LEVÍTICO

1 Chau Jehová mütrümfi* ta Moisés, tati trahunhue tolto ruca mu* dungufi. Feipi: 2 “Dungufinge pu Israel che,* feipifinge: ‘Inei rume eimün meu cüpa chalintuculelfile ta Jehová quiñe ñom culliñ, hulpe quiñe huaca, toro, ufisa cam capüra.

3 Inei rume yele quiñe toro ñi hulal quiñe lüpümngeelchi chalintucun,* mülei ñi hulal quiñe tremolechi toro. Quisu tañi ayün mu chalintucuafi Chau Jehová ñi adquiñ mu itrotripa ti ngillatuhue tolto ruca mu. 4 Fei fampuhulelafi ñi cuhu tati culliñ ñi lonco mu tañi lüpümngeal. Fei Chau Dios llohuai ti chalintucun ca perdonañmayafi ñi culpan.*

5 Fei Chau Jehová ñi adquiñ mu langümngeai ti hue toro. Aarón tañi pu fotüm, pu sacerdote, chalintucuaingün ti mollfüñ, pütefafingün* huall püle ti altar mu,* itrotripa mülelu ti trahunhue tolto ruca mu. 6 Ti culliñ ñi lüpümngeal mülei ñi entutrülquengeal ca ñi catrücangeal. 7 Aarón tañi pu fotüm, pu sacerdote, tucuafingün cütral ti altar meu, fei huente cütral tucuafingün mamüll. 8 Aarón tañi pu fotüm, pu sacerdote, tucuafingün ti catrücalechi culliñ, tañi lonco ca tañi yihuiñ* huente ti üicülechi mamüll mülelu ti altar meu. 9 Co mu mülei ñi cüchangeal ti cüllche ca ti matra. Fei ti sacerdote mülei ñi com lüpümafiel huente altar, fei ñi tripayal fitrun.* Quiñe lüpümngeelchi chalintucun-ngeai, cütral mu chalintucungeai, cüme nümün-ngeai* Chau Jehová mu.

10 Inei rume yele quiñe ufisa cam quiñe capüra ñi hulal quiñe lüpümngeelchi chalintucun, mülei ñi hulal quiñe hue caniru* cam quiñe chifu,* huelu tremolepe. 11 Mülei ñi langümngeal Chau Jehová ñi adquiñ mu, ti altar ñi picun püle.* Fei Aarón tañi pu fotüm, pu sacerdote, pütefafingün ti mollfüñ huall püle ti altar mu. 12 Mülei ñi catrücangeal ti culliñ, fei ti sacerdote tucuafi ti catrücaelchi culliñ, ñi lonco ca tañi yihuiñ* huente üicülechi mamüll mülelu ti altar meu. 13 Co mu mülei ñi cüchangeal ti cüllche ca ti matra. Fei ti sacerdote mülei ñi com lüpümafiel huente altar mu ñi tripayal fitrun. Quiñe lüpümngeelchi chalintucun-ngeai, cütral mu chalintucungeai, cüme nümün-ngeai Chau Jehová mu.

14 Huelu inei rume cüpa yefile quiñe üñüm* ñi eluafiel ta Jehová quiñe lüpümngeelchi chalintucun, mülei ñi hulal maicoño cam pichique paloma. 15 Ti sacerdote chalintucuafi ti üñüm altar mu. Catrüñmayafi ñi pel ca lüpümafi ti üñüm huente altar ñi tripayal fitrun. Huelu hune hutrulnacümafi* ti mollfüñ quiñe püle ti altar mu. 16 Ti sacerdote mülei ñi lahumafiel ca entuñmayafiel tañi ngüño, fei ütrüftucuafi inaltu altar, tripahue antü püle, cheu ñi elcünungequem ti trufquen.* 17 Cheu ñi mülen tañi müpü nülacünuafi, huelu epu troquiñcünulayafi. Fei ti sacerdote lüpümafi huente altar ñi tripayal fitrun. Quiñe lüpümngeelchi chalintucun-ngeai, cütral mu chalintucungeai, cüme nümün-ngeai Chau Jehová mu.

2 Inei rume cüpa chalintuculelfile fün ta Chau Jehová, mülei ñi hulal cüme rüngo, tuculelafi aceite ca huente tuculelafi olibano.* 2 Fei hula yelelafi Aarón ñi pu fotüm, ti pu sacerdote. Ti sacerdote nüai quiñe runa* ti cüme rüngo nielu aceite ca com ti olibano. Fei lüpümafi huente altar ñi tripayal fitrun,* femngechi Chau Dios cüme llohuafi com ti chalintucun.* Cütral mu chalintucungeai, cüme nümün-ngeai Chau Jehová mu. 3 Sofrachi fün ti chalintucun mu mülei ñi elungeal ta Aarón ca tañi pu fotüm. Tüfa rume yamfalngei, coneltulei chem ñi chalintuculelngeel ta Chau Jehová cütral mu.

4 Cüpa chalintucufilmi fün pepicangelu horno mu,* mülei tami deumayafiel cüme rüngo mu. Hulaimi cofque rangiñ mu huechodcülelu, nielayai fayümhue,* aceite engu deumangeai. Cafei hulafuimi churrasca nienolu fayümhue ca huifontucungelu aceite mu.

5 Cüpa chalintucufilmi fün pepicangelu cofilechi lata mu, mülei ñi deumangeal cüme rüngo mu, tuculelngelayai fayümhue* ca reyüleai* aceite engu. 6 Triracangeai* ca hutrulmangeai* aceite. Tüfa tati fün chalintucungelu.

7 Cüpa chalintucufilmi fün pepicangelu challa mu, mülei ñi deumangeal cüme rüngo mu ca aceite engu. 8 Ti fün chalintucun femngechi pepicangelu yelelafimi ta Chau Jehová. Eluafimi ti sacerdote, fei quisu yeafi inafül altar mu. 9 Ti sacerdote pichin entuai ti fün chalintucungelu, femngechi Chau Dios cüme llohuafi com ti chalintucun. Ca lüpümafi huente altar ñi tripayal fitrun. Cütral mu chalintucungeai, cüme nümün-ngeai Chau Jehová mu. 10 Sofrachi fün ti chalintucun mu mülei ñi elungeal Aarón ca tañi pu fotüm. Tüfa rume yamfalngei, coneltulei chem ñi chalintuculelngeel ta Chau Jehová cütral mu.

11 Chalintuculel-layafimün Chau Jehová fün fayümhue* nielu. Püramngechi masan ca miel* lüpümlayafimün ñi tripayal fitrun. Tüfa coneltulelai chem tañi chalintuculelngeal Chau Jehová cütral mu.

12 Chalintuculelafuimün tüfa ta Chau Jehová tati hunenque fün reque, huelu hultucungelayai ti altar mu ñi tripayal cüme nümün.

13 Com ti fün tami chalintucuafiel, chadiñmacünungepe. Ngüyünentulayaimi* ñi tuculelafiel chadi ti mañumtun. Feitichi chadi quelluaimu tami ngoimanoal* chem ñi eldungucünuel tami Chau Dios. Hulün mu quiñe chalintucun, ca chalintucuaimi chadi.

14 Chalintuculelfilmi ta Chau Jehová tami hunenque afülechi fün, mülei tami hulal hueque fün* cotülelu ca tücüncülelu. Femngechi chalintucuaimi tami hunenque afülechi fün. 15 Huente mu tuculelafimi aceite ca olibano. Tüfa tati fün ñi chalintucungeel. 16 Fei ti sacerdote nüai pichin tücüncülechi fün nielu aceite ca com tañi olibano. Lüpümafi ñi fitrun tripayal, femngechi Chau Dios cüme llohuafi com ti chalintucun. Cütral mu chalintuculelngeai ta Chau Jehová.

3 Inei rume hul-le quiñe chalintucun* quiñentrür ingequelu,* hulafui quiñe toro cam quiñe huaca, huelu mülei ñi chalintucual Chau Jehová ñi adquiñ mu tremolechi culliñ. 2 Fei puhulafi ñi cuhu ti culliñ ñi lonco mu tañi chalintucuafiel. Fei langümngeai itrotripa ti trahunhue tolto ruca mu.* Aarón tañi pu fotüm, pu sacerdote, pütefafingün* ti mollfüñ huall püle ti altar mu. 3 Feitichi chalintucun quiñentrür ingequelu, quiñe troquiñ lüpümelngeai ta Chau Jehová. Chalintucungeai ti yihuiñ impolniefilu* ti cüllche ca feiti yihuiñ pünalelu ti cüllche meu. 4 Cafei chalintucungeai tañi epu cusacusa ca tañi yihuiñ fülcülelu tañi furi mu. Entuñmangele ñi cusacusa, ca mülei ñi entuñmangeal ti yihuiñ* mülelu ti que mu.* 5 Fei Aarón tañi pu fotüm huente altar mu com lüpümafingün ñi tripayal fitrun.* Tucuafingün cheu ñi elcünungeel ti lüpümngeelchi chalintucun, huente üicülechi mamüll meu. Cütral mu chalintucungeai, cüme nümün-ngeai Chau Jehová mu.

6 Inei rume cüpa elufile ta Chau Jehová quiñe chalintucun quiñentrür ingequelu, hulafui quiñe ufisa cam quiñe capüra, huentru culliñ cam domo culliñ, huelu mülei ñi tremoleal. 7 Chalintucufile quiñe hue caniru,* Chau Jehová tañi adquiñ meu mülei tañi chalintucuafiel. 8 Fei puhulafi ñi cuhu ti culliñ ñi lonco mu tañi chalintucuafiel. Fei langümngeai itrotripa ti trahunhue tolto ruca mu. Aarón tañi pu fotüm, pu sacerdote, pütefcayafingün ti mollfüñ huall püle ti altar mu. 9 Feitichi chalintucun quiñentrür ingequelu, tati yihuiñ lüpümngeai cütral mu ñi chalintuculelngeal ta Chau Jehová. Catrünentuñmangeai com ñi motrilechi cülen nüucülelu üchomen cudi foro mu.* Ca entuñmangeai feiti yihuiñ impolniefilu* ti cüllche ca ti yihuiñ pünalelu ti cüllche meu. 10 Cafei chalintucungeai tañi epu cusacusa ca tañi yihuiñ fülcülelu tañi furi mu. Entuñmangele ñi cusacusa, ca mülei ñi entuñmangeal ti yihuiñ mülelu ti que mu. 11 Fei ti sacerdote com lüpümafi huente altar ñi tripayal fitrun. Tüfa ta iyael,* cütral mu tucungeai ñi chalintuculelngeal ta Chau Jehová.

12 Inei rume cüpa chalintucufile quiñe capüra, Chau Jehová ñi adquiñ mu chalintucuafi. 13 Fei puhulafi ñi cuhu ti culliñ ñi lonco mu tañi chalintucuafiel. Fei langümngeai itrotripa ti trahunhue tolto ruca mu. Aarón tañi pu fotüm, pu sacerdote, pütefafingün ti mollfüñ huall püle ti altar mu. 14 Cütral mu chalintuculelngeai ta Chau Jehová ti yihuiñ impolniefilu* ti cüllche ca feitichi yihuiñ pünalelu ti cüllche mu. 15 Cafei chalintucungeai tañi epu cusacusa ca tañi yihuiñ fülcülelu tañi furi mu. Entuñmangele ñi cusacusa, ca mülei ñi entuñmangeal ti yihuiñ mülelu ti que mu. 16 Fei ti sacerdote com lüpümafi huente altar ñi tripayal fitrun. Tüfa ta iyael,* cütral mu chalintucungeai ca cüme nümün-ngeai. Com ti yihuiñ Chau Jehová ngen-ngei.

17 Elcünungei tüfachi ley dungu ñi amulerpual. Com tamün pu cüpanche mülei ñi inanieafiel. Turpu ilayafimün yihuiñ ca mollfüñ’”.

4 Chau Jehová dunguniefi ta Moisés: 2 “Feipifinge ti pu Israel che: ‘Femlayaimün feipile Chau Jehová, huelu quiñe che femle ca culpale* fei ñi ngüneduamnon, tüfa mülei ñi femal.

3 Tati dullin sacerdote* culpale,* fei tucufile tati troquiñche culpan dungu mu, mülei ñi yelelafiel ta Chau Jehová quiñe tremolechi hue toro, quiñe chalintucun-ngeai culpan dungu mu, quisu culpalu am. 4 Fei yeafi ti toro Chau Jehová ñi adquiñ mu, itrotripa ti trahunhue tolto ruca mu.* Puhulafi ñi cuhu ti toro ñi lonco mu, fei langümafi Chau Jehová ñi adquiñ mu. 5 Ti dullin sacerdote yeafi pichin ti toro ñi mollfüñ ponhuitu ti trahunhue tolto ruca mu. 6 Fei ti sacerdote huifontucuafi ñi changüll cuhu ti mollfüñ mu. Chau Jehová ñi adquiñ mu regle rupa pütefcayafi* pichin mollfüñ itrotripa ti cortina mülelu ti yamfal mülehue mu. 7 Cafei ti sacerdote pichin mollfüñ tucuai tati altar ñi müta mu cheu ñi lüpümngequen incienso.* Tüfachi altar mülei Chau Jehová ñi adquiñ mu ti trahunhue tolto ruca meu. Sofrachi toro ñi mollfüñ hutrulnacümafi* inaltu ti altar cheu ñi lüpümngequen chalintucun* mülelu itrotripa ti trahunhue tolto ruca meu.

8 Ti toro ñi chalintucungeel culpan dungu mu,* entuñmangeai com tañi yihuiñ, tati impolniefilu* ti cüllche ca ti yihuiñ pünalelu cüllche mu. 9 Cafei entuñmangeai tañi epu cusacusa ca tañi yihuiñ fülcülelu ñi furi mu. Entuñmangele ñi cusacusa, ca mülei ñi entuñmangeal ñi yihuiñ mülelu ti que mu.* 10 Feichi toro hulngelu ti chalintucun quiñentrür ingequelu, ca femngechi femngeai tüfachi toro. Fei ti sacerdote lüpümafi ñi tripayal fitrun* huente altar cheu ñi lüpümngequen chalintucun.

11 Huelu ti trülque toro, tañi ilo, ñi lonco, tañi matra, ti cüllche ca tañi me, 12 com ñi sofraelchi toro mu, huecun yengeai, camapu cheu ñi mülen tati pu che, cheu ñi dullingeel ñi elcünungeal ta trufquen.* Com lüpümafi üicülechi mamüll meu. Mülei ñi lüpümngeal cheu ñi elcünungequen ta trufquen.

13 Femlayaimün pile Chau Jehová, huelu com ti Israel troquiñche quimnofiel mu femle, culpayaingün* fei ñi ngüneduamnon. 14 Fei quimngele ñi culpan engün,* ti trahunche* mülei ñi hulal quiñe hue toro quiñe chalintucun culpan dungu mu. Ca mülei ñi yeafiel itrotripa ti trahunhue tolto ruca meu. 15 Fei Chau Jehová ñi adquiñ mu, pu loncolelu ti troquiñche mu puhulaingün ñi cuhu ti toro ñi lonco mu. Fei langümngeai Chau Jehová ñi adquiñ mu.

16 Fei ti dullin sacerdote yeai pichin toro ñi mollfüñ ponhuitu ti trahunhue tolto ruca mu. 17 Fei ti sacerdote huifontucuafi ñi changüll cuhu ti mollfüñ mu. Chau Jehová ñi adquiñ mu regle rupa pütefcayafi pichin mollfüñ itrotripa ti cortina mu. 18 Cafei ti sacerdote tucuai pichin mollfüñ tati müta ñi nieel ti altar mülelu Chau Jehová ñi adquiñ mu ti trahunhue tolto ruca meu. Sofrachi mollfüñ hutrulnacümafi inaltu altar cheu ñi lüpümngequen chalintucun, mülelu itrotripa ti trahunhue tolto ruca meu. 19 Entuñmayafi com ñi yihuiñ tati toro, fei lüpümafi huente altar ñi tripayal fitrun. 20 Chem ñi femfiel ti cangelu toro chalintucungelu culpan dungu mu,* ca femngechi femafi tüfachi toro. Femngechi femai ti sacerdote, fei tüfachi chalintucun mu liftungeai ti troquiñche ñi culpan ca perdonangeai. 21 Fei ti sacerdote huercüai ñi yengeal ti toro huecun, camapu cheu ñi mülen ti pu che. Fei lüpümafi chumngechi ñi lüpümfiel ti hunen toro. Femngechi tati troquiñche ñi duam mu, hulngeai tüfachi chalintucun culpan dungu mu.*

22 Femlayaimün pile Chau Dios Jehová, huelu quiñe loncolelu ti troquiñche mu femle ca culpale* fei ñi ngüneduamnon, conai culpan dungu mu. 23 Cafei raquiduamtucule ñi culpan* inanofiel mu quiñe huercün dungu, mülei ñi chalintucual quiñe tremolechi pichi chifu.* 24 Puhulafi tañi cuhu ti pichi chifu ñi lonco mu, fei langümafi cheu ñi langümngequen ti lüpümngeelchi chalintucun Chau Jehová ñi adquiñ mu. Tüfa quiñe chalintucun culpan dungu mu.* 25 Tüfachi chalintucun culpan dungu mu,* ti sacerdote tañi changüll cuhu mu tucuai pichin mollfüñ tati altar ñi müta mu cheu ñi lüpümngequen chalintucun. Sofrachi mollfüñ hutrulnacümafi inaltu altar cheu ñi lüpümngequen chalintucun. 26 Fei lüpümafi com ti yihuiñ huente altar ñi tripayal fitrun, chumngechi ñi femfiel ti yihuiñ tati chalintucun quiñentrür ingequelu. Femngechi femai ti sacerdote ñi liftungeal ti che ñi culpan,* fei perdonangeai.

27 Femlayaimün pile Chau Jehová, huelu quiñe che femle ca culpale* fei ñi ngüneduamnon, conai culpan dungu mu. 28 Cafei ngüneduamle ñi culpan,* mülei ñi yeafiel quiñe tremolechi pichi capüra ñi hulal quiñe chalintucun tañi culpan dungu mu. 29 Puhulai ñi cuhu ti pichi capüra ñi lonco mu, tüfa ti chalintucun culpan dungu mu.* Fei langümafi cheu ñi langümngequen ti lüpümngeelchi chalintucun. 30 Tüfachi chalintucun mu ti sacerdote pichin mollfüñ entuai, fei tañi changüll cuhu mu tuculelafi tati altar ñi müta mu cheu ñi lüpümngequen chalintucun. Sofrachi mollfüñ hutrulnacümafi inaltu altar. 31 Fei entuñmayafi com tañi yihuiñ, chumngechi ñi entuñmangequen com ti yihuiñ ti chalintucun quiñentrür ingequelu. Fei ti sacerdote lüpümafi huente altar ñi tripayal fitrun, quiñe chalintucun cüme nümün-ngelu Chau Jehová mu. Femngechi femai ti sacerdote ñi liftungeal ti che ñi culpan,* fei perdonangeai.

32 Huelu yefile quiñe pichi ufisa ñi hulal ti chalintucun culpan dungu mu,* mülei tañi tremoleal. 33 Puhulafi ñi cuhu ti pichi ufisa ñi lonco mu, tüfa ti chalintucun culpan dungu mu.* Fei langümafi cheu ñi langümngequen ti lüpümngeelchi chalintucun. 34 Tüfachi chalintucun culpan dungu mu,* ti sacerdote tañi changüll cuhu mu tucuai pichin mollfüñ tati altar ñi müta mu cheu ñi lüpümngequen chalintucun. Sofrachi mollfüñ hutrulnacümafi inaltu altar. 35 Entuñmayafi com ti yihuiñ chumngechi ñi entuñmangequen ti yihuiñ tati hue caniru* feiti chalintucun quiñentrür ingequelu. Fei ti sacerdote lüpümafi huente altar ñi tripayal fitrun. Tucuafi huente feitichi chalintucun ñi elungen ta Chau Jehová cütral mu. Femngechi femai ti sacerdote ñi liftungeal ti che ñi culpan,* fei perdonangeai.

5 Quiñe che peafui ta cangelu ñi culpamequen* cam quimafui chi ñi culpan. Feimu mütrümngele* pu che ñi feipial chem tañi rupan,* huelu feichi che amunole, conai culpan dungu mu ca castigangeai tañi culpan mu.

2 Quiñe che nünütufile chem rume lifngenolu,* quiñe lachi auca culliñ* lifngenolu, quiñe lachi ñom culliñ lifngenolu cam lachi pichique culliñ* lifngenolu, feichi che lifngelayai, fei culpayai,* ngüneduamnole rume tañi femün. 3 Quiñe che ngüneduamnon mu nünütufile chem rume lifngenolu, fei tüfa femcünuafeyu ñi lifngenoal. Huelu ngüneduamle ñi femün, fei conai culpan dungu mu.*

4 Quiñe che ngüneduamnon mu matu eldungucünuafui, cüme dungu cam huesa dungungeafui rume. Fei ngüneduamle ñi matu eldungucünun, conai culpan dungu mu.*

5 Inei rume conle culpan mu* tüfachi dungu ñi duam mu, mülei ñi entudungual* chumngechi tañi culpan. 6 Cafei yelelafi ta Chau Jehová quiñe chalintucun* huelulcan mu, quisu culpalu am.* Yelelafi quiñe pichi ufisa cam quiñe pichi capüra, tüfa quiñe chalintucun culpan dungu mu. Fei ti sacerdote hulai ti chalintucun ñi perdonangeal ti che ñi culpan.

7 Huelu nienole plata ñi yeal quiñe ufisa, yelelafi ta Jehová epu maicoño cam epu pichique paloma ñi hulal ti chalintucun huelulcan mu quisu tañi culpan meu.* Chalintucuai quiñe üñüm* tañi culpan meu ca ti cangelu üñüm lüpümngeelchi chalintucun-ngeal. 8 Yelelafi tati epu üñüm ti sacerdote. Fei hune chalintucuai tati üñüm ti culpan dungu mu.* Catrüñmayafi ñi pel, huelu entuñmalayafi ti lonco. 9 Quiñe püle ti altar pütefafi* pichin mollfüñ tati chalintucun culpan dungu mu.* Sofrachi mollfüñ hutrulnacümafi* inaltu altar. Tüfa tati chalintucun culpan dungu mu. 10 Fei chalintucuai ti cangelu üñüm quiñe lüpümngeelchi chalintucun-ngeal. Femai chumngechi ñi femngequen. Femngechi femai ti sacerdote ñi liftungeal ti che ñi culpan,* fei perdonangeai.

