1 Crónicas
17 David mülenaglu müten quisu tañi ruca mu,* feipifi ta Natán, Chau Ngünechen ñi huerquen: “Fau mülen iñche, quiñe ruca mu cedro mamüllngelu, huelu ti falin caja pengelquelu Chau Jehová ñi eldungu mülei tolto ruca mu”.* 2 Natán feipifi ta David: “Femaimi chem mülei tami piuque mu. Chau Ngünechen afcadinieimu”.
3 Feichi pun mu müten Natán feipingei Chau Ngünechen ñi dungu: 4 “Amunge, feipiafimi tañi cüdaufe David: ‘Tüfa ñi feipin Chau Jehová: “Eimi deumalel-layaen quiñe ruca tañi müleal fei mu. 5 Feichi entufilu pu Israel che ta fantepu meu, iñche mülelafun chem ruca mu no rume, huelu mai miyahun fillque tolto ruca ca fillque ngillatuhue tolto ruca mu. 6 Feichi miyaulu iñche pu Israel che engün, üitufiñ quiñeque juez Israel mu ñi camañafiel* tañi pu che, huelu ¿feipipefiñ mai engün tüfachi dungu? ¿Ramtupefiñ engün ‘¿Chemu am deumalelmulan quiñe ruca cedro mamüllngelu?’?”’.
7 Feula feipifinge tañi cüdaufe David: ‘Tüfa ñi feipin Chau Jehová, tati Ñidolcülelu pu hueichafe mu:* “Iñche entueyu lelfün cachu cheu tami inayahulfiel quechan ufisa, fei tami loncolerpual tañi pu che Israel. 8 Cheu rume miyahulmi, iñche compañnieayu. Eimi tami adquiñ mu apümcayafiñ com tami pu caiñe. Feman ñi quimngeal tami üi chumngechi quimngequei pu falin che mapu mu. 9 Eluafiñ cheu ñi müleal tañi pu che Israel. Tiye mu elcünuafiñ engün, fei turpu huesa duamelngelayai engün. Pu huesaque che cutrancalayafi tañi pu che chumngechi femngequefui cuifi, 10 feichi dullilu iñche pu juez tañi pu che Israel mu. Huehuafiñ com tami pu caiñe. Ca feipieyu: ‘Chau Jehová deumalelaimu quiñe ruca’.*
11 Eimi lalmi ca amutulmi tami cuifiqueche yem engün, iñche eluafiñ tami cüpanche, quiñe tami pu fotüm, ñi lonco ülmen-ngeal, fei alüñmayai tañi ngünenieal. 12 Quisu deumalelaeneu quiñe ruca ñi yamngeal* tañi üi, rüfcünu feman ñi rumel müleal tañi ülmen huancu. 13 Iñche fotümyeafiñ, fei chauyeaeneu. Iñche piuqueyenieafiñ.* Quisucünulayafiñ chumngechi elcünufiñ ti huentru ngünenielu petu tami femnon eimi. 14 Iñche tañi pin mu rumel müleai iñche tañi ruca mu ca tañi lonco ülmen-ngeai. Rumel müleai tañi ülmen huancu”’”.
15 Natán feipifi ta David com tüfachi dungu ca com tüfachi afmatun dungu.
16 Fei hula ti lonco ülmen David amui ca anücünuhui Chau Jehová ñi adquiñ mu, fei feipi: “Chau Jehová, ¿inei am iñche? ¿Inei am tañi pu che* tami cüpalmufiel tüfa mu? 17 Huelu feica müten no, ahuem, Chau Dios, ca feipiqueimi ñi alüñmayal tami cüdaufe ñi familia cüpalechi antü mu. Cafei eimi, Chau Ngünechen Jehová, peen quiñe huentru reque felelu ñi doi püramyengeal.* 18 Chau Ngünechen, eimi yamnieen ta iñche, eimi tami cüdaufe, ca cüme quimnieen, huelu ¿ca chem piafeyu iñche? 19 Ahuem, Chau Jehová, tami cüdaufe ñi duam mu ca chumngechi ayüniei tami piuque femqueimi com tüfachi fütraque dungu ca pengelqueimi tami afmatufalngen. 20 Chau Jehová, eimi trürümfalngelaimi ca quiñeleimi müten. Allcüntucuiñ caquelu dios, huelu eimi müten müleimi Chau Ngünechen. 21 Mapu meu, ¿mülepei mai quiñe troquiñche trürümfalngelu tami pu che Israel mu? Eimi, Chau Ngünechen, amuimi tami montulafiel, femngechi tami pu chengetual engün. Eimi huemünentufimi* pu troquiñche tami pu che ñi adquiñ mu ca montulfimi engün Egipto mapu mu. Fei fütraque afmatun dungu femimi, femngechi quimfalcünuimi tami üi. 22 Femcünufimi pu Israel che tami pu chengetual rumel mu. Ahuem, Chau Jehová, fei engün ñi Chau Ngünechen ngetuimi. 23 Feula mai Chau Jehová, rumel mu loncontucunieafimi chem tami feipicünufiel tami cüdaufe ca tañi pu che, ca femaimi tami feipicünun. 24 Manelfalngepe tami üi ca rumel püramyengepe, femngechi pu che feipiai: ‘Chau Jehová Ñidolcülei pu hueichafe mu, Israel ñi Chau Ngünechen, Chau Ngünechen ngüneniefi pu Israel che’. Eimi tami adquiñ mu, rumel mülepe tami cüdaufe David ñi pu che. 25 Chau Ngünechen, eimi quimelelfimi tami cüdaufe tami deumalelafiel quiñe ruca.* Feimu tami cüdaufe maneluuquei tami llellipuaeteu. 26 Ahuem, Chau Jehová, eimi müten Chau Ngünechen ngeimi ca tami cüdaufe ñi duam mu feipicünuimi tüfachi cümeque dungu. 27 Feimu füreneen, eluunge tami cümelcayafiel tami cüdaufe ñi pu che, ca eimi tami adquiñ mu rumel mülepe tañi pu che. Chau Jehová, eimi cümelcafimi tañi pu che ca cümelcangeai rumel meu”.