Isaías
64 ¡Huicürcafulmi nga* ti huenu!
Fei nagafuimi, ca nengümcayafuimi fütraque mahuida tami adquiñ mu.
2 Nagfulmi nga cütral reque ñi lüpümafiel ancülechi chamida
ca huadcümquefilu ti co.
¡Fei tami pu caiñe quimürpuafui tami üi,
ca pu troquiñche müllmüllcüleafui tami adquiñ meu!
3 Afmatufalchi dungu femimi turpu taiñ üngümquenofel,*
fei nagimi ca fütraque mahuida müllmüllingün tami adquiñ meu.
4 Eimi müten fürenequefimi tami pu üngümnieteu ñochi duam mu.*
Fütra cuifi ca fantepu mu
inei no rume allcütulai ca ngüneduamlai cangelu Dios eimi reque.
5 Trafmefimi pu ayühun mu femquelu cümeque dungu,
tami pu raquiduamtucunieteu ca inaniequelu tami rüpü.
¿Montulngepeafulu am ta iñchiñ?
6 Com iñchiñ lifngenochi chengerpuiñ reque,
com taiñ nor femquen quiñe podngechi pañu reque felei.*
Com tonfünagaiñ quiñe tapül reque.
Taiñ culpan* cañpüle yeaiñmu chumngechi ti cürüf cañpüle yequefi ti tapül.
7 Inei no rume püramyequelafi tami üi,
inei no rume quintuquelai tami quellun.
8 Huelu tüfa hula, ahuem Jehová, eimi taiñ Chau tati.
9 Ahuem Jehová, rume illcuquilnge,
rumel mu raquiduamtuculayafimi taiñ culpan.*
Fürenemuiñ, lelimuiñ, iñchiñ eimi tami troquiñche tati.
10 Tami yamfalque huaria* huellin mapungetui,*
Sion quiñe huellin mapungetui,
Jerusalén quiñe huellilechi mülehuengetui.
11 Taiñ yamfalchi ruca afmatufalngelu,
cheu tami poyequeteu taiñ cuifiqueche yem,
lüpümtucungei,
itrofillem taiñ falintuniefiel teifücalehuetui.
12 Ahuem, Chau Jehová, com tüfachi dungu mu, ¿chumconlayaimi rume?
¿Dungulayaimi? ¿Eluaimi taiñ fente cutrancangeal?