11 Huelu nienole plata ñi hulal epu maicoño cam epu pichique paloma, mülei ñi yeafiel quiñe kilo cüme rüngo* ñi hulal ti chalintucun culpan dungu mu* quisu tañi culpan meu. Tuculel-layafi aceite ca olibano no rume, tüfa am quiñe chalintucun culpan dungu mu. 12 Fei yelelafi chem ñi chalintucual ti sacerdote. Ti sacerdote nüai quiñe runa,* fei lüpümafi huente altar ñi tripayal fitrun,* femngechi Chau Dios cüme llohuafi com ti chalintucun. Tucuafi huente feitichi chalintucun ñi elungen ta Chau Jehová cütral mu. Tüfa quiñe chalintucun culpan dungu mu.* 13 Femngechi femai ti sacerdote ti che ñi culpan mu,* chuchi tüfachi dungu meu rume culpale, fei perdonangeai. Sofrachi chalintucun mülei ñi elungeal ti sacerdote, chumngechi ñi elungen ti sofrachi fün chalintucungelu’”.

14 Chau Jehová dunguniefi ta Moisés, feipifi: 15 “Quiñe che ngüneduamnon mu culpayafui* pecancafiel mu* Chau Jehová tañi yamfal chemcün, fei huesa femürpuafui. Femle, mülei ñi yelelafiel ta Chau Jehová quiñe tremolechi caniru,* tüfa quiñe chalintucun huelulcan mu. Ti sacerdote feipiai tunten* plata ñi falin ti caniru. Fanefanetungeai ti plata chumngechi ñi fanefanetungequeel ti yamfal mülehue mu. 16 Mülei ñi cullial tunte ñi falin ti yamfal chemcün quisu ñi pecancafiel. Cafei tunte ñi falin hudamngeai quechu troquiñ meu, fei ca mülei ñi cullial quiñe. Com eluafi tati sacerdote, fei ti sacerdote hulai ti caniru tati chalintucun huelulcan mu, femngechi liftungeai ti che ñi culpan.* Fei perdonangeai.

17 Femlayaimün pile Chau Jehová, huelu quiñe che femle ca culpale,* ngüneduamnon mu rume, culpan dungu mu conai. Fei castigangeai tañi culpan meu. 18 Mülei ñi yelelafiel ti sacerdote quiñe tremolechi caniru, tüfa mülei ñi falial tunte ñi feipingen. Femngechi hulngeai ti chalintucun huelulcan mu. Femngechi femai ti sacerdote ñi liftungeal ti che ñi culpan,* quisu culpalu am tañi ayünon mu ca quimnon mu. Fei perdonangeai. 19 Tüfa quiñe chalintucun huelulcan mu. Quisu culpai* Chau Jehová mu, feimu coni culpan dungu mu”.

6 Chau Jehová feipifi ta Moisés: 2 “Inei rume culpale* ca feyentunofile ta Chau Jehová, fei ngünencafi ñi chafche* ñi elfalcünueteu cam hueñeñmafi cam müntuñmafi* ñi nieel tañi chafche 3 cam pedafile* quiñe chemcün, huelu coilatule ca coila dungu mu feipile iñche culpalan,* tüfa mülei tañi femal: 4 culpale,* mülei ñi huiñoleltual chem tañi hueñen, chem tañi nierpuel ngünencan dungu meu, chem tañi elfalcünulelngeel, chem tañi pedael 5 cam chemngeafui rume ñi feipicünun coila dungu mu, mülei ñi com huiñoleltual cam ñi cullial com tañi falin. Cafei tunte* ñi falin hudamngeai quechu troquiñ meu, fei ca mülei ñi cullial quiñe. Feichi antü quimngele ñi culpan,* mülei ñi huiñoleltuafiel ti ngen chemcün. 6 Fei yelelafi ta Chau Jehová quiñe chalintucun* huelulcan mu. Yelelafi ti sacerdote quiñe caniru.* Ti sacerdote feipiai tunten plata ñi falin ti caniru. Femngechi hulai ti chalintucun huelulcan mu. 7 Ti sacerdote hulai ti chalintucun Chau Jehová ñi adquiñ mu ñi liftungeal ti che ñi culpan.* Fei chem mu rume tañi culpan perdonangeai”.

8 Chau Jehová dunguniefi ta Moisés, feipifi: 9 “Eluafimi tüfachi huercün dungu ta Aarón ca tañi pu fotüm. Feipiafimi engün: ‘Tüfa tati ley dungu ñi hulngeal lüpümngeelchi chalintucun. Ti lüpümngeelchi chalintucun com pun müleai ti cütral mu ñi mülen ti altar mu, hunle hula. Ti cütral mülei ñi üicüleal altar mu. 10 Ti sacerdote tucutuhuai tañi sacerdote tacun lino deumangelu ca tucutuhuai tañi lino charahuilla. Com lüpümngele cütral mu ti lüpümngeelchi chalintucun altar mu, entuafi com ti trufquen,* fei quiñe püle ti altar elcünuafi. 11 Fei hula modahuai* ca yeafi ti trufquen cheu ñi dullingeel tañi elcünungeal, camapu cheu ñi mülen pu che. 12 Ti cütral mülei ñi üicüleal altar mu, chongümngelayai. Fill pulihuen ti sacerdote lüpümafi ti mamüll tüfa meu. Fei tucuai ti lüpümngeelchi chalintucun. Cafei lüpümafi ti yihuiñ tripalu feitichi chalintucun quiñentrür ingequelu, fei ñi tripayal fitrun. 13 Ti cütral fill antü mülei ñi üicüleal altar mu, chongümngelayai.

14 Tüfa tati ley dungu ñi chalintucungeal ti fün. Eimün, Aarón ñi pu fotüm, mülei tamün chalintucuafiel Jehová tañi adquiñ mu itrotripa ti altar. 15 Feitichi fün chalintucungelu, quiñe sacerdote nüai quiñe runa* cüme rüngo, pichin aceite ca com ti olibano, fei lüpümafi huente altar ñi tripayal fitrun,* femngechi Chau Dios cüme llohuafi com ti chalintucun. Tüfachi chalintucun cüme nümün-ngeai Chau Jehová mu. 16 Aarón ca tañi pu fotüm elungeai ti sofrachi fün chalintucungelu. Deumayai engün fayümngenochi cofque. Fei iyafingün quiñe yamfal mülehue mu ti trahunhue tolto ruca* ñi lepün meu.* 17 Ngelai ñi tuculelngeal fayümhue.* Iñche elufiñ engün, tüfa tañi coneltulen engün iñche tañi chalintuculelngeel cütral mu. Rume yamfalngei chumngechi ñi yamfalngen ti chalintucun culpan dungu mu* ca ti chalintucun huelulcan mu. 18 Aarón tañi pu cüpanche müten iyafingün, re huentru müten. Rumel elungeaingün tüfa, coneltulei chem ñi chalintuculelngeel Chau Jehová cütral mu. Chem rume tuntucufile tachi chalintucun, yamfalngeai’”.

19 Chau Jehová huiño dungufi ta Moisés, feipifi: 20 “Aarón ca tañi pu fotüm, tüfachi chalintucun rumel mülei ñi eluafiel ta Chau Jehová feichi antü dullingele engün. Chalintucuaingün fün, quiñe kilo cüme rüngo,* rangiñ kilo pulihuen ca rangiñ kilo nagantü. 21 Aceite engu pepicangeai, tucungeai cofilechi lata mu. Fei cüme reyülcünuafimi* aceite mu. Triracayafimi,* femngechi hulaimi tüfachi chalintucungeelchi fün afülelu. Cüme nümün-ngeai Chau Jehová mu. 22 Inei rume Aarón tañi cüpanche meu sacerdotecünungele ñi hueluconal Aarón mu, hulai tüfachi chalintucun. Elcünungei tüfachi ley dungu ñi amulerpual: com tüfachi chalintucun lüpümelngeai ta Chau Jehová ñi tripayal fitrun. 23 Chalintucungele fün quiñe sacerdote ñi duam mu, mülei ñi com lüpümngeal. Ingelayai”.

24 Chau Jehová huiño dungufi ta Moisés, feipifi: 25 “Feipiafimi ta Aarón ca tañi pu fotüm: ‘Tüfa tati ley dungu ñi hulngeal ti chalintucun culpan dungu mu.* Tüfachi chalintucun langümngeai Chau Jehová ñi adquiñ mu cheu ñi langümngequen ti lüpümngeelchi chalintucun. Tüfa rume yamfalngei. 26 Ti sacerdote lloulu ti chalintucun culpan dungu mu* iyafi. Ingeai quiñe yamfal mülehue mu ti trahunhue tolto ruca ñi lepün meu.*

27 Chem rume tuntucufile ti ilo, yamfalngeai. Pütefrumele* pichin mollfüñ quiñe huesaquelu mu, mülei tami cüchatuafiel quiñe yamfal mülehue mu. 28 Ti ilo huadcümngele quiñe rag challa mu,* mülei ñi trafongeal ti challa. Huelu huadcümngele quiñe challa mu deumangelu cobre mu, mülei ñi carüfngeal ca cüchangeal co mu.

29 Com pu huentru sacerdotengelu iyafingün. Rume yamfalngei. 30 Quiñeque mu yengeafui trahunhue tolto ruca mu pichin mollfüñ feitichi culliñ chalintucungelu culpan dungu mu,* fei ti yamfal mülehue mu liftungeai ti culpan. Femngele, ingelayai ti ilo. Doi mai lüpümngeai cütral mu.

7 Tüfa tati ley dungu ñi hulngeal chalintucun* huelulcan mu. Rume yamfalngei. 2 Langümngeai tüfachi chalintucun huelulcan mu cheu ñi langümngequen ti lüpümngeelchi chalintucun. Fei huall püle pütefcangeai* ti altar tati mollfüñ mu. 3 Ti sacerdote* chalintucuai com ti yihuiñ, tañi motrilechi cülen, ti yihuiñ impolniefilu* ti cüllche, 4 tañi epu cusacusa ca tañi yihuiñ fülcülelu ñi furi mu. Entuñmangele ñi cusacusa, ca mülei ñi entuñmangeal ñi yihuiñ mülelu ti que mu.* 5 Ti sacerdote com lüpümafi altar mu ñi tripayal fitrun.* Cütral mu chalintuculelngeai ta Chau Jehová. Tüfa tati chalintucun huelulcan mu. 6 Com pu huentru sacerdotengelu iyafingün. Mülei ñi ingeal quiñe yamfal mülehue mu. Rume yamfalngei. 7 Quiñe ley dungu müten inaniengeai ñi hulngeal ti chalintucun culpan dungu mu* ca ti huelulcan mu. Ti sacerdote hul-lu ti chalintucun ngen-ngeai ti ilo mu.

8 Quiñe che ñi duam mu ti sacerdote hul-le quiñe lüpümngeelchi chalintucun, quisungeai ti trülque.

9 Chem fün rume chalintucungelu pepicangele horno mu,* challa mu cam cofilechi lata mu, elungeai ti sacerdote hul-lu ti chalintucun, quisungeai. 10 Huelu ti fün reyüconcülele* aceite engu cam nienole aceite, Aarón tañi pu fotümngeai. Quisuque engün trür llohuaingün.

11 Tüfa tati ley dungu quiñe che ñi eluafiel ta Chau Jehová chalintucun quiñentrür ingequelu. 12 Ti che chalintucule tüfa ñi pengelal tañi mañumcülen, tüfachi chalintucun quiñe mañumtun-ngeai. Fei chalintucule tüfa, ca chalintucuai cofque rangiñ mu huechodcülelu aceite engu deumangelu, cafei churrasca nienolu fayümhue* huifontucungelu aceite mu. Cafei yeai cofque rangiñ mu huechodcülelu, cüme rüngo mu deumangeai, cüme reyüleai* ca tuculelngeai fentren aceite. 13 Hultucufile tüfachi chalintucun, ca chalintucuai cofque rangiñ mu huechodcülelu ca nielu fayümhue* ca ti chalintucun quiñentrür ingequelu, tüfa tati mañumtun. 14 Tüfachi chalintucun mu mülei cofque caque rume deumangelu, fei quiñe müten entungeai caque rume deumangelu, tüfa püntücünulelngeai ta Chau Jehová. Feita elungeai ti sacerdote ñi pütefmequefiel ti mollfüñ feitachi chalintucun quiñentrür ingequelu. 15 Hul-le ti chalintucun quiñentrür ingequelu, feitichi mañumtun, feichi antü mu müten mülei ñi ingeal ti ilo. Ngelai ñi echelcünuafiel* ca antü ñi ingeal.

16 Ti che hul-le ti chalintucun tañi eldungucünuel mu cam quisu tañi ayün mu chalintucule, feichi antü mu müten mülei ñi ingeal ti ilo. Sofrale, ca antü ingeafui. 17 Huelu cüla antü rupale, mülei ñi lüpümngeal cütral mu sofrachi ilo ti chalintucun mu. 18 Cüla antü rupale, huelu ingele ñi ilo ti chalintucun quiñentrür ingequelu, Chau Dios lloulayafi feichi che hul-lu ti chalintucun. Tañi chalintucun chem cümelcalayaeyu rume. Tüfachi dungu ünufali. Ti che ifilu ti ilo castigangeai tañi culpan meu.* 19 Tati ilo tuntucufile chem rume lifngenolu, mülei tañi ingenoal. Mülei ñi lüpümngeal cütral mu. Tati lifngelu iyafui ti lifngechi ilo.

20 Huelu inei rume lifngenole, ifile ti ilo ñi chalintuculelngeel ta Chau Jehová ñi quiñentrür ingeal, mülei tañi langümngeal. 21 Inei rume nüafui chi quiñe che cam culliñ lifngenolu, chem rume ünufalngelu ca lifngenolu. Fei ifile tati ilo ñi chalintuculelngeel ta Chau Jehová ñi quiñentrür ingeal, feitichi che mülei tañi langümngeal’”.

22 Chau Jehová dunguniefi ta Moisés, feipifi: 23 “Feipifinge ti pu Israel che: ‘Iñmalayafimün ñi yihuiñ quiñe toro, hue caniru* cam quiñe capüra. 24 Pedangele* quiñe la culliñ, chem mu rume pünengeafui tañi yihuiñ, huelu ngelai ñi ingeal. Ca femngeai quiñe culliñ langümeliyu cangelu culliñ. 25 Quiñe che cütral mu chalintuculelfile ta Chau Jehová quiñe culliñ, huelu ifile ti yihuiñ, mülei tañi langümngeal.

26 Cheu rume mülelmün, mülelai tamün iñmayafiel ñi mollfüñ quiñe üñüm* cam chem culliñ no rume. 27 Inei rume ifile ti mollfüñ, mülei ñi langümngeal’”.

28 Chau Jehová feipiniefi ta Moisés: 29 “Feipifinge tati pu Israel che: ‘Inei rume yelelfile ta Chau Jehová quiñe chalintucun quiñentrür ingequelu, quiñe troquiñ mülei ñi eluafiel ta Chau Jehová. 30 Tañi cuhu mu yeafi ti yihuiñ ca ti rücu ñi lüpümelafiel ta Chau Jehová cütral mu. Epuñpüle nengümcayafi Chau Jehová ñi adquiñ mu tañi chalintuculelafiel. 31 Ti sacerdote huente altar lüpümafi ti yihuiñ ñi tripayal fitrun. Huelu ti rücu elungeai Aarón ca tañi pu fotüm.

32 Tamün chalintucun quiñentrür ingequelu, püntücünuafimün* ti chang* man püle mülelu. Fei eluafimün ti sacerdote. 33 Aarón ñi fotüm chalintucule ti mollfüñ ca ti yihuiñ feitichi chalintucun quiñentrür ingequelu, fei elungeai ti chang man püle mülelu tañi quisungeal. 34 Iñche ngen-ngen ti rücu epuñpüle nengümcangelu ca tati chang püntücünungelu* feitichi chalintucun quiñentrür ingequelu ñi hulün tati pu Israel che. Elufiñ tüfa ta Aarón ca tañi pu fotüm. Tüfachi ley dungu elcünungei ñi rumel inanieafiel tati pu Israel che.

35 Tüfa mülefui ñi püntücünulelngeal tati pu sacerdote, coneltulei chem ñi chalintuculelngeel ta Chau Jehová cütral mu. Mülefui ñi püntücünulelngeal feichi antü ñi chalintucungeel Aarón ca tañi pu fotüm Chau Jehová tañi pu sacerdotengeal. 36 Feichi antü Chau Jehová ñi dullifiel tati pu sacerdote, femcünui tüfachi dungu ñi püntücünulelngeal* tüfa tati pu Israel che mu. Tüfachi ley dungu mülei ñi amulerpual, com tañi pu cüpanche mülei ñi inanieafiel’”.

37 Tüfa tati ley dungu ñi hulngeal ti lüpümngeelchi chalintucun, ti fün chalintucungelu, ti chalintucun culpan dungu mu, ti chalintucun huelulcan mu, ti chalintucun ñi elfalcünungeal pu sacerdote ca ti chalintucun quiñentrür ingequelu. 38 Chau Jehová femngechi feipicünufi ta Moisés Sinaí huincul mu, feichi antü feipicünufi tati pu Israel che ñi eluafiel tañi chalintucun ta Chau Jehová Sinaí pingechi huellin mapu meu.*

8 Chau Jehová dunguniefi ta Moisés, feipifi: 2 “Yefinge ta Aarón ca tañi pu fotüm, tañi tacun, ti falin aceite, ti toro ñi chalintucungeal culpan dungu mu,* ti epu caniru* ca ti cülco* nielu fayümngenochi cofque. 3 Fei com ti pu che trahulafimi itrotripa ti trahunhue tolto ruca mu”.*

4 Feimu Moisés femi com ñi feipicünuel Chau Jehová. Fei tati pu che trahuluhui itrotripa ti trahunhue tolto ruca mu. 5 Moisés feipifi tati pu che: “Chau Jehová feipicünueiñmeu taiñ femal tüfa”. 6 Fei Moisés feipifi ñi fülconal* Aarón ca tañi pu fotüm, ca cüchafi engün co mu. 7 Fei tuculelfi ta Aarón tati tacun, ti trarihue, ti tacun nienolu cuhul.* Ca tuculelfi ti sacerdote ñi falin tacun* ca cüme traricünulelfi ti ngüren trarihue. 8 Fei hula tuculelfi tati pichi carpa yengelu rücu mu ca tucufi ti Urim ca ti Tumim tati pichi carpa mu. 9 Fei tuculelfi ti munulonco ca tol püle tucufi tati yamfal oro lamina* huilüfcülelu, chumngechi ñi feipicünufiel Chau Jehová ta Moisés.

10 Fei hula Moisés tucufi tüfachi falin aceite tati ngillatuhue tolto ruca ca com tañi mülen tüfa meu. Fei com püntücünufi engün* tañi rume yamfalngeal. 11 Fei hula pichin aceite mu regle rupa pütefmafi* ti altar, com tañi chemcün,* tati fütra lafatorio ca cheu tañi anüleal. Püntücünufi* tañi rume yamfalngeal. 12 Moisés inan-ngechi hutrulelfi* pichin ti falin aceite Aarón tañi lonco mu, femngechi püntücünulelfi* ta Chau Dios.

13 Fei Moisés feipifi ñi fülconal Aarón ca tañi pu fotüm. Tuculelfi tati tacun, ti trarihue, tati munulonco, chumngechi ñi feipicünufiel Chau Jehová ta Moisés.

14 Fei hula Moisés huercüi ñi cüpalelngeal ti toro ñi chalintucungeal culpan dungu mu.* Aarón ca tañi pu fotüm puhulingün ñi cuhu ti toro ñi lonco mu ñi chalintucungeal culpan dungu mu. 15 Moisés langümfi ti culliñ, fei tañi changüll cuhu mu tucui pichin mollfüñ tati altar ñi meli müta mu. Femngechi liftufi ti altar. Sofrachi mollfüñ hutrulnacümfi inaltu altar ñi liftuafiel, femngechi hulngeafui tüfa meu chalintucun* ñi liftungeam ta culpan.* 16 Fei nüi com ti yihuiñ mülelu cüllche mu, tati yihuiñ mülelu ti que mu,* tati epu cusacusa tañi yihuiñ engu. Fei Moisés lüpümfi altar mu ñi tripayal fitrun.* 17 Fei sofrachi la culliñ, tañi trülque, ñi ilo ca tañi me, cütral mu lüpümngei huecun, camapu cheu ñi mülen pu che, chumngechi ñi feipicünufiel Chau Jehová ta Moisés.

18 Fei feipi ñi cüpalelngeal ti caniru ñi hulal ti lüpümngeelchi chalintucun. Aarón ca tañi pu fotüm puhulingün ñi cuhu ti caniru ñi lonco mu. 19 Feimu Moisés langümfi ti caniru, fei pütefmafi ti mollfüñ huall püle ti altar mu. 20 Catrücangei ti caniru, fei Moisés lüpümfi ti lonco, ti catrün ca ti yihuiñ* ñi tripayal fitrun. 21 Co meu cüchangei ti cüllche ca ti matra. Fei Moisés lüpümfi com ti caniru altar mu ñi tripayal fitrun. Tüfachi chalintucun cüme nümün-ngei. Cütral mu chalintuculelngei ta Chau Jehová, chumngechi ñi feipicünufiel Chau Jehová ta Moisés.

22 Fei hula Moisés feipi ñi cüpalelngeal ti cangelu caniru, tüfa chalintucungeafui ñi üitungeal pu sacerdote. Fei Aarón ca tañi pu fotüm puhulingün ñi cuhu ti caniru ñi lonco mu. 23 Moisés langümfi ti caniru, fei tuculelfi pichin mollfüñ Aarón tañi man pilun mu, tañi man motrin changüll cuhu mu* ca tañi man motrin changüll namun.* 24 Fei Moisés feipi ñi fülconal Aarón tañi pu fotüm. Tuculelfi engün pichin mollfüñ tañi man pilun meu, tañi man motrin changüll cuhu mu ca tañi man motrin changüll namun. Fei sofrachi mollfüñ Moisés pütefmafi huall püle ti altar.

