Isaías
43 Ahuem, Jacob, Chau Jehová deumaeimu.
Ahuem, Israel, quisu femcünueimu. Fei tüfa tañi feipin:
“Llicaquilnge, iñche ngillanentueyu.
Mütrümeyu* tami üi meu.
Iñche ngen-ngen eimi mu.
2 Rumelmi co mu, iñche afcadinieayu.
Nolmi leufü mu, ñamnaglayaimi.
Rupalmi cütral mu, lüflayaimi.
Cuninlayaimi no rume* leuleucülechi cütral mu.*
3 Iñche tami Chau Dios Jehová,
Israel ñi Lifngechi Ngünechen, tami montuleteu.
Hultucufiñ ta Egipto, Etiopía ca Sebá tami montual.
Feimu tami montulngeal hultucuafiñ pu che
ca fillque troquiñche.
5 Llicaquilnge, iñche afcadinieyu.
Tripahue antü püle cüpalafiñ tami cüpanche,
conhue antü püle nüafiñ engün.
6 Feipiafiñ ti norte mapu:* ‘¡Huiñoltufinge engün!’.
Ca feipiafiñ ti sur mapu:* ‘Nünacümlayafimi engün.
Alü camapu mu cüpalfinge tañi pu fotüm. Ca cheu ñi afpun ti mapu cüpalfinge tañi pu ñahue,
7 com pu yenielu tañi üi.
Cüpalfinge iñche tañi deumafiel tañi püramyeaeteu,
ca iñche tañi femcünuel’.
8 Entufinge tati pu che. Fei engün nieingün nge, huelu pelolaingün.
Nieingün pilun, huelu allcüquelaingün.
9 Com pu troquiñche trahuluupe quiñe mülehue mu,
com pu che trahuluupe.
Fei engün meu, ¿mülepei mai quiñe dios ñi feipiafel tüfa?
¿Elupeafeiñmu mai taiñ allcütual tati hunenque dungu ñi rupayal?
Pengelpe engün ñi rüfngen tüfa. Cüpalpe engün che ñi dunguñpeaeteu.
Fei allcüafuingün ca feipiafuingün: ‘¡Tüfa rüfngei!’”.
10 “Eimün dunguqueimün iñche meu” feipi Chau Jehová.
“Mai, eimün iñche tañi cüdaufe, iñche tañi dullifiel,
femngechi tamün quimniemuafiel ca tamün maneluhual* iñche meu.
Ca quimtucuaimün iñche rumel femngechi felean.
Chem dios no rume hunelelai iñche mu
ca inalelai quiñe no rume.
11 Iñche, iñche ta Chau Jehová. Ngelai cangelu montulchefe, iñche müten”.
12 Chau Jehová feipi: “Petu tamün nienon cañpüle cüpachi dios,
iñche feipicünun chem tañi chumal, montuluhuiyiñ ta eimün, fei huldungucünun tüfa.
Feimu lle eimün dunguqueimün iñche meu. Iñche cai ta Chau Dios.
13 Cafei iñche rumel femngechi felean,
inei no rume müntuñmalayaeneu* chem no rume tañi cuhu meu.
Iñche tañi femün, ¿inei am catrütupeafeneu?”.
14 Israel ñi Lifngechi Ngünechen, tamün ngillanentueteu, Chau Jehová feipi:
“Tamün duam meu huercüafiñ quiñe troquiñ hueichafe* Babilonia mu, apümcayafiñ tati puerta ñi tranca.*
Pu caldeo che ñi farcu mu cutrantupiuquelen mu huiraraingün.
15 Iñche ta Jehová, tamün Lifngechi Ngünechen, tati Deumafilu ta Israel, tamün Lonco Ülmen”.
16 Tüfa ñi feipin Chau Jehová.
Quisu deumai quiñe rüpü rupayalu lafquen püle
ca quiñe rüpü rupayalu illculechi co meu.*
17 Quisu femcünui ñi tripayal ti hueichan carretela* ca tati pu cahuellu,
ti troquiñ hueichafe ca pu nehuen-ngechi hueichafe.
Fei Chau Dios feipi: “Tranalehueaingün, huitrahuelayaingün.
Apümcangeaingün, chongümngeaingün quiñe leuleucülechi mecha reque.”
18 “Raquiduamtucuquefilmün rupayechi dungu
ca ngüneduammequequilmün cuifique dungu.
19 ¡Tüfei! Quiñe hue dungu feman,
deu amulei tati.
¿Ngüneduamlaimün am?
Elcünuan quiñe rüpü rupayalu huellin mapu meu*
ca fillque leufü rupayalu ancülechi huellin mapu mu.
20 Auca culliñ* miyaulu lelfün meu, auca trehua* ca choique
püramyeaeneu,
iñche hulquelu cai co huellin mapu mu,
ca elcünun leufü ancülechi huellin mapu meu,
femngechi ñi pütocoal tañi pu che, iñche tañi pu dullinche.
21 Elcünufiñ tüfachi pu che tañi iñchengeal,
femngechi tañi püramyeaeteu.
22 Huelu eimi llellipulaen, ahuem, Jacob.
Afeluhuimi iñche mu, ahuem, Israel.
23 Cüpalel-laen ufisa tami hulal lüpümngeelchi chalintucun*
ca püramyelaen tami chalintucun mu.
Dicümtuculaeyu* tami hulal quiñe regalo.
Ca feipifeipimequelaeyu tami cüpalal olibano,* femngechi afeluulaeyu.
24 Tami plata mu ngillalel-laen cüme nümün-ngechi rüme*
ca tuduamel-laen tami chalintucun ñi yihuiñ mu.
Huelu mai, tami culpan mu* quiñe fanechi fillem reque tuculelen,
afeluucülen tami huelulcan mu.
25 Iñche, iñche llemai liftumequefiñ tami huelulcan tañi üi ñi duam mu.
Raquiduamtucuniehuelayafiñ tami culpan.*
26 Juiciantucuhuayu. Raquiduameltuen chem ñi rupan.
Cüme quimfalcünuaimi tami dungu, fei pengelcünuaimi ñi rüfngen tami feipin.
28 Feimu lifngenolu troquiafiñ pu principe mülelu ti yamfal mülehue mu.
Hultucuafiñ ta Jacob ñi apümcangeal.
Ca femcünuan ñi lucatungeal* ta Israel.