3 Juan

1 Iñche, ti füchache,* huirintuculelfiñ tüfachi carta tañi saquin peñi Gayo. Rüf piuqueyefiñ.

2 Saquin peñi, eimi cümelcaleimi, feimu llellipulen tami cümelcaleal com dungu meu ca tami cüme feleal. 3 Cüpalu pu peñi nütramelpaeneu* tami püntütripanon* ti rüf dungu meu, tami miyahun ti rüf dungu mu. Feimu rume ayühun. 4 Rume ayühueleneu* quimfiel tañi pu yall ñi miyahun ti rüf dungu meu.

5 Saquin hueni, tunte quimnielafimi rume tati pu peñi, huelu quelluquefimi engün. Femngechi pengelqueimi tami manelfal chengen. 6 Fei engün nütramcalelfi ti trahunche tami piuqueyehun. Amutule engün, eluafimi chem tañi duamnieel, tami chumal mülei ñi ayühuelafiel ta Chau Ngünechen. 7 Fei engün tripai Chau Ngünechen tañi üi meu. Pilaingün ñi eluaeteu chem rume caquelu che.* 8 Feimu iñchiñ mülei taiñ poyetuafiel tüfachi pu peñi. Femngechi quelluconaiñ ñi huldungungeal ti rüf dungu.

9 Deu huirintuculelfiñ ti trahunche. Huelu Diótrefes noquelcauquei* ñi hunencüleal, yamüñmaquelaeiñmeu taiñ feipin.* 10 Feimu amuli üyeu, quimfalcünuan tañi femmequen. Ngam fill huesaque dungu feipimequei iñchiñ meu. Feica müten no, cafei yamün meu cüpa llouquelafi tati pu peñi. Cüpa catrütuquefi tati pu ayülu ñi poyecheal, ayülei ñi huemünentuafiel engün* trahunche mu.

11 Saquin peñi, inayentulayafimi huesaque dungu, cümeque dungu mai ta inayafimi. Tati femlu cümeque dungu Chau Ngünechen mu cüpai. Tati femlu huesaque dungu pequelafi* ta Chau Ngünechen. 12 Com pu peñi cüme nütramyequefi ta Demetrio. Tañi inaniefiel ti rüf dungu, pengelquei ñi rüfngen tañi feipin engün. Iñchiñ cüme che troquiquefiyiñ cafei, eimi quimnieimi ñi rüfngen taiñ feipin.

13 Fentren dungu feipiafeyu tati, huelu ayülan tami huirintuculelafiel. 14 Doi mai ayülen pichiñma mu tayu pehual. Femngechi cüme nütramcahuayu.

Cüme feleaimi.

Lemoria* pieimu pu hueni. Cafei lemoria piafimi caque quiñeque tañi pu hueni.*