JOSUÉ

1 Deu ñi lan Moisés, Jehová tañi cüdaufe, Chau Jehová dungufi ta Josué,* Nun tañi fotüm, Moisés tañi quelluqueteu.* Feipifi: 2 “Lai Moisés, iñche tañi cüdaufe. Feula pepicaunge, amunge nometu Jordán leufü, eimi ca com pu che. Conpunge ti mapu ñi eluafiel pu Israel che. 3 Chumngechi feipicünufiñ ta Moisés, iñche eluhuayiñ quisuque tamün lof cheu tamün müleal. 4 Com tüfachi mapu eimün ngen-ngeaimün. Cheu ñi mülen ti huellin mapu* puulu ti fütra mahuida Líbano pingelu. Cafei cheu ñi mülen ti fütra leufü, Éufrates pingelu puulu ti Fütra lafquen mu* conantü püle. Cafei com tati pu Het che ñi mapu.* 5 Inei no rume hueulayaimu. Chumngechi quellufiñ ta Moisés, ca femngechi quelluayu. Quisucünulayayu ca elcünulayayu rume. 6 Yafüluucülenge ca nehuen piuquecünuunge. Eimi mai quelluafimi tüfachi pu che ñi llohual ti mapu, chumngechi feipicünufiñ tamün pu cuifiqueche yem.

7 Eimi rume yafüluucülenge ca nehuen piuquecünuunge. Cüme inayafimi com tati ley tami huercüeteu Moisés, iñche tañi cüdaufe. Püntütripalayaimi man püle cam huele püle no rume. Femngechi quimchengeaimi cheu rume miyahulmi. 8 Cafei mülei tami nütramcacheal ñi feipin Moisés ñi ley. Fei antü ca pun meu mülei tami papeltuafiel ca raquiduamtucuafiel.* Femngechi femülmi, cüme inayafimi com tañi huirintucuel, fei cüme tripayai tami femün ca quimchengeaimi. 9 Iñche llemai feipicünueyu tami yafüluucüleal ca tami nehuen piuquengeal, feimu llicalayaimi. Tami Chau Ngünechen Jehová afcadinieimu cheu rume miyahulmi”.

10 Fei hula Josué feipicünufi pu loncolelu ti pu che meu: 11 “Amumün cheu ñi mülen pu Israel che, feipiafimün tüfachi huercün dungu: ‘Pepicamün iyael. Cüla antü rupale amuaimün nometu Jordán leufü, fei conpuaimün ca nüafimün ti mapu tamün elueteu Chau Jehová’”.

12 Cafei Josué dungufi tati pu che Rubén ca Gad tuhun-ngelu ca Manasés tañi rangiñ troquiñche, fei feipifi: 13 “Loncontucuniemün chem tamün feipieteu Moisés, Chau Jehová ñi cüdaufe. Fei feipi: ‘Tamün Chau Ngünechen Jehová elunieimünmeu tüfachi mapu ca cüme felen. 14 Moisés elueimünmeu tüfachi mapu tripahue antü püle Jordán leufü mu, feimu tamün pu domo, tamün pu yall ca tamün pu culliñ mülenagcüleai tüfa mu. Huelu com eimün, pu nehuen-ngechi hueichafe* pepicaucülemün tamün hueichayal, fei notuaimün ti leufü pu Israel che ñi adquiñ mu. Eimün quelluafimün engün 15 puule hula Jehová ñi eluaeteu cüme felen tamün pu peñi ca lamngen, chumngechi elueimünmeu ta eimün. Fei engün nüafi ti mapu Chau Jehová ñi feipicünueteu. Fei hula eimün huiñotuaimün quisuque tamün elungeelchi mapu, fei cüdahuaimün ca mülenagcüleaimün fei mu. Moisés, Chau Jehová ñi cüdaufe elueimünmeu feichi mapu tripahue antü püle Jordán leufü mu’”.

