1 Crónicas
12 David lefmauquiyauquefui Saúl ñi duam mu, tüfa Quis ñi fotüm. Feichi mu mülequefui huentru quiñeulu David engün Ziclag huaria mu. Tüfa engün coneltulefui pu nehuen-ngechi hueichafe* ñi quelluntucueteu hueichan mu. 2 Yeniefuingün arco. Tañi man cuhu cam huele cuhu mu ütrüftuqueingün cura cam flecha tañi arco meu. Tüfa engün Saúl ñi pu peñi, Benjamín mu tuulu. 3 Loncolefui Ahiézer quiñentrür Joás engu, tüfa engu Semaá ñi fotüm, ti Guibeá che. Ca mülefui Jeziel ca Pélet, tüfa engu Azmávet ñi fotüm. Cafei Beracá, Jehú, tüfa ti Anatot che. 4 Ismayá, tüfa ti Gabaón che, quiñe nehuen-ngechi hueichafengei, coneltulefui 30 hueichafe mu ca loncolei fei engün mu. Ca mülefui Jeremías, Jahaziel, Johanán, Jozabad, tüfa ti Guederá che, 5 Eluzái, Jerimot, Bealías, Semarías, Sefatías, tüfa ti harifita che, 6 Elcaná, Isías, Azarel, Joézer, Jasobeam, tüfa engün pu Coré che, 7 Joelá ca Zebadías, tüfa engu Jeroham ñi fotüm, tüfa ti Guedor che.
8 Quiñeque Gad che püntütripaingün* tañi pu peñi mu, fei quiñehuingün David engu ti ellcaupeyüm mu* huellin mapu püle.* Nehuen-ngechi hueichafengei, pepicaucüleingün ñi hueichayal ca eluucüleingün ñi quehuayal fütraque escudo ca huaiqui mu.* Tañi ange trapial ange reque trüri ca matu nengümuuquefui engün quiñe gacela reque mülelu mahuida mu. 9 Ézer loncolei, Abdías ti epu ürque, Eliab ti cüla ürque, 10 Mismaná ti meli ürque, Jeremías ti quechu ürque, 11 Atái ti cayu ürque, Eliel ti regle ürque, 12 Johanán ti pura ürque, Elzabad ti ailla ürque, 13 Jeremías ti mari ürque, Macbanái ti mari quiñe ürque. 14 Tüfa ta Gad chengefuingün, loncolei hueichafe mu. Ti müte nehuen-ngenolu huehuafui 100 hueichafe ca ti doi nehuen-ngelu huehuafui mil hueichafe. 15 Ti hunen cüyen mu tüfachi pu huentru noingün ti Jordán leufü petu mangiñmamequelu. Tüfa engün ñi duam mu, lefmahuingün com pu che mülelu nag mapu mu, tripahue antü ca conhue antü püle.
16 Quiñeque Benjamín ca Judá huentru ca cüpaingün cheu ñi ellcaucülen David. 17 Fei David tripai, huitracünuhui tañi adquiñ mu engün ca feipifi: “Cüme duam mu cüpalmün tamün quellumual iñche, hueniyehuaiñ.* Huelu cüpalmün tamün ngünencamual ca hultucumuafiel tañi pu caiñe, fei tañi huesa femnon iñche, ngüneduampe ca juzgape taiñ cuifiqueche ñi Chau Ngünechen”. 18 Fei hula Chau Ngünechen ñi nehuen puhui Amasái mu, tüfa loncolei 30 hueichafe mu, ca feipi:
“Ahuem, David, iñchiñ quelluntucuhuiyiñ. Ahuem, Jesé ñi fotüm, eimi mu müleiñ.
Cüme feleaimi, tüngcüleaimi* ca feiti tami quellueteu tüngcülepe.
Tami Chau Ngünechen quellumequeimu”.
Fei David lloufi engün ca loncocünufi pu hueichafe mu.
