Miqueas

4 Afaelchi antü meu

ti mahuida cheu ñi mülen Chau Jehová ñi ruca

doi alüpüraleai caquelu mahuida mu ca cüme anücünungeai.

Cafei doi alüpüraleai caquelu huincul mu,

üye mu puucüleaingün pu troquiñche.

“Amuiñ, pürapuiñ Chau Jehová ñi huincul mu,

Jacob ñi Ngünechen tañi ruca mu.

Quisu quimeltuaiñmu tañi rüpü,

fei iñchiñ miyahuaiñ chumngechi ñi ayünieel”.

Sion mu tripayai ti ley,*

Jerusalén mu tripayai Chau Jehová ñi dungun.

 3 Quisu juezcüleai fentren troquiñche meu

ca cüme elcünutuafi huesaque dungu ñi nieel nehuen-ngechi troquiñche camapulelu.

Araucünuafingün tañi fütraque cuchillo

ca rosehuecünuafingün tañi huaiqui.*

Pu troquiñche hueluquentu hueichaulayaingün*

ca quimhuetulayaingün chumngechi ñi quehuayal.

 4 Caque quiñeque anücünuhuaingün miñche tañi anüm ofad ca miñche tañi higuera mu.

Inei no rume llicalcalayayu.

Chau Jehová Ñidolcülelu pu hueichafe mu feipicünui tüfa.

 5 Com pu troquiñche, tañi pu dios ñi üi mu miyahuaingün.

Huelu iñchiñ, rumel mu miyahuaiñ taiñ Chau Dios Jehová ñi üi mu.

 6 Chau Jehová feipi: “Feichi antü,

huitrañpüramafiñ tati cüntrolelu,

trahultuafiñ tati cañpüle puhulngelu

ca tati pu che iñche ñi cutrancafiel.

 7 Montulafiñ quiñe troquiñ tati pu cüntrolelu mu.

Quiñe nehuen-ngechi troquiñche femcünuafiñ tati cañpüle puhulngelu.

Sion huincul mu Chau Jehová ngünenieafi engün,

fantepu ca rumel meu.

 8 Ahuem, alüpüralechi ruca ñi incañpequefiel ti quechan,

tati huinculcülechi mapu Sion tañi püñeñ mu,

feichi cuifi* ngüneniequefulu huiñotuai eimi mu,

felei llemai, Jerusalén tañi püñeñ huiño ngen-ngetuai tañi ngünenieal.

¿Niehuelaimi lonco ülmen?

¿Lapei mai tami ngülamtufe?

¿Feimu fente cutrancaumequeimi choyüpechi domo reque?

10 Ahuem, Sion ñi püñeñ, rume cutrancahuaimi

quiñe choyüpechi domo reque.

Feula tripatuaimi tati huaria mu, lelfün mu mülepuaimi.

Babilonia mu puhuaimi.

Tiye mu montulngeaimi,

tiye mu Chau Jehová montulaimu* tami pu caiñe mu.

11 Fei fentren troquiñche trahuluhuaingün tami quehuayaeteu,

feipiaingün: ‘Com apümcangepe Sion,

cüpa pefiyiñ tati’.

12 Huelu quimüñmalafingün Chau Jehová ñi raquiduam,

quimlaingün tañi ayünieel.*

Quisu trahulafi engün cheu ñi pünongequen quetran quiñe cütrüng cachilla reque* hue catrüngelu.

13 Ahuem, Sion ñi püñeñ, huitrapürange, pünoquetran-nge.

Pañillhuecünuafiñ* tami müta,

cobrecünuafiñ tami huili,

eimi cai trufürcünuafimi fentren troquiñche.

Tañi huehuel engün norngenochi dungu meu eluafimi ta Chau Jehová,

tañi nieel engün eluafimi tati Ñidol* com mapu meu”.