16 Fei engün feipifingün ta Josué: “Femaiñ com tami feipimufiel ca amuaiñ cheu rume tami huercümufiel. 17 Chumngechi allcütufiyiñ ta Moisés ca femngechi allcütuhuayiñ ta eimi. Doyelchi mai tami Chau Ngünechen Jehová mülepe eimi mu, chumngechi mülefui Moisés engu. 18 Chem huentru rume caiñetufile ca feyentunofile com tami huercüfiel, mülei ñi layal. Feimu yafüluucülenge ca nehuen piuquecünuunge”.

2 Mülelu Sitim mapu mu, Josué, Nun tañi fotüm huercüi epu huentru ñi ngüneduamafiel ti mapu. Feipifi: “Amumu ñi ngüneduamafiel ti mapu, doyelchi mai Jericó huaria”. Ti epu huentru amuingu, fei puhuingu quiñe cüri domo ñi ruca mu,* Rahab pingelu. Fei üyeu mülenagpuingu. 2 Tati lonco ülmen Jericó huaria mu mülelu quimelelngei: “Tüfachi pun, quiñeque Israel huentru acuingün ñi ngüneduamafiel ti mapu”. 3 Allcülu tüfa, Jericó ñi lonco ülmen feipifalfi ta Rahab: “Entufinge ti pu huentru mülepalu tami ruca mu. Cüpaingün ñi ngüneduamafiel com chi mapu”.

4 Huelu ti domo ellcafi ti epu huentru.* Fei feipi: “Mai, pepaeneu ti epu huentru. Huelu iñche quimlan cheu ñi tuhun. 5 Fei dumiñnaglu, petu ñi cerrangenon ti huaria ñi puerta pu huentru tripaingu. Quimlan cheu ñi amutun engu. Huelu matu amulmün, dintucuafuimün”. 6 (Huelu Rahab yefi ti epu huentru huente ruca mu, fei ellcafi cheu ñi mülen huifcülechi lino anümca). 7 Feimu feichi pu huentru inantucufi ti epu huentru Jordán leufü püle ngilahue mu. Tripalu müten pu inantucuchequelu, cerrangei ti huaria ñi puerta.

8 Petu ñi umautunon ti epu huentru ngüneduamfilu ti mapu, Rahab pürai cheu ñi mülen engu. 9 Feipifi: “Iñche quimnien Chau Jehová eluaimünmeu tüfachi mapu. Eimün tamün duam mu, iñchiñ rume llicalequeiñ. Com pu che mülelu tüfachi mapu mu, müllmüllcüleingün eimün tamün duam mu. 10 Iñchiñ allcüiñ tripatulu eimün Egipto mapu mu, eimün tamün adquiñ mu, Chau Jehová arcümfi ti co* Quelü lafquen. Cafei allcüiñ tamün chumfiel pu amorreo ñi epu lonco ülmen, Sehón ca Og pingelu. Eimün langümfimün* nometu Jordán leufü.* 11 Allcülu iñchiñ, rume llicaiñ.* Inei no rume pilai tamün hueichayaeteu.* Tamün Chau Ngünechen Jehová rume pepiluhun-ngei huenu ca nag mapu mu. 12 Iñche pengeleluhuiyiñ piuqueyen,* feimu feula füreneen, Jehová ñi üi mu feipicünumuchi* tamün ca femngechi piuqueyeafiel* tañi chau ñi pu che. Cafei pengelelmuchi ñi femtripayal tamu feipicünun. 13 Mülei tamün montulafiel tañi chau, tañi ñuque, tañi pu lamngen ca com tañi pu che engün. Montulmuiñ taiñ lanoal”.*

14 Fei pu huentru feipieyu: “¡Hultucuayu tayu mongen eimün tamün duam mu! Entudungunolmün chumngelu tayu cüpan,* pengeleluhuayiñ piuqueyen* ca raquiduamtucunieayu tayu feipin elueliyiñmu Chau Jehová tüfachi mapu”. 15 Jericó huaria mu mülerquefui quiñe fütra cura malal, tüfa mu quiñe ad püle huechuñ mu mülerquei Rahab ñi ruca, feimu Rahab feipifi ti epu huentru ventana püle ñi nagal llasu meu. 16 Ca feipifi: “Amumu mahuidantu mapu püle, fei tiye mu cüla antü ellcahuaimu, femngechi tamu inantucuyahuleteu dintuculayaimu. Fei huiñotule engün, eimu trecacünuhuaimu”.