19 Cüpalu David pu Filistea che engün tañi hueichayafiel ta Saúl, quiñeque Manasés huentru elcünufingün Saúl ñi troquiñ hueichafe, fei quiñehuingün David engu. Huelu pu ngüneniefilu pu Filistea che nütramcahuingün tañi chumal, fei huemünentufingün* ta David. Feipingün: “Elcünuaiñmu iñchiñ, fei quiñehuai tañi ñidol Saúl engu. Cuñihun mu conai taiñ mongen”. Feimu David quellulafi pu Filistea che. 20 David amulu Ziclag huaria mu, tüfachi pu Manasés huentru elcünuingün tañi pu peñi, fei quiñehui David engün: Adná, Jozabad, Jediael, Miguel, Jozabad, Elihú ca Ziletái, tüfa loncolei mil Manasés ñi pu hueichafe mu. 21 Tüfachi pu huentru quellufingün ta David feichi chaftufilu pu malocontuchequelu. Com engün nehuen-ngeingün ca llicaquelaingün, cafei loncolerpuingün pu hueichafe mu. 22 Fill antü acuquei huentru ñi quelluafiel ta David, fei rume alün-ngerpui David ñi pu hueichafe, trüri Chau Ngünechen ñi pu hueichafe reque.
23 Raquingei pu loncolelu adniefilu pu huentru yenielu hueichahue tañi quehuayal, tüfa engün quiñehui David engu Hebrón huaria mu tañi elungeal Saúl tañi ngünenieel, chumngechi feipi Chau Jehová. Tüfa tati pu huentru: 24 mülefui 6 mil 800 Judá huentru yenielu fütraque escudo ca huaiqui. Pepicaucüleingün tañi hueichayal. 25 Mülefui 7 mil 100 Simeón huentru, tüfa engün nehuen-ngeingün ca llicaquelaingün.
26 Mülefui 4 mil 600 Leví huentru. 27 Jehoiadá loncolefui Aarón ñi pu fotüm ca compañeyu 3 mil 700 huentru. 28 Ca mülefui Sadoc, quiñe hueche huentru nehuen-ngelu ca llicaquenolu. Cafei 22 huentru loncolelu tañi familia mu.
29 Mülefui 3 mil Benjamín huentru, tüfa ta Saúl ñi pu peñi. Epe com engün cuifi quelluntucuquefui Saúl ñi familia. 30 Mülefui 20 mil 800 Efraín huentru, tüfa engün nehuen-ngeingün ca llicaquelaingün. Cüme quimniengei engün tañi familia mu.
31 Manasés ñi rangiñ troquiñche mu mülefui 18 mil huentru. Dullingei tañi üi mu engün ñi cüpayal tañi lonco ülmencünuafiel ta David. 32 Isacar ñi pu fotüm meu mülefui 200 loncolelu, tüfa engün ngüneduamquefui chem ñi rupamequen ca quimniefuingün ñi chumal pu Israel che. Cafei com tañi pu peñi inaniequeyu tañi feipin. 33 Mülefui 50 mil Zabulón huentru, tüfa engün conafui troquiñ hueichafe mu ca pepicaucülefui ñi quehuayal com tañi hueichahue mu. Com engün quelluntucufingün ta David com piuque mu.* 34 Mülefui mil Neftalí loncolelu, ca quisu engün meu mülefui 37 mil huentru yenielu fütraque escudo ca huaiqui. 35 Mülefui 28 mil 600 Dan huentru pepicaucülelu ñi hueichayal. 36 Cafei 40 mil Aser huentru conafui troquiñ hueichafe mu ca pepicaucülefui ñi hueichayal.
37 Nometu Jordán leufü mu mülefui 120 mil soltau nielu itrofill hueichahue. Tüfa engün coneltulei pu Rubén che meu, pu Gad che ca Manasés ñi rangiñ troquiñche. 38 Com tüfachi huentru hueichafengefui ca pepicaucülefui ñi hueichayal. Acuingün Hebrón huaria mu, fei com piuque mu lonco ülmencünufingün ta David com pu Israel che meu. Cafei com pu mülehuechi Israel che quiñeucülen lonco ülmencünufingün ta David. 39 Tiye mu 3 antü mülenagingün David engu. Imequefui ca putumequefui engün* chem tañi pepicaeteu tañi pu peñi. 40 Com pu Israel che rume ayüucülefui, feimu pu che püllelelu quisu engün meu ca tati pu che mülelu Isacar, Zabulón ca Neftalí ñi mapu mu cüpalingün burro, camello, mula ca toro cüpalnielu iyael: rüngo, cochü cofque nielu anquen higo ca anquen ofad, pulcu ca aceite. Ca cüpalnieingün fentren huaca ca ufisa.