Números

3 Tüfa Aarón ca Moisés tañi pu cüpanche feichi antü Chau Jehová dungufilu ta Moisés Sinaí huincul mu. 2 Tüfa Aarón tañi pu fotüm: tañi hunen fotüm Nadab, cafei Abihú, Eleazar ca Itamar. 3 Tüfa tañi üi Aarón ñi pu fotüm, fei engün dullingei ca elfalcünungei ñi sacerdotengeal. 4 Sinaí ñi huellin mapu meu,* Nadab ca Abihú chalintuculelfingu ta Chau Jehová, huelu ñi femnoafel engu. Feimu laingu Chau Jehová ñi adquiñ mu, ca nierquelaingu fotüm. Huelu Eleazar ca Itamar amulei ñi cüdaumequen engu tañi sacerdotengen quiñentrür tañi chau engün.

5 Fei Chau Jehová feipifi ta Moisés: 6 “Fülümpafinge pu Leví che. Huitracünuupe engün ti sacerdote Aarón ñi adquiñ mu, fei cüdahuelafi engün. 7 Itrotripa ti trahunhue tolto ruca mu* mülei ñi cüdahual engün. Femngechi cüdahuelafingün ta Aarón ca tati pu Israel che chumngechi ñi elfalcünulelngeel. 8 Elfalcünulelngeai engün itrofill chemcün* ñi mülen trahunhue tolto ruca mu ca femaingün ti cüdau duamniengelu fei mu. Femngechi serfinieafingün pu Israel che. 9 Hultucuafimi pu Leví che, eluafimi ta Aarón ca tañi pu fotüm. Pu Israel che mu püntünentungeingün* ñi elungeal ta Aarón quiñe yehun reque.* 10 Sacerdotecünuafimi ta Aarón ca tañi pu fotüm ñi cüdahual. Inei rume elungerquenolu ñi femal* fülconpule,* mülei tañi layal”.

11 Chau Jehová ca feipifi ta Moisés: 12 “Iñche dullirqueafun tati pu Israel che ñi hunenque fotüm. Huelu femlayan. Doi mai dulliafiñ tati pu Leví che. Ngen-ngean fei engün meu. 13 Iñche ngen-ngen com pu hunenque fotüm meu. Feichi antü langümfilu iñche com pu hunenque fotüm mülelu Egipto mapu meu, püntücünufiñ* iñchengeal com pu hunenque fotüm ca hunenque pichique culliñ Israel mu. Ngen-ngean fei engün meu. Iñche ta Chau Jehová”.

14 Chau Jehová huiño dungufi ta Moisés Sinaí ñi huellin mapu meu. Feipifi: 15 “Leví tañi troquiñche huirintucuñmayafimi tañi tuhunche ca tañi familia. Huirintucuafimi com pu huentru ca pichique huentru quiñe cüyen nielu cam doi”. 16 Moisés raquifi engün chumngechi ñi feipieteu Chau Jehová. 17 Tüfa Leví tañi pu fotüm: Guersón, Cohat ca Merarí.

18 Guersón tañi pu fotüm, fei ta Libní ca Simeí. Femngechi ca üitungequefui caque quiñeque engu tañi familia.

19 Cohat tañi pu fotüm, fei ta Amram, Izhar, Hebrón ca Uziel. Femngechi ca üitungequefui caque quiñeque engün tañi familia.

20 Merarí tañi pu fotüm, fei ta Mahlí ca Musí. Femngechi ca üitungequefui caque quiñeque engu tañi familia.

Tüfa pu Leví che ñi pu familia ca tañi tuhunche.

21 Guersón mu tripai pu Libní che ca Simeí che. Com tüfa pu Guersón che. 22 Raquingei com pu huentru ca pichique huentru quiñe cüyen nielu cam doi. Huirintucungei 7.500 huentru. 23 Conhue antü püle furitu ti ngillatuhue tolto ruca, pu Guersón che anücünuquefuingün tañi tolto ruca. 24 Eliasaf, Lael tañi fotüm, loncolei pu Guersón che ñi pu familia mu. 25 Ti trahunhue tolto ruca mu pu Guersón che elfalcünulelngei cuñiutucuafiel ti ngillatuhue tolto ruca, tañi fillque pañu, tañi tacun, ti cortina mülelu trahunhue tolto ruca ñi conhue püle, 26 ti lepün* ñi cortina ca ti cortina mülelu ti lepün ñi conhue mu, feitichi lepün hualloñmaniefi ti ngillatuhue tolto ruca ca ti altar.* Ca mülei ñi cuñiutucuafiel tañi def* ca itrocom ñi nüucülen tüfachi cüdau mu.

