülehuealu Israel mu
ca pu mongetripayalu Jacob ñi pu cüpanche mu
recüluuhuelayaingün inei ñi hulelcaeteu mu.
Huelu mai com piuque mu recüluhuaingün
Chau Jehová mu, Israel ñi Lifngechi Ngünechen.
21 Quiñe pichi troquiñche müten mülehuealu Jacob ñi pu cüpanche meu
huiñotuai tati Nehuen-ngechi Dios mu.
22 Ahuem, Israel, tami troquiñche
alün-ngefule rume inaltu lafquen mu mülechi cuyüm reque,
quiñe pichi troquiñche müten huiñotuai.
Chau Ngünechen deu feipicünui ñi apümcangeal tüfachi troquiñche,
mangiñ reque puhuai fei engün meu tañi cutrancangeal nor dungu mu.
23 Felei, ti Doi Fütra Ñidol, Chau Jehová Ñidolcülelu pu hueichafe mu, feipicünui ñi apümcangeal tüfachi pu che,
com tüfachi mapu mu puhuai.
24 Feimu llemai tati Doi Fütra Ñidol, Chau Jehová Ñidolcülelu pu hueichafe mu, feipi: “Eimün, tañi pu che mülelu Sion mu, llicalayafimün ti Asiria huentru. Quisu cupafcaeimünmeu fara mu ca huitrañpürami ñi retrü tamün hulelaeteu chumngechi ñi femün Egipto. 25 Pichilehuei ñi afal iñche tañi illcun, fei illcutuafiñ engün tañi apümcayafiel. 26 Chau Jehová Ñidolcülelu pu hueichafe mu huimacayafi refenque mu, chumngechi ñi hueufiel ta Madián inafül Oreb cura mu. Fampuhulafi ñi retrü lafquen mu chumngechi ñi femfiel ta Egipto.
27 Ti Asiria huentru fanechi chemcün tuculeleimünmeu furi mu
ca tucui ñi yucu tamün topel mu.
Fei feichi antü famentulelngeaimün.
Ti yucu trafoai aceite ñi duam mu”.
28 Quisu cüpai Ayat mu,
Migrón mu rupai,
fei Micmash mu elcünui ñi huesaquelu.
29 Notuingün ngilahue püle,*
Gueba mu umañpuingün.
Pu che Ramá mu müllmüllcülei,
lefmahui pu che mülelu Saúl ñi huaria mu, Guibeá pingelu.
30 ¡Ahuem, pu Galim che, com tamün nehuen mu huirarpüramaimün!
¡Ahuem, Laisa huaria, ngüneduamnge!
¡Aungeaimi mai, Anatot!
31 Madmená lefmahui.
Pu Guebim che quintuingün cheu ñi ellcahual.*
32 Feichi antü mu müten huitracünuhuai Nob mu.
Huitrañpüramai ñi cuhu tati huincul ñi adquiñ püle, üye mu mülei Sion huaria.
Femngechi femai ñi aneltuafiel* ti huincul cheu ñi mülen Jerusalén.
33 ¡Tüfei! Tati Ñidol, Chau Jehová Ñidolcülelu pu hueichafe mu,
tañi catrüroumequen mu allcüngequei quiñe llicafalchi trünün.
Tati doi alüpürachi anümca catrüngei
ca tati fütraque anümca trananacümngei.
34 Toqui mu apümcaquefi mahuidantu.
Quiñe nehuen-ngelu apümcayafi ti Líbano.