17 Ti epu huentru feipieyu: “Eimi feipimuiñ ñi eldungucünual, huelu femürpuaiñ tüfachi dungu 18 traricünufilmi tüfachi quelü huilüf llasu ventana mu, cheu tayu nagal iñchiu. Femngechi femaimi conpaliyiñ tüfachi mapu mu. Tami ruca mu trahulafimi tami chau ca com tañi pu che, cafei tami ñuque ca tami pu lamngen. 19 Huelu quiñe tami pu che trecatripale tami ruca mu, quisu tañi duam mu layai, iñchiñ culpaconlayaiñ tañi lan. Huelu huesa rupale quiñeque che mülelu eimi engün tami ruca mu, iñchiñ culpaconaiñ tañi lan mu. 20 Huelu nütramcalmi chemu tayu cüpan, iñchiñ culpaconlayaiñ tüfachi dungu mu tami feipicünufiel”.* 21 Rahab feipi: “Felepe chumngechi tamu feipin”.

Fei hula peucayal pifi tati epu huentru ca trecacünuhuingu. Fei hula Rahab trarifi ti quelü huilüf llasu ventana mu. 22 Tati epu huentru amutuingu mahuidantu mapu püle, fei mülenagpuingu cüla antü huiñotulu hula tañi pu inantucueteu. Tüfa engün fillque rüpü püle quintuyahulfeyu, huelu pelaeyu engün. 23 Fei hula ti epu huentru nagingu mahuidantu mapu püle ca notuingu ti leufü mu. Fei engu pemefi ta Josué, Nun tañi fotüm, ca nütramcalelfingu com tañi rupan engu. 24 Feipifingu ta Josué: “Chau Jehová elueiñmu com tüfachi mapu. Iñchiñ taiñ duam mu com pu che üyeu mülelu müllmüllcüleingün fente tañi llican”.

3 Pulihuen huitrai Josué. Fei ca com pu Israel che* elcünuingün Sitim mapu, fei puhuingün Jordán leufü mu. Üyeu umañpuingün petu ñi nopunon ti leufü.

2 Cüla antü rupalu, pu loncolelu ti pu che mu rupaingün cheu ñi mülen pu Israel che ñi tolto ruca.* 3 Ca feipifingün pu che: “Pu sacerdote Leví tuhun-ngelu yeafi ti falin caja pengelquelu Chau Jehová ñi eldungu. Eimün pefilmün müten, amutumün cheu tamün mülen, fei inayafimün. 4 Huelu doi 900 metro püle* pülleconlayaimün, doi fülconpulayaimün, femngechi quimaimün chem rüpü inayal. Eimün turpu miyauquelafuimün feichi rüpü mu”.

5 Fei hula Josué feipifi tati pu che: “Hule Chau Jehová femai fütraque afmatun dungu eimün tamün duam mu, feimu pepicaucülemün”.*

6 Cafei Josué feipifi tati pu sacerdote: “Huitrañpüramafimün ti falin caja pengelquelu Chau Dios ñi eldungu, fei hune amuleaimün tati pu che meu”. Feimu pu sacerdote huitrañpüramfingün ti falin caja pengelquelu Chau Dios ñi eldungu, fei hune amuleingün tati pu che meu.

7 Fei hula Chau Jehová feipifi ta Josué: “Iñche pengelcünuan tami quellufiel, chumngechi quellufiñ ta Moisés. Feimu fachantü ca cüpalechi antü mu tati pu Israel che eluhuaingün tami yamnieaeteu.* 8 Tüfachi dungu feipiafimi pu sacerdote yenielu ti falin caja pengelquelu Chau Dios ñi eldungu: ‘Puhulmün inaltu Jordán leufü, conpuaimün, fei huitracünuhuaimün leufü mu’”.

