1 Crónicas

23 Fei David deu füchalu ca pichi faltalu tañi layal, lonco ülmencünufi tañi fotüm Salomón Israel mu. 2 Fei hula trahulfi com Israel ñi pu principe, pu sacerdote ca pu Leví che. 3 Raquingei pu Leví che nielu doi 30 tripantu. Raquingei caque quisuque engün, fei mülerquei 38 mil huentru. 4 Tüfachi pu che meu raquingelu, 24 mil huentru loncolefui ti cüdau femngequelu Chau Jehová ñi ruca mu, 6 mil huentru loncolefui ca juezngefui engün. 5 Cafei 4 mil huentru cuidaquefui puerta ca 4 mil huentru püramyequefingün Chau Jehová feichi dungulhue mu ñi feipin David: “Deumafiñ ñi püramyeafiel ta Chau Dios”.

6 David hudamfi pu Leví che. Quisuque troquiñche cüpai quiñe Leví ñi fotüm mu: Guersón, Cohat ca Merarí. 7 Guersón ñi pu fotüm fei ta Ladán ca Simeí. 8 Ladán ñi 3 fotüm fei ta Jehiel, tüfa ti loncolelu, Zetam ca Joel. 9 Simeí ñi 3 fotüm fei ta Selomot, Haziel ca Harán. Tüfa engün loncolefui Ladán ñi pu familia mu. 10 Ca Simeí ñi pu fotüm fei ta Jáhat, Ziná, Jeús ca Berías. Tüfa engün Simeí ñi 4 fotüm. 11 Jáhat loncolefui ca Zizá inalefui. Huelu Jeús ca Berías nielafuingu fentren fotüm, feimu quiñe familia müten troquingequefui ca elungei quiñe cüdau müten.

12 Cohat ñi 4 fotüm fei ta Amram, Izhar, Hebrón ca Uziel. 13 Amram ñi pu fotüm fei ta Aarón ca Moisés. Huelu Aarón huichucünungei rumel ñi cüdahual ti Doi Yamfal Mülehue mu.* Aarón ca tañi pu fotüm mülefui ñi hulal chalintucun* Chau Jehová ñi adquiñ mu ca tañi cüdahuelafiel. Cafei mülefui ñi cümelcacheal Chau Dios ñi üi mu rumel meu. 14 Moisés fei ta Chau Ngünechen ñi huerquen, ca tañi pu fotüm coneltulefui Leví tañi troquiñche mu. 15 Moisés tañi pu fotüm fei ta Guersom ca Eliezer. 16 Guersom tañi pu fotüm meu Sebuel loncolefui. 17 Eliezer tañi cüpanche mu* Rehabías loncolefui. Eliezer nielafui caquelu fotüm, huelu Rehabías ñi pu fotüm fentrelefuingün. 18 Izhar ñi pu fotüm mu Selomit loncolefui. 19 Hebrón ñi pu fotüm fei ta Jerías, tüfa tati loncolelu, ti epungelu Amarías pingei, ti cülangelu Jahaziel ca tati melingelu Jecameam. 20 Uziel ñi pu fotüm fei ta Miqueas, tüfa tati loncolelu, ca inalefui Isías.

21 Merarí ñi pu fotüm fei ta Mahlí ca Musí. Mahlí ñi pu fotüm fei ta Eleazar ca Quis. 22 Eleazar lai, nielafui fotüm, re ñahue müten. Feimu Quis ñi pu fotüm, tüfa tañi pu pariente,* niehui Eleazar ñi pu ñahue engün. 23 Musí ñi 3 fotüm fei ta Mahlí, Éder ca Jeremot.

24 Com tüfachi pu huentru Leví mu cüpaingün. Raquingei ca ngüneduamngequei tañi familia ca tañi loncolelu engün, femngechi ñi huirintucungeal tañi üi. Fei engün elfalcünungei ñi cüdahual Chau Jehová ñi ruca mu. Ca tati pu che huirintucungelu nierquei doi 20 tripantu. 25 David deu feipi: “Israel ñi Chau Ngünechen Jehová elufi tañi pu che ñi cüme feleal, ca rumel müleai Jerusalén mu. 26 Cafei pu Leví chengelai ñi yenieal ti ngillatuhue tolto ruca* ca quiñe chemcün no rume* ñi poyengeal ta Chau Dios”. 27 Feimu raquingei pu Leví che nielu doi 20 tripantu, chumngechi feipi David. 28 Tüfa engün mülefui ñi quelluafiel Aarón ñi pu fotüm. Cüdauquefuingün Chau Jehová ñi ruca mu, elfalcünulelngei tati lepün,* cheu ñi iquen che ca mülefui ñi liftuafiel com ti chemcün huichucünulelngelu ta Chau Dios. Mülefui ñi femal chem cüdau rume Chau Ngünechen ñi ruca mu. 29 Quelluingün ñi huelurentrücünuafiel cofque,* pepicayal ti cüme rüngo ñi hulngeal ti fün chalintucun, ti churrasca nienolu fayümhue,* tati cofque afümngelu cofilechi lata mu, ti masa aceiteñmalelu, cafei mülefui ñi com fanetual ca medial. 30 Fill pulihuen ca nagantü mülefui ñi mañumafiel ca püramyeafiel ta Chau Jehová. 31 Elungequefui Chau Jehová lüpümngeelchi chalintucun ürcütun antü mu,* hue cüyen meu ca mülen mu fiesta chumngechi feipi ti ley. Fei engün quelluconquefui feichi cüdau mu Chau Jehová ñi adquiñ mu. 32 Cafei entuquefuingün tañi elfal cüdau ti trahunhue tolto ruca ca ti yamfal mülehue mu. Cafei quelluquefuingün tañi pu peñi, tüfa ta Aarón ñi pu fotüm, ñi cüdahual Chau Jehová ñi ruca mu.