Isaías
30 Chau Jehová feipi: “¡Aungeai pu fotüm yafü piuquengelu!
Femqueingün tañi ayünieel müten, huelu iñche tañi ayünieel no,
pinon mu rume iñche, quiñeuqueingün caquelu che engün,*
femngechi doi culpan dungu mu* conqueingün.
2 Amuqueingün ta Egipto, huelu ramtuquelaeneu rume,
ayünieingün ñi incañpeaeteu ti Faraón,
ca ellcauqueingün Egipto ñi llaufeñ meu.*
3 Huelu yehuelcangeaimün tamün incañpeteu mu ti Faraón,
ca illamcangeaimün tamün ellcahun mu Egipto ñi llaufeñ meu.
4 Pu principe müleingün Zoan huaria mu,
ca pu huerquen puhuingün Hanés meu.
5 Pu Egipto che quelluchequelaingün,
feimu yehuentucuafingün pu Israel che,
quellulayafingün ca cümelcalayafingün,
huelu mai ayentucuafingün ca illamcayafingün”.
6 Tüfachi juician dungu feipicünulelngei tati pu culliñ sur mu mülelu:*
Pu huerquen yefingün tañi falinque fillem huente burro mu,
ca tañi fillque yehun* huente camello mu.
Rupaingün cuñihun-ngechi mapu meu,
cheu ñi mülen trapial, mürülquiyauchi trapial,*
ca pu venenongechi filu matu nengümuuquelu.
Huelu com feitichi falinque fillem quellulayayu engün.
7 Egipto tañi quellun falilai,
feimu üitucufiñ “Rahab,* tati chumquenolu”.
8 “Feula amunge, com tüfachi dungu quisu engün tañi adquiñ meu huirintucuafimi laf cura mu,*
ca huirintucufinge quiñe lifru mu.
Tüfa pünengeai cüpalechi antü meu,
femngechi rumel mu quimfalcünungeai tañi feipin.
9 Feitichi pu fotüm ngünencachequeingün,
cüpa allcütuquelaingün Chau Jehová ñi ley,*
tüfachi troquiñche yafü loncongeingün.
10 Fei engün feipiquefingün Chau Dios tañi pu huerquen: ‘Fentecünumün’.
Ca feipiquefingün pu pequelu afmatun dungu: ‘Feipimulayaiñ rüfngechi afmatun dungu.
Doi mai feipimuiñ ayüfalchi dungu, feipimuiñ mai coila afmatun dungu.
11 Famtripamün ti rüpü meu, püntütripamün,
dungumuhuelayaiñ Israel ñi Lifngechi Ngünechen meu’”.
12 Feimu tüfa ñi feipin Israel ñi Lifngechi Ngünechen:
“Eimün famentufimün* tüfachi feipin,
ca maneluucüleimün coila dungu mu ca ngünencan meu,
ca recüluuqueimün tüfa mu.
13 Tamün huelulcan mu quiñe huechodcülechi cura malal reque feleaimün,
quiñe alüpürachi malal reque cülülelu ca epe tranapuucülelu.
Fei matu müten teifünagai.
14 Trafocahuai quiñe fütra metahue reque rag mu* deumangelu,
fente cüme teifücaleai, feimu quiñe triran no rume
pünengelayafui ñi entual ailen cütral,
cam ñi entual co cheu ñi ngülcülen”.*
15 Tüfa ñi feipin tati Doi Fütra Ñidol Jehová, Israel ñi Lifngechi Ngünechen:
“Huiñotulmün iñche meu, ca tüngcülen mu* üngümcülelmün,* montulngeaimün.
Tüngcülemün ca maneluucülemün, femngechi nehuencüleaimün”.
Huelu eimün eluulaimün tamün femal.
16 Huelu mai feipimün: “¡Femlayaiñ! ¡Cahuellu mu lefmahuaiñ!”.
Felei, eimün lefmahuaimün.
Ca feipimün: “¡Charcharquiyauchi* cahuellu mu tripayaiñ!”.
Felei, matuyahuai tamün inantucunieaeteu.
17 Quiñe huentru ñi aneltun mu müten* 1.000 che lefmahuaingün.
Quechu che aneltuaimünmeu, fei lefmahuaimün.