25 Fei nüi com ti yihuiñ, tati motrilechi cülen, com ti yihuiñ mülelu cüllche mu, tati yihuiñ mülelu ti que mu,* tati epu cusacusa tañi yihuiñ engu ca tati chang* man püle mülelu. 26 Chau Jehová ñi adquiñ mu mülerquei ti canastu nielu fayümngenochi cofque. Feiti mu entui quiñe cofque rangiñ mu huechodcülelu nienolu fayümhue* ca quiñe deumangelu aceite mu, cafei quiñe churrasca. Fei huente tucufi cheu ñi mülen ti yihuiñ ca ti man mülechi chang. 27 Fei tucufi com tüfa Aarón ca tañi pu fotüm ñi pülai cuhu mu. Fei eluhui ñi epuñpüle nengümcayafiel Chau Jehová ñi adquiñ mu tañi chalintuculelafiel. 28 Feimu Moisés entuñmafi tañi cuhu mu engün, lüpümfi altar mu ñi tripayal fitrun, huente cheu ñi mülen ti lüpümngeelchi chalintucun. Hulngei tüfachi chalintucun ñi üitungeal pu sacerdote. Cüme nümün-ngei, cütral mu chalintuculelngei ta Chau Jehová.

29 Fei hula Moisés nüi ti rücu ca epuñpüle nengümcafi Chau Jehová ñi adquiñ mu tañi chalintuculelafiel. Tüfachi caniru chalintucungelu ñi üitungeal pu sacerdote, ti rücu elungei ta Moisés, chumngechi ñi feipicünufiel Chau Jehová ta Moisés.

30 Fei Moisés nüi quiñe pichin ti falin aceite ca ti mollfüñ mülelu huente altar, fei pütefmafi Aarón, tañi pu fotüm ca tañi tacun engün. Femngechi Aarón, tañi pu fotüm ca tañi tacun engün püntücünulelngei* ta Chau Dios.

31 Feimu Moisés feipifi ta Aarón ca tañi pu fotüm: “Huadcümafimün ti ilo itrotripa ti trahunhue tolto ruca mu. Tiye mu iyafimün cofque engu ñi mülen ti cülco* pünengelu ñi üitungeal pu sacerdote. Femngechi feipicünungen cai: ‘Aarón ca tañi pu fotüm iyafingün’. 32 Sofrale ilo ca cofque, lüpümngeai cütral mu. 33 Regle antüñmayai tamün sacerdotecünungeal, feimu mülenagaimün müten regle antü itrotripa ti trahunhue tolto ruca, fentepuule hula feichi antü tamün sacerdotecünungeal. 34 Chau Jehová femngechi feipicünui taiñ femal fachantü, fei liftuñmangeaimün tamün culpan.* 35 Regle antü mülenagaimün itrotripa ti trahunhue tolto ruca mu, antü ca pun meu. Fei femaimün com tamün feipicünueteu Chau Jehová, fei lalayaimün, femngechi feipingen cai”.

36 Aarón ca tañi pu fotüm femngechi femingün com tañi feipicünuel Chau Jehová ta Moisés.

9 Pura antü mu Moisés mütrümfi* ta Aarón, tañi pu fotüm ca ti pu loncolelu Israel mu. 2 Feipifi ta Aarón: “Nüaimi quiñe tremolechi pichi culliñ,* chalintucuafimi tami culpan dungu mu.* Cafei nüaimi quiñe tremolechi caniru* tami hulal lüpümngeelchi chalintucun,* Chau Jehová ñi adquiñ mu chalintucuafimi. 3 Huelu feipiafimi tati pu Israel che: ‘Nüfimün quiñe chifu* tamün chalintucuafiel culpan dungu mu.* Cafei nüaimün quiñe pichi culliñ ca quiñe hue caniru, mür mülei ñi tremoleal ca ñi nieal quiñe tripantu müten. Fei hulaimün lüpümngeelchi chalintucun. 4 Cafei nüaimün quiñe toro ca quiñe caniru, fei hulaimün ti chalintucun quiñentrür ingequelu, Chau Jehová tañi adquiñ mu chalintucuafimün. Cafei chalintucuaimün fün reyülelu* aceite engu, fachantü Chau Jehová peufaluhuai eimün meu’”.

5 Com ñi feipicünuel Moisés yefingün itrotripa ti trahunhue tolto ruca mu.* Com pu che fülconingün,* huitracünuhuingün Chau Jehová tañi adquiñ meu. 6 Moisés feipi: “Tüfa feipicünui Chau Jehová tamün femal, fei Chau Jehová pengelelaimünmeu tañi fütra pelon”. 7 Feimeu Moisés feipifi ta Aarón: “Fülconpange altar mu, fei hulaimi tami chalintucun culpan dungu mu* ca tami lüpümngeelchi chalintucun, femngechi perdonangeaimi ca tami pu che. Cafei hultucuaimi ti troquiñche ñi chalintucun, femngechi tañi perdonangeal engün, femaimi chumngechi ñi feipicünuel Chau Jehová”.

8 Feimeu müten Aarón fülconi altar mu, fei langümfi ti pichi culliñ ñi chalintucuafiel tañi culpan mu.* 9 Aarón ñi pu fotüm yeleleyu engün ti mollfüñ, fei Aarón huifontucufi tañi changüll cuhu mollfüñ mu ca tucufi altar ñi müta mu. Fei sofrachi mollfüñ hutrulnacümfi* inaltu altar. 10 Fei hula lüpümfi huente altar ti yihuiñ, tati cusacusa ca ti yihuiñ mülelu ti que mu* ñi tripayal fitrun.* Femngechi huli ti chalintucun culpan dungu mu.* Femi chumngechi ñi feipicünufiel Chau Jehová ta Moisés. 11 Fei huecun lüpümfi ti ilo ca ti trülque camapu cheu ñi mülen pu che.

12 Fei hula langümfi ti lüpümngeelchi chalintucun. Aarón tañi pu fotüm yeleleyu engün ti mollfüñ, fei pütefmafi* huall püle ti altar. 13 Yeleleyu engün tati catrücalechi culliñ ca ti lonco tati lüpümngeelchi chalintucun. Fei Aarón lüpümfi huente altar ñi tripayal fitrun. 14 Cafei cüchafi tati cüllche ca ti matra, fei lüpümfi huente altar ñi tripayal fitrun, huente cheu ñi mülen ti lüpümngeelchi chalintucun.

15 Fei hula huli ti troquiñche ñi chalintucun, nüi ti chifu ñi chalintucuafiel ti troquiñche ñi culpan mu,* langümfi. Fei huli ti chalintucun culpan dungu mu, chumngechi ñi femün tati hunen chalintucun mu. 16 Cafei huli ti lüpümngeelchi chalintucun, femi chumngechi ñi femngequen.

17 Fei hula chalintucui ti fün, nüi quiñe runa fün,* fei lüpümfi huente altar ñi tripayal fitrun, trür engu ti lüpümngeelchi chalintucun pulihuen mu.

18 Fei ti troquiñche ñi duam mu langümfi ti toro ca ti caniru, fei tati chalintucun quiñentrür ingequelu. Fei Aarón tañi pu fotüm yeleleyu engün ti mollfüñ, fei pütefmafi huall püle ti altar. 19 Fei toro ñi yihuiñ, ti caniru ñi motrilechi cülen, ti yihuiñ impolniefilu* ti cüllche, ti cusacusa ca ti yihuiñ mülelu ti que mu, 20 com tüfachi yihuiñ, culliñ ñi rücu mu tucufingün, fei lüpümfi ti yihuiñ huente altar ñi tripayal fitrun. 21 Huelu ti pu culliñ ñi rücu ca ñi chang* tañi nieel man püle, Aarón epuñpüle nengümcafi Chau Jehová tañi adquiñ meu ñi chalintuculelafiel, chumngechi ñi feipicünuel Moisés.

22 Deu hul-lu ti chalintucun culpan dungu mu,* ti lüpümngeelchi chalintucun ca ti chalintucun quiñentrür ingequelu, Aarón huitrañpürami ñi cuhu cheu ñi mülen pu che, cümeque dungu feipifi engün, fei nagpai altar mu. 23 Fei hula Moisés ca Aarón conpuingu ti trahunhue tolto ruca mu, tripalu engu cümeque dungu feipifingu tati troquiñche.

Fei Chau Jehová pengelelfi tañi fütra pelon com tati pu che. 24 Fei Chau Jehová huercüi cütral, com lüpümfi tati yihuiñ mülelu huente altar ca ti lüpümngeelchi chalintucun. Pu che pefilu tüfachi dungu afmatulen huiraringün ca fampuhulingün ñi lonco mapu meu.

10 Fei hula Nadab ca Abihú, Aarón tañi pu fotüm, nüfingu tañi braserillo, tuculelfingu cütral, fei huente tucuingu ti incienso. Fei chalintuculelfingu ta Chau Jehová. Huelu femlaingu chumngechi ñi feipicünuel Chau Dios. 2 Fei Chau Jehová huercüi cütral ca lüpümfi engu. Femngechi laingu Chau Jehová ñi adquiñ meu. 3 Fei Moisés feipifi ta Aarón: “Tüfa ñi feipiel Chau Jehová: ‘Com pu che fülcülelu* ta iñche meu mülei tañi raquiduamtucunieafiel iñche tañi lifngen. Püramyengean com tati pu che ñi adquiñ meu’”. Fei Aarón dunguhuelai.

4 Fei Moisés mütrümfi* ta Misael ca Elzafán, Uziel tañi pu fotüm, fei ta Aarón ñi malle. Moisés feipifi engu: “Cüpamu. Entufimu tamu pu peñi mülelu itrotripa ti yamfal mülehue meu. Fei huecun entufimu cheu ñi mülenon pu che”. 5 Fei amuingu, yetufingu ti epu la, petu tucunieingu tañi sacerdote tacun. Huecun entufingu cheu ñi mülenon pu che. Femingu chumngechi ñi feipieteu Moisés.

6 Moisés feipifi ta Aarón ca tañi caquelu fotüm, Eleazar ca Itamar: “Cüme dapinieafimün* tamün cal lonco, huichafcalayaimün* tamün tacun, femngechi lalayaimün ca Chau Dios illcutulayafi* com tati pu che. Tamün pu peñi, pu Israel che, ngümayeafingün feichi pu huentru Chau Jehová ñi langümfiel cütral meu. 7 Famtripalayaimün itrotripa ti trahunhue tolto ruca mu.* Femülmün, layaimün, Chau Jehová cai dullieimünmeu tañi falin aceite meu”. Fei femingün com tañi feipieteu Moisés.

8 Fei Chau Jehová feipifi ta Aarón: 9 “Eimi ca tami pu fotüm conülmün ti trahunhue tolto ruca meu, putulayaimün pulcu ca chem no rume.* Femngechi lalayaimün. Elcünungei tüfachi ley dungu ñi amulerpual, com tamün pu cüpanche mülei ñi inanieafiel. 10 Femngechi quimaimün chem ñi yamfalngen ca chem ñi yamfalngenon, chem ñi lifngen ca chem ñi lifngenon. 11 Cafei quimelelafimün pu Israel che Chau Jehová tañi huercün dungu, quisu elufi ta Moisés ñi quimeltulelafiel pu Israel che”.

12 Fei Moisés feipifi ta Aarón ca tañi mülehuechi fotüm, Eleazar ca Itamar: “Chalintuculu eimün tamün fün, quiñe troquiñ lüpümelfimün ta Chau Jehová. Fei hula nüaimün chem ñi lüpümngenoel ca deumayaimün cofque fayümhue nienolu.* Tüfa rume yamfalngei, feimu inafül altar meu iyafimün. 13 Iyafimün quiñe yamfal mülehue meu. Tüfa püntücünulelngeimi* ca tami pu fotüm, coneltulei chem ñi chalintuculelngeel ta Chau Jehová cütral mu. Femngechi feipingen tamün femal. 14 Quiñe lif mülehue meu, eimi, tami pu fotüm, tami pu ñahue mülei tamün iyafiel ti rücu feiti chalintucun* epuñpüle nengümngequelu. Cafei iyafimün ti chang* tamün püntücünulelngeel.* Feitichi iyael püntücünulelngeimi ca tami pu fotüm, entungei feiti chalintucun quiñentrür ingequelu ñi hulün pu Israel che. 15 Yeafimün ti chang tamün püntücünulelngeel,* ti rücu feiti chalintucun epuñpüle nengümngequelu ca ti yihuiñ ñi chalintucungeel cütral mu, femngechi Chau Jehová ñi adquiñ meu epuñpüle nengümcangeai feiti chalintucun. Tüfa rumel püntücünulelngeaimi ca tami pu fotüm. Femngechi feipicünui Chau Jehová”.

16 Moisés huall püle quintufi ti chifu* hulngealu ti chalintucun culpan dungu mu,* fei quimtucui ñi lüpümngeel. Feimu rume illcutufi* ta Eleazar ca Itamar, Aarón ñi mülehuechi fotüm. Fei feipifi engu: 17 “Tüfachi chalintucun culpan dungu mu* rume yamfalngei. Feimu, ¿chumngelu* ilafimün ti yamfal mülehue meu? Chau Dios elueimünmeu tamün yenieal pu Israel che ñi culpan, femngechi ñi perdonangeal tañi culpan engün Chau Jehová ñi adquiñ meu. 18 ¡Tüfei! Ti chalintucun ñi mollfüñ yengelai ponhuitu ti yamfal mülehue mu. Mülefui tamün iyafiel ti chalintucun ti yamfal mülehue mu chumngechi tañi feipingeel iñche”. 19 Aarón feipifi ta Moisés: “Tati pu che hulingün chalintucun culpan dungu mu* ca ti lüpümngeelchi chalintucun Chau Jehová ñi adquiñ meu. Huelu iñche ilayafun feitichi chalintucun. Eimi cüme quimnieimi com tañi rupan fachantü. Feimu ifuli feiti chalintucun culpan dungu mu, ¿cümepeafui mai Chau Jehová ñi adquiñ meu?”. 20 Moisés allcülu tüfa, cümelu troquifi.

11 Fei Chau Jehová feipifi ta Moisés ca Aarón: 2 “Feipiafimu pu Israel che: ‘Tüfachi pu culliñ mülelu mapu mu iyafuimün: 3 chem culliñ rume triralelu tañi huili ca caimütuquelu,* iyafuimün.

4 Huelu ilayafimün quiñeque culliñ caimütuquelu cam triralelu tañi huili. Ti camello caimütuquei, huelu triralelai tañi huili. Feimu lifngelai eimün meu. 5 Cafei ilayafimün ti daman, caimütuquei, huelu triralelai tañi huili. Feimu lifngelai eimün meu. 6 Ti mara ca ilayafimün, caimütuquei, huelu triralelai tañi huili. Feimu lifngelai eimün meu. 7 Ti sañhue triralei tañi huili, huelu caimütuquelai. Feimu lifngelai eimün meu. 8 Feitichi culliñ ñi ilo ilayafimün, larpule, nünütulayafimün rume. Lifngelai eimün meu.

9 Com ñi mülen co mu, tüfa iyafuimün: com ñi mülen co mu, lafquen cam leufüngeafui rume, com iyafuimün niele müpü ca niele trolüf reque.* 10 Huelu chem rume ñi mülen lafquen cam leufü mu nienole müpü ca nienole trolüf, fütraque troquiñ miyaule rume co mu cam chem mongen rume ñi mülen tüfei mu, ünufali eimün meu. 11 Felei, mülei ñi ünufalngeal eimün mu. Iñmalayafimün ñi ilo ca ünufal troquiafimün feitichi la. 12 Chem rume ñi mülen co mu nienole müpü ca nienole trolüf, ünufalngeai eimün meu.

13 Feitichi culliñ müpüyauquelu ünufalnieafimi. Ilayafimün, ünufalngei tati: ti ñamcu, ti ñamcu iquelu challhua, ti curü buitre, 14 tati milano real pingelu, ca chem curü milano no rume. 15 Cafei chem cuervo no rume. 16 Ti choique, ti congcong, tati caucau ca chem halcon no rume. 17 Ti pequen, ti yecu, tati quillquill,* 18 tati piupiu,* ti pelicano, tati canin, 19 ti cigüeña, chem garza no rume, ti abubilla ca ti pinüique no rume. 20 Chem rume nielu müpü, fütraque troquiñ miyaulu mapu mu* ca meli namun meu trecayaule, ünufalngeai eimün meu.

21 Feiti nielu müpü, fütraque troquiñ miyaulu mapu meu ca meli namun mu trecayaulu, iyafuimün feiti nielu epu fütraque chang ñi rincüyahual mapu meu. 22 Tüfa iyafuimün: fillque langosta cañpüle amuquelu, caquelu ifalchi langosta, tati grillo ca ti chori. 23 Caquelu nielu müpü, fütraque troquiñ miyaulu mapu meu ca nielu meli namun, ünufalngei eimün meu. 24 Ifilmün, eimün lifngelayaimün. Inei rume nünütufile feitichi la, lifngelayai nagantüle hula. 25 Inei rume yefile feitichi la, mülei ñi cüchayafiel tañi tacun, fei lifngelayai nagantüle hula.

26 Chem culliñ rume triralelu tañi huili, huelu nülalenole rangiñ mu ca caimütunole, lifngelayai eimün meu. Inei rume nüfile, lifngelayai. 27 Tachi pu culliñ meli namun mu trecayaule, huelu niele fütraque huili, lifngelai eimün meu. Inei rume nüfile feitichi la, lifngelayai nagantüle hula. 28 Inei rume yefile quiñe la tüfachi pu culliñ, mülei ñi cüchayafiel ñi tacun, lifngelayai nagantüle hula. Tüfa engün lifngelayai eimün meu.

29 Tati pu culliñ fütraque troquiñ miyaulu mapu mu, tüfa engün lifngelayai eimün meu: ti dehu, topo pingechi cangelu dehu, itrofill lagarto, 30 ti geco, ti fütra lagarto, ti salamandra miyauquelu co mu, ti fillcuñ ca ti camaleon. 31 Tüfachi pu culliñ fütraque troquiñ miyaulu mapu mu lifngelai eimün meu. Inei rume nüfile feitichi la, lifngelayai nagantüle hula.

32 Ti culliñ lale, ütrüfnagafui huente quiñe tacun, quiñe trülque, quiñe catrün tela sacu cam quiñe chemcün* mamüll mu deumangelu. Chem chemcün mu rume ütrüfnagle, lifngelayai. Chem chemcün rume pünengequelu, mülei ñi tucungeal co meu, fei lifngelayai nagantüle hula. Fei hula lifcüleai. 33 Tranaconle quiñe metahue deumangelu fotra mu, mülei tami trafocayafiel. Ca chem rume mülele ponhuitu feitichi metahue mu, lifngelayai. 34 Chem iyael rume huifoconle feitichi co ñi mülen ti metahue mu, lifngelayai. Chem rume mülele feiti metahue meu ñi pütocongeal, lifngelayai. 35 Ti la culliñ ütrüfnagle chem chemcün mu rume, feitichi chemcün lifngelayai, quiñe horno* cam cütralhuengefule, mülei ñi teifüngeal. Lifcülelai, huiño pünehuelayafimün. 36 Huelu feiti huitrunco ca ti rüngan cheu ñi ngülümngequen co, lifngeai. Inei rume nünütufile feiti la culliñ, lifngehuelayai. 37 Huelu feitichi la culliñ trananagle huente quiñe fün ñi ngan-ngeal, feitichi fün lifngeai. 38 Huelu feiti la culliñ trananagle huente quiñe hutrucongeelchi fün,* feitichi fün lifngelayai eimün meu.

39 Huelu lale quiñe ifalngechi culliñ, inei rume nünütufile ti la culliñ, lifngelayai nagantüle hula. 40 Inei rume ifile ti la culliñ, mülei tañi cüchayafiel tañi tacun, fei lifngelayai nagantüle hula. Inei rume cañpüle yefile ti la culliñ, mülei ñi cüchayafiel tañi tacun, fei lifngelayai nagantüle hula. 41 Chem culliñ rume fütraque troquiñ miyaulu mapu meu, ünufalngei. Mülelai tañi ingeal. 42 Mülelai ñi ingeal chem culliñ no rume huinolquiyauquelu* tañi pütra meu, chem culliñ no rume trecayaulu tañi meli namun meu ca chem culliñ no rume fütraque troquiñ miyaulu mapu mu ca nielu fentren namun. Ünufalngei tati. 43 Ilayafimün feiti pu culliñ fütraque troquiñ miyaulu mapu meu. Femngechi lifngeaimün, podcülelayaimün ca ünufalngelayaimün. 44 Iñche tamün Chau Dios Jehová. Feimu lifcülemün, iñche lifngen, feimu eimün lif chengeaimün. Ilayafimün feiti pu culliñ fütraque troquiñ miyaulu mapu mu. Femngechi lifngeaimün. 45 Iñche ta Chau Jehová, entuhuiyiñ Egipto mapu meu tamün Dios ngeal. Iñche lifngen, feimu mülei tamün lif chengeal.

46 Tüfa ñi feipin ti ley pu culliñ meu, feiti müpüyauquelu, itrofill mongen nengümquiyaulu co meu ca com feiti pu culliñ fütraque troquiñ miyaulu mapu mu. 47 Femngechi ñi quimngeal chuchi ñi lifngen ca chuchi ñi lifngenon, chem culliñ ñi ingeal ca chem culliñ ñi ingenoal’”.

12 Chau Jehová feipifi ta Moisés: 2 “Feipiafimi pu Israel che: ‘Quiñe domo niepüñeñcülele, fei choyüfile quiñe huentru püñeñ, regle antü lifngelayai, chumngechi ñi lifngenon tañi domo cutran meu. 3 Puule pura antü, mülei ñi circuncidangeal ti pichiche. 4 Fei mülei ñi rupayal 33 antü ñi lifcületual mollfüñlu am. Ngelai ñi nünütuafiel chem yamfal chemcün rume* ca ñi connoal ti yamfal mülehue mu fentepuule hula ti antü ñi lifcületual.

