Isaías
4 Feichi antü regle domo nüafingün quiñe huentru müten, fei feipiaingün:
“Iyaiñ iñchiñ taiñ cofque
ca quintuaiñ iñchiñ taiñ tacun.
Eluunge tami niemuafiel, femngechi tami pu domo pingeaiñ,*
fei yehuelcangehuelayaiñ”.
2 Feichi antü Chau Jehová elai ñi choyüal* cümeque anümca cüme adngelu. Fei tati pu montulu pu Israel che mu saquihuaingün ca ayüucüleaingün ti mapu ñi hulqueel mu. 3 Lif che pingeai inei rume mülehuele Sion mu ca inei rume mülehuele Jerusalén mu, com pu mülealu Jerusalén mu ca huirintucuñmangelu ñi üi tañi llohual mongen.
4 Chau Jehová liftuñmayafi ñi pod* Sion ñi pu püñeñ. Rume illcutuafi* ta Jerusalén ca juzgayafi, femngechi liftuafi ti mollfüñ hutrulngelu* fei mu. 5 Fei Chau Jehová com Sion huincul mu ca cheu ñi femngequen fütraque trahun elcünuai quiñe fitrulechi tromü* antü mu ca elcünuai üicülechi cütral ñi alofcüleal pun mu. Femngechi incañpengeai com ti afmatufalngelu. 6 Fei müleai quiñe llamasa* ñi llaufeñtual che* are antü mu ca ñi ellcahuam* ca chellcomtuam* mülen mu cürüftucu mahun.