27 Cohat mu tripai pu Amram che, pu Izhar che, pu Hebrón che ca pu Uziel che. Com tüfa tati pu Cohat che. 28 Raquingei com pu huentru ca pichique huentru quiñe cüyen nielu cam doi. Huirintucungei 8.600 huentru. Pu Cohat che elfalcünulelngei ñi cuñiutucuafiel ti yamfal mülehue.* 29 Huaihuen püle* ti ngillatuhue tolto ruca, Cohat tañi pu che anücünuquefuingün tañi tolto ruca. 30 Elizafán, Uziel ñi fotüm, loncolei pu Cohat che ñi pu familia mu. 31 Elfalcünulelngei engün ti Falin Caja, ti mesa, ti candelabro,* ti altar ca itrofill chemcün pünengequelu ti yamfal mülehue mu. Cafei cuñiutucuafingün ti cortina mülelu ponhui mu ca itrocom ñi nüucülen tüfachi cüdau mu.

32 Eleazar, ti sacerdote Aarón ñi fotüm, fei tati hunen loncolelu pu Leví che meu. Quisu adniequefui pu huentru ñi elfalcünulelngeel fillque cüdau ti yamfal mülehue mu.

33 Merarí mu tripai pu Mahlí che ca pu Musí che. Com tüfa pu Merarí che. 34 Raquingei com pu huentru ca pichique huentru nielu quiñe cüyen cam doi. Huirintucungei 6.200 huentru. 35 Zuriel, Abihail ñi fotüm, loncolei pu Merarí che ñi pu familia mu. Picun püle* ti ngillatuhue tolto ruca mu anücünuquefuingün tañi tolto ruca. 36 Pu Merarí che elfalcünulelngei tati ngillatuhue tolto ruca ñi armazon, ñi moncol mamüll, ñi orcon ca ti chemcün cheu ñi anüleal, cafei tañi itrofill chemcün ca itrocom ñi nüucülen tüfachi cüdau meu. 37 Cafei elfalcünulelngei feitichi orcon hualloñmaniefilu ti lepün, ti chemcün cheu ñi anüleal, tañi estaca ca tañi def.

38 Tripahue antü püle itrotripa ti ngillatuhue tolto ruca, trahunhue tolto ruca ca pingelu, Moisés, Aarón ca tañi pu fotüm anücünuquefuingün tañi tolto ruca. Tüfa engün elfalcünulelngei cuñiutucuafiel ti yamfal mülehue. Pu Israel che ñi duam mu elfalcünulelngeingün tüfa. Huelu inei rume elungerquenolu ñi femal* fülconpule, mülei tañi layal.

39 Chau Jehová ñi feipin mu, Moisés ca Aarón huirintucuñmafingu ñi familia com pu huentru ca pichique huentru Leví chengelu quiñe cüyen nielu cam doi. Raquingei 22.000 huentru.

40 Fei Chau Jehová feipifi ta Moisés: “Raquiafimi ca huirintucuñmayafimi ñi üi com pu Israel che ñi hunenque fotüm quiñe cüyen nielu cam doi. 41 Pu Leví che huelutucuafimi pu Israel che ñi hunenque fotüm mu. Feimu püntücünulelen* pu Leví che. Iñche ta Chau Jehová. Püntücünuafimi pu Leví che ñi ñomque culliñ. Tüfa engün huelutucuafimi pu Israel che ñi hunenque ñom culliñ mu”. 42 Fei chumngechi ñi feipieteu Chau Jehová, Moisés huirintucucünui pu Israel che ñi hunenque fotüm. 43 Huirintucuñmangei ñi üi com pu hunenque fotüm quiñe cüyen nielu cam doi. Raquingei 22.273 huentru.

44 Chau Jehová dunguniefi ta Moisés. Feipifi: 45 “Pu Leví che huelutucuafimi pu Israel che ñi hunenque fotüm mu. Feimu püntücünuafimi* pu Leví che. Cafei pu Leví che ñi ñomque culliñ huelutucuafimi pu Israel che ñi ñomque culliñ mu. Feimu püntücünuafimi. Iñche ngen-ngean pu Leví che mu. Iñche ta Chau Jehová. 46 Culliaimi tami ngillanentuafiel feichi 273 hunenque fotüm doingelu pu Leví che mu. 47 Caque quiñeque engün meu culliaimi quechu siclo.* Fanefanetungeai chumngechi ñi fanefanetungequen ti yamfal mülehue mu. Quiñe siclo fanei mari epu gramo.* 48 Eluafimi ti plata ta Aarón ca tañi pu fotüm, femngechi ngillanentuafimi pu Israel che ñi hunenque fotüm doingelu pu Leví che meu”. 49 Feimu Moisés llohui ti plata cullingelu ñi ngillanentuafiel pu hunenque fotüm doingelu pu Leví che. 50 Llohui ti plata cullingelu pu Israel che ñi hunenque fotüm meu. Trapümngei 1.365 siclo. Tüfa fanefanetungei chumngechi ñi fanefanetungequen ti yamfal mülehue mu. 51 Chau Jehová ñi feipin mu Moisés elufi ti plata ta Aarón ca tañi pu fotüm chumngechi ñi feipifiel Chau Jehová ta Moisés.