5 Choyüfile quiñe domo püñeñ, mari meli antü meu lifngelayai, chumngechi ñi lifngenon tañi domo cutran meu. Mülei ñi rupayal 66 antü ñi lifcületual mollfüñlu am. 6 Fentepuule ti antü ñi liftumequen ti domo tañi huentru püñeñ cam tañi domo püñeñ meu, amuai itrotripa ti trahunhue tolto ruca mu.* Yelelafi ti sacerdote quiñe hue caniru* quiñe tripantu nielu ñi hulal ti lüpümngeelchi chalintucun.* Ca yeafi quiñe pichi paloma cam quiñe maicoño ñi hulal ti chalintucun culpan dungu mu.* 7 Fei ti sacerdote com chalintucuai Chau Jehová ñi adquiñ mu. Fei liftuñmangeai ñi culpan* tati domo ca lifngeai tañi mollfüñ ñi duam mu. Tüfa tati ley dungu ñi inayafiel ti domo choyüfile quiñe huentru püñeñ cam quiñe domo püñeñ. 8 Huelu ti domo nienole plata ñi chalintucual quiñe ufisa, mülefui ñi yeafiel epu maicoño cam epu pichique paloma, quiñe ñi hulal ti lüpümngeelchi chalintucun, cangelu ñi hulal ti chalintucun culpan dungu mu.* Fei ti sacerdote chalintucuai tüfa ñi liftuñmangeal ti domo ñi culpan. Fei hula lifcületuai’”.

13 Chau Jehová amulerpui ñi nütramcafiel Moisés ca Aarón. Feipifi: 2 “Quiñe che huefrumele ñi trahua mu quiñe pitru, poñpoñcülele cam lantralele ñi trahua, lepra cutran* nieafui chi tañi trahua meu. Fei mülei ñi yengeal cheu ñi mülen ti sacerdote Aarón cam quiñe tañi pu fotüm, pu caquelu sacerdote. 3 Ti sacerdote ngüneduamafi ti allfen mülelu ti trahua mu. Ti cal trahua mülelu feitichi allfen mu fülangcünuule ca ti allfen conle ponhuitu ti fün ilo mu, lepra cutran-ngei. Ti sacerdote ngüneduamfile, feipiai ñi lifngenon ti che. 4 Huelu tati lantralelu trahua mu fülangcülele, huelu ti allfen conlai ilo mu ca ti cal trahua fülangcünuulai, fei ti sacerdote huichucünuafi ti cutrancülelu regle antü. 5 Rupale regle antü, feiti sacerdote ca ngüneduamafi ti allfen. Felecale müten ca doi amulenole ti trahua mu, ti sacerdote ca regle antü huichucünuafi.

6 Rupale regle antü, ti sacerdote ca quiñe rupa ngüneduamafi. Mülehuenole ti allfen ca doi amulenole trahua mu, ti sacerdote feipiai ñi lifngen ti che. Quiñe pitru müten ürque. Fei ti che cüchayafi ñi tacun ca lifcületuai. 7 Ti sacerdote deu feipilu ñi lifcülen ti che, huelu huefrumele quiñe pitru tañi trahua mu ca amulerpule, mülei ñi huiñotual ti sacerdote mu. 8 Ti sacerdote ngüneduamafi ti allfen. Ti pitru amulerpule trahua mu, ti sacerdote feipiai ñi lifngenon ti che, lepra cutran ürque.

9 Quiñe che nierpule lepra cutran, mülei ñi yengeal ti sacerdote mu. 10 Fei ti sacerdote ngüneduamafi ti che. Fülangcülele cheu ñi poñpoñcülen ti trahua, fülangcünuule ti cal trahua ca nülalele ti allfen tiye mu, 11 lepra cutran niei, fentreñmayai. Fei ti sacerdote feipiai ñi lifngenon ti che. Huichucünulayafi ñi ngüneduamafiel ca antü, deu feipingelu cai ñi lifngenon. 12 Huelu ti lepra cutran com puule ti trahua mu ca ti sacerdote pefile ti lepra ñi tacufiel ti che ñi cuerpo,* lonco, namun mu cütu, 13 fei ti sacerdote ngüneduamfile ti huentru ñi apolen com tañi cuerpo lepra cutran mu, feipiai ñi lifcülen ti che. Com tañi trahua fülangcünuhui, feimu inei no rume tulayafui ti lepra cutran.* 14 Huelu hueftripale quiñe nülalechi allfen, ti che lifcülelayai. 15 Ti sacerdote ngüneduamfile ñi nülalen ti allfen, lifcülelai piai. Nülalechi allfen lifngelai, lepra cutran tüfa. 16 Huelu ti nülalechi allfen huiño fülangcünuule, mülei ñi amual tati sacerdote mu. 17 Ti sacerdote ngüneduamafi. Fülangcünuule ti allfen, lifcülei ti che piai ti sacerdote, lifngei tati.

18 Huefrumele quiñe allfen* quiñe che ñi trahua mu, tremotule,* 19 huelu cheu ñi mülequefel ti allfen fülangcülen poñpoñcünuule cam fülang lantracünuule allhue quelülelu, ti che mülei ñi amual ti sacerdote mu. 20 Fei ti allfen conle ponhuitu fün ilo mu ca fülangcünuule ti cal trahua, ti sacerdote feipiai ñi lifcülenon ti che. Lepra cutran huefrumei ti allfen mu. 21 Huelu ti sacerdote ngüneduamle ti allfen, peafui ñi pichilehuen ti allfen, conlai ponhuitu fün ilo mu ca ti cal trahua fülangcünuulai. Fei ti sacerdote huichucünuafi ti che regle antü. 22 Fei quimfalcülele ti allfen ñi puhun com ti trahua mu, ti sacerdote feipiai ñi lifcülenon ti che, lepra cutran niei tati. 23 Huelu tati lantralelu felecale müten ca doi amulerpunole, re poñpoñcülei ti allfen, fei ti sacerdote feipiai ñi lifcülen ti che.

24 Quiñe che lüfle tañi trahua, pengeafui tañi fün ilo. Fei ti allfen fülang lantralele cam fülangcünuule allhue quelülelu, 25 ti sacerdote ngüneduamafi. Fülangcünuule ti cal trahua mülelu ti lantralelu mu ca conle ponhuitu fün ilo mu, lepra cutran niei hueflu ti lüpümuhun mu. Fei ti sacerdote feipiai ñi lifcülenon ti che. Lepra cutran ürque. 26 Huelu ti sacerdote ngüneduamle ti lantralelu, peafui ñi pichilehuen, conlai ponhuitu fün ilo mu ca ti cal trahua fülangcünuulai. Fei ti sacerdote huichucünuafi ti che regle antü. 27 Rupale regle antü, ti sacerdote huiño ngüneduamafi. Fei quimfalcülele ti lantralelu puhui com ti trahua mu, ti sacerdote feipiai ñi lifcülenon ti che, lepra cutran niei. 28 Huelu tati lantralelu felecale müten, amulerpunole com ti trahua mu ca pichilehuele, re poñpoñcülei ti lüpümuhun. Fei ti sacerdote feipiai ñi lifcülen ti che, re poñpoñcülelu am cheu ñi lüpümuhun ti che.

29 Quiñe huentru cam quiñe domo niele quiñe allfen lonco mu cam quetre mu, 30 ti sacerdote ngüneduamafi ti allfen. Conpule ponhuitu fün ilo mu, chodcünuule ti cal trahua ca pichin cal mülele, ti sacerdote feipiai ñi lifcülenon ti che. Cutrancülei ti trahua lonco cam quetre. Lepra cutran niei hueflu lonco mu cam quetre mu. 31 Huelu ti sacerdote ngüneduamfile ti allfen huente trahua mu müten ñi mülen ca ñi nienon curü cal, ti sacerdote huichucünuafi ti cutrancülelu regle antü. 32 Rupale regle antü, ti sacerdote ngüneduamai ti allfen. Doi amulerpunole, nienole chod cal trahua ca ponhuitu conpunole fün ilo mu, 33 ti che mülei ñi cupiluhual cam payuntuhual, huelu femlayai cheu ñi allfülen. Fei ti sacerdote huichucünuafi ti cutrancülelu regle antü.

34 Rupale regle antü, ti sacerdote huiño inaduamafi ti allfen. Feitichi allfen mülelu ti trahua lonco mu cam quetre mu doi amulerpunole trahua mu ca conpunole fün ilo mu, ti sacerdote feipiai ñi lifcülen ti che. Quisu cüchayafi tañi tacun, fei lifcületuai. 35 Deu feipingelu ti che ñi lifcülen, huelu huiño huefrumele quiñe allfen ca amulerpule trahua mu, 36 ti sacerdote ngüneduamafi. Ti allfen amulerpule trahua mu, ti sacerdote ngüneduamlayai rume ñi mülepen mai chod cal trahua: feitichi che lifcülelai. 37 Huelu ngüneduamngele ca pengele ñi doi amulerpunon ti allfen ca ñi huefpan curü cal feiti mu, deu tremoletui ti allfen. Lifcülei ti che. Fei ti sacerdote feipiafi ñi lifcülen.

38 Fülang lantralele quiñe huentru cam quiñe domo ñi trahua, 39 ti sacerdote ngüneduamafi. Tati lantralechi trahua cochornagcülele, huesa cutran no, re lantralei müten tañi trahua. Feitichi che lifcülei.

40 Quiñe huentru llancünagle ñi cal lonco, fei liftralehuetule, lifngeai. 41 Quiñe huentru llancünagle ñi cal lonco, fei trailefcülehuele ñi tol püle, lifngeai. 42 Huelu tañi trahua lonco cam tol meu cheu ñi liftralen huefrumele quiñe allfen fülang-ngelu ca allhue quelülelu, tüfa leprangei tripamequelu trahua lonco cam tol meu. 43 Ti sacerdote ngüneduamafi, fei femngechi felele tañi poñpoñcülechi allfen ca lepra reque felele tañi trahua lonco mu, 44 tüfa lepra cutran tati. Feimu ti sacerdote feipiai ñi lifngenon ti che. 45 Ti che lepra cutran nielu tucunieai huichafcülechi tacun ca chuchicaleai tañi cal lonco. Tacunieai tañi hun ca huirarai: “¡Lifcülelan! ¡Lifcülelan!”. 46 Petu tañi nieel feitichi cutran lifngelayai. Lifcülenolu am, mülei ñi quisuleal. Camapuleai cheu ñi mülen ti pu che.

47 Ti lepra cutran huefrumeafui quiñe tacun meu, lino cam cal mu deumangelu. 48 Feitichi ngürecan* deumangelu cal cam lino mu huefrumeafui ti lepra cutran, cafei quiñe trülque mu cam chem chemcün rume* trülque mu deumangelu. 49 Feimu quiñe tacun meu, trülque mu, ngürecan cam chem trülque chemcün rume huefrumele quiñe tropan* carülelu ca allhue chodngelu cam quelüngelu, lepra cutran niei feitichi tacun. Feimu yelelngeai tati sacerdote. 50 Ti sacerdote inaduamafi ti chemcün nielu ti tropan, fei huichucünuafi regle antü. 51 Puule ti regle antü, ti sacerdote ngüneduamafi ti cutran, fei pefile ñi doi amulen ti cutran tati tacun meu, ti ngürecan cam itrofill trülque chemcün mu, feiti cutran huesa leprangei. Feimu ti chemcün lifcülelai. 52 Huefrumele feitichi cutran, ti sacerdote lüpümafi ti tacun, ti ngürecan ca chem trülque chemcün rume. Huesa lepra niei, feimu lüpümngeai.

53 Huelu ti sacerdote ngüneduamfile ti chemcün, ngüneduamafui ñi doi amulerpunon ti tropan tati tacun meu, ngürecan cam chem trülque chemcün rume. 54 Fei ti sacerdote feipiai ñi cüchangeal ti lifngenochi chemcün ca huichucünuafi regle antü. 55 Cüme cüchangele hula ti lifngenochi chemcün, ti sacerdote huiño inaduamafi. Fei ti tropan felecale müten, doi amulerpunole rume, feitichi chemcün lifngelayai. Lüpümngeai, funalelu cai lepra ñi duam mu.

56 Huelu deu cüme cüchangele ti tacun, ti sacerdote inaduamafi. Pichilehuele ti tropan, catrünentuñmayafi tati tacun. Ca femafi tati trülque ca ti ngürecan. 57 Huelu ti tropan huefrumeafui cañpüle ti tacun, ngürecan cam chem trülque chemcün rume. Doi amulerpui ti cutran, feimu lüpümngeai cütral meu chem lifngenochi chemcün rume. 58 Huelu deu cüchangele ti tacun, ngürecan cam chem trülque chemcün rume, fei mülehuenole ti tropan, huiño cüchangepe, fei lifcületuai.

59 Tüfa ñi feipiel tati ley conün mu lepra cutran quiñe tacun meu cal cam lino mu deumangelu, quiñe ngürecan cam chem trülque chemcün rume. Femngechi feipicünungeai chem ñi lifngen cam chem ñi lifngenon”.

14 Chau Jehová feipiniefi ta Moisés: 2 “Ti che lepra cutran nielu yengele ti sacerdote mu ñi feipingeal tañi lifcülen, tüfachi ley dungu mülei ñi inangeal feichi antü. 3 Ti sacerdote tripayai huecun cheu ñi mülenon tati pu che, fei ngüneduamafi. Lepra cutran niehuenole, 4 ti sacerdote feipiafi ti che ñi yeafiel epu lifngechi üñüm* mongelelu, cedro mamüll, quelü füu ca pichique rou* anümca,* femngechi tañi lifcületual. 5 Ti sacerdote feipicünuai ñi langümngeal quiñe üñüm huente quiñe lafatorio fotra mu* deumangelu. Feiti lafatorio mülei ñi nieal co tripalu huitrunco mu. 6 Huelu nüai ti mongelechi üñüm, ti cedro mamüll, quelü füu ca feiti pichique rou anümca. Com huifontucuafi tati lachi üñüm ñi mollfüñ meu. Feitichi üñüm langümngerquei huente ti co tripalu huitrunco mu. 7 Feiti mollfüñ mu regle rupa püteftuafi* tati che petu liftumequeulu, ca feipiai ñi lifcülen. Fei huecun neicümentuafi ti mongelechi üñüm lelfün meu.

8 Tati petu liftumequeulu mülei ñi cüchayafiel tañi tacun, catrüal com tañi cal ca müñetual co mu. Fei lifcületuai. Fei hula conpuafui cheu ñi mülen tati pu che, huelu huecun müleai tañi tolto ruca mu* regle antü. 9 Puule ti regle antü, mülei ñi cupiluhual com tañi cal lonco, payuntuai ca catrüafi tañi ceja.* Catrünentufile hula com tañi cal, cüchayai tañi tacun, müñetuai co mu, fei lifcületuai.

10 Ti pura antü meu nüai epu hueque caniru* tremolelu, quiñe tremolechi pichi ufisa quiñe tripantu nielu ca quiñe taza* aceite. Cafei ñi chalintucual fün, nüai cüla kilo ca rangiñ* cüme rüngo reyülelu* aceite engu. 11 Ti sacerdote ñi feipial ti huentru ñi lifcületun, yeafi ti huentru ca tañi chalintucun* Chau Jehová ñi adquiñ meu itrotripa tati trahunhue tolto ruca mu. 12 Ti sacerdote nüai quiñe hue caniru, fei chalintucuafi huelulcan mu. Ca femafi ti taza aceite. Epuñpüle nengümcayafi ñi chalintucuafiel Chau Jehová ñi adquiñ mu. 13 Quiñe yamfal mülehue mu cheu ñi langümngequen ti chalintucun culpan dungu mu* ca ti lüpümngeelchi chalintucun, fei mu ti sacerdote langümafi ti hue caniru. Ti sacerdote ngen-ngei tati chalintucun huelulcan mu ca ti chalintucun culpan dungu meu. Rume yamfalngei.

14 Tati sacerdote pichin mollfüñ entuai tati chalintucun huelulcan mu, fei tuculelafi tati che petu liftumequeulu. Tucuafi tañi man pilun meu, tañi man motrin changüll cuhu* ca tañi man motrin changüll namun mu.* 15 Feiti taza aceite mu, ti sacerdote pichin hutrulafi* tañi huele pülai cuhu mu. 16 Fei ti aceite mu mülelu tañi huele pülai cuhu mu, huifontucuai tañi man changüll cuhu. Fei regle rupa pütefafi pichin aceite Chau Jehová ñi adquiñ mu. 17 Fei hula ti mülehuechi aceite ñi nieel tañi huele pülai cuhu mu, pichin tuculelafi tati che petu liftumequeulu. Tucuafi tañi man pilun meu, tañi man motrin changüll cuhu ca tañi man motrin changüll namun. Tucuafi huente feiti mollfüñ entungelu tati chalintucun huelulcan mu. 18 Fei ti aceite mülehuelu ti sacerdote ñi pülai cuhu mu, tuculelafi lonco mu tati che petu liftumequeulu. Femngechi femai ti sacerdote ñi perdonangeal ti che ñi culpan* Chau Jehová ñi adquiñ mu.

19 Ti sacerdote hulai ti chalintucun culpan dungu mu,* femngechi ñi perdonañmangeal tañi culpan feiti che petu liftumequeulu. Fei hula langümafi ti lüpümngeelchi chalintucun. 20 Fei ti sacerdote tucuai ti lüpümngeelchi chalintucun ca ti fün chalintucun huente altar, femngechi ñi perdonangeal ti che, fei lifcületuai.

21 Huelu pofrengele ca pepi cullinole com tüfa, nüai quiñe hue caniru ñi chalintucuafiel culpan dungu mu* ca epuñpüle nengümcayafi, femngechi ñi perdonañmangeal tañi culpan. Cafei ñi chalintucungeal fün, hulai cüla kilo ca rangiñ cüme rüngo reyülelu* aceite engu. Cafei hulai quiñe taza aceite 22 ca epu maicoño cam epu pichique paloma. Hulai tunte* tañi pepilel. Quiñe üñüm chalintucungeai culpan dungu mu,* cangelu ñi hulngeal ti lüpümngeelchi chalintucun. 23 Puule ti pura antü, ti che com tüfa yelelafi ti sacerdote itrotripa ti trahunhue tolto ruca mu, Chau Jehová ñi adquiñ meu. Femngechi feipingeai ñi lifcületun ti che.

24 Ti sacerdote nüai ti hue caniru chalintucungelu huelulcan mu ca ti taza aceite. Fei epuñpüle nengümcayafi ñi chalintucuafiel Chau Jehová ñi adquiñ meu. 25 Fei langümafi ti hue caniru ñi chalintucuafiel huelulcan mu. Tati sacerdote pichin mollfüñ entuai tati chalintucun huelulcan mu, fei tuculelafi tati che petu liftumequeulu. Tucuafi tañi man pilun meu, tañi man motrin changüll cuhu ca tañi man motrin changüll namun. 26 Ti sacerdote pichin aceite hutrulafi tañi huele pülai cuhu mu. 27 Fei ti pichin aceite ñi nieel tañi huele pülai cuhu mu, regle rupa pütefafi Chau Jehová ñi adquiñ meu tañi man changüll cuhu mu. 28 Fei hula ti sacerdote nüai pichin aceite ñi nieel tañi pülai cuhu mu. Tuculelafi tati che petu liftumequeulu. Tucuafi tañi man pilun meu, tañi man motrin changüll cuhu ca tañi man motrin changüll namun. Tucuafi cheu ñi tucungeel ti mollfüñ entungelu tati chalintucun huelulcan mu. 29 Fei ti aceite mülehuelu ti sacerdote ñi pülai cuhu mu, tuculelafi lonco mu tati che petu liftumequeulu. Femngechi femai ti sacerdote ñi perdonangeal ti che ñi culpan* Chau Jehová ñi adquiñ mu.

30 Fei ti sacerdote hulai quiñe maicoño cam quiñe pichi paloma, tunte ñi pepi hulün ti che. 31 Ti üñüm ñi pepi cullifiel chalintucuafi culpan dungu mu.* Cangelu üñüm mu hulai ti lüpümngeelchi chalintucun quiñentrür ti fün chalintucungelu. Ti sacerdote femai tüfa Chau Jehová ñi adquiñ mu ñi perdonañmangeal tañi culpan ti che petu liftumequeulu.

32 Tüfa ñi feipiel ti ley ñi lifcületual ti che lepra cutran niefulu, huelu nielai tañi cullial”.

33 Fei hula Chau Jehová feipifi ta Moisés ca Aarón: 34 “Iñche eluhuayiñ Canaán mapu. Fei conülmün ca femcünuli ñi conal feiti lepra cutran quiñe ruca tamün mapu meu, 35 ti ngen ruca feipimeafi ti sacerdote: ‘Tañi ruca mu huefrumei quiñe tropan reque’.* 36 Ti sacerdote feipiai ñi huellingeal ti ruca petu ñi conpunon tañi ngüneduamafiel. Femngechi feipilayai ñi lifcülenon com ñi mülen ponhuitu ruca mu. Fei hula ti sacerdote conpuai ñi inaduamafiel ti ruca. 37 Fei ngüneduamafi cheu ñi mülen ti tropan. Huechodcüleafui ti traf ruca,* carü allhue chodcüleafui ti huechod cam quelüleafui. Ca conpuafui ponhuitu traf ruca mu. 38 Felele ti ruca, ti sacerdote tripayai itrotripa ti ruca meu, regle antü inei no rume conlayai ti ruca mu piai.

39 Puule ti regle antü, ti sacerdote huiño inaduamafi ti ruca. Ti tropan amulele traf ruca mu, 40 ti sacerdote feipiai ñi nentungeal ti cura nielu ti cutran ca ñi ütrüftucungeal huecuntu huaria quiñe lifngenochi mülehue mu. 41 Fei ti sacerdote feipiai ñi cüme cafüdcünungeal ponhuitu ruca. Feitichi yeso ca fotra* nentungelu, yengeai huecuntu huaria quiñe lifngenochi mülehue mu. 42 Cheu ñi entungeel ti cura, cangelu cura tucungeai. Fei huente traf ruca huiño tuculelngeai yeso.