9 Fei Josué feipifi tati pu Israel che: “Allcütupamün tamün Chau Ngünechen Jehová ñi dungu”. 10 Ca feipi Josué: “Femngechi quimaimün ñi mülen quiñe mongelechi Ngünechen rangiñ eimün meu. Rüfcünu, eimün tamün adquiñ meu Chau Ngünechen huemünentuafi* pu Canaán che, pu Het che,* pu heveo che, pu perizita che, pu guirgaseo che, pu amorreo che ca pu jebuseo che. 11 ¡Ngüneduamaimün! Tati Ñidolcülelu ngüneniei com ti mapu, fei tañi falin caja pengelquelu tañi eldungu conpuai Jordán leufü eimün tamün adquiñ mu. 12 Feula dulliaimün mari epu huentru Israel troquiñche mu, caque quisuque troquiñche dulliaimün quiñe huentru. 13 Pu sacerdote yenieai ti falin caja ñi nieel Chau Jehová, tati Ñidolcülelu com mapu mu. Pu sacerdote pünoconle müten ñi namun Jordán leufü nagcülepalu, catrüfemai ti co, fei ngülümuhuai”.*

14 Fei pu che tripatui cheu tañi mülen engün. Petu tañi nopunon Jordán leufü mu, fei pu sacerdote hune amulerquei tati pu che meu ca yenierquei ti falin caja pengelquelu Chau Dios ñi eldungu. 15 Mülen mu ti antü ñi cosechangeal, ti Jordán leufü mangiñtripaquefui. Pu sacerdote yenielu ti falin caja puhuingün Jordán leufü mu. Pünoconlu müten ñi namun inaltu leufü, 16 catrüfemi ti co nagcülepalu. Fei Adán huaria püllelelu Zaretán huaria mu, ngülümi ti co.* Fei camapulei pu Israel che mu. Cafei arcüi ti co* nagcülepalu Cotrü lafquen pingelu* mülelu Arabá mapu mu. Catrüfemi ti co, fei Jericó huaria itrotripa püle, pu Israel che trecalen noingün. 17 Fei pu sacerdote huitracünuhuingün rangiñ ancülechi Jordán leufü, fei engün yenierquei ti falin caja pengelquelu Chau Jehová ñi eldungu. Femngechi com pu Israel che noingün ti Jordán leufü ancülechi mapu mu.

4 Pu Israel che deu nopulu ti Jordán leufü, Jehová feipifi ta Josué: 2 “Dulliaimün mari epu huentru pu Israel che meu. Quiñe huentru caque quisuque tañi troquiñche mu. 3 Ca feipiafimün tüfachi dungu: ‘Ñimituaimün* mari epu cura rangiñ ti Jordán leufü mu, cheu ñi huitralen pu sacerdote. Yeafimün ti cura ca tucuafimün cheu tamün umañal’”.

4 Fei Josué mütrümfi* ti mari epu huentru ñi dulliel pu Israel che mu. Quiñe huentru caque quisuque tañi troquiñche mu. 5 Fei Josué feipifi: “Amumün rangiñ Jordán leufü mu, itrotripa rupamün cheu ñi mülen Chau Ngünechen Jehová ñi falin caja. Quisuque engün meñcu pürampe quiñe cura tunten troquiñchengen pu Israel che. 6 Tüfachi cura mu quimngeai chem ñi femün ta Chau Dios. Rupachi antü mu, tamün pu yall ramtuelmu: ‘¿Chumngelu* mülei fau tüfachi cura?’, 7 eimün mülei tamün feipiafiel: ‘Ti Jordán leufü catrütungei rupalu ti falin caja pengelquelu Chau Jehová ñi eldungu. Ti falin caja rulmengelu Jordán leufü mu, ti co catrütungei. Tüfachi cura mu, pu Israel che rumel acordanieafi engün* chem ñi rupan’”.

8 Fei pu Israel che rüf femingün chem ñi huercüeteu ta Josué. Fei ñimituingün mari epu cura rangiñ Jordán leufü, chumngechi Jehová feipifi ta Josué. Quiñe cura quisuque caque Israel troquiñche mu. Yefingün ti cura cheu tañi umayal engün ca tucufingün üyeu.

9 Fei Josué ca tucui mari epu cura rangiñ Jordán leufü mu, cheu ñi huitralen pu sacerdote yenielu ti falin caja pengelquelu Chau Ngünechen ñi eldungu. Famülque mu, petu müleyei ti cura üyeu.

