Isaías
33 ¡Aungeaimi eimi tati apümcaquelu, huelu turpu apümcangenolu,
eimi tati ngünencaquelu, huelu turpu ngünencangenolu!
Fentecünulmi tami apümcamequen, apümcangeaimi.
Fentecünulmi tami ngünencamequen, ngünencangeaimi.
2 Ahuem, Chau Jehová, fürenemuiñ,
eimi mu maneluucüleiñ.
Fillque pulihuen nehuentucumuiñ,*
felei llemai, montulmuiñ rupaliyiñ cutrancahun dungu meu.
3 Tati pu che allcütufiel tami nehuen-ngechi dungun lefmauqueingün,
Huitralu eimi pu troquiñche huall püle amuqueingün.
4 Pu langosta reque* ñi lümüfiel com tañi peel, ca femngechi lümüngeai tami falinque fillem,
langosta reque tati pu che nüafingün tami falinque fillem.
5 Chau Jehová huenu mu mülei,
feimu püramyengeai.
Quisu femcünuafi pu Sion che ñi nor chengeal.
6 Quisu eluqueimu tami cuñiutucuucüleal,
montulqueimu, eluqueimu quimün, adümuhun ca tami rume yamnieafiel* ta Chau Jehová.
Tüfa rume falin-ngei.*
7 ¡Tüfei! Tañi nehuen-ngechi huentru huirarmequeingün rüpü püle,
pu huerquen miyahulquefilu tüngcülechi dungu,* hueñancülen mu ngümacaumequeingün.
8 Ti rüpü huellilei,
inei no rume miyaulai rüpü püle.
Ti caiñe inahuelai ti eldungu,
famentufi fillque huaria,
duamtuquelafi chem che no rume.
9 Tüfachi mapu mu mülei hueñancün,* tonfünagi.
Ti Líbano yehuentucuhui, huesañmahui.
Sarón huellin mapungetui.*
Basán ca ti Carmelo mütrouquefi tañi tapül.
10 Chau Jehová feipi: “Feula huitrapürayan,
feula pengelan ñi nehuen,
feula pengelan ñi afmatufalngen.
11 Eimün huesaque che, tamün raquiduamqueel ca tamün femqueel chem no rume falilai. Ancülechi cachu ca congilhue reque felei.
Tamün huesaque raquiduam cütral reque lüpümaimünmeu.
12 Pu troquiñche trufquen-ngetuai.*
Cütraltungeaingün catrüelchi chacai reque.*
13 ¡Eimün, camapu mülelu, allcütumün chem tañi femal!
¡Eimün, fülmaucülelu, quimtucumün tañi nehuen!
14 Sion ñi pu culpafe* pellqueleingün,*
pu chaftuniefilu ta Chau Dios müllmüllmequeingün fente tañi llican, feipingün:
‘Iñchiñ mu, ¿inei am müleafui fütra cütral mu?
Iñchiñ mu, ¿inei am müleafui chongquenochi cütral meu?’.
15 Tati che rumel cüme femquelu,
tati nor dunguquelu,
quisu ayüquelai ñi huehual plata ngünencan mu ca norngenochi dungu meu,
tañi cuhu mu llouquelai cullitu ellcalen mu,*
tacuquei ñi pilun ñi allcütunoal langümchen mu,
umercünuquefi ñi nge tañi penoal huesaque dungu.
16 Feichi che müleai alüpürachi huincul mu,
cuñiutucun mu ellcahuai fütraque cura mu puhulfalngenolu.
Elungeai cofque
ca rumel nieai co”.
17 Tami nge mu peaimi quiñe lonco ülmen afmatufalngelu,
peaimi quiñe mapu alü camapulelu.
18 Tami piuque mu raquiduamtucunieafimi* feichi llicafalchi dungu, ramtuhuaimi:
“¿Cheu am ta mülei ti secretario?
¿Cheu am ta mülei ti fanefanetulu ti cullitu?
¿Cheu am ta mülei tati raquiquefilu alüpürachi ruca?”.
19 Pehuelayafimi ti yamquenochi troquiñche,
tañi quehun dungu cüdaungei, adümfalngelai.
Quetroquetrotu dunguqueingün, pepilfal-lai tati.
20 ¡Pefinge ta Sion, ti huaria cheu taiñ fiestaquen!
Tami nge mu peafimi ta Jerusalén, quiñe tüngcülechi mülehue reque,
quiñe tolto ruca* nengümngequenolu.
Tañi estaca turpu nentungelayai,
ca tañi def* quiñe no rume catrülayai.
21 Üye mu Chau Jehová, Fütra Pepiluhun-ngelu incañpeaiñmu.
Quiñe leufü cam huitrunco reque feleai incañpequefilu quiñe huaria.
Üye mu rupalayai quiñe hueichan farcu*
cam afmatufalchi farcu no rume.
22 Jehová fei taiñ Juez,
Jehová fei taiñ eluqueteu ley,
Jehová fei taiñ Lonco Ülmen,
quisu montulaiñmu.
23 Mücüfcülelayai tati def ñi nieel pu caiñe ñi farcu,*
feimu pepi huitralelayafui ti farcu ñi orcon* ca ünifngelayafui* ti vela.
Feichi mu hudamcünungeai quiñe fütra cullitu,
pu cüntrongelu ca nüafingün fentren fillem.
24 Inei no rume* “cutrancülen” pilayai.
Pu che mülealu tüfachi mapu mu rulpacünuñmangeai tañi culpan.*