43 Huelu deu entungelu ti cura nielu ti cutran ca deu cafüdngelu ti traf ruca ca tucungelu yeso, huiño huefrumele ti tropan, 44 ti sacerdote conpuai, fei inaduamafi. Com ruca püle amulele ti tropan, huesa lepra mülei ti ruca meu, lifcülelai. 45 Teifüngepe ti ruca feipiai ti sacerdote, feiti cura, trafla, yeso ca tati fotra.* Huecuntu ti huaria mu yengeai, quiñe lifngenochi mülehue mu. 46 Feitichi antü feipingelu inei no rume ñi conpunoal ruca mu, huelu quiñe che conpule, lifcülelayai nagantüle hula. 47 Inei rume cudule ti ruca mu cam ile ti ruca mu, mülei ñi cüchayafiel tañi tacun.

48 Huiño tuculelngele yeso ti traf ruca, ti sacerdote ngüneduammeafi. Fei pefile ti tropan ñi doi amulenon ti ruca mu, ti sacerdote feipiai ñi lifcülen ti ruca mülenolu cai ti tropan. 49 Ñi liftungeal ti ruca, ti sacerdote nüafi epu üñüm, cedro mamüll, quelü füu ca pichique rou anümca. 50 Langümafi quiñe üñüm huente quiñe lafatorio rag mu* deumangelu. Feiti lafatorio mülei ñi nieal co tripalu huitrunco mu. 51 Fei hula nüai cedro mamüll, pichique rou anümca, quelü füu ca ti mongelechi üñüm. Fei huifontucuafi tati lachi üñüm ñi mollfüñ meu ca ti co entungelu huitrunco mu. Fei ti mollfüñ mu regle rupa püteftuafi ti ruca. 52 Fei liftuafi ti ruca tati üñüm ñi mollfüñ mu, ti co nentungelu huitrunco mu, ti mongelechi üñüm, ti cedro mamüll, ti pichique rou anümca ca ti quelü füu. 53 Fei hula neicümentuafi ti mongelechi üñüm huecuntu huaria, lelfün meu. Fei liftuafi ti ruca, femngechi lifcületuai.

54 Tüfachi ley dungu mülei ñi inaniengeal mülele lepra cutran, huefrumele quiñe allfen trahua lonco cam quetre mu, 55 huefrumele lepra tacun cam ruca mu, 56 trahua mu tripale pitru, cam poñpoñcülele cam lantralele. 57 Femngechi quimngeai chem ñi lifngen cam ñi lifngenon. Tüfa tati ley dungu lepra cutran mu”.

15 Chau Jehová dunguniefi Moisés ca Aarón, feipifi: 2 “Dunguafimu pu Israel che, feipiafimu: ‘Quiñe huentru cutrancülele, fei trarcülele tañi huillihue, tañi cutran meu lifcülelai. 3 Tañi huillihue trarcülele cam ngüdilele, ti huentru lifcülelayai tañi cutran meu.

4 Chem cahuitu mu rume cudule ti huentru cutrancülelu, lifngelayai. Ca femngechi lifngelayai cheu rume ñi anün. 5 Chem huentru rume nünütufile feichi cahuitu, mülei ñi cüchayal tañi tacun ca müñetuai co meu, fei lifcülelayai nagantüle hula. 6 Chem che rume anüle cheu ñi anün ti cutrancülelu, mülei ñi cüchayal tañi tacun ca ñi müñetual co mu. Fei lifcülelayai nagantüle hula. 7 Chem che rume nünütufile ti cutrancülelu, mülei ñi cüchayafiel tañi tacun ca müñetuai co mu. Fei lifcülelayai nagantüle hula. 8 Quiñe huentru nielu feitichi cutran tofcütufile quiñe lifcülechi che, feitichi che mülei ñi cüchayal tañi tacun ca müñetual co mu, fei lifcülelayai nagantüle hula. 9 Quiñe huentru cutrancülelu püracahuellule, ti chilla lifngelayai. 10 Inei rume nünütufile cheu ñi anün ti cutrancülelu, lifcülelayai nagantüle hula. Inei rume yeniele feitichi chemcün,* mülei ñi cüchayal tañi tacun ca ñi müñetual co mu, fei lifcülelayai nagantüle hula. 11 Ti huentru nielu feichi cutran cüchacuhunole ca nünütufile quiñe che, feiti che mülei ñi cüchayafiel ñi tacun ca ñi müñetual co mu, fei lifcülelayai nagantüle hula. 12 Ti cutrancülelu nüfile quiñe rag lafatorio,* mülei ñi teifücangeal. Ca nüfile quiñe mamüll lafatorio, tüfa mülei ñi cüchangeal co mu.

13 Tremolele* ti huentru ca trarcülehuenole, rupayai regle antü, fei cüchayai tañi tacun ca müñetuai co mu entungelu huitrunco mu, fei lifcületuai. 14 Puule ti pura antü, nüai epu maicoño cam epu pichique paloma, amuai Chau Jehová ñi adquiñ mu itrotripa ti trahunhue tolto ruca meu,* fei eluafi tati sacerdote. 15 Ti sacerdote chalintucuai tüfachi epu üñüm,* quiñe üñüm chalintucuai culpan dungu mu,* cangelu hulai ti lüpümngeelchi chalintucun.* Chau Jehová ñi adquiñ mu ti sacerdote liftuafi ti che tañi cutran mu.

16 Ti huentru tripale ñi fine,* mülei ñi müñetual com tañi cuerpo* co meu, fei lifcülelayai nagantüle hula. 17 Chem tacun cam trülque rume niele fine, mülei ñi cüchayafiel co mu, fei lifcülelayai nagantüle hula.

18 Quiñe huentru cudumuule quiñe domo engu, fei tripale ñi fine, mür mülei ñi müñetual co mu. Fei lifcülelayaingu nagantüle hula.

19 Quiñe domo mollfüñle tañi domo cutran meu, lifcülelayai regle antü meu. Inei rume nünütueliyu, lifcülelayai nagantüle hula. 20 Ti domo lifcülenole tañi domo cutran meu, lifngelayai cheu ñi cudun ca cheu ñi anün. 21 Inei rume nünütufile ti domo ñi cahuitu, mülei ñi cüchayal ñi tacun ca ñi müñetual co mu. Fei lifcülelayai nagantüle hula. 22 Inei rume nünütufile cheu ñi anün ti domo, mülei ñi cüchayal ñi tacun ca ñi müñetual co mu, fei lifcülelayai nagantüle hula. 23 Inei rume nünütufile ti domo ñi cahuitu cam cheu tañi anün, lifcülelayai nagantüle hula. 24 Quiñe huentru cudumuule quiñe domo engu, fei huente ti huentru mu ütrüfnagle mollfüñ ti domo ñi cutran meu, ti huentru lifcülelayai regle antü meu. Ca chem cahuitu mu rume cudule, lifcülelayai.

25 Ti domo lifcülelai tañi domo cutran meu, huelu mollfüñcülele* petu ñi puunoafel tañi domo cutran cam doi antü amulerpule tañi mollfüñcülen, ca femngechi lifcülelayai com feichi antü meu. 26 Mollfüñcülele ti domo, lifngelayai cheu ñi cudun ca cheu ñi anün, chumngechi ñi rupaquen lifcülenolu tañi domo cutran meu. 27 Inei rume nünütufile feitichi chemcün, lifcülelayai. Mülei ñi cüchayafiel tañi tacun ca müñetual co meu, fei lifcülelayai nagantüle hula.

28 Huelu mollfüñhuenole, rupayai regle antü, fei lifcületuai. 29 Puule ti pura antü, nüai epu maicoño cam epu pichique paloma. Yelelafi tati sacerdote itrotripa ti trahunhue tolto ruca mu. 30 Ti sacerdote chalintucuai quiñe üñüm culpan dungu mu,* cangelu hulai ti lüpümngeelchi chalintucun. Chau Jehová ñi adquiñ mu ti sacerdote liftuafi ti domo tañi lifcülenon mu.

31 Feimu lle mülei tamu quelluafiel pu Israel che ñi lifcüleal engün. Lifcülenole engün, tañi ngillatuhue tolto ruca lifcülelayai, feimu layaingün.

32 Tüfa tati ley dungu ñi inangeal ti huentru trarcülele ñi huillihue, tripale ñi fine, 33 ti domo lifcülenole tañi domo cutran meu, cam inei rume niele quiñe tüfachi dungu, huentru cam domongeafui rume. Cafei inangeai tüfachi ley quiñe huentru cudumuule quiñe lifcülenochi domo engu’”.

16 Chau Jehová dungufi ta Moisés deu lalu Aarón ñi epu fotüm ñi fülmafiel engu* ta Chau Jehová. 2 Chau Jehová feipifi ta Moisés: “Feipifinge tami peñi Aarón quisu ñi duam mu conrumelayafui adquiñ püle tati Falin Caja ñi tapa, mülelu furitu cortina ti Doi Yamfal Mülehue mu. Femngechi lalayai, iñche peufaluhualu cai quiñe tromü mu huente ti tapa meu.

3 Tüfa mülei ñi yenieal Aarón conpule ti Doi Yamfal Mülehue mu: quiñe hue toro ñi chalintucungeal culpan dungu meu* ca quiñe caniru* ñi hulngeal ti lüpümngeelchi chalintucun.* 4 Mülei ñi tucutuhual ti yamfalchi tacun, ti charahuilla, ti trarihue ca ti munulonco. Com tüfachi tacun lino mu deumangei ca yamfalngei. Aarón mülei ñi müñetual co mu, fei hula tucutuhuai.

5 Pu Israel che mu, Aarón mülei ñi nüafiel epu pichique capüra ñi chalintucungeal culpan dungu meu* ca quiñe caniru ñi hulngeal ti lüpümngeelchi chalintucun.

6 Fei Aarón chalintucuai ti toro culpan dungu mu,* femngechi perdonangeai quisu ca tañi pu che.

7 Fei hula nüafi ti epu pichique capüra, fei tucuafi Chau Jehová ñi adquiñ mu itrotripa ti trahunhue tolto ruca mu.* 8 Aarón püneafi pichique cura, femngechi dulliai chuchi pichi capüra elungeai ta Chau Jehová ca chuchi cañpüle yeafi pu che ñi culpan.* 9 Ti dullielchi capüra ñi elungeal ta Chau Jehová, Aarón chalintucuafi culpan dungu meu.* 10 Ti cangelu capüra mongelen yengeai Jehová tañi adquiñ meu, femngechi ñi perdonangeal ta culpan.* Fei huercüngeai huellin mapu mu,* cañpüle yenieai pu che ñi culpan.*

11 Aarón hultucuai ti toro ñi chalintucungeal tañi culpan mu,* femngechi ñi perdonangeal quisu ca tañi pu che. Fei hula langümafi ti toro ñi chalintucungeal quisu tañi culpan meu.

12 Fei hula nüai ti braserillo, apoleai üicülechi ailen mu entungelu tati altar mülelu Jehová ñi adquiñ meu. Cafei nüai epu runa incienso* cüme nümün-ngelu ca rüngülelu. Fei yeafi furitu cortina. 13 Feiti cütral mülelu Chau Jehová ñi adquiñ meu tucuafi ti incienso, fei ti fitrun* tripayalu ti incienso mu impolafi* ti Falin Caja ñi tapa. Femngechi femai tañi lanoal.

14 Tañi changüll cuhu meu pichin mollfüñ nüai tati toro mu, fei regle rupa pütefafi* itrotripa ti tapa meu puel püle.

15 Fei hula langümafi ti pichi capüra ñi chalintucungeal tati pu che ñi culpan meu.* Yeafi ti mollfüñ furitu cortina mu, fei pütefafi itrotripa ti tapa mu, chumngechi ñi femfiel tati toro ñi mollfüñ.

16 Pu Israel che tañi culpan* ca tañi huesa femün meu, Aarón mülei ñi liftucünuafiel ti Doi Yamfal Mülehue. Ca liftucünuafi ti trahunhue tolto ruca, mülelu cai rangiñ pu Israel che lifcülenolu.

17 Aarón conpule ti Doi Yamfal Mülehue mu ñi perdonangeal ta culpan,* quiñe huentru no rume ngelai tañi conpual tati trahunhue tolto ruca mu tripale hula ta Aarón. Conai ñi perdonangeal quisu, tañi pu che ca com pu Israel che.

18 Fei amuai tati altar mu mülelu Chau Jehová ñi adquiñ meu, femngechi tañi lifcünuafiel. Tati toro ca ti pichi capüra ñi mollfüñ pichin tuculelafi tati altar ñi fillque müta meu. 19 Regle rupa tañi changüll cuhu mu pichin mollfüñ pütefafi huente altar, femngechi lifcünuafi tati pu Israel che ñi lifngenochi femün meu.

20 Deu liftucünufile ti Doi Yamfal Mülehue, ti trahunhue tolto ruca ca tati altar, mülei ñi hulal ti mongelechi pichi capüra. 21 Aarón puhulafi tañi epu cuhu ti mongelechi pichi capüra ñi lonco mu, entudunguai* pu Israel che ñi huelulcan, ñi huesa femün ca tañi culpan.* Fei tuculelafi reque tati pichi capüra ñi lonco mu ca huercüafi huellin mapu meu, quiñe huentru elfalcünungelu* nguyulafi ti pichi capüra. 22 Ti pichi capüra yenieafi reque pu che ñi huelulcan, yeafi huellin mapu mu. Aarón huercüafi ti pichi capüra huellin mapu mu.

23 Fei Aarón conpuai ti trahunhue tolto ruca mu, entuai ñi lino tacun ñi tucutuel conpulu ti Doi Yamfal Mülehue mu, fei tiye mu elcünuafi. 24 Quiñe yamfal mülehue mu mülei ñi müñetual co mu, fei tucutuhuai. Fei hula tripayai ñi hulal quisu tañi lüpümngeelchi chalintucun ca tati pu che ñi lüpümngeelchi chalintucun. Femngechi perdonangeai quisu ca tati pu che. 25 Tati chalintucun culpan dungu meu,* lüpümafi ti yihuiñ ñi tripayal fitrun.

26 Ti huentru nguyulfilu feiti pichi capüra cañpüle yenielu pu che ñi culpan,* mülei ñi cüchayal tañi tacun ca müñetual co mu, fei hula conpuafui cheu ñi mülen pu che.

27 Ti toro ca ti pichi capüra chalintucungelu culpan dungu mu* mülei ñi yengeal huecun cheu ñi mülenon pu che. Fei cütral mu lüpümngeai tañi trülque, tañi ilo ca tañi me. Feiti toro ca pichi capüra ñi mollfüñ yengei ti Doi Yamfal Mülehue mu ñi perdonangeal ta culpan. 28 Ti huentru ñi lüpümafiel, mülei ñi cüchayal tañi tacun ca ñi müñetual co mu, fei hula conafui cheu ñi mülen tati pu che.

29 Inanieafimün tüfachi ley dungu elcünungelu ñi amulerpual: puule ti mari antü tati regle cüyen meu, pengelaimün tamün hueñancülen* tamün culpan meu,* ti Israel che ca pu catripanche* mülelu eimün meu chem cüdau entulayai rume. 30 Feichi antü rulpacünuñmangeaimün tamün culpan,* fei lifcületuaimün. Chau Jehová ñi adquiñ meu lifcületuaimün tamün culpan meu. 31 Ürcütun antüngeai* eimün meu, pengelaimün tamün hueñancülen tamün culpan meu.* Tüfachi ley dungu elcünungei ñi amulerpual.

32 Ti sacerdote dullingelu ca üitucungelu ñi hueluconal tañi chau mu, femngechi tañi hunen lonco sacerdotengeal, hulai chalintucun ñi perdonangeal ta culpan.* Ca tucutuhuai lino tacun, feitichi yamfalchi tacun. 33 Liftucünuafi tati Doi Yamfal Mülehue, tati trahunhue tolto ruca ca tati altar. Ca femcünuai ñi perdonangeal pu sacerdote ca com tati pu Israel che. 34 Femngechi femngeai quiñe rupa tripantu mu ñi perdonangeal pu Israel che ñi culpan.* Tüfachi ley dungu elcünungei ñi amulerpual eimün meu”.

Aarón com femi tañi feipicünufiel Chau Jehová ta Moisés.

17 Chau Jehová feipiniefi ta Moisés: 2 “Dungufinge ta Aarón, tañi pu fotüm ca com pu Israel che. Feipifinge: ‘Tüfa ñi huercüel Chau Jehová:

3 “Ponhui cam huecun cheu ñi mülen ti pu che, quiñe Israel che langümle quiñe toro, quiñe hue caniru* cam quiñe capüra, 4 quisu culpan dungu mu* conai. Mülefui ñi yeafiel ti culliñ itrotripa ti trahunhue tolto ruca mu* ñi chalintucungeal. Mülefui ñi chalintuculelafiel ta Chau Jehová itrotripa Chau Jehová ñi ngillatuhue tolto ruca mu. Feiti che langümlafi ti culliñ chumngechi ñi feipicünungeel, feimu mülei ñi langümngeal. 5 Pu Israel che chalintuculelquefuingün culliñ ta Chau Jehová lelfün meu, huelu feula mülei ñi yelelafiel tati sacerdote itrotripa ti trahunhue tolto ruca mu. Eluafingün ta Chau Jehová quiñe chalintucun* quiñentrür ingequelu. 6 Ti sacerdote pütefafi* ti mollfüñ Chau Jehová ñi altar meu, itrotripa ti trahunhue tolto ruca mu. Fei lüpümafi ti yihuiñ ñi tripayal fitrun.* Tüfachi chalintucun cüme nümün-ngeai Chau Jehová mu. 7 Feimu ngelai tañi eluafiel chalintucun feitichi huesaque püllü capüra reque adngelu,* feiti huesaque püllü tañi poyemequefiel engün.* Tüfachi ley dungu elcünungei ñi amulerpual eimün meu ca tamün pu cüpanche mu”’.

8 Cafei mülei tami feipiafiel: ‘Quiñe Israel huentru cam ca cüpanche mülelu eimün meu hultucule quiñe lüpümngeelchi chalintucun cam cangelu chalintucun, 9 mülei ñi yeafiel itrotripa tati trahunhue tolto ruca mu ñi chalintuculelafiel ta Chau Jehová. Femnole, mülei tañi langümngeal.

10 Quiñe Israel huentru cam ca cüpanche mülelu eimün meu ifile chem mollfüñ rume, iñche famentuafiñ feiti ifilu ti mollfüñ, langümafiñ. 11 Com pu mongelelu niei mongen tati mollfüñ ñi duam meu. Fei iñche eluhuiyiñ ti mollfüñ tamün pütefmayafiel ti altar, femngechi tamün perdonañmangeal tamün culpan.* Ti mollfüñ meu mülei ta mongen, feimu eimün perdonañmangeafuimün tamün culpan feitichi mollfüñ ñi duam meu. 12 Feimu feipifiñ pu Israel che: “Inei no rume eimün meu ngelai tamün iyafiel mollfüñ, ca cüpanche no rume mülelu eimün mu mülelai ñi iyafiel ti mollfüñ”.

13 Quiñe Israel che cam quiñe catripanche* mülelu eimün meu nüfile ca langümfile quiñe auca culliñ* cam quiñe üñüm* ifalngelu, mülei ñi hutrunacümafiel* ti mollfüñ, fei tacuafi trufür mu. 14 Com pu mongelelu niei mongen tati mollfüñ ñi duam mu. Tati mollfüñ meu mülei ta mongen. Feimu feipifiñ pu Israel che: “Chem mongelelu rume iñmalayafimün ñi mollfüñ, com pu mongelelu nielu cai mongen tati mollfüñ ñi duam meu. Feimu chem che rume ifile, langümngeai”. 15 Quiñe Israel che cam quiñe ca cüpanche ifile quiñe la culliñ pedangelu* cam ñi langümeteu huapo culliñ,* mülei ñi cüchayal ñi tacun ca müñetual co mu, fei lifcülelayai nagantüle hula. Fei hula lifcületuai. 16 Huelu cüchanole ñi tacun ca müñetunole, castigangeai tañi huelulcan meu’”.

18 Chau Jehová dunguniefi ta Moisés, feipifi: 2 “Feipifinge pu Israel che: ‘Iñche tamün Chau Dios Jehová. 3 Femlayaimün ñi chumqueel pu Egipto che, cheu tamün mülequefel. Cafei femlayaimün ñi femmequen pu Canaán che, feiti mapu cheu tamün yeniefiel. Inayentulayafimün ñi huimtun engün. 4 Inayafimün com tañi ley dungu ca tañi huercün dungu. Iñche tamün Chau Dios Jehová. 5 Mülei tamün inayafiel tañi ley dungu ca tañi huercün dungu. Inei rume inafile, mongeleai. Iñche ta Chau Jehová.

6 Inei no rume ngelai ñi cudumuhual tañi fülmaucülechi pariente engu. Iñche ta Chau Jehová. 7 Cudumlayafimi tami chau cam tami ñuque. Eimi tami ñuque tati, feimu ngelai tami cudumafiel.

8 Cudumlayafimi tami chau ñi domo, tüfa yehuen-ngeafui tami chau mu.

9 Cudumlayafimi tami deya.* Cudumlayafimi tami chau ñi ñahue cam tami ñuque ñi domo püñeñ, choyüngefule rume tami ruca mu cam cañpüle.

10 Cudumlayafimi tami fotüm ñi ñahue cam tami ñahue ñi domo püñeñ. Tüfa yehuen-ngeafui eimu mu.

11 Tami chau ñi domo niele quiñe domo püñeñ, cudumlayafimi. Tüfa tami chau ñi cüpanche, eimi tami lamngen tati.

12 Cudumlayafimi tami chau ñi lamngen, feiti domo tami chau ñi fülmaucülechi pariente tati.

13 Cudumlayafimi tami ñuque ñi lamngen, feiti domo tami ñuque ñi fülmaucülechi pariente tati.

14 Cudumlayafimi tami malle* ñi domo, quisu tami palu tati. Femngechi yehuentuculayafimi tami chau ñi peñi.

15 Cudumlayafimi tami püñmo. Tüfa tami fotüm ñi domo, feimu cudumlayafimi.

16 Cudumlayafimi tami peñi ñi domo. Tüfa yehuen-ngeafui tami peñi mu.

17 Cudumlayafimi quiñe domo ca tañi püñeñ cam tañi chuchu.* Fei engün fülmaucülechi parientengeingün tati. Tüfachi dungu ünufalngei.