10 Pu sacerdote yenielu ti falin caja huitracünuhuingün rangiñ Jordán leufü mu. Femngechi femingün femtripalu hula com ñi feipifiel Chau Jehová tati pu che, chumngechi feipingei ta Josué. Ca femngechi femtripai chumngechi Moisés huercüfi ta Josué. Fei tati pu che matu nopuingün ti leufü. 11 Deu nopulu com tati pu che, Chau Jehová ñi falin caja ca tati pu sacerdote rupaingün tati pu che ñi adquiñ meu. 12 Cafei rupaingün tati pu che Rubén ca Gad tuhun-ngelu ca Manasés ñi rangiñ troquiñche. Rupalu engün com pu Israel che ñi adquiñ mu, pengelingün ñi pepicaucülen tañi hueichayal.* Femingün chumngechi tañi feipieteu Moisés. 13 Chau Jehová ñi adquiñ mu 40.000 soltau peno yenieingün tañi hueichahue. Fei engün amuingün laf mapu püle Jericó ñi huellin mapu mu.*

14 Feichi antü Chau Jehová cüme pengeli ñi quelluquefiel ta Josué com pu Israel che ñi adquiñ mu. Tunte puulu ñi mongen Josué, pu Israel che rume yamnieyu,* chumngechi ñi rume yamquefiel ta Moisés.

15 Fei hula Chau Jehová feipifi ta Josué: 16 “Pu sacerdote yeniei ti falin caja nielu Chau Dios ñi ley. Feipiafimi engün tañi tripatual Jordán leufü mu”. 17 Feimu Josué feipifi tati pu sacerdote: “Tripatumün ti Jordán leufü mu”. 18 Pu sacerdote yenieingün ti falin caja pengelquelu Chau Jehová ñi eldungu. Fei engün tripatulu müten rangiñ Jordán leufü ca tañi namun pünoconlu müten ti anquen mapu, ca huiño hutrutui* ti Jordán leufü ca huiño mangiñcületui.

19 Feiti 10 antü hunen cüyen mu tati pu che nopuingün ti Jordán leufü mu, fei anümingün ñi tolto ruca* Guilgal huaria mu, tripahue antü püle cheu fentepuhui Jericó huaria.

20 Cafei Guilgal huaria mu, Josué tucufi ti mari epu cura entungelu Jordán leufü mu. 21 Ca feipifi pu Israel che: “Fei cüpalechi antü mu, tamün pu yall ramtuelmünmeu ‘¿Chem cüpa feipi tüfachi cura?’, 22 eimün mülei tamün quimelelafiel tamün pu yall, ‘Pu Israel che nopui ti Jordán leufü ancülechi mapu mu. 23 Feichi mu tamün Chau Dios Jehová arcümfi* ti Jordán leufü quisu engün ñi adquiñ mu, femngechi rumei engün. Ca femngechi femi tamün Chau Dios Jehová, fei arcümfi ti Quelü lafquen iñchiñ taiñ adquiñ mu, fei taiñ nopual. 24 ¿Chumngelu* femi tüfa? Com mapu müleyechi troquiñche ñi quimal Chau Jehová rume pepiluhun-ngei. Cafei eimün tamün rumel püramyenieafiel* tamün Chau Jehová’”.

5 Com pu amorreo ñi lonco ülmen mülerquei conantü püle* Jordán leufü mu, ca inaltu lafquen mu mülerquei com pu Canaán ñi lonco ülmen. Tüfa engün allcüingün Chau Jehová ñi arcümfiel* ti Jordán leufü pu Israel che ñi adquiñ mu nopulu hula engün. Feica müten llicafemingün* ca yafüngehuelai engün* pu Israel che ñi duam mu.

