1 Crónicas

26 Femngechi adcünungei pu troquiñche cuidaquelu puerta mu. Pu Coré che meu mülefui Meselemías, Coré ñi fotüm, Asaf ñi cüpanche. 2 Ca Meselemías niefui fotüm: tañi hunen fotüm fei ta Zacarías, ti epungelu Jediael, ti cülangelu Zebadías, ti melingelu Jatniel, 3 ti quechungelu Elam, ti cayungelu Jehohanán ca ti reglengelu Elieho-Enái. 4 Cafei Obed-Edom niefui fotüm: tañi hunen fotüm fei ta Semaya, ti epungelu Jehozabad, ti cülangelu Joá, ti melingelu Sacar, ti quechungelu Netanel, 5 ti cayungelu Amiel, ti reglengelu Isacar ca ti purangelu Peuletái. Femngechi Chau Dios fürenefi ta Obed-Edom.

6 Ca tañi fotüm, Semaya pingelu, niefui fotüm. Tüfa engün loncolefui tañi familia mu. Nehuen-ngechi huentrungefui ca adümuucülefui engün. 7 Semaya ñi pu fotüm fei ta Otní, Refael, Obed ca Elzabad. Cafei Elzabad ñi pu pariente fei ta Elihú ca Semakías, tüfa engu adümuhun huentrungefui. 8 Com engün Obed-Edom ñi pu fotümngefui. Tüfa engün, tañi pu fotüm ca tañi pu peñi adümuhun huentrungefui ca pepicaucülei ñi cüdahual. Obed-Edom ñi familia mu mülefui 62 che. 9 Cafei Meselemías niefui fotüm ca peñi, 18 adümuhun huentrungefui. 10 Hosá niefui fotüm, tüfa Merarí ñi pu fotüm mu tuhui. Simrí loncolefui. Hunen fotümngelafui rume, huelu tañi chau loncocünueyu. 11 Inalei Hilquías, ti cülangelu Tebalías ca ti melingelu Zacarías. Com tüfa, Hosá ñi pu fotüm ca tañi pu peñi, 13 ngefuingün.

12 Pu loncolelu adniequefilu pu troquiñche cuidaquelu puerta mu niefui elfal cüdau Chau Jehová ñi ruca mu, tañi pu peñi reque. 13 Fei quisuque pu familia, pichin cam fentren chengefule rume, sortiaingün* tañi quimal chem puerta mu ñi cüdahual engün. 14 Selemías elungei ñi cüdahual ti puerta mülelu tripahue antü püle. Fei sortiaingün chem puerta meu ñi cüdahual tañi fotüm Zacarías, tüfa quim ngülamtuquelu, fei elungei ti puerta norte püle* mülelu. 15 Obed-Edom elungei ti puerta mülelu sur püle* ca tañi pu fotüm elfalcünulelngei tati mülehue cheu ngülümngequei itrofillem. 16 Supim ca Hosá elungei ti puerta mülelu conhue antü püle, püllelefui Saléket ñi puerta mu, tüfa mülefui inafül ti pürachi fütra rüpü püle. Mülefui quiñe troquiñ cuidaquelu puerta inafülcülelu cangelu troquiñ mu. 17 Tripahue antü püle mülefui 6 Leví che. Fill antü norte püle mülefui 4 Leví che ca sur püle mülefui 4 Leví che. Ca cheu ngülümngequei itrofillem mülefui 2 Leví che inafül cangelu 2 Leví che meu. 18 Ti conhue mülelu tripahue antü püle mülefui 4 Leví che rüpü püle ca 2 che conhue püle. 19 Femngechi adcünungei pu troquiñche cuidaquelu puerta mu. Tüfa engün pu Coré che ca pu Merarí che mu tuhuingün.

20 Pu Leví che meu mülefui Ahíya. Tüfa elfalcünungei cheu ñi ngülümel falinque fillem Chau Dios ñi ruca mu ca cheu ñi ngülümel falinque chemcün* huichucünulelngelu ta Chau Dios. 21 Guersón ñi pu fotüm meu cüpai Ladán. Ladán ñi pu fotüm mu mülefui Jehielí. Tüfa loncolei Ladán ñi familia mu. 22 Ca mülefui Jehielí ñi pu fotüm, Zetam ca tañi peñi Joel. Fei engün elfalcünulelngei ti mülehue cheu ñi ngülümel falinque fillem Chau Jehová ñi ruca mu. 23 Pu Amram che meu mülefui pu Izhar che ca pu Hebrón che. Cafei pu Uziel che meu 24 mülefui Sebuel. Tüfa Guersom ñi fotüm, Moisés ñi lacu.* Sebuel loncolefui ti mülehue cheu ngülümngequei itrofillem. 25 Ca mülefui tañi pu peñi Eliezer mu tuulu. Tüfa ta Rehabías, Jesayá, Joram, Zicrí ca Selomot. 26 Selomot ca tañi pu peñi elfalcünungei com ti mülehue cheu ñi ngülümel falinque fillem huichucünulelngelu ta Chau Dios. Tüfa chalintucuquefui ti lonco ülmen David, pu loncolelu familia mu, pu loncolelu mil hueichafe mu,* pu loncolelu 100 hueichafe mu ca pu loncolechi hueichafe. 27 Fei engün huichucünulelfingün ta Chau Dios quiñeque fillem ñi huehuel hueichan mu, fei ñi cüme elcünutuafiel Chau Jehová ñi ruca. 28 Cafei elfalcünungei com ti fillem Samuel ñi huichucünulelfiel ta Chau Dios, tüfachi huentru pequelu afmatun dungu, cafei chem ñi huichucünuel Saúl, tüfa Quis ñi fotüm, Abner, tüfa Ner ñi fotüm ca Joab, tüfa Zeruyá ñi püñeñ. Elfalcünulelngei Selomit ca tañi pu peñi com tañi huichucünulelngen ta Chau Dios.

29 Pu Izhar che meu mülefui Kenanías ca tañi pu fotüm. Tüfa engün elungei fill cüdau femngequenolu Chau Dios ñi ruca mu. Loncolefui ca juezngefui engün Israel mu.

30 Pu Hebrón che meu mülefui Hasabías ca tañi pu peñi, tüfa engün mil 700 adümuhun huentru. Conhue antü püle Jordán leufü mu elfalcünungeingün ñi adcünuafiel com dungu Israel mu. Com adcünuingün ñi poyengeal Chau Jehová ca cüdahuelfingün ti lonco ülmen. 31 Pu Hebrón che meu mülefui Jeriya. Tüfa loncolefui pu Hebrón che ñi familia mu chumngechi pengeli tañi tuhun engün. David yenielu 40 tripantu tañi ngünenieel, quintungei huentru llicaquenolu ca nehuen-ngelu pu Hebrón che meu. Jazer huaria mülelu Galaad mu pengei femngechi huentru. 32 Jeriya ca tañi pu peñi engün 2 mil 700 adümuhun huentrungefui, loncolefui tañi familia mu. Feimu ti lonco ülmen David elufi engün ñi adnieafiel pu Rubén che, pu Gad che ca Manasés ñi rangiñ troquiñche. Femngechi com adcünuingün ñi poyengeal Chau Ngünechen ca cüdahuelfingün ti lonco ülmen.