Chem mülehuele eimün meu, quiñe quisulechi orcon reque feleai huechuñ huincul meu,
quiñe pengelcülechi orcon reque huitralelu mahuida mu.
18 Chau Jehová ñochi duam mu üngümcülei tamün füreneaeteu,
eluhuai tamün cutranpiuqueyeaeteu.
Chau Jehová quiñe Dios nor juzgachequelu.
Feimu ayühun niei com pu maneluucülelu* quisu meu.
19 Pu Sion che huiñotule ta Jerusalén, rüfcünu llemai eimi ngümacahuelayaimi. Huirarülmi tami quellungeal, quisu rüfcünu füreneaimu. Allcütuelmu müten, quisu huiñoldunguaimu.* 20 Chau Jehová cofque reque eluaimu tami cutrantupiuquelngeal. Co reque eluaimu tami cutrancangeal. Tami Fütra Quimeltuchefe ellcauhuelayai.* Tami nge mu peafimi tami Fütra Quimeltuchefe. 21 Fei famtripalmi man püle cam huele püle, tüfachi dungun allcütuaimi tami furi püle: “Tüfa tati rüpü, fau püle miyaunge”.
22 Feitichi adentun* tami poyefiel ca tami impolcünufiel* plata ca oro mu,* mülei tami apümcayafiel. Ütrüftucuafimi quiñe mollfüñcülechi pañu reque, feipiafimi: “¡Tripatunge!”.* 23 Chau Dios hulai mahun, fei ñi tremal ti fün tami nganel mapu mu. Fentren cümeque iyael hulai ti mapu. Feichi antü tami quechan culliñ ütayai fütraque lelfün meu. 24 Pu toro ca burro cüdauquefilu ti mapu elungeai cümeque iyael, feitichi iyael pala ca horqueta mu* ütrüfpüramngei ñi liftungeal. 25 Fütra langümchen mülele, trananagai alüpürachi ruca, müleai huitrunco com fütraque mahuida ca fütraque huincul meu. 26 Puhuai chi antü Chau Jehová ñi impolafiel tañi pu che ñi allfen. Quisu cupafcafi engün, fei allfülfi, huelu tremoltuafi. Feichi mu apo cüyen ñi ale* pelontuai chumngechi ñi pelontuquen ti antü. Ti antü 7 rupa doicünuai ñi alofün. Quiñe antü mu müten alofai chumngechi ñi femqueel 7 antü meu.
Illculen mu dungumequei,
tañi quehun quiñe fütra cütral reque felei.
28 Quisu tañi nehuen* quiñe huitrunco reque felei fütra mangiñlu, ti co pel püle puuquei.
Epuñpüle nengümafi fillque troquiñche, quiñe cedazo mu rulpayafi ñi apümcangeal.
Feiti fillque troquiñche tuculelafi quiñe huitrantucuhue, fei femngechi yengeaingün ñi apümcangeal.
29 Pun meu petu pepicamequelu ta che ñi conal quiñe yamfal fiesta mu,*
ülcantuqueingün, fei ca femngechi ülcantuaimün.
Quiñe che amulei Chau Jehová ñi huincul meu, tüfa Israel ñi Fütra Cura,
ayühunquechi dungulmequefi ñi flauta,*
fei ca femngechi ayühuaimün.
30 Chau Jehová femcünuai ñi allcütungeal tañi afmatufalchi dungun.
Fente tañi illculen pengelai ñi rume nehuen-ngen tañi lipang.
31 Chau Jehová ñi dungun meu, Asiria rume llicayai,
quisu quiñe fara mu cupafcayafi.
32 Chau Jehová tañi fara mu
cupafcamequefile ta Asiria ñi cutrancayafiel,
ca allcün-ngeai pandero ca arpa,
huitrañpüramai ñi lipang tañi hueichayafiel engün.*
33 Deu pepicalei cheu ñi apümcangeal Asiria*
ca tañi lonco ülmen.
Chau Dios* femcünui ñi alüconal ca alürupayal ti cütralhue,
fei fentren cütral ca mamüll niei.
Chau Jehová ñi pimun quiñe azufre leufü reque felei,
femngechi üyümafi ti cütral.