18 Petu mongelele tami domo, nielayafimi ca cudumlayafimi tañi lamngen ñi mürihuen-ngeal engu.

19 Quiñe domo lifcülenole tañi domo cutran meu, cudumlayafimi.

20 Cudumlayafimi cangelu huentru* ñi domo. Femülmi, lifcülelayaimi tati.

21 Eluulayaimi inei no rume tami pu cüpanche ñi hultucungeal* tati dios Mólek mu.* Femngechi pecancalayafimi* tami Chau Dios ñi üi. Iñche ta Chau Jehová.

22 Quiñe huentru mülelai ñi cudumuhual chaf huentru engu.* Tüfa ünufalngei tati.

23 Quiñe huentru no rume ngelai ñi nüntuafiel quiñe culliñ. Femle, lifcülelayai. Ca quiñe domo no rume eluuquinolpe tañi nüntuaeteu quiñe culliñ. Tüfa ünufal dungu tati.

24 Podümuulayaimün feitichi dungu meu. Tüfachi dungu meu lifcülelaingün pu troquiñche iñche ñi huemünentuafiel.* 25 Ti mapu lifcülehuelai, iñche castigayafiñ tati pu che feichi mapu meu tañi culpan meu.* Rapinentuaeyu engün ti mapu.* 26 Huelu eimün mülei tamün inanieafiel iñche tañi ley dungu ca tañi huercün dungu. Femlayaimün ünufalchi dungu. Femlayai ti Israel che ca ti catripanche no rume* mülelu eimün meu. 27 Com feiti lifngenochi dungu deu femingün pu huentru mülefulu tüfachi mapu mu petu tamün puunon. Feimu ti mapu lifcülelai. 28 Podümlayafimün ti mapu tamün rapinentunoaeteu, chumngechi ñi rapinentufiel tati pu che mülefulu tiye mu petu tamün puunon. 29 Inei rume femle feitichi ünufal dungu, mülei ñi langümngeal. 30 Eimün mülei tamün inanieafiel tañi huercün dungu. Feimu inalayafimün feiti ünufalchi huimtun ñi femngequefel petu tamün puunon, femngechi podümuulayaimün feitichi dungu meu. Iñche tamün Chau Dios Jehová’”.

19 Chau Jehová huiño dungufi ta Moisés, feipifi: 2 “Dunguafimi com pu Israel che, feipiafimi: ‘Iñche, tamün Chau Dios Jehová, lifngen, feimu eimün lif chengeaimün.

3 Caque quiñeque eimün mülei tamün yamnieafiel* tamün ñuque ca tamün chau. Cafei yamnieafimün tañi ürcütun antü.* Iñche tamün Chau Dios Jehová. 4 Poyelayafimün pu dios chem no rume falinolu. Ca deumalayaimün dios pañillhue mu.* Iñche tamün Chau Dios Jehová.

5 Elufilmün ta Chau Jehová quiñe chalintucun* quiñentrür ingequelu, cüme eluafimün tañi cüme lloungeal. 6 Mülei ñi ingeal feichi antü ñi chalintucungeel ca ti cüpalechi antü. Huelu ti sofrachi chalintucun mülei ñi lüpümngeal cütral mu puule ti cüla antü. 7 Huelu chem ñi chalintucungeel ingele ti cüla antü mu, ünufalngeai tati, lloungelayai. 8 Feiti che ifile, castigangeai tañi culpan meu,* pecancafilu cai* Chau Jehová ñi yamfal chalintucun. Tüfachi che mülei ñi langümngeal.

9 Püramfilmi tami nganün mapu mu, feitichi inaltulelu elcünuafimi ca ütrüfnaglu ñimitulayafimi.* 10 Cafei ñimitulayafimi ti ofad sofralu cam ütrüfnaglu tami anüm ofad mu. Elcünulelafimi tati pu pofre* ca tati pu ca mapu cüpalu. Iñche ta Jehová, eimün tamün Chau Dios.

11 Hueñelayaimün, ngünencachelayaimün ca hueluquentu femuulayaimün norngenochi dungu. 12 Iñche tañi üi meu coila eldungucünulayaimün. Femülmün, pecancayafimün tamün Chau Dios ñi üi. Iñche ta Chau Jehová. 13 Hueñelayaimi ca ngünencalayafimi tami chafche.* Petu ñi afnon ti antü mülei tami culliafiel tami cüdaufe.

14 Malisialayafimi ti che pilungelu ca chem no rume elcünulayafimi cheu ñi rupayal ti traumalelu. Rume yamniefinge tami Chau Dios. Iñche ta Chau Jehová.

15 Quiñe juicio mu nor chengeaimün. Doyümnielayafimün quiñe ülmen huentru ca quiñepülecünulayafimün ti pofre. Nor chengeaimün tamün juzgayafiel tamün chafche.*

16 Tami troquiñche mu coila dalluntucuchelayaimi. Cuñihun mu tuculayafimi tami chafche* ñi mongen.* Iñche ta Chau Jehová.

17 Tami piuque mu üdenielayafimi tami peñi. Norümtufinge* tami chafche,* femngechi culpaconlayaimi* quisu tañi culpan meu.

18 Tami huesa femeteu tami pu che, huiñoleltulayafimi. Ca huesa duam mu piuquentuculayafimi tami femngeel. Chumngechi piuqueyehuimi ca piuqueyeafimi tami chafche.* Iñche ta Chau Jehová.

19 Inanieafimün tañi ley dungu: epu rume culliñ yallümlayafimi. Epurumechi fün trür nganlayaimün tamün lelfün meu. Ca tucutuulayaimün quiñe tacun ngürecangelu epurumechi füu meu.

20 Quiñe huentru cudumafui chi quiñe domo, esclavangei ca deu feipicünungei ñi elungeal ta cangelu huentru. Ti domo petu lifrecünungenole ca ngillangenole, ti huentru ca ti domo mülei ñi castigangeal. Huelu langümngelayai engu, ti domo petu lifrelenolu cai. 21 Ti huentru mülei ñi yelelafiel ta Chau Jehová quiñe chalintucun huelulcan mu itrotripa ti trahunhue tolto ruca meu.* Yeai quiñe caniru* ñi chalintucungeal tañi huelulcan mu. 22 Fei ti sacerdote hulai tüfachi caniru Chau Jehová ñi adquiñ meu ñi perdonañmangeal ti huentru ñi culpan.*

23 Conülmün feichi mapu mu tamün eluafiel ca anüntucufilmün quiñe anümca hulquelu fün, ilayafimün ti fün rupale cüla tripantu hula. Feiti fün lifngelayai eimün meu, famentuafimün. 24 Puule ti meli tripantu com tañi fün lifcületuai, fei ayühun mu chalintuculelngeai ta Chau Jehová. 25 Puule ti quechu tripantu, fei hula iyafimün ti fün, femngechi doicülerpuai tamün cosecha. Iñche tamün Chau Dios Jehová.

26 Chem rume niele mollfüñ, mülelai tamün iyafiel.

Quintulayaimün pelontun dungu ca conlayaimün calcu dungu mu.

27 Cupil-layafimi ti cal mülelu epuñpüle tami lonco mu. Huechuñ püle catrülayafimün tamün payun quetre püle.*

28 Quiñe la* ñi duam mu catrülayafimün tamün cuerpo* ca deumalayaimün adentun* tamün trahua mu. Iñche ta Chau Jehová.

29 Yehuentuculayafimi tami ñahue, yelayafimi ñi cüri domongeal.* Femngechi tati mapu podcülelayai cürique domo meu ca apolelayai podngechi femün.

30 Yamniefimün tañi ürcütun antü ca rume yamniefimün tañi yamfal mülehue. Iñche ta Chau Jehová.

31 Pemelayafimün pu che ramtucaquefilu pu la ca pu pelontuchequelu. Femülmün, fei engün ñi duam meu lifcülelayaimün. Iñche tamün Chau Dios Jehová.

32 Feiti pu che lingarcülelu ñi lonco,* huitrapürayaimi ñi adquiñ mu tami yamnieafiel. Yamnieafimi pu füchaqueche. Yamniefinge tami Chau Dios. Iñche ta Chau Jehová.

33 Quiñe ca cüpanche mülepale tamün mapu meu, cutrancalayafimün. 34 Ti ca cüpanche mülelu eimün meu, Israel che reque troquiafimün. Eimün ca cüpanchengequefuimün Egipto mapu meu, feimu piuqueyeafimün chumngechi piuqueyehuimün. Iñche tamün Chau Dios Jehová.

35 Nor chengeaimün tamün medial ca tamün fanefanetual chem rume. 36 Nor cümelcalepe tamün romana, tamün pesa ca chem rume tamün pünequeel.* Iñche tamün Chau Dios Jehová tamün entufiel Egipto mapu mu. 37 Inanieafimün com tañi huercün dungu ca tañi ley dungu. Iñche ta Chau Jehová’”.

20 Chau Jehová feipiniefi ta Moisés: 2 “Mülei tami feipiafiel pu Israel che: ‘Chem Israel huentru cam chem ca cüpanche rume Israel meu chalintuculelfile ñi yall tati dios Mólek, rüfcünu mülei ñi layal. Ti troquiñche ütrüftuafi cura tañi langümafiel. 3 Feichi huentru ñi chalintuculelfiel tañi yall tati dios Mólek, iñche famentuafiñ ca apümcayafiñ. Quisu podümcünufi tañi yamfal mülehue ca pecancafi* tañi lifngechi üi. 4 Quiñe huentru chalintuculelfile tañi yall tati dios Mólek, fei ti pu che pefile ñi femün, huelu duamcülenole ca langümnofile, 5 iñche famentuafiñ feiti huentru ca tañi pu che. Langümafiñ tüfachi huentru ca com pu inaye poyemequefilu ta Mólek.*

6 Quiñe che pemefile pu ramtucaquefilu pu la ca pu pelontuchequelu, nor piuqueyelaeneu. Feimu iñche famentuafiñ llemai ca langümafiñ.

7 Iñche tamün Chau Dios Jehová, feimu liftuhuaimün ca lif chengeaimün. 8 Inanieafimün iñche tañi ley dungu. Iñche ta Chau Jehová, iñche liftumequehuiyiñ.

9 Quiñe huentru malisiafile tañi chau ca tañi ñuque, mülei ñi layal. Malisiafi tañi chau ca tañi ñuque, feimu quisu tañi femün meu layai.

10 Quiñe huentru ñihuañpefile tañi domo tañi chafche* ñi domo meu, mülei tañi layal. Ti huentru ca ti domo ñihualu mülei ñi layal engu. 11 Quiñe huentru cudumfile tañi chau ñi domo, yehuelcayafi tañi chau. Ti huentru ca ti domo mülei ñi layal engu. Tañi femün mu layaingu. 12 Quiñe huentru cudumfile tañi püñmo, mür mülei tañi layal engu. Ünufalngei tati. Tañi femün mu layaingu.

13 Epu huentru cudumuule,* tüfa ta ünufalngei tati. Feimu mülei tañi layal engu. Tañi femün mu layaingu.

14 Quiñe huentru niefile quiñe domo, huelu ca cudumfile tüfachi domo ñi ñuque, tüfa ta ünufalngei.* Feimu ti huentru ca pu domo mülei ñi lüpümngeal cütral mu. Femngechi mülehuelayai pod dungu eimün meu.

15 Quiñe huentru nüntufile quiñe culliñ, ti huentru mülei ñi layal ca langümafimün ti culliñ. 16 Quiñe domo eluule ñi nüntuaeteu quiñe culliñ, ti domo ca tati culliñ mülei ñi langümngeal. Rüfcünu mülei tañi layal. Tañi femün mu engu layaingu.

17 Quiñe huentru cudumfile tañi deya,* tañi chau ñi ñahue cam tañi ñuque ñi püñeñ, tüfa ta yehuen-ngei tati. Tati pu che ñi adquiñ meu mür mülei ñi langümngeal. Quisu yehuelcafi tañi lamngen, feimu castigangeai tañi culpan meu.*

18 Quiñe huentru cudumfile quiñe domo miyaulu tañi domo cutran meu, trür pengelaingu ñi yamnienofiel* tañi mollfüñcülen.* Feimu mülei tañi langümngeal engu.

19 Cudumlayafimi tami ñuquentu cam tami palu. Femülmi, yehuelcangeai tami fülmaucülechi pariente. Trür mülei tañi castigangeal tañi culpan mu.* 20 Ti huentru cudumfilu tañi malle ñi domo, yehuelcafi tañi malle. Mür mülei tañi castigangeal ñi culpan meu.* Fei ñi nienon yall layaingu. 21 Quiñe huentru niefile tañi peñi ñi domo,* tüfa ta ünufalngei. Quisu yehuelcafi tañi peñi. Nielayaingu yall.

22 Iñche yeniehuiyiñ quiñe mapu tamün mülenagal. Feimu tamün rapinentunoaeteu tüfachi mapu,* inanieafimün com tañi huercün dungu ca com tañi ley dungu. 23 Conlayaimün feitichi huimtun mu ñi nieel tati troquiñche tañi huemünentuafiel* tamün adquiñ meu. Com feitichi dungu ñi femqueel engün ünuniefiñ. 24 Feimu feipihuiyiñ: “Eimün-ngeai tüfachi troquiñche ñi mapu. Iñche eluhuayiñ tamün ngen-ngeal. Quiñe mapu cheu ñi mülen fentren lichi ca miel.* Iñche tamün Chau Dios Jehová, iñche püntücünuhuiyiñ caquelu troquiñche meu”. 25 Eimün mülei tamün ngüneduamal chem culliñ lifngei ca chem culliñ lifngelai, chem üñüm* lifngei ca chem üñüm lifngelai. Iñche elcünufiñ quiñeque culliñ, üñüm ca huinolquiyauquelu* ñi lifngenoal eimün meu. Feimu podümuulayaimün ifiel mu. 26 Iñche, Chau Jehová, lifngen, feimu eimün mülei tamün lif chengeal. Caquelu troquiñche mu püntücünuhuiyiñ ta eimün iñche tañi troquiñchengeal.

27 Chem huentru cam chem domo rume ramtufile pu la cam pelontuchele, rüfcünu mülei tañi layal. Ti troquiñche curatuafi ñi langümafiel. Quisu tañi femün mu layai’”.

21 Chau Jehová ca feipifi ta Moisés: “Feipiafimi tati pu sacerdote, Aarón ñi pu fotüm: ‘Quiñe Israel che larumele, chem sacerdote no rume mülelai ñi podümuhual feitichi la mu. 2 Huelu podümuhuafui* larumele quiñe fülmaucülechi pariente, tañi ñuque, tañi chau, tañi fotüm, tañi ñahue, tañi peñi. 3 Cafei podümuhuafui larumele tañi fütangenochi lamngen, turpu cudumngenolu ca quiñentrür mülelu tañi ruca mu. 4 Larumele quiñe domo nieulu quiñe huentru engu tati sacerdote ñi pu che mu, ti sacerdote ngelai ñi podümuhual feitichi la mu. Femle, lifcülelayai. 5 Fei engün ngelai ñi liftracünual tañi lonco, huechuñ püle catrülayafingün tañi payun quetre püle ca allfül-layafingün tañi cuerpo.* 6 Fei engün eluquefingün ta Chau Jehová chalintucun* cütral meu, Chau Dios ñi chalintucun.* Feimu mülei tañi lif chengeal Chau Dios ñi adquiñ meu, ngelai ñi pecancayafiel* tañi üi. Mülei tañi lif chengeal engün. 7 Ti sacerdote püntücünulelngei* ta Chau Dios, feimu ngelai ñi nieafiel quiñe cüri domo,* quiñe domo cudumngelu cam quiñe domo hudaulu tañi huentru meu. 8 Eimün, pu Israel che, lifngelu troquiafimün ti sacerdote, hultucumequelu am Chau Dios ñi chalintucun. Iñche, Chau Jehová, lifngen ca liftumequehuiyiñ. Feimu lifngelu troquiafimün pu sacerdote.

9 Ti sacerdote ñi ñahue cüri domongele, quisu yehuentucuhuai ca yehuelcayafi tañi chau. Feimu mülei tamün lüpümafiel cütral mu.

10 Ti hunen lonco sacerdote dullingei tañi pu peñi meu, tuculelngei ti falin aceite ñi lonco mu ca dullingei ñi tucutuhual tati sacerdote ñi tacun. Quisu mülei ñi chuchicalenoal tañi cal lonco ca huichafcanoafiel* tañi tacun. 11 Mülelai ñi fülconal* quiñe lachi che mu,* tañi chau cam tañi ñuquengeafui rume, femngechi ñi podümuunoal. 12 Ngelai ñi tripayal ti yamfal mülehue mu. Pecancalayafi Chau Dios ñi yamfal mülehue, nielu cai huente ñi lonco mu ti falin aceite pengelquelu ñi dullicünungeel. Iñche ta Chau Jehová.

13 Mülei ñi nieafiel quiñe domo turpu ñi cudumnoeteu quiñe huentru rume. 14 Ngelai ñi nieafiel quiñe lantu domo, quiñe domo hudaulu tañi huentru mu, quiñe domo cudumngelu cam quiñe cüri domo. Mülei ñi nieafiel quiñe domo tañi pu che meu turpu ñi cudumnoeteu quiñe huentru. 15 Femnole, tañi cüpanche lifngenolu troquiaeyu pu che. Iñche am ta Chau Jehová, iñche liftumequefiñ’”.

16 Chau Jehová dunguniefi ta Moisés ca feipifi: 17 “Feipifinge ta Aarón: ‘Quiñe tami pu cüpanche encañngele, turpu hul-layafui Chau Dios tañi chalintucun. 18 Hul-layafui ti chalintucun quiñe huentru no rume encañngelu: traumangele, cüntrongele, chuchicalele ñi ange, doi alüle quiñe matra cam quiñe lipang, 19 trafolele tañi namun cam tañi cuhu, 20 quiñe huaillepen, quiñe laftra huentru,* niele cutran tañi nge mu, lantralele ñi trahua,* niele pitru cam cutrancülele ñi cudañ.* 21 Quiñe huentru tati sacerdote Aarón ñi cüpanche mu encañngele, elulayafui chalintucun ta Chau Jehová cütral mu. Encañngei, feimu hul-layafui tañi Chau Dios ñi chalintucun. 22 Iyafui tañi Chau Dios ñi chalintucun coneltulelu tati yamfal chemcün mu* ca tati rume yamfal chemcün mu. 23 Huelu fülconpulayafui ti cortina mu ca ti altar mu no rume, encañngelu cai. Ngelai ñi pecancayafiel tañi yamfal mülehue, iñche am ta Chau Jehová, iñche liftumequefiñ engün’”.

24 Feimu llemai Moisés dungufi ta Aarón, tañi pu fotüm ca com tati pu Israel che.

22 Ca quiñe rupa Chau Jehová dungufi ta Moisés, feipifi: 2 “Pu Israel che püntücünufingün* chem tañi chalintuculelaeteu ta iñche. Feimu feipifinge ta Aarón ca tañi pu fotüm ñi yamnieafiel* feitichi yamfal chalintucun.* Femngechi pecancalayafingün* tañi yamfal üi. Iñche ta Chau Jehová. 3 Feipifinge: ‘Pu Israel che püntücünufingün tati yamfal chalintucun ñi eluafiel ta Chau Jehová. Feimu inei rume tami pu cüpanche lifcülenole, ngelai ñi fülmayafiel. Femle, mülei ñi langümngeal. Iñche ta Chau Jehová. 4 Inei rume Aarón tañi cüpanche mu lepra cutran niele cam trarcülele tañi huillihue, ilayafi ti yamfal chalintucun. Ca femlayafui quiñe huentru tripale ñi fine* cam nünütufile cangelu che podümuulu quiñe lachi che mu. Lifcületule hula iyafui. 5 Cafei femlayafui nünütufile quiñe lifngenochi culliñ fütraque troquiñ miyaulu mapu mu cam nünütufile quiñe huentru lifcülenolu. 6 Inei rume nünütufile chem ñi lifngenon, lifcülelayai nagantüle hula. Ca ilayai ti yamfal chalintucun müñetule hula co mu. 7 Conantüle, lifcületuai. Fei hula iyafui ti yamfal chalintucun, quisu ñi iyael tati. 8 Cafei pedangele* quiñe lachi culliñ cam ñi langümeteu quiñe huapo culliñ,* ngelai ñi iyafiel. Femle, lifcülelayai. Iñche ta Chau Jehová.

9 Fei engün mülei ñi inanieafiel iñche tañi huercün dungu ca ngelai ñi illamcayafiel engün tati yamfalngelu. Femngechi culpan dungu mu* conlayaingün ca lalayaingün. Iñche ta Chau Jehová. Iñche liftumequefiñ engün.

10 Inei rume elungenole tañi femal,* ilayafi ti yamfal iyael. Quiñe catripanche no rume* mülelu ti sacerdote ñi ruca mu ilayafi ti yamfal iyael ca ilayafi quiñe cullingeelchi cüdaufe no rume. 11 Huelu ti sacerdote quisu ñi plata mu ngillafile quiñe esclavo, feichi che iyafui ti iyael. Cafei chem esclavo rume choyüngele ti sacerdote ñi ruca mu ca iyafui. 12 Tati sacerdote ñi ñahue nieule quiñe huentru sacerdotengenolu, ti domo ilayafui ti yamfal chalintucun ñi hulün tati pu che. 13 Tati sacerdote ñi ñahue lantuafui cam hudahuafui chi tañi huentru engu. Fei nienole püñeñ ca huiñotule tañi chau ñi ruca mu, cheu ñi mülequefel üllcha domongelu, feiti domo iyafui tañi chau ñi iyael. Huelu inei no rume elungenolu tañi femal,* ilayafi feichi iyael.

14 Quiñe huentru huelulcaule, fei ifile ti yamfalchi iyael, mülei ñi huiñoleltuafiel tati sacerdote chem tañi ifiel ca doi pichin mülei tañi eluafiel.* 15 Feimu ti pu sacerdote ngelai ñi pecancayafiel ti yamfal chalintucun pu Israel che ñi elufiel ta Chau Jehová 16 ca elulayafingün tañi iyafiel ti yamfal chalintucun, femngechi femcünulayafingün tañi culpayal* ca tañi castigangeal. Iñche am ta Chau Jehová, iñche liftumequefiñ engün’”.

