Isaías
51 Allcütumuchi, eimün pu inamequelu ti nor dungu,
eimün pu quintumequefilu ta Chau Jehová.
Ngüneduamfimün ti fütra cura cheu catrünentungeimün
ca ti fütra lolo cheu entungeimün.
2 Ngüneduamfimün tamün chau Abrahán
ca Sara tamün choyüeteu.
Abrahán quisu müten mülequefui mütrümfilu* iñche,
huelu cümelcafiñ ca femcünun ñi alün-ngerpual tañi pu cüpanche.
3 Chau Jehová yafültucuafi ta Sion,
com teifücalelu cüme elcünutuafi.*
Edén reque femcünuafi tañi huellin mapu*
Tati lafcülechi huellin mapu Chau Jehová femcünuafi tañi cüme lelfün reque.
Üye mu müleai fentren ayühun, cüme duam,
ayüfalchi ül ca pengelngeai mañumtun.
4 Iñche ñi pu che, ngüneduammuchi.
Saquin troquiñche, allcütumuchi.
Iñche mu tripayai quiñe ley
ca femcünuafiñ tañi nor dungu quiñe pelon reque pu troquiñche mu.
5 Tañi nor dungu püllelepai
ca tañi montulchen femtripayai.
Tañi nehuen mu juiciantucuafiñ pu troquiñche.
Pu che huapi mu mülelu maneluhuaingün iñche mu
ca üngümcüleaingün* ñi pengelal tañi nehuen.
6 Püraquintumün huenu mu
ca nagquintumün mapu meu.
Huenu afrumeai fitrun reque,*
ti mapu huesañmaleai tacun reque,
ti pu che layaingün pichique pülü reque.
Huelu tañi montulchequen rumel müleai
ca tañi nor dungu turpu aflayai.
7 Eimün, troquiñche, quimniefimün ti nor dungu
ca tamün piuque mu nieimün tañi ley,* allcütumuchi.
Llicaquefilmün pu huentru tamün ayentumequeteu,
ca pellquequilmün huesa pielmünmeu.
8 Quiñe piru iyafi engün quiñe tacun reque.
Ti piru com iyafi engün cal ufisa reque.
Huelu tañi nor dungu rumel müleai
ca tañi montulchequen müleai tunten tripantu rupafule rume.
9 Chau Jehová ñi lipang eluupe ñi femal ca pengelpe ñi nehuen.
Felei, tañi lipang eluupe ñi femal.
Fempe chumngechi ñi femquefel fütra cuifi.
¿Eimi no am catrücafimi ta Rahab*
ca allfülcafimi fütra culliñ lafquen mu?
10 ¿Eimi no am arcümfimi* ti lafquen, rume alüconchi co?
¿Eimi no am elcünufimi quiñe rüpü reque ti llufü lafquen,* femngechi ñi notual pu ngillanentungelu?
11 Chau Jehová ñi montulfielchi pu che huiñotuaingün.
Cüpatuaingün Sion mu, fei ayühun mu huiraraingün.
Rumel ayüucületuaingün.
Nieaingün fentren ayühun ca pürapapiuqueleaingün.
Ngehuelayai hueñancün ca afduamhuelayai che.
12 “Iñche llemai yafültucumequehuiyiñ.
Quiñe pecan huentru layalu
cam quiñe huentru ñi fotüm tonfünagalu carü cachu reque, ¿chumngelu* llicayafimi?
13 Chau Jehová deumaimu,
ünifcünufi* ti huenu ca anücünufi ti mapu.
Fei, ¿chumngelu* ngoimanentufimi?*
Huelu, ¿amulepei mai tañi illcun mu tami ahucamequeteu?
14 Tati pu pochongcülelu* ca trapelcülelu cadena mu müchai müten lifrenentungeaingün.
Lalayaingün, ütrüftucungelayaingün rüngan mu
ca nielan cofque pilayaingün.
15 Huelu iñche tami Chau Dios Jehová.
Nengümcaquefiñ ti lafquen ca femcünuquen ñi raracüleal ti reu lafquen.*
Iñche ta Chau Jehová, tati Ñidolcülelu pu hueichafe mu.*
16 Tucuan tañi dungun tami hun mu
ca cuñiutucuayu tañi cuhu ñi llaufeñ mu,*
femngechi ñi elcünuafiel ti huenu, ñi anücünuafiel ti mapu
ca ñi feipiafiel ta Sion: ‘Eimi iñche tañi troquiñche’.
17 ¡Nepenge! ¡Nepenge! Huitrange, ahuem, Jerusalén.
Chau Jehová nüniei tati copa nielu tañi illcun, eimi putufimi.*
Putufimi tañi copa pulcu,
com putufimi tati copa mutrurelchequelu.
18 Quiñe tami nieelchi püñeñ no rume mülelai tami adnieaeteu.
Quiñe tami tremümfielchi püñeñ no rume nüñmalaeimu tami cuhu.
19 Tüfachi dungu mu rupayaimi.
Apümcangeaimi ca cutrancahuaimi.
Rupayaimi filla ca hueichan meu.
¿Inei cutranpiuqueyeaimu?
¿Inei am yafültucuaimu?
20 Tami pu püñeñ rupaduamingün.*
Fillque rüpü ñi ellaconün mu tranalehueingün
auca ufisa reque* nülcüconcülelu huachi meu.
Femngechi dungu rupaingün Jehová ñi illcutunieteu engün ca ñi rume cutrancaeteu”.
21 Eimi domo, cutrancaucüleimi ca ngollileimi, huelu pulcu mu no.
Füreneen, allcütunge tüfa.
22 Tüfa ñi feipin tami Ñidol Jehová, eimi tami Chau Dios, tati incañpequefilu tañi pu che:
“Tami cuhu mu müntuñmayayu* ti copa mutrurelchequelu,
ti copa pulcu, ti copa nielu iñche tañi illcun.
Putuhuelayafimi.
23 Tami pu ahucaqueteu ñi cuhu mu elcünuafiñ.
Fei engün feipieimu nga: ‘Pochongnagnge, rupayaiñ huente eimi mu’.
Tami furi femcünufimi quiñe mapu reque,
quiñe rüpü reque tañi pünoal engün”.