1 Crónicas
22 Fei David feipi: “Fau müleai Chau Ngünechen Jehová ñi ruca. Cafei tüfa mu müleai quiñe altar cheu ñi hulal lüpümngeelchi chalintucun* pu Israel che”.
2 Fei hula David huercüfalfi ñi trahulngeal pu ca cüpanche mülelu Israel mapu mu. David elfalcünufi engün ñi catrücayafiel cura ca ñi cüdahual cura meu, femngechi ñi deumayal Chau Ngünechen ñi ruca. 3 David ca ngülümcünui fentren pañillhue* ñi deumayal clafu tucungealu puerta mu, ca ngülümi chemcün* grapa reque felelu, cafei rume fentren cobre. Pepi fanetungelai. 4 Cafei pu Sidón che ca pu Tiro che cüpalelfingün ta David fentren cedro mamüll, feimu David ca ngülümi rume fentren cedro mamüll. 5 David feipi: “Tañi fotüm Salomón petu hueche huentrungei, nielai adümuhun. Ca tati ruca ñi deumalelngeal ta Chau Jehová mülei ñi afmatufalngeal, femngechi cüme quimngeai com troquiñche mu ca quimngeai tañi cüme adcülen. Feimu ngülümcünulelafiñ tañi fotüm fentren chemcün tañi deumarucayal”. Feimu David petu tañi lanon, fentren chemcün ngülümcünui.
6 Cafei mütrümfi* tañi fotüm Salomón ca elfalcünulelfi ñi deumalelafiel quiñe ruca ta Chau Jehová, Israel ñi Chau Ngünechen. 7 David feipifi tañi fotüm Salomón: “Tañi piuque meu ayüfun ñi deumayal quiñe ruca tañi püramyengeal tañi Chau Ngünechen Jehová ñi üi. 8 Huelu llohun Chau Jehová ñi dungu. Feipingen: ‘Eimi langümfimi fentren che ca quehuaqueimi fütraque hueichan.* Iñche tañi adquiñ mu langümfimi fentren che, feimu deumalayaimi quiñe ruca ñi püramyengeal tañi üi. 9 Eimi nieaimi quiñe fotüm, fei tüngcülen mongeleai.* Hualloñmayayu* pu caiñe, huelu cuñiutucuafiñ com engün meu. Salomón* pingeai tañi üi ca petu ngüneniele, eluafiñ pu Israel che ñi tüngcüleal ca tañi cüme feleal. 10 Quisu deumayai quiñe ruca ñi püramyengeal iñche tañi üi. Fei chauyeaeneu ca iñche fotümyeafiñ. Iñche rüf eluafiñ tañi rumel ngünenieafiel ta Israel’.
11 Feula, poyen fotüm, Chau Jehová mülepe eimi mu, cüme miyahuaimi ca deumayaimi tami Chau Ngünechen Jehová ñi ruca, chumngechi feipicünui Chau Dios eimi mu. 12 Doi mai, Chau Jehová tañi pin mu nieaimi quimün ca adümuhun eluelmu tami ngünenieafiel ta Israel. Femngechi inayafimi tami Chau Ngünechen Jehová ñi ley dungu. 13 Cüme inayafimi Chau Dios ñi feipin ca tañi ley dungu Moisés ñi elufiel pu Israel che Chau Jehová tañi pin mu. Femülmi, cüme miyahuaimi. Yafüluucülenge ca nehuen piuquecünuunge. Llicalayaimi ca pellquelayaimi rume. 14 Rume cüdahun ca pepicacünun ñi deumangeal Chau Jehová ñi ruca. Fei ngülümcünun 3 millon 400 mil kilo* oro,* 34 millon kilo* plata, rume fentren cobre ca pañillhue. Pepi fanetungelai. Ca ngülümcünun mamüll ca cura, huelu eimi doi ngülümaimi. 15 Nieimi fentren cüdaufe: pu catrücafilu cura, pu che cüdauquelu cura meu, pu che cüdauquelu mamüll mu ca itrofill cüdaufe adümuucülelu. 16 Raquifalngelai ti oro, plata, cobre ca pañillhue. Eluhuaimi tami cüdahual. Chau Jehová mai quelluaimu”.
17 Fei hula David feipifi com Israel ñi pu principe ñi quelluafiel tañi fotüm Salomón. Feipifi engün: 18 “Tamün Chau Ngünechen Jehová mülei eimün mu, ca fill püle elueimünmu cüme felen, ¿felei no am? Tüfachi mapu mu Chau Ngünechen elueneu com pu che. Cafei Chau Jehová ca tañi pu che ngüneniequefi tüfachi mapu. 19 Feula eluhuaimün tamün quintuafiel tamün Chau Ngünechen Jehová com piuque mu ca com nehuen mu.* Eluhuaimün tamün deumayal Chau Ngünechen Jehová ñi yamfal mülehue.* Femngechi cüpalngeai ti falin caja pengelquelu Chau Jehová ñi eldungu ca Chau Ngünechen ñi yamfal chemcün. Com tüfa cüpalngeai ti ruca mu deumangealu ñi püramyengeal Chau Jehová ñi üi”.