17 Chau Jehová dunguniefi ta Moisés, feipifi: 18 “Dunguafimi ta Aarón, tañi pu fotüm ca com tati pu Israel che. Feipiafimi engün: ‘Quiñe Israel huentru cam quiñe catripanche* Israel mu eluafui ta Chau Jehová quiñe lüpümngeelchi chalintucun, quisu tañi duam meu hultucuafui cam ñi femürpual tañi eldungucünuel. 19 Fei mülei ñi hulal quiñe tremolechi toro, quiñe hue caniru* cam quiñe chifu.* Femngechi iñche cüme llohuafiñ. 20 Hultuculayaimün encañngechi culliñ, iñche lloulayafiñ.

21 Quiñe huentru elufile ta Chau Jehová quiñe chalintucun quiñentrür ingequelu ñi femürpual tañi eldungucünuel cam hultucufile quisu tañi duam meu, mülei ñi eluafiel quiñe tremolechi toro, huaca, ufisa cam capüra. Femngechi cüme lloungeai. Ngelai ñi encañngeal ti culliñ. 22 Ngelai ñi hultucungeal quiñe culliñ traumalelu, trafolelu ñi foro, allfülelu cam nielu peglleñ,* pihulechi allfen cam pitru. Com tüfa elulayafimün ta Chau Jehová. Com feitichi dungu chalintuculayafimün ta Chau Jehová altar meu. 23 Cüpa hultuculmün quiñe chalintucun quisu tamün duam meu, hultucuafuimün quiñe toro cam quiñe ufisa doi alüle cam doi pichile rume quiñe tañi matra. Huelu lloungelayai femngechi culliñ cüpa hultucufilmün quiñe chalintucun eldungu mu. 24 Chalintuculel-layafimün ta Chau Jehová quiñe culliñ cutrancülelu ñi cudañ,* chapüdcülelu cam catrünentuñmangelu. Chalintuculayaimün femngechi culliñ tamün mapu meu. 25 Elulayafimün tati pu catripanche* ñi chalintuculelafiel ta Chau Dios femngechi culliñ, tüfa engün cai cutrancülelu ca encañngelu. Chau Dios lloulayafi’”.

26 Chau Jehová huiño dungufi ta Moisés, feipifi: 27 “Coñingele quiñe toro, quiñe hue caniru cam chifu, regle antü mülenagai tañi ñuque engu. Huelu puule ti pura antü, hulngeafui quiñe chalintucun mu. Cütral mu chalintuculelngeafui ta Chau Jehová. 28 Quiñe antü meu langümlayafimün quiñe huaca ca tañi coñi cam quiñe ufisa ca tañi coñi.

29 Elufilmün quiñe chalintucun ta Chau Jehová tamün mañumafiel, cüme chalintucuafimün tamün llohuaeteu. 30 Feichi antü mu müten mülei tañi ingeal. Echelcünulayafimün* ca antü mu. Iñche ta Chau Jehová.

31 Inanieafimün iñche tañi huercün dungu. Iñche ta Chau Jehová. 32 Pecancalayafimün tañi yamfal üi, tati pu Israel che quimaingün iñche tañi lifngen. Iñche ta Chau Jehová, liftumequehuiyiñ ta eimün. 33 Entuhuiyiñ Egipto mapu mu iñche tamün Dios ngeal. Iñche ta Chau Jehová”.

23 Chau Jehová dunguniefi ta Moisés, feipifi: 2 “Dungufinge pu Israel che, feipifinge: ‘Chau Jehová ñi fiesta tamün femal, falinque trahun-ngei. Fei tüfa iñche tañi fiesta:

3 Cayu antü meu cüdahuafuimün, huelu puule ti regle antü, cüdaulayaimün. Tüfa quiñe ürcütun antü tati,* quiñe falin trahun. Chem cüdau no rume femlayaimün. Cheu rume mülelmün, tüfa quiñe ürcütun antüngeai ñi püramyengeal ta Chau Jehová.

4 Fei tüfa Chau Jehová ñi fiesta, eimün mülei tamün femal feitachi falinque trahun tati señacünuelchi antü meu. 5 Tati mari meli antü ti hunen cüyen meu, epe punle,* femngeai ti Pascua ñi püramyengeal ta Chau Jehová.

6 Tati mari quechu antü feitichi cüyen mu femngeai ti Fiesta tati Fayümngenochi Cofque ñi püramyengeal ta Chau Jehová. Regle antü iyaimün fayümngenochi cofque. 7 Ti hunen antü femaimün quiñe falin trahun. Fanechi cüdau femlayaimün feichi antü. 8 Doi mai regle antü meu eluafimün ta Chau Jehová chalintucun* cütral mu. Puule ti regle antü, quiñe falin trahun müleai. Fanechi cüdau femlayaimün’”.

9 Chau Jehová dunguniefi ta Moisés, feipifi: 10 “Dunguafimi pu Israel che, feipiafimi engün: ‘Conpulmün ti mapu iñche tamün eluafiel ca cosechalmün, tamün hunenque fün mu yelelafimün quiñe cütrüng* tati sacerdote. 11 Ti sacerdote epuñpüle nengümafi ti cütrüng* Chau Jehová ñi adquiñ meu, femngechi cüme lloungeai. Quiñe antü rupale hula ti ürcütun antü meu, ti sacerdote nengümafi ti cütrüng. 12 Feichi antü nengümcangele ti cütrüng,* cütral mu chalintuculelafimün ta Chau Jehová quiñe hue caniru,* mülei ñi tremoleal ca nieal quiñe tripantu. 13 Tamün chalintucual fün, hultucuaimün epu kilo cüme rüngo reyülelu* aceite engu.* Cütral mu chalintuculelafimün ta Chau Jehová, cüme nümün-ngeai. Ca tamün hutrulngeelchi* chalintucun, quiñe litro* pulcu niepe. 14 Ilayaimün cofque, cotülechi fün ca hue fün no rume puule hula feichi antü tamün chalintuculelafiel ta Chau Dios. Tüfachi ley dungu elcünungei ñi amulerpual, com tamün pu cüpanche mülei ñi inanieafiel cheu rume tamün mülen.

15 Quiñe antü rupale hula ti ürcütun antü mu, yeafimün ti cütrüng* ñi epuñpüle nengümngeal. Feichi antü eluhuaimün tamün raquial regle semana.* Raquiaimün ti regle antü ñi nieel caque quiñeque semana. 16 Quiñe antü rupale hula feiti regle semana, puhuai ti 50 antü. Fei hueque fün chalintuculelafimün ta Chau Jehová. 17 Cheu tamün mülen entuaimün epu cofque, yeafimün, fei epuñpüle nengümngeai tañi chalintucungeal. Feitachi epu cofque deumangeai epu kilo cüme rüngo mu ca tuculelngeai fayümhue.* Fei horno mu* afümngeai. Tüfa tati hunenque afülechi fün ñi chalintuculelngeal ta Chau Jehová. 18 Hulaimün feitachi cofque, fei ca hulaimün regle tremolechi cordero quiñe tripantu nielu, quiñe hue toro ca epu caniru. Tüfachi culliñ quiñe lüpümngeelchi chalintucun-ngeai ñi elungeal ta Chau Jehová. Cafei chalintuculelngeai fün ca ti hutrulngeelchi chalintucun, cütral mu lüpümngeai ca cüme nümün-ngeai Chau Jehová mu. 19 Hultucuaimün quiñe pichi capüra, tüfa quiñe chalintucun culpan dungu mu.* Cafei hultucuaimün epu hue cordero quiñe tripantu nielu, tüfa quiñe chalintucun quiñentrür ingequelu. 20 Ti sacerdote nengümcayafi tati epu hueque caniru ca ti cofque deumangelu ti hunenque afülechi fün meu, femngechi tañi chalintucuafiel Chau Jehová ñi adquiñ mu. Tüfa yamfalngei Chau Jehová mu. Ti sacerdote ngen-ngeai. 21 Feichi antü femaimün quiñe falin trahun. Fanechi cüdau femlayaimün. Tüfachi ley dungu elcünungei ñi amulerpual, com tamün pu cüpanche mülei ñi inanieafiel cheu rume tamün mülen.

22 Püramfilmi tami nganün mapu mu, feitichi inaltulelu elcünuafimi ca ütrüfnaglu ñimitulayafimi.* Elcünulelafimi tati pu pofre* ca tati pu ca mapu cüpalu. Iñche ta Jehová, eimün tamün Chau Dios’”.

23 Chau Jehová feipiniefi ta Moisés: 24 “Feipiafimi pu Israel che: ‘Ti hunen antü tati regle cüyen meu, quiñe ürcütun antüngeai eimün meu. Feichi antü dungulngeai ta trompeta, femngechi raquiduamtucungeai ñi falin-ngen feitichi trahun. 25 Fanechi cüdau femlayaimün. Cütral mu eluafimün chalintucun ta Chau Jehová’”.

26 Chau Jehová ca feipifi ta Moisés: 27 “Huelu puule ti mari antü tati regle cüyen meu conai ti Antü ñi Liftungeal ti Culpan.* Femaimün quiñe falin trahun, pengelaimün tamün hueñancülen* tamün culpan meu.* Fei cütral mu eluafimün quiñe chalintucun ta Chau Jehová. 28 Feichi antü tamün Chau Dios Jehová ñi adquiñ mu ti sacerdote hulai chalintucun ñi perdonangeal tamün culpan.* Feimu feichi antü cüdaulayaimün. 29 Feichi antü inei rume pengelnole ñi hueñancülen tañi culpan mu,* langümngeai. 30 Iñche langümafiñ inei rume cüdaule feiti antü meu. 31 Chem cüdau no rume femlayaimün. Tüfachi ley dungu elcünungei ñi amulerpual, com tamün pu cüpanche mülei ñi inanieafiel cheu rume tamün mülen. 32 Ürcütun antüngeai eimün meu. Feichi cüyen ti ailla antü mu, conantü mu pengelaimün tamün hueñancülen tamün culpan meu.* Ti ürcütun antü ellaconai conantüle ca puhuai ca antü, conantüle hula”.

33 Chau Jehová dunguniefi ta Moisés, feipifi: 34 “Feipifinge pu Israel che: ‘Tati mari quechu antü tati regle cüyen meu, femngeai tati Fiesta ñi Müleal Llamasa mu.* Femngechi püramyengeai ta Chau Jehová. Regle antü puhuai. 35 Ti hunen antü quiñe falin trahun femngeai. Fanechi cüdau femlayaimün. 36 Regle antü mu eluafimün ta Chau Jehová chalintucun cütral mu. Ti pura antü femaimün quiñe falin trahun, fei eluafimün ta Chau Jehová quiñe chalintucun cütral mu. Yamfal trahun-ngeai, fanechi cüdau femlayaimün.

37 Tüfa tati fillque fiesta tamün püramyeafiel ta Chau Jehová, falinque trahun tamün eluafiel ta Chau Jehová tüfachi chalintucun cütral mu: ti lüpümngeelchi chalintucun, ti fün chalintucungelu ca ti hutrulngeelchi chalintucun. Hulngeai chumngechi adcünungei ñi femngeal fill antü. 38 Hulngeai tüfa, fei ca hulngeai chem ñi chalintucungequen Chau Jehová tañi ürcütun antü mu, tamün yehun,* tamün chalintucun eldungu mu ca chem tamün chalintucuqueel quisu tamün duam mu. Com tüfa mülei tamün eluafiel ta Chau Jehová. 39 Huelu ti mari quechu antü tati regle cüyen meu, cosechalmün, mülei tamün femal Chau Jehová ñi fiesta regle antü meu. Ti hunen antü ca ti pura antü, ürcütun antüngeai. 40 Ti hunen antü entuaimün tati adngechi anümca ñi fün, tapül palmera ca entuñmayafimün rou* feiti alürupachi anümca ca tati alamo mülelu laf mapu mu. Feiti regle antü meu ayüucüleaimün tamün Chau Jehová ñi adquiñ meu. 41 Fill tripantu, regle antü meu femaimün tüfachi fiesta ñi püramyengeal ta Chau Jehová. Fiestayaimün tati regle cüyen meu. Tüfachi ley dungu elcünungei ñi amulerpual, com tamün cüpanche mülei ñi inanieafiel. 42 Regle antü mülei tamün müleal llamasa mu. Com pu Israel che mülei ñi müleal llamasa meu. 43 Femngechi tamün cüpanche quimaingün, iñche femcünun pu Israel che ñi müleal llamasa mu entufilu engün Egipto mapu meu. Iñche tamün Chau Dios Jehová’”.

44 Femngechi Moisés nütramcalelfi pu Israel che Chau Jehová ñi fillque fiesta.

24 Chau Jehová huiño dungufi ta Moisés, feipifi: 2 “Feipicünuafimi pu Israel che tami cüpalelaeteu engün cüme oliva aceite ñi tuculelngeal ti pelontuhue, femngechi rumel üicüleai. 3 Aarón mülei ñi ngüneduamafiel ti pelontuhue ñi mülen itrotripa ti cortina fülcülelu ti falin caja pengelquelu Chau Dios ñi eldungu ponhuitu tati trahunhue tolto ruca mu.* Mülei tañi rumel üicüleal Chau Jehová ñi adquiñ mu, nagantü üyümngeai, fei üicüleai hunle hula. Tüfachi ley dungu elcünungei ñi amulerpual, com tañi pu cüpanche mülei ñi inanieafiel. 4 Chau Jehová ñi adquiñ mu rumel mülei ñi pepicanieafiel ti pelontuhue huente ti candelabro re orongelu.*

5 Nüaimi cüme rüngo, fei horno mu* deumayafimi mari epu cofque rangiñ mu huechodcülelu. Caque quiñeque cofque deumayaimi epu kilo rüngo mu.* 6 Huelurentrücünuafimi cayu feitichi cofque, cangelu cayu cofque ca huelurentrücünuafimi. Fei Chau Jehová ñi adquiñ mu elcünuafimi huente mesa re oro mu deumangelu. 7 Huente caque quiñeque huelurentrülelu mu tucuaimi cüme olibano. Fei chalintucuaimi tüfa ti cofque ñi chalintucungeafel. Cütral mu chalintuculelngeai ta Chau Jehová. 8 Rumel mu fillque ürcütun antü* ti cofque elcünungeai Chau Jehová ñi adquiñ mu. Tüfachi eldungu amulerpuai pu Israel che mu. 9 Feitichi cofque elungeai ta Aarón ca tañi pu fotüm. Fei quiñe yamfal mülehue mu iyafingün. Tüfa rume yamfalngei, entungei chem ñi chalintuculelngeel ta Chau Jehová cütral mu. Tüfachi ley dungu elcünungei ñi amulerpual”.

10 Tati pu Israel che meu mülerquei quiñe huentru, tañi ñuque Israel chengei, huelu tañi chau Egipto chengei. Fei quiñe antü eluhui ñi quehuayal quiñe Israel huentru engu cheu ñi toltoucülen pu che.* 11 Feitichi Israel domo ñi püñeñ eluhui ñi pecancayafiel* ca malisiayafiel Chau Dios ñi üi,* feimu yengei Moisés mu. Selomit pingerquei ñi ñuque, Dibrí ñi ñahue, Dan ñi troquiñche mu cüpai. 12 Ti huentru presuntucungei, üngümcülerqueingün* chem ñi feipial ta Chau Jehová.

13 Fei Chau Jehová feipifi ta Moisés: 14 “Huecun entufinge cheu ñi mülenon che feiti huentru ñi pecancañmaeteu tañi üi. Fei com pu che allcülu ñi feipin tüfachi huentru, puhulafi ñi cuhu ti huentru ñi lonco mu, fei com ti troquiñche curatuafi. 15 Feipiafimi pu Israel che: ‘Inei rume malisiafile tañi Chau Dios, castigangeai tañi culpan meu.* 16 Feimu inei rume pecancafile Chau Jehová ñi üi, rüfcünu mülei tañi layal. Com ti troquiñche mülei ñi curatuafiel. Catripanche* cam Israel chengele rume, mülei ñi layal pecancafiel mu Chau Dios ñi üi.

17 Quiñe huentru langümfile quiñe che,* rüfcünu mülei ñi layal. 18 Inei rume allfülcafile, fei langümfile quiñe ñom culliñ,* mülei ñi cullial, hulai ca quiñe ñom culliñ. 19 Quiñe huentru allfülfile tañi chafche,* ca femngechi mülei ñi femngeal. 20 Trafolmafile quiñe foro, ca femngechi femngeai. Allfülmafile quiñe nge cam quiñe ayehue foro, ca femngeai. Chumngechi ñi allfülcafiel ti che, ca mülei tañi allfülcangeal. 21 Inei rume allfülfile, fei langümfile quiñe culliñ, mülei tañi cullial. Huelu allfülfile ca langümfile quiñe che, mülei tañi layal.

22 Iñche tamün Chau Dios Jehová, feimu catripanche* cam Israel chengeafui rume, mülei ñi inaniengeal quiñe ley dungu müten’”.

23 Feimu Moisés dungufi tati pu Israel che. Fei huecun entufingün cheu ñi mülenon che tati huentru malisiafilu Chau Dios ñi üi, fei curatufingün. Femngechi pu Israel che cüme femingün chem ñi feipicünufiel Chau Jehová ta Moisés.

25 Chau Jehová huiño dungufi ta Moisés Sinaí huincul mu, feipifi: 2 “Feipifinge pu Israel che: ‘Conülmün feichi mapu tamün eluafiel, inanieaimün ñi chem pilen Chau Jehová ñi ley tati ürcütun tripantu meu ca cüdahuel-layafimün ti mapu. 3 Cayu tripantu nganaimi tami lelfün, catrüafimi tami anüm ofad ñi rou* ca cosechayaimi. 4 Huelu ti regle tripantu mu cüdahuel-layafimi ti mapu, felecape müten. Quiñe ürcütun tripantungeai* Chau Jehová mu. Nganlayaimi tami lelfün ca catrülayafimi tami anüm ofad ñi rou.* 5 Cosechafilmi, ütrüfnagai fün, fei quisutu tremai, huelu feitichi fün cosechalayafimi. Cafei tulayafimi tami anüm ofad ñi fün. Ürcütupe ti mapu, felecape müten quiñe tripantu. 6 Huelu eimün iyafuimün ti iyael tremlu ti mapu mu feiti ürcütun tripantu meu. Eimi, tami esclavo, tami esclava, tami cüdaufe cullingequelu ca ti catripanche* mülelu eimi meu ca iyafuingün. 7 Ñom culliñ ca auca culliñ* ñi mülen tami mapu mu ca iyafuingün. Com ñi hulün ti mapu ingeafui.

8 Regle ürcütun tripantu raquiaimi, fei regle rupa raquiaimi regle tripantu. Com tüfa 49 tripantungeai. 9 Fei conle mari antü ti regle cüyen meu, nehuentu cullculltuaimi. Femcünuaimün ñi allcütungeal ti cullcull com tamün mapu mu feitichi Antü ñi Liftungeal ti Culpan.* 10 Feiti 50 tripantu lifngei Chau Dios ñi adquiñ meu, fei huldungucünuaimün tamün mapu meu ñi lifreleal tati pu che. Ayühun Tripantu ngeai eimün meu. Fei caque quiñeque eimün huiñolelngetuai tañi mapu ca caque quiñeque eimün huiñotuai tañi pu che meu. 11 Ti 50 tripantu Ayühun Tripantu ngeai eimün meu, nganlayaimün ca feiti fün ütrüfnaglu ca quisu tremlu cosechalayafimün. Cafei tulayafimün tamün anüm ofad ñi fün. 12 Tüfachi Ayühun Tripantu yamfalngeai eimün meu. Iyafuimün müten chem ñi quisu hulün ti mapu. 13 Tüfachi Ayühun Tripantu mu caque quiñeque eimün huiñolelngetuai tañi mapu. 14 Ngillafilmün cam fendelelfilmün chem rume tamün chafche,* hueluquentu ngünencaulayaimün. 15 Ngillañmafilmün quiñe mapu tamün chafche,* raquiaimün tunten* tripantu ñi rupan tati Ayühun Tripantu meu. Ca tati fendefilu ngüneduamai tunten tripantu mülehuei ñi cosechangeal. 16 Fentren tripantu mülehuele, doi fentren cofrayafui. Huelu pichilehuele, mülei ñi doi pichin cofrayal, fendemequelu am tunten rupa ñi cosechangeal ti mapu. 17 Inei no rume ngelai ñi ngünencayafiel tañi chafche.* Eimün mülei tamün rume yamnieafiel* tamün Chau Dios. Iñche cai tamün Chau Dios Jehová. 18 Inaniefilmün tañi huercün dungu ca tañi ley, cüme feleaimün ti mapu meu. 19 Ti mapu hulai ñi fün, eimün iyafimün ca huedayaimün. Cüme feleaimün ti mapu meu.

20 Huelu eimün ramtuhuafuimün chi: “Feiti regle tripantu meu nganlayaiñ ca cosechalayaiñ, fei ¿chem iyaiñ?”. 21 Rüfcünu mai ti cayu tripantu meu iñche cümelcahuayiñ, fei ti mapu hulai fentren fün tamün iyal cüla tripantu mu. 22 Puule ti pura tripantu, nganaimün ca iyaimün tamün ngülümcünuel puule hula ti ailla tripantu. Petu puunole ti hue cosecha, amuleai tamün iyafiel tamün ngülümcünuel.

23 Iñche ngen-ngen ti mapu meu, feimu fendelel-layafimün inei no rume ñi quisungeal rumel meu. Iñche tañi adquiñ meu catripanchengeimün cai.* 24 Ngillafilmün quiñe mapu, eluafimün tati fendelu ñi huiño ngillayafiel. Femaimün tüfa com ti mapu meu tamün ngen-ngeal.

25 Pofrengerpule tami chafche,* duamnieafui chi ñi fendeal quiñe troquiñ tañi mapu. Fei quiñe tañi fülmaucülechi pariente cüpayafui ca huiño ngillayafui chem tañi fendeel. 26 Quiñe che nielayafui chi inei ñi huiño ngillalelaeteu ñi mapu. Huelu ricungerpufule, fei niele plata ñi huiño ngillayafiel tañi mapu, 27 mülei ñi raquial tunten tripantu deu rupai ñi fendefiel ti mapu. Fei culliai tunten tripantu ñi mülehuen tañi acual ti Ayühun Tripantu. Femngechi huiñolelngetuai ñi mapu.

