Isaías
24 ¡Tüfei! Chau Jehová entumequefi pu che tüfachi mapu meu,* huellicünumequefi.
Llüpünacümfi reque,* femngechi ñi pachügentuafiel* tati pu che.
2 Com femngechi rupayaingün:
tati che ca ti sacerdote,
tati cüdaufe ca ti ngen cüdaufe,
tati domo cüdaufe ca ti ngen domo cüdaufe,
tati ngillacaquelu ca ti fendequelu,
tati arelquelu ca ti aretuquelu,
tati arelquelu plata ca ti defequelu.
3 Tüfachi mapu com huelliletuai,
com müntuñmangeai* tañi nieel.
Chau Jehová feipicünui tüfa.
4 Ti mapu hueñancülei,* huesalcaumequei.
Ti cüme mapu tonfünagmequei, afnagmequei.
Ti ülmenque che tüfachi mapu mu tonfünagmequei reque.
5 Pu che podümfi tañi mapu,
huallcünufingün ti ley,
huelucünufingün ti huercün dungu
ca inahuelafingün ti eldungu ñi rumel müleafel.*
6 Feimu tüfachi mapu malisialei ca huesalcalei,
tati pu mülelu fei mu culpantucungeingün.
Tati pu che mülelu tüfachi mapu mu pichin-ngerpuingün,
ti pu huentru pichilehueingün.
7 Ti hue pulcu arcümequei,* ti anüm ofad tonfünagmequei,
ca com pu ayüupiuquelelu afduammequei.
8 Fentepui ti ayühun tripalu pandero meu.
Fentepui ñi huaqueñün pu fiestaquelu.
Fentepui ti arpa ñi ayühun-ngechi ülcantun.
9 Putumequeingün* pulcu, huelu ülcantumequelaingün.
Fürentuquefingün chem tañi putumequen.
10 Ti huellilechi huaria teifücalei.
Com ti ruca racümcülei,* conün-ngelai.
11 Pulcu fel pimequei pu che rüpü püle.
Afi com ti ayühun,
ngehuelai ayühun mapu mu.
12 Ti huaria teifücalehuei,
ti puerta com trañmalehuei.
13 Tüfa ñi rupayal tüfachi mapu rangiñ caquelu troquiñche mu:
feleai cupafcangelu reque ti olivo anümca,
üñiftungelu reque* ti ofad deu tungelu com ti ofad.
14 Pu che huirarpüramai,
ayühun mu huiraraingün.
Conhue antü püle* huldunguaingün Chau Jehová ñi püramyefalngen.
15 Ti mapu mu tripahue antü püle* mülelu püramyengeai ta Chau Jehová.
Lafquen mülechi huapi meu püramyengeai Chau Jehová ñi üi, Israel ñi Chau Dios.
16 Cheu ñi afpun ti mapu allcüiñ ülcantun:
“¡Püramyengepe ti Norngelu!”.
Huelu iñche feipin: “¡Yafüngehuelan, yafüngehuelan!
¡Aungen! Pu che manelfalngelai ca ngünencachemequei.
Felei llemai, amulei ñi manelfalngenon ca ñi ngünencamequen”.
17 Eimi mülelu tüfachi mapu mu, rupayaimi llicafalchi dungu meu, ütrüfconaimi lolo mu ca huachi meu.
18 Inei rume lefmaule ñi allcütufiel llicafalchi dungu, tranaconai lolo mu.
Fei inei rume tripale ti lolo mu, tranaconai huachi mu.
Tati compuerta ñi catrütufiel ti co huenu mu nülanentungeai,
ca ti mapu müllmüllai.
19 Tüfachi mapu nülatripai,
tüfachi mapu nengümcangei,
tüfachi mapu nehuentu trefcücahui.
20 Ti mapu itulquiyahui* quiñe ngollife reque,
epuñpüle nengümcaumequei quiñe llamasa reque* cürüf mu.
Tañi culpan* rume fanei quisu mu.
Trananagai, fei huitrahuetulayai.
21 Feichi antü Chau Jehová juiciantucuafi pu hueichafe* mülelu huenu mu
ca ti pu lonco ülmen mülelu mapu mu.
22 Fei trahulngeaingün
presu reque quiñe rüngan mu,
racümtucungeaingün carcel mu.
Fei fentren antü rupale, juiciantucungeaingün.
23 Tañi troquiñche ñi pu loncolelu, fei engün ñi adquiñ mu
Chau Jehová, Ñidolcülelu pu hueichafe mu, Lonco Ülmencülerpui Sion huincul mu ca Jerusalén meu.
Afmatufalngeai ñi ngünenien.
Feimu ti apo cüyen dumiñcülelu troquingeai,
ca ti alofcülechi antü pelontuquenolu troquingeai.