Isaías
47 Ahuem, Babilonia ñi üllcha püñeñ,*
nagnge ca anünge trufür meu.
Ahuem, Caldea ñi püñeñ,
anünge mapu mu cheu ñi mülenon ülmen huancu.
Chumcaunorume tati pu che huiño feipilayai tami princesangen.
2 Tami cuhu mu nüfinge ti cudi ca rüngümfinge tati fün.
Entunge ti pañu tacunielu tami ange.
Entunge tami pollera, pengelcünunge tami chang.
Notunge ti leufü mu.
3 Pengeai tami triltrangcülen.
Yehuelcangeaimi.
Huiñoleltuayu tami huesa femün,
inei no rume catrütulayaeneu.
5 Ahuem, Caldea ñi püñeñ,
ñücüfcülen mu* anüpunge, conpunge dumiñ meu.
Tati Domo Ngünenielu feipingehuelayaimi.
Huelu eimi cutranpiuqueyelafimi.
Pu füchaqueche cütu tuculelfimi fanechi yucu.
7 Feipimi: “Iñche tati Domo Ngünenielu, rumel femngechi chengean, rumel mu”.
Huelu duamcülelaimi chem tami femmequen,
raquiduamlaimi chumngechi ñi huechutripayal.
8 Feula allcütunge, eimi, rume inaniequeimi fillque illutun dungu,
maneluhun mu anüleimi, feipiqueimi tami piuque mu:
“Iñche tati doi falin-ngelu, ngelai cangelu iñche reque.
Turpu lantulayan.
Chumcaunorume ñamümlayafiñ tañi pu püñeñ”.
9 Huelu quiñe antü mu müten rupayaimi tüfachi epu dungu mu:
ñamümaimi tami pu püñeñ ca lantuaimi.
Tami conün calcu dungu mu ca dahun dungu meu
dituaimu com tüfachi huesaque dungu.
10 Maneluhuimi tami huesa femmequen mu.
Feipimi: “Inei no rume penielaeneu”.
Tami quimün ca tami pepiluhun huelulcaeimu.
Ca raquiduamimi tami piuque mu: “Iñche tati doi falin-ngelu, ngelai cangelu iñche reque”.
11 Huelu huesaque dungu mu rupayaimi,
chem calcu dungu no rume tami femqueel catrütulayafui.*
Huesaque dungu diturumeaimu, chem no rume femlayafuimi.
Apümcarumengeaimi, turpu femngechi rupaquelafuimi.
12 Feimu amulenge müten tami dahucan dungu mu ca tami fillque calcu dungu meu,
huechengelu müten tami femmequeel.
Quellupeafeimu chi,
afmatulpeafuimi chi pu che.
13 Ürcüimi fente tami ramtufiel tami fentren ngülamtufe.
Feula huitratupe engün, eluupe tami montulaeteu,
feiti che ñi poyefiel chem ñi mülen huenu mu,* pu ngüneduamquefilu huangülen,
hue cüyen mu feipicünuqueingün chem ñi rupayal.
14 ¡Tüfei! Fei engün congillhue reque feleingün.
Cütral lüpümayu.
Montuluulayafuingün leuleucülechi cütral meu.*
Feitichi cütral, ailen reque felelayai cheu ñi eñumtual che
ca quiñe cütral reque felelayai cheu ñi anüleal che inaltu mu.
15 Tüfa ñi rupayal tami pu calcu che,
feiti che tami quiñentrür cüdahun huechengelu müten eimi.
Amutuaingün, caque quiñeque fill püle* nampiyahuaingün.*
Inei no rume montul-layafeimu.