Isaías
59 Chau Jehová ñi nehuen puulai ñi montulcheal pingelayafui,
ca tañi pilun allcüquelai pingelayafui.
2 Huelu mai tamün culpan* ñi duam mu püntütripaimün* tamün Chau Dios mu.
Tamün culpan mu Chau Dios ellcacünui* ñi ange eimün mu
ca cüpa allcütuquelaeimünmeu.
3 Tamün cuhu podcülei mollfüñ mu
ca tamün changüll cuhu podcülei culpan mu.*
Tamün hun mu tripaquei coilaque dungu ca tamün quehun dümdüm dungumequei* norngenochi dungu.
4 Inei no rume nehuentu dunguquelai ñi incañpeafiel ti nor dungu.
Ca inei no rume rüf dunguquelai amun mu juicio meu.
Maneluucüleingün falinochi dungu mu ca ngünam dungu feipiqueingün.
Huesaque dungu raquiduamqueingün, ca choyüquefingün cutrancahun dungu.
5 Llüpañmaniefingün venenongechi filu ñi curam,
ca ngürecaquefingün telaraña.
Tuchi ifile ti curam, layai.
Ca trafole ti curam, tripayai quiñe venenongechi filu.
6 Tuculayafuingün tañi telaraña huesaquelu reque
ca taculayafeyu tañi deumael engün.
Tañi femün engün huesalcalei,
ca tañi cuhu mu femqueingün ahucan dungu ca quehuan dungu.
7 Lefqueingün tañi femal huesaque dungu.
Matu amuqueingün ñi langümafiel culpanochi che.
Re huesaque raquiduam nieingün.
Hueluquentu apümcauqueingün ca cutrancauqueingün.
8 Quimlafingün ti tüngcülechi rüpü,*
mülelai nor dungu tañi rüpü mu engün.
Trompeucünuquefingün* tañi rüpü,
inei rume pünole fei mu, tüngcülelayai.
9 Feimu lle ti nor dungu camapulei iñchiñ mu,
ti nor dungu ditulayafeiñmu.
Üngümcüleiñ* ñi müleal pelon, huelu dumiñ ta mülerquei.
Üngümcüleiñ ñi alofcüleal antü, huelu dumiñ mu ta miyahuiyiñ.
10 Trauma reque sumpatuquefiyiñ* ti traf ruca.
Mequeiñ taiñ sumpatuyahun tati pu pelonolu reque.
Mutrurquiyauqueiñ rangiantü mu chumngechi femqueiñ deu dumdumnaglu.*
Rangi tati pu nehuen-ngelu mu la reque feleiñ.
11 Mürülquiyahuiyiñ oso reque
ca hueñancün mu eyütumequeiñ paloma reque.
Üngümcüleiñ ñi müleal nor dungu, huelu mülelai.
Üngümcüleiñ ñi müleal montuluhun, huelu rume camapulei iñchiñ mu.
12 Fentren rupa trencül piuquecünuhuiyiñ* tami adquiñ mu.
Caque quiñeque taiñ culpan* pengelquei taiñ culpafengen.
Quimtucunieiñ taiñ trencül piuquengen,
cüme quimnieiñ taiñ huelulcauquen.
13 Culpaiñ* ca quiñepülecünufiyiñ ta Jehová,
furintucufiyiñ taiñ Chau Dios.
Ahucan dungu ca chaftun dungu mu nütramcahuiyiñ.
Raquiduamqueiñ chem coila dungu taiñ feipial, fei hula coilatuqueiñ.
14 Ti nor dungu cañpüle huercüngei reque
ca ti norngelu camapulei.
Plaza mu inei no rume rüf dunguquelai,
ca tati nor che conpulayafui.
Chau Jehová pefi tüfa, fei turpu ayülafi,
mülenolu am nor dungu.
16 Ngüneduami inei no rume ñi quelluchequenon.
Ca afmatui inei no rume ñi rangiñelhuelenon.
Fei tañi nehuen-ngechi lipang mu cüpali montuluhun,
tañi nor dungu nehuentucueyu.
17 Nor dungu mu tucutuhui quiñe soltau reque ñi cuñiutucuhual tañi rücu.
Cafei ti montuluhun casco reque tucufi tañi lonco mu.
Tacun reque tucutuhui ti nor dungu ñi huiñoleltuafiel ñi femün tañi pu caiñe,
ca tacun mu tucutuucülei reque fente ñi eluucülen tañi cüme elcünutuafiel ti dungu.
18 Ñi huesa femün engün ca femngechi huiñoleltuafi:
illcutuafi* tañi pu chaftueteu, cutrancayafi tañi pu caiñe,
ca tati pu che huapi mu mülelu huiñoleltuafi ñi femün.
19 Tati pu mülelu conhue antü püle rume yamnieafingün* Chau Jehová ñi üi.
Ca tati pu mülelu tripahue antü püle rume yamnieafingün tañi afmatufalngen.
Fei cüpayai illculechi leufü reque,
adnieayu Chau Jehová ñi nehuen.
20 Chau Jehová feipi: “Ti Ngillanentuquelu cüpayai Sion mu,
cheu ñi mülen Jacob ñi pu cüpanche ñi elcünuel engün ti culpan dungu”.*
21 Chau Jehová feipi: “Iñche cai tüfa eldungucünuafiñ engün. Tañi nehuen eimi mu mülei ca tami hun mu tucufiñ tañi dungun. Fei tüfa mülecayai tami hun mu, tami pu fotüm ñi hun mu ca tami pu lacu* ñi hun mu, fantepu ca rumel mu” pi Chau Jehová.