2 Feichi mu Chau Jehová feipifi ta Josué: “Deumange cura cuchillo ñi circuncidayal* pu Israel huentru”. 3 Feimu Josué deumai cura cuchillo, fei circuncidafi pu Israel huentru Guibeat-Haaralot mapu mu. 4 Josué circuncidafi engün tüfachi dungu mu: com pu Israel huentru, tüfa com pu hueichafe* tripalu Egipto mapu mu, com laingün amulelu engün huellin mapu mu,* deu tripatulu engün Egipto mapu mu. 5 Com pu huentru tripatulu Egipto mapu mu circuncidangei engün. Huelu pu huentru choyüngelu petu ñi amulen huellin mapu mu, deu elcünulu engün Egipto mapu mu, quiñe no rume circuncidangelai. 6 Pu Israel che 40 tripantu miyahuingün huellin mapu mu lalu hula com ti troquiñche, fei tüfa tati pu hueichafe tripatulu Egipto mapu mu. Fei engün allcütulafingün Chau Jehová ñi feipin. Feimu Chau Jehová feipicünueyu engün* turpu ñi penoal ti mapu cheu ñi mülen fentren lichi ca miel.* Chau Jehová feipicünufi taiñ pu cuifiqueche taiñ eluaeteu feichi mapu. 7 Chau Dios famentufi feichi pu huentru, fei cüpalfi tañi pu yall engün tüfachi mapu mu. Fei engün petu amulelu rüpü meu circuncidangelai, feimu Josué circuncidaeyu engün.

8 Circuncidangelu hula com pu huentru, pu Israel che mülenagingün cheu ñi mülen tañi tolto ruca,* femngechi ñi tremotual* pu huentru.

9 Fei hula Chau Jehová feipifi ta Josué: “Tañi femün fachantü catrütufiñ* pu Egipto che, fei illamcangelayaimün”. Feimu fantepu mu Guilgal* feipingequei feichi huaria.

10 Pu Israel che amulei ñi mülenagcülen Guilgal huaria mu, tüfa mülerquefui Jericó ñi huellin mapu laf mapu püle. Fei nagantülu ti 14 antü cüyen mu, femingün ti Pascua. 11 Rupalu ti Pascua antü, feichi antü müten eluhuingün ñi iyafiel chem ñi hulqueel ti mapu: fayümngenochi cofque ca fün cotün. 12 Cafei feichi antü ifilu engün chem ñi hulqueel ti mapu, ngehuelai mana. Pu Israel che nienolu rume ti mana, eluhuingün ñi iyafiel chem ñi hulqueel Canaán mapu feichi tripantu.

13 Feichi püllelelu Josué Jericó huaria mu, lelipürai, fei pefi quiñe huentru huitralelu quisu tañi adquiñ mu. Feichi huentru nüniei quiñe fütra cuchillo. Josué fülcontufi,* fei ramtufi: “Eimi, ¿quellumupaiñ cam quellupafimi taiñ pu caiñe?”. 14 Ti huentru huiñoldungui:* “Iñche loncolen Chau Jehová ñi pu hueichafe mu, feimu mülepan tüfa meu”. Allcülu Josué pochongnagi* fente tañi yamniefiel,* fei feipifi: “Tañi ñidol, iñche eimi tami cüdaufengen, ¿chem dungu feipipaen?”. 15 Tati loncolelu Chau Jehová ñi pu hueichafe mu huiñoldungufi ta Josué:* “Nentunge tami ocota, tüfachi mapu cheu pünoleimi huichucünulelngei ta Chau Dios”. Feimeu müten Josué femi tañi feipingeel.

6 Jericó ñi puerta cüme cerrangei pu Israel che ñi duam mu. Inei no rume tripaquelafui ca conquelafui.

2 Feimu Jehová feipifi ta Josué: “Iñche hulcünueyu Jericó huaria, tañi lonco ülmen ca tañi fütraque hueichafe. 3 Com eimün pu hueichafe, amulemün, hualloñmayafimün ti huaria quiñe rupa müten antü meu. Femngechi femaimün cayu antü. 4 Regle sacerdote huneleaingün ti falin caja mu. Caque quisuque engün yeniepe quiñe cullcull.* Huelu puule ti regle antü, regle rupa amuleaimün, hualloñmayafimün ti huaria, fei tati pu sacerdote dungulafingün tañi cullcull. 5 Fei dungulfilmün ti cullcull, fei allcülmün ñi cullculltun, com pu che mülei ñi nehuentu huiraral ñi cüpalen ti hueichan.* Fei hula ti huaria ñi fütra cura malal teifücahuai. Fei quisuque pu che, cheu tañi mülen engün, mülei ñi conpual huaria mu”.

