Isaías

39 Feichi mu Babilonia ñi lonco ülmen, Merodac-Baladán pingelu, tüfa Baladán ñi fotüm, quimürpui ñi cutrancülefel Ezequías, huelu tremotui,* feimu huercülelfi carta ca quiñe regalo. 2 Ezequías ayühunquechi lloufi* pu huerquen ca pengelelfi com tañi ruca cheu ñi ngülümel falinque fillem: ti plata, oro,* aceite balsamico, caquelu aceite rume falilu, cheu ñi mülen com tañi hueichahue* ca com ñi mülen cheu ñi ngülümel falinque fillem. Ezequías com pengelelfi ñi mülen tañi ruca mu* ca com tañi ngünenieel.

3 Rupalu tüfa Chau Ngünechen ñi huerquen, Isaías pingelu, conpui cheu ñi mülen ti lonco ülmen Ezequías ca ramtufi: “Feichi pu huentru, ¿chem feipingün? ¿Cheu cüpaingün?”. Ezequías huiñoldungui:* “Alü camapu cüpaingün, Babilonia mu”. 4 Fei Isaías ramtufi: “¿Chem peingün tami ruca mu?”. Ezequías huiñoldungueyu: “Peingün com ñi mülen tañi ruca mu. Com tañi falinque fillem pengelelfiñ”.

5 Fei hula Isaías feipifi ta Ezequías: “Allcütufinge ta Chau Jehová, Ñidolcülelu pu hueichafe mu: 6 ‘Fülcülepai chi antü,* fei com ñi mülen tami ruca mu ca com ñi ngülümel tami cuifiqueche ta fantepu mu yengetuai Babilonia mu. Chem no rume ngehuelayai’ feipi Chau Jehová. 7 ‘Ca quiñeque tami pu fotüm yengeai ca cüdahuaingün ti ülmen ruca mu, cheu ñi mülen Babilonia ñi lonco ülmen’”.

8 Allcülu tüfa Ezequías feipifi ta Isaías: “Chau Jehová ñi dungu tami feipiel, cümei tati”. Ca feipi: “Petu ñi mülen iñche,* müleai tüngün* ca cüme felen”.