Isaías
26 Feichi antü tüfachi ül ülcantungeai Judá mapu meu:
“Quiñe nehuen-ngechi huaria nieiñ.
Chau Dios ñi montulchequen trürcülei quiñe nehuen-ngechi cura malal.*
2 Nülangepe ti puerta ñi conal ti norngechi troquiñche.
Tüfachi troquiñche femquei Chau Dios ñi feipin.
4 Rumel maneluucülemün Chau Jehová mu,
Jehová,* Chau Jehová llemai, fei tati rumel mülechi Fütra Cura.
5 Quisu illamcafi tati pu che mülelu huincul mu, feiti huaria alüpürachi mapu mülelu.
Trananacümfi,
famnacümfi mapu mu,
ütrüfnacümfi trufür meu.
6 Pu cutrancaumequelu ca pu cuñifallcülelu
tañi namun mu pünocayafingün”.
7 Pu norngechi che ñi rüpü norngei.*
Eimi norngeimi,
feimu lafcünuafimi pu norngechi che ñi rüpü.
8 Ahuem, Chau Jehová, petu amulelu iñchiñ tami nor rüpü meu,
maneluucüleiñ eimi mu.
Iñchiñ* rume falintuniefiyiñ tami üi ca cüpa raquiduamtucuniefiyiñ.*
9 Pun meu üngümnieyu* com tañi piuque mu.*
Felei, cüme duamquechi quintumequeyu.
Tami juzgafiel mu ti mapu,
tati pu che quimqueingün nor dungu.*
10 Fürenengele rume ti huesa che,
quimlayai nor dungu.
Huesa dungu femai pu nor che ñi mapu mu,*
pelayai Jehová ñi afmatufalngen.
11 Ahuem, Jehová, huitrañpüramnieimi tami cuhu, huelu ti huesa che pelayafi.
Peaingün fente tami piuqueyefiel tami troquiñche, fei yehuelcangeaingün.
Felei, tami cütral lüpümafi tami pu caiñe.
12 Ahuem, Jehová, eimi elumuaiñ tüngün.
Eimi tami nehuen mu,
com femürpuiñ.
13 Ahuem, taiñ Chau Dios Jehová, caquelu che ngünenieiñmu,
huelu iñchiñ püramyefiyiñ tami üi müten.
14 Fei engün laingün, mongelelayaingün.
Nehuen nielaingün, huitratulayaingün.
Eimi juzgafimi engün tami apümcayafiel,
femngechi huiño üitungehuelayai engün.
15 Ahuem, Jehová, femcünuimi ñi fentren-ngeal tüfachi troquiñche,
femcünuimi ñi alün-ngeal engün,
quisutu püramyehuimi.
Eimi doi üyeu puhulfimi cheu ñi fentepuhun tüfachi mapu.
16 Ahuem, Chau Jehová, hueñancülen mu engün ngillatueimu.
Norümtufilu eimi, cafcü dungun mu* ngillatuingün com ñi piuque mu.
17 Quiñe domo epe choyümequelu,
huirarquei fente tañi cutrancahun meu,
ca femngechi duamcülerpuiñ iñchiñ eimi tami duam meu, ahuem, Chau Jehová.
18 Niepüñeñün mu iñchiñ, rume cutrancahuiyiñ choyün ñi duam mu,
huelu choyüfiyiñ reque re cürüf müten.
Cüpal-laiñ montuluhun tüfachi mapu mu,
inei no rume choyüngequelai ñi müleal tüfa mu.
19 Chau Dios feipi: “Tami pu la mongetuaingün.
Tañi pu la huiño huitratuaingün.
¡Eimün trufür mu mülelu, trepemün!*
¡Ayühun mu huirarmün!
Ti ilhuen* tami füshcümqueteu, pulihuen nagpachi ilhuen reque felei.
Ti mapu entuafi tañi pu la ñi huiñomongetual.
20 Saquin troquiñche,* amumün, conpumün tamün doi ponhuitulechi pieza mu,
ca cerrantucufimün tamün puerta furi püle.
21 ¡Tüfei! Chau Jehová tañi mülehue mu cüpalei,
ramtucadungupayafi tati pu che tüfachi mapu meu ñi culpan meu.
Ti mollfüñ ñi hutrulngeel* tüfachi mapu meu pengelcünungeai,
ti mapu ellcahuelayafi tañi pu la”.