1 Crónicas

29 Fei hula ti lonco ülmen David feipifi com ti trahunche: “Chau Ngünechen dullifi tañi fotüm Salomón, huelu petu hueche huentrungei, nielai adümuhun ca fütra cüdau mülei ñi femal. Tüfachi fütra ruca* deumalelngelayai ta quiñe huentru, doi mai deumalelngeai ta Chau Jehová. 2 Nehuentu cüdahun, fei com pepicacünun ñi deumangeal tañi Chau Ngünechen ñi ruca. Trapümfiñ ti oro* ñi deumayal fillque cüdau oro mu, ti plata ñi deumayal fillque cüdau plata mu, ti cobre ñi deumayal fillque cüdau cobre mu, ti pañillhue* ñi deumayal fillque cüdau pañillhue mu, ti mamüll ñi deumayal fillque cüdau mamüll mu. Cafei trapümfiñ onice cura, cura ñi pünantucungeal argamasa mu,* pichique cura ñi deumangeal mosaico, fillque falichi cura ca fentren alabastro pingechi cura.* 3 Cafei ñi falintufiel mu tañi Chau Ngünechen ñi ruca, hulün quisu tañi oro ca tañi plata tañi Chau Ngünechen ñi ruca mu. Cafei fentren fillem pepicacünun ñi deumalelngeal ti ruca ta Chau Dios. 4 Cafei 102 mil 600 kilo* oro ofir mu tuulu ca 239 mil 400 kilo* lifngechi plata, femngechi ñi tacuafiel fillque pieza ñi pared,* 5 ñi femngeal cüdau oro meu, ñi femngeal cüdau plata mu ca pu artesano ñi entual com ti cüdau. Fachantü cai, ¿inei ayüi ñi cüpalelafiel quiñe yehun* ta Chau Jehová?”.

6 Fei quelluconingün pu principe quisuque familia mu, pu principe Israel ñi troquiñche mu, pu loncolelu mil hueichafe mu* ca pu loncolelu 100 hueichafe mu ca pu elfalcünungelu ti lonco ülmen ñi fillque duam. 7 Hulingün 171 mil kilo* oro, 10 mil oro moneda,* 342 mil kilo* plata, 615 mil 600 kilo* cobre ca 3 millon 420 mil kilo* pañillhue. Tüfa hulingün ñi femngeal chi cüdau Chau Ngünechen ñi ruca mu. 8 Pu che nielu falichi cura hulingün feichi cura ñi trapümngeal cheu ñi ngülümngen falinque fillem Chau Jehová ñi ruca mu. Tüfa elfalcünungei Jehiel, Guersón ñi cüpanche. 9 Pu che ayüucülei hulün mu tañi nieel quisu ñi pin mu, com piuque mu elufingün ta Chau Jehová tañi nieel. Ca tati lonco ülmen David rume ayüucülefui.

10 Fei hula David püramyefi ta Chau Jehová com ti trahunche ñi adquiñ mu. David feipi: “Rumel püramyengepe Chau Jehová. Ahuem, taiñ chau Israel ñi Ngünechen. 11 Ahuem, Chau Jehová, eimi alüpüraleimi, fütra nehuen-ngeimi, afmatufalngeimi, püramyefalngeimi ca yamfalngeimi.* Com ti mülelu huenu mu ca mapu mu eimi ngen-ngeimi. Ahuem, Chau Jehová, eimi ngünenieimi. Eimi com ngünenieimi. 12 Eimi hulqueimi falinque fillem ca püramyechequeimi. Eimi com ngünenieimi ca com nehuen nieimi. Tami cuhu mu püramyequefimi ca yafültucuquefimi com che. 13 Feula, ahuem, taiñ Chau Ngünechen, mañumuhuiyiñ ca püramyehuiyiñ tami fütra üi.

