Isaías
57 Ti nor che lai,
huelu inei no rume duamtulaeyu.
Pu huentru püntütripaquenolu* Chau Dios mu laingün,
huelu inei no rume quimtuculai ti nor che ñi lan tañi penoal cutrancahun.
2 Fei tüngcületui.*
Com pu miyaulu nor rüpü mu ürcütumequeingün tañi cahuitu mu.*
3 “Huelu eimün, calcu domo
ñi pu püñeñ, fülconpamün.*
Tamün chau pod cudumuhun mu conquei,* tamün ñuque pod mongen yeniei.*
4 ¿Chumngelu* fütra nülacünuimün tamün hun ca nentumequeimün tamün quehun?
¿Inei am ayentumequefimün?
¿Culpafe che* ca coilatufe che ñi pu yall no am* ta eimün?
5 ¿Eimün no am rume illutuqueimün rangi fütraque anümca,
miñche alürupachi anümca mu?
¿Eimün no am langümquefimün tamün pu yall laf mapu mu,*
rangi fütraque cura mu?
6 Eimi ayüquefimi laf mapu müleyechi cura,
tüfa tami dulliel tati.
Eluquefimi hutrulngeelchi chalintucun* ca regalo.
¿Ayüucüleafulu am* iñche tüfachi dungu mu?
7 Huechuñ fütra huincul mu pepicafimi tami cahuitu.
Tiye mu pürapuimi tami hulal chalintucun.
8 Ponhui tami ruca mu* elcünuimi quiñe adentun* poyengequelu.
Elcünuen ca triltrangcünuhuimi.
Püraimi tami cahuitu mu, quiñepülecünuhuimi.
Eldungucünulelfimi engün.
Rume ayüqueimi cuduleal quiñentrür fei engün.
Adquintuniequefuimi huentru ñi huillihue.*
9 Nagimi cheu ñi mülen Mélec,*
yeimi aceite ca fentren cüme nümün-ngelu.
Camapu huercüfimi tami pu huerquen,
femngechi nagimi Rüngan mu.*
10 Yafüngehuelaimi fente tami miyahun fill püle,
huelu turpu feipilaimi ‘Ngünam femmequen’.
Nehuencontuimi,
feimu fentecünulaimi.
11 ¿Chumngelu* coilatuimi?
¿Inei ñi duam mu fente llicaleimi ca pellqueleimi?
Raquiduamtuculaen.
Turpu duamcülelaimi.
Chem pilan rume ca rulpacünuñmaeyu tami femün,
feimu turpu yamnielaen.*
12 Pengelcünuan tami femün ca tami nor che femfaluuquen.
Huelu tüfa falilayai eimi mu.
13 Huirarcülelmi tami quellungeal,
tami pu fentren adentun montul-layaimu.
Quiñe cürüf com engün cañpüle yetuayu,
quiñe pichi cürüf müten yeayu engün.
Huelu tati maneluucülelu iñche mu
ngen-ngeai tüfachi mapu mu ca tañi lif huincul.
14 Feipingeai: ‘¡Deumamün quiñe rüpü, felei, deumamün! ¡Pepicacünufimün ti rüpü!
Tañi pu che ñi rüpü mu nentumün chem rume catrütumequelu’”.
15 Tati Rume Alüpüralelu rumel mongelequei ca yamfalngei tañi üi.
Tüfa ñi feipin:
“Alüpüralei ca yamfalngei cheu ñi mülen iñche.
Huelu cafei afcadiniefiñ pu cutrancaucülelu ca pu ngañhuadcülelu,*
femngechi ñi yafültucuafiel pu ngañhuadcülelu
ca ñi yafültucuñmayafiel ñi piuque tati pu cutrancaucülelu.
16 Rumel chaftunielayafiñ ca illcutunielayafiñ engün.*
Femfuli, pu che yafüngehuelayafui iñche tañi duam mu,
felei, yafüngehuelayafui pu mongelelu iñche ñi deumafiel.
17 Illcun Israel ñi huesa femün mu, ayüniequefui ñi huehual plata ngünencan mu.
Feimu cupafcafiñ, illcun mu eluhun ñi pengenoal tañi ange.
Huelu quisu fentecünulai ñi trencül piuquengen,* re inaniei chem ñi ayünieel tañi piuque.
18 Pefiñ ñi femün,
huelu tremoltuafiñ* ca adnieafiñ.
Cafei huiño yafültucuafiñ ca pu hueñancülelu quisu engu”.
19 Chau Jehová feipi: “Femcünumequen tañi püramyengeal.
Tati camapulelu ca tati fülcülelu rumel tüngcüleaingün,
fei iñche tremoltuafiñ engün.
20 Huelu pu huesaque che illculechi lafquen reque feleingün, pepi tüngcülelai,
feitichi lafquen ñi co entumequei pod ca fotra.*
21 Pu huesaque che turpu tüngcülelayaingün” pi tañi Chau Dios.