28 Huelu ti che nienole plata ñi huiño ngillayafiel ñi mapu, feiti ngillalu niecayafi ti mapu puule hula ti Ayühun Tripantu. Huelu puule ti Ayühun Tripantu, huiño nietuai ñi mapu, huiñolelngetuai.

29 Quiñe huentru fendeafui tañi ruca mülelu quiñe malalmalechi huaria meu. Feichi antü mu ñi fendefiel tañi ruca quiñe tripantu mu ca huiño ngillayafui. Elungeai tañi huiño ngillayafiel tañi ruca com quiñe tripantu mu. 30 Com quiñe tripantu rupayafui, fei huiño ngillangenole ti ruca mülelu quiñe malalmalechi huaria meu, tati ngillalu ti ruca ca com tañi pu cüpanche ngen-ngeaingün rumel meu. Puule ti Ayühun Tripantu huiñolelngetulayai tati ngen rucangefulu. 31 Huelu quiñe rucantu malalmalenolu, lelfün reque troquingeai müten. Feimu chumül rume huiño ngillangeafui ca mülei ñi huiñolelngetual ti ngen rucangefulu Ayühun Tripantu mu.

32 Pu Leví che rumel elungeai ñi ngillayafiel tañi ruca mülelu ñi huaria mu. 33 Israel mapu mu pu Leví che ngen-ngeingün com tati ruca mülelu quisu engün ñi huaria meu. Feimu pu Leví che ñi huaria mu quiñe Leví che fendefile ñi ruca, huelu huiño ngillanofile, huiñolelngetuai Ayühun Tripantu mu. 34 Cafei feitichi lelfün ñi hualloñmanieteu tañi huaria fendengelayai. Fei engün rumel ngen-ngeingün.

35 Quiñe tami chafche* fülcülelu* eimi mu pofrengerpule, fei nienole chumngechi tañi mongeluhual, mülei tami eluafiel chem ñi duamnieel, chumngechi tami quelluquefiel quiñe catripanche.* Femngechi ñi mongeleal tami chafche. 36 Doi cofralayafimi tami arelelfiel mu ca allmalltulayaimi tami huehual plata. Rume yamnieafimi tami Chau Dios, fei mongeleai tami chafche.* 37 Arelel-layafimi plata tami doi cofrayafiel. Ca elulayafimi iyael tami huehual plata. 38 Iñche tamün Chau Dios Jehová, entuhuiyiñ Egipto mapu meu, fei eluhuayiñ Canaán mapu, femngechi iñche tamün Chau Dios ngean.

39 Quiñe tami chafche* fülcülelu eimi mu pofrengerpule, fei ngillaen tami esclavongeal pielmu, femcünulayafimi ñi cüdahual quiñe pecan esclavo reque. 40 Quiñe cullingequeelchi cüdaufe reque troquiafimi, quiñe catripanche reque.* Cüdahuelaimu puule hula ti Ayühun Tripantu. 41 Fei elcünuaimu. Quisu ca tañi pu yall huiñotuaingün tañi pu che meu, fei huiñolelngetuai tañi cuifiqueche yem ñi mapu. 42 Fei engün iñche tañi pu esclavo tati, entufiñ engün Egipto mapu mu. Mülelai ñi fendengeal quiñe esclavo reque. 43 Cutrancalayafimi engün, rume yamnieafimi tami Chau Dios. 44 Feiti troquiñque mapu tami hualloñmanieteu cüpayai tami pu esclavo ca tami pu esclava. Feichi mapu meu ngillayafuimi esclavo cam esclava. 45 Pu catripanche* ñi pu yall mülelu eimün meu ca tañi familia choyüngelu tamün mapu meu, eimün ngillayafuimün esclavo. Ngen-ngeaimün quisu engün mu. 46 Lalmün, elcünulelafuimün tamün pu yall. Ngen-ngeaingün fei engün meu, fei cüdahuelaeyu engün. Huelu cutrancalayafimün tamün pu chaf Israel che.*

47 Quiñe catripanche* mülelu eimi meu ricungerpuafui, huelu quiñe chaf Israel che* pofrengerpuafui, feimu ngillaen tami esclavongeal feipiafi chi ti catripanche mülelu eimi meu cam quiñe tañi pu che. 48 Ti pofrengelu, fendengelu rume, huiño ngillangeafui. Quiñe tañi pu peñi huiño ngillayafeyu. 49 Ca huiño ngillayafeyu tañi malle, tañi müna,* quiñe fülmaucülechi pariente cam chem pariente rume.

Cafei ti pofrengelu ricungerpule, quisu huiño ngillahuafui. 50 Ti esclavo ca ti ngen esclavo raquiaingu tunten tripantu mülehuerquefui ñi puhual ti Ayühun Tripantu fendengelu ti esclavo. Com feichi tripantu pengelai tunten plata mu fendengei ti esclavo. Tunten ñi cullingequen quiñe cüdaufe, ca femngechi faliai ti esclavo ñi cüdau com tüfachi tripantu meu. 51 Fentren tripantu mülehuele ñi puhual ti Ayühun Tripantu, cullicünuai com feiti mülehuechi tripantu meu tañi lifrecünungeal. 52 Huelu pichin tripantu mülehuele ñi puhual ti Ayühun Tripantu, entucuentayai, fei cullicünuai tati mülehuechi tripantu meu. Femngechi tañi lifretripayal. 53 Com feitichi tripantu ti esclavo ñi cüdahuelfiel tañi ñidol, cullingequeelchi cüdaufe reque troquingeai ca mülelai tañi cutrancangeal. 54 Huelu pepi huiño ngillaunole chumngechi feipi tüfachi huercün dungu, quisu ca tañi pu yall lifretripayaingün puule ti Ayühun Tripantu.

55 Pu Israel che iñche tañi pu esclavongeingün. Entufiñ Egipto mapu meu. Iñche tañi esclavongeingün tati. Iñche tamün Chau Dios Jehová.

26 Iñche tamün Chau Dios Jehová, feimu deumalayaimün falin-ngenochi dios, chem adentun no rume* cam huitracünuelchi cura poyengequelu. Ca elcünulayaimün tamün mapu meu quiñe adelcalechi cura tamün lucunagal ñi adquiñ meu. 2 Yamnieafimün* tañi ürcütun antü,* rume yamnieafimün tañi yamfal mülehue. Iñche ta Chau Jehová.

3 Inaniefilmün iñche tañi ley ca tañi huercün dungu, 4 iñche eluhuayiñ fentren mahun puuchi antü mu. Ti mapu ca ti anümca mülelu lelfün mu hulai ñi fün. 5 Ti pünoquetranün puhuai tungele ti ofad. Cafei ñi tumequengen ofad fentepuhuai nganün antü mu. Iyaimün cofque, huedayaimün, cüme feleaimün tamün mapu mu. 6 Iñche femcünuan ñi tüngcüleal* ti mapu. Eimün cuduaimün, inei no rume llicalcalayaimünmeu. Femcünuan ñi ngehuenoal auca culliñ.* Chem che no rume malocontulayaimünmeu tamün mapu mu. 7 Rüfcünu inantucuafimün tamün pu caiñe, fei langümafimün ti fütra cuchillo mu. 8 Quechu che eimün meu inantucuafi pataca che tamün pu caiñe meu. Ca pataca che eimün meu inantucuafi mari huaranca che* tamün pu caiñe meu. Langümafimün tamün pu caiñe ti fütra cuchillo mu.

9 Iñche ta fürenehuayiñ, eluhuayiñ fentren yall, alün-ngeaingün. Huechunentuan chem tamün eldungucünulelfiel. 10 Petu tamün imequen chem tamün ngülümcünuel rupachi tripantu mu, entuafimün chem tamün cosechacünuel, femngechi tamün tucual ti hue cosecha. 11 Iñche tucuan tañi ngillatuhue tolto ruca* rangi eimün meu, famentuulayayiñ. 12 Iñche amulean eimün meu, tamün Chau Dios ngean. Eimün iñche tañi pu chengeaimün. 13 Iñche tamün Chau Dios Jehová. Egipto mapu mu entuhuiyiñ tamün esclavongehuenoal. Trafocafiñ ti yucu tamün esclavoyeteu. Femcünun tamün lifreyahual.

14 Huelu allcütumunoli, inanolmün com tüfachi huercün dungu, 15 famentufilmün tañi feipin ca üdefilmün tañi ley dungu, yeaimünmeu tamün inanoafiel com tañi huercün dungu ca tamün femnoal iñche tañi eldungu. 16 Femülmün, iñche femuhuayiñ tüfa: cutrancahuayiñ huesaque dungu mu, eluhuayiñ tuberculosis ca rume aling cutrancüleaimün. Feimu nehue pelohuelayaimün ca yafüngehuelayaimün. Ngünam nganaimün, pu caiñe iñmayaimünmeu tamün cosecha. 17 Iñche famentuhuayiñ. Tamün pu caiñe huehuaimünmeu ca ti pu che tamün üdequeteu cutrancayaimünmeu. Eimün lefmahuaimün inei no rume tamün inantucunienoeteu.

18 Com tüfa rupalmün, huelu allcütumunoli, doi regle rupa cutrancahuayiñ tamün culpan meu.* 19 Fentecünuan tamün trencül piuquengen ca tamün mallma chengen. Cerracünuafiñ ti huenu, fei mahunlayai. Ca femcünuan ti mapu ñi hulnoal chem no rume. 20 Ngünam nehuentuaimün tamün cüdahual. Ti mapu ca ti anümca lelfün mu mülelu hul-layai ñi fün.

21 Huelu chaftuniemuli ca cüpa allcütumunoli, doi regle rupa cutrancahuayiñ tamün culpan meu. 22 Huercüleluhuayiñ auca culliñ* miyauquelu lelfün mu, apümcayafingün tamün pu yall, tamün pu ñom culliñ. Pichilehueaimün müten, inei no rume miyauhuelayai tamün rüpü meu.

23 Com tüfa rupalmün, huelu eluunolmün iñche tamün norümtuaeteu ca chaftuniemuli, 24 iñche ca chaftuhuayiñ, fei regle rupa cutrancahuayiñ tamün culpan meu.* 25 Tamün inanienofiel mu tañi eldungu, cutrancahuayiñ. Femcünuan tamün lefcontuaeteu tamün pu caiñe. Ellcahulmün* tamün huaria mu, huercüleluhuayiñ cutran. Fei hultucungeaimün tamün pu caiñe ñi cuhu meu. 26 Femcünuli tamün niehuenoal cofque, mari domo pepicayaingün tamün cofque quiñe horno mu müten.* Fanefanetuafingün, fei pichin eluaimünmeu. Iyafimün, huelu huedalayaimün.

27 Com tüfa rupalmün, huelu allcütumunoli ca chaftuniemuli, 28 iñche doi chaftuhuayiñ. Iñche llemai regle rupa cutrancahuayiñ tamün culpan meu.* 29 Feimu ilotuafimün tamün pu fotüm ca tamün pu ñahue. 30 Apümcayafiñ tamün yamfal mülehue.* Teifücayafiñ tamün altar cheu tamün lüpümquefiel incienso. Cheu ñi teifücalen tamün ünufalchi* adentun, fei mu huelurentrücünuafiñ tamün lachi cuerpo.* Ünuniehuayiñ, feimu püntütripayan* eimün meu. 31 Elcünuan ñi apümcangeal tamün huaria. Ca huellicünuafiñ tamün yamfal mülehue. Ayühuel-layaeneu tamün chalintucun* ñi cüme nümün. 32 Iñche huellicünuafiñ ti mapu, tamün pu caiñe mülenagaingün feiti mu, fei afmatulehueaingün. 33 Fill püle ti pu troquiñche mu puhuluhuayiñ. Iñche ñi pin mu, tamün pu caiñe quehuatupayaimünmeu fütra cuchillo mu. Huellileai tamün mapu ca apümcangeai tamün huaria.

34 Tamün mapu ürcütulai. Feimu mülepulmün tamün caiñe ñi mapu meu, fei hula ürcütuai. Tamün mapu ürcütuai, cuifi ürcütunolu am. 35 Mülelu eimün ti mapu mu, ürcütulai. Feimu huellilele, fill antü ürcütuai.

36 Inei rume montule, fei mülepale tañi pu caiñe ñi mapu meu, iñche femcünuan ñi rume llicaleal. Lefmahuaingün allcüle quiñe tapül ñi nengümeteu ti cürüf. Lefmahuaingün chumngechi ñi lefmauquen quiñe che hueichan mu.* Ca trananagaingün inei no rume ñi inantucunienoeteu. 37 Inantucungenolu rume, hueluquentu mutrurtucuhuaingün chumngechi ñi femquen pu lefmaulu hueichan mu. Pepi chaftulayafimün tamün pu caiñe. 38 Layaimün rangi ti pu troquiñche mu, tamün pu caiñe ñi mapu meu. 39 Quiñeque mülehuele, tamün culpan meu* cutrancahuaingün* tamün caiñe ñi mapu meu. Cutrancahuaingün llemai tañi pu chau ñi culpan meu. 40 Fei entudunguaingün* quisu engün ca tañi pu chau ñi femün. Chaftueneu engün, feyentulaingün ca culpaingün* iñche mu. 41 Feimu chaftufiñ engün ca yefiñ tañi pu caiñe ñi mapu meu.

Tüfachi dungu rupai ñi ñomngeal tañi trencül piuque engün ca tañi castigangeal tañi culpan meu.* 42 Iñche raquiduamtucunieafiñ chem tañi eldungucünulelfiel ta Jacob, Isaac ca Abrahán. Ca raquiduamtucunieafiñ ti mapu. 43 Quisucünufile engün ti mapu, ürcütuai ca huellileai, ngehuelayai engün. Quisu engün castigangeai tañi culpan meu.* Famentufingün tañi ley dungu ca üdefingün tañi huercün dungu. 44 Com tüfa rupale rume, huelu petu mülele engün tañi pu caiñe ñi mapu meu, iñche rumel mu famentulayafiñ engün, com apümcalayafiñ fente tañi ayünienofiel meu. Femfuli, famentuafun chem tañi eldungucünulelfiel engün. Iñche Jehová, quisu engün tañi Chau Dios. 45 Ñi cümelcaleal engün, raquiduamtucunieafiñ chem ñi eldungucünulelfiel tañi cuifiqueche yem. Egipto mapu meu entufiñ engün pu troquiñche ñi adquiñ mu, quisu engün tañi Dios ngeal. Iñche ta Chau Jehová’”.

46 Sinaí huincul mu Chau Jehová elufi tüfachi huercün dungu ca ley dungu ta Moisés, femngechi ñi eluafiel tati pu Israel che.

27 Chau Jehová huiño dungufi ta Moisés, feipifi: 2 “Dungufinge pu Israel che, feipifinge: ‘Quiñe che feipicünufile ta Chau Jehová ñi eluafiel quiñe che, culliai tunten* plata feipicünungei ñi cullingeal feitichi che meu. 3 Cüpa hultucungele quiñe huentru, 20 cam 60 tripantu nieafui cütu, fei mülei ñi cullingeal 570 gramo* plata. Feiti plata fanefanetungeai chumngechi ñi fanefanetungequen ti yamfal mülehue mu. 4 Huelu cüpa hultucungele quiñe domo, mülei tañi cullingeal 342 gramo* plata. 5 Cüpa hultucungele quiñe che quechu cam epu mari tripantu nieafui cütu, huentrungele, cullingeai 228 gramo* plata, domongele, cullingeai 114 gramo* plata. 6 Niele quiñe cüyen cam quechu tripantu nieafui cütu, pichi huentrungele, cullingeai 57 gramo* plata, pichi domongele, cullingeai 34 gramo* plata.

7 Niele 60 tripantu cam doi, huentrungele cullingeai 171 gramo* plata, domongele, cullingeai 114 gramo* plata. 8 Huelu tati eldungulu rume pofrengele, yeafi ti che tati sacerdote ñi adquiñ mu. Fei ti sacerdote feipicünuai tunten ñi cullingeal feitichi che mu. Ti sacerdote ngüneduamai tunte ñi culliafel feiti eldungulu, fei feipicünuai tunte ñi cullial feiti che mu.

9 Quiñe che feipicünule ñi eluafiel ta Chau Jehová quiñe lif culliñ, feitichi culliñ püntücünulelngeai* ta Chau Jehová. 10 Tüfachi culliñ hultucuan pile, ngelai ñi cüpalal cangelu. Feipicünule ñi hulal quiñe cüme culliñ, mülelai ñi cüpalal quiñe encañngelu. Cam feipicünule ñi hulal quiñe huesa culliñ, ngelai ñi cüpalal quiñe doi cümelu. Huelu cüpalfile cangelu culliñ, ti epu culliñ püntücünulelngeai* ta Chau Dios, tati feipicünulu ñi hulal ca tati inangechi culliñ. 11 Feipicünule ñi hulal quiñe lifngenochi culliñ, tüfa chalintuculelngequelai ta Chau Jehová. Fei yeafi ti culliñ ti sacerdote ñi adquiñ meu. 12 Ti sacerdote ngüneduamafi ñi chumlen* ti culliñ. Fei feipicünuai tunten ñi falin. Ti sacerdote feipiai tunten ñi cullingeal ti culliñ meu. 13 Huelu ti che cüpa huiño ngillafile ti culliñ, tunten ñi falin ti culliñ hudamngeai quechu troquiñ meu, fei ca mülei ñi cullial quiñe.

14 Quiñe huentru hultucufile ñi ruca ñi püntücünulelngeal* ta Chau Jehová, ti sacerdote ngüneduamafi ñi chumlen* ti ruca. Fei feipiai tunten ñi falin. Fente fali pile ti sacerdote, femngechicünungeai. 15 Huelu ti hultuculu ti ruca ayüfule ñi huiño ngillayafiel, tunten ñi falin ti ruca hudamngeai quechu troquiñ meu, fei ca mülei ñi cullial quiñe. Femngechi huiño nietuafui ñi ruca.

16 Quiñe che püntücünulelafui* ta Chau Jehová quiñe troquiñ tañi lelfün. Ñi quimal tunten tañi falin, ngüneduamngeai tunten fün duamfalngei ñi ngan-ngeal ti lelfün, 130 kilo* fün meu cullingeai 570 gramo* plata. 17 Püntücünufile* ti lelfün ti Ayühun Tripantu meu, fente faliai müten. 18 Püntücünungele* ti lelfün deu rupale ti Ayühun Tripantu, ti sacerdote ngüneduamai tunten tripantu mülehuei ñi puhual ti inalechi Ayühun Tripantu. Fei feipicünuai tunten ñi falin ti lelfün, femngechi doi pichin cullingeai. 19 Huelu ti che püntücünufilu* ti lelfün, ayüfule tañi ca huiño ngillayafiel, tunten ñi falin ti lelfün hudamngeai quechu troquiñ mu, fei ca culliai quiñe. Femngechi huiño nietuafui tañi lelfün. 20 Huelu huiño ngillanofile ti lelfün, fei fendelelngele ta cangelu huentru, pepi huiño ngillahuelayafi. 21 Ayühun Tripantu mu ti lelfün elungeai ta Chau Jehová. Yamfalngeai, tati pu sacerdote ngen-ngeaingün.

22 Quiñe che ngillafile quiñe lelfün quisu tañi mapu no fel, fei püntücünulelfile* ta Chau Jehová, 23 ti sacerdote ngüneduamai tunten tripantu mülehuei ñi puhual ti Ayühun Tripantu. Femngechi quimai tunten ñi falin ti lelfün. Feichi antü mu llemai feipiai tunten ñi falin. Tüfa yamfalngei Chau Jehová mu. 24 Ayühun Tripantu mu ti lelfün huiñolelngetuai feiti ngen mapungefulu, tati ngillañmangelu ti lelfün.

25 Com tüfa fanefanetungeai chumngechi ñi fanefanetungequen ti yamfal mülehue mu. Quiñe siclo fanei mari epu gramo.*

26 Chau Jehová ngen-ngei com pu hunenque culliñ meu. Feimu inei no rume feipicünulayafui ñi eluafiel ta Chau Dios. Toro cam ufisangeafui, Chau Jehová deu ngen-ngei. 27 Hultucule quiñe lifngenochi culliñ ca ayüfule tañi huiño ngillayafiel, mülei tañi cullial. Tunten ñi falin ti culliñ hudamngeai quechu troquiñ meu, fei ca culliai quiñe. Huelu huiño ngillangenole, fendelelngeafui ta cangelu che tunten ñi falin mu müten.

28 Quiñe che rumel mu püntücünulelafui* ta Chau Jehová quiñe tañi culliñ, lelfün cam che. Tüfa fendengelayafui ca huiño ngillangelayafui. Feichi culliñ, lelfün cam che rume yamfalngei, Chau Jehová ngen-ngei. 29 Cafei montulngelayafui inei no rume condenangelu tañi layal. Rüfcünu mülei tañi layal.

30 Com ñi hulün ti mapu, tati lelfün ñi hulün ca tati anümca ñi fün, hudamngeai mari troquiñ meu, fei quiñe troquiñ Chau Jehová ngen-ngeai. Com tüfa püntücünulelngeai* ta Chau Jehová. 31 Inei rume cüpa huiño ngillafile feichi troquiñ ñi elufiel ta Chau Dios, tunten ñi falin hudamngeai quechu troquiñ meu, fei ca culliai quiñe. 32 Quiñe che niele mari huaca cam toro, quiñe eluafi ta Chau Jehová. Ca femai niele mari ufisa cam capüra. Petu raquimequele tañi pu culliñ,* fillque rupa raquifile mari, tüfa püntücünulelafi ta Chau Dios. Feitichi culliñ püntücünungealu, yamfalngeai. 33 Ngüneduamngelayai ñi chumlen* ti culliñ ca huelucünungelayai. Huelu cüpalfile cangelu culliñ, ti epu culliñ püntücünulelngeai ta Chau Dios, tati feipicünulu ñi hulal ca tati inangechi culliñ. Cafei pepi huiño ngillangelayai’”.

34 Sinaí huincul mu Chau Jehová elufi tüfachi huercün dungu ta Moisés, femngechi ñi eluafiel tati pu Israel che.