14 Iñchiñ eluhuiyiñ chalintucun* quisu taiñ pin mu, huelu ¿inei am ta iñche ca tañi troquiñche? Itrocom eimi mu cüpai ca tami cuhu mu cüpai chem taiñ elufiel ta eimi. 15 Tami adquiñ mu ca cüpanchengeiñ, femngechi felefui com taiñ cuifiqueche. Taiñ mongen mapu mu quiñe llaufeñ* reque felei, ngelai maneluhun. 16 Ahuem, taiñ Chau Ngünechen Jehová, deumaleluhuaiñ quiñe ruca cheu püramyengeai tami yamfal üi, feimu trapümiyiñ com tüfachi fillem, huelu com tüfa tami cuhu mu cüpai. Com ngünenieimi. 17 Ahuem, tañi Chau Ngünechen, iñche cüme quimnien eimi ngüneduamqueimi pu che ñi piuque ca ayüqueimi ti nor dungu. Tañi cüme piuquengen mu ngülümün com tüfachi dungu iñche tañi pin mu ca rume ayühun ñi pefiel tami pu che, fau mülepaingün tami cüpalelaeteu chalintucun quisu tañi pin mu. 18 Ahuem, Chau Jehová, taiñ cuifiqueche Abrahán, Isaac ca Israel ñi Ngünechen, quelluafimi tüfachi troquiñche ñi amuleal ñi femngechi femquen cüme duam mu ca tami cüdahuelaeteu com piuque mu. 19 Quellufinge tañi fotüm Salomón com piuque mu ñi inayal tami huercün dungu, tami ngülam ca tami feipin. Ca quellufinge ñi femal com tüfachi dungu. Iñche deu pepicacünun itrofill chemcün,* feimu quellufinge tañi deumayafiel tami ruca”.*

20 Fei hula David feipifi com ti trahunche: “Feula püramyeafimün tamün Chau Ngünechen Jehová”. Fei com ti trahunche püramyefi ta Jehová, tañi cuifiqueche ñi Chau Ngünechen. Fei lucutunagingün ca pochongnagingün* Chau Jehová ca ti lonco ülmen ñi adquiñ mu. 21 Amulei ñi elufiel chalintucun ta Chau Jehová ca antü hula. Cafei hulingün lüpümngeelchi chalintucun ta Chau Jehová: mil hue toro, mil caniru* ca mil cordero ca hutrulngeelchi chalintucun.* Hulingün fentren chalintucun com pu Israel che ñi duam mu. 22 Feichi antü fente tañi ayüucülen imequeingün ca putumequeingün* Chau Jehová ñi adquiñ mu. Ca huiño lonco ülmencünufingün ta Salomón, David ñi fotüm. Dullifingün ñi loncoleal Chau Jehová ñi adquiñ mu. Cafei sacerdotecünufingün ta Sadoc. 23 Salomón anünagi Chau Jehová ñi ülmen huancu mu tañi lonco ülmen-ngeal ca hueluconi tañi chau David mu. Cüme tripai ñi femün ca com pu Israel che inaeyu ñi feipin. 24 Com pu principe, pu nehuen-ngechi hueichafe ca com ti lonco ülmen David ñi pu yall* eluhuingün ñi ngünenieaeteu ti lonco ülmen Salomón. 25 Chau Jehová tañi pin mu, Salomón rume yamniengefui com Israel mu ca doi püramyengei ta Salomón com caquelu lonco ülmen mülequefulu Israel mu.

26 David, Jesé ñi fotüm, ngüneniefui com Israel. 27 David 40 tripantu ngüneniefui Israel. Fei 7 tripantu ngüneniefui Hebrón huaria ca 33 tripantu ngüneniefui Jerusalén huaria mu. 28 David nierquei fentren tripantu ca cüme duamcülefui, fei lai. Ca nierquei itrofillem ca rume yamniengefui. Ca tañi fotüm Salomón hue lonco ülmen-ngetui. 29 Samuel, ti huentru pequelu afmatun dungu, Natán, tüfa Chau Ngünechen ñi huerquen ca Gad, ti huentru pequelu afmatun dungu, huirintucuingün com ñi rupan ti lonco ülmen David, 30 cafei com tañi ngünenieel, tañi fütra nehuen, chem tañi rupan, ñi rupan Israel mu ca ñi rupan com caquelu troquiñche ñi hualloñmanieteu.*