6 Fei Josué, Nun ñi fotüm, trahulfi pu sacerdote, fei feipifi: “Huitrañpüramfimün ti falin caja pengelquelu Chau Dios ñi eldungu. Fei regle sacerdote hune amulepe engün Chau Jehová ñi falin caja mu, ca yeniepe regle cullcull”. 7 Fei hula feipifi tati pu che: “Amumün, fei hualloñmayafimün ti huaria. Pu soltau nielu hueichahue hune amulepe Chau Jehová ñi falin caja mu”. 8 Fei ti pu regle sacerdote yenielu regle cullcull huneleingün Jehová ñi adquiñ mu. Fei amuingün, dungulfingün ti cullcull. Fei inanieyu ti falin caja pengelquelu Chau Jehová ñi eldungu. Femngechi femingün chumngechi Josué feipifi ti pu che. 9 Pu soltau yenielu ti hueichahue hunelei pu sacerdote mu, fei engün dungulniefi ti cullcull. Fei caquelu soltau inalei tati falin caja petu ñi cullculltun pu sacerdote.

10 Huelu Josué feipifi tati pu che: “Huirarlayaimün ca dungulayaimün. Ñücüfcüleaimün puule hula chi antü, iñche feipihuayiñ ‘¡Huirarmün!’, fei hula huiraraimün”. 11 Fei Josué huercüi ñi hualloñmangeal ti huaria Jehová ñi falin caja mu, fei quiñe rupa hualloñmangei. Fei hula huiñotuingün cheu ñi mülen tañi tolto ruca.* Üyeu umautuingün.

12 Ca antü pulihuen huitrai Josué, fei pu sacerdote huitrañpüramfingün Jehová ñi falin caja. 13 Fei pu regle sacerdote huneleingün Jehová ñi falin caja mu, fei engün yenieingün regle cullcull, af dungulafingün. Pu soltau yenielu tañi hueichahue huneleingün quisu engün meu. Fei caquelu pu hueichafe inaleingün Jehová ñi falin caja meu, petu ñi cullculltulen pu sacerdote. 14 Fei ca antü com engün hualloñmafi ti huaria quiñe rupa müten. Fei hula huiñotuingün cheu ñi mülen tañi tolto ruca. Cayu antü femngechi femingün.

15 Puulu chi regle antü pulihuen huitraingün hunlu müten. Fei amuleingün ñi hualloñmafiel ti huaria. Regle rupa femngechi femingün. Feichi antü meu müten, regle rupa amuleingün, hualloñmafingün ti huaria. 16 Regle rupa hualloñmafilu ti huaria, ti pu sacerdote dungulingün ti cullcull. Fei Josué feipifi tati pu che: “¡Huirarmün, Chau Jehová elueimünmeu tüfachi huaria! 17 Ti huaria ca itrofill mülelu mülei ñi apümcangeal. Com tüfa Chau Jehová ngen-ngei. Ti cüri domo* Rahab mülei ñi mongeleal, quisu ellcafi* ti pu huentru ñi huercüel, feimu quisu ca com tañi pu che mülelu tañi ruca mu mülei ñi montual. 18 Huelu püntülemün* com tati felelu ñi apümcangeal. Femngechi tamün illutunoafiel tati felelu ñi apümcangeal, fei tamün ngen-ngenoal. Chem no rume femlayaimün, femngechi cheu ñi mülen pu Israel che ñi tolto ruca inaye conlayaimün tati felelu ñi apümcangeal, tamün connoal huesaque dungu mu. 19 Huelu com tati plata, ti oro* ca fillque fillem cobre ca pañillhuengelu* huichulelngei ta Jehová, fei trapümafimün tati falinque fillem mülelu Chau Jehová ñi ruca mu”.

20 Fei dungulfilu ñi cullcull engün, com pu che huiraringün. Fei com tati pu che allcüi ñi cullculltun, fei nehuentu huiraringün ñi cüpalen ti hueichan. Fei tati fütra cura malal teifücahui. Fei rupalu tüfa, com pu che cheu tañi mülen engün, conpuingün ca nüfingün ti huaria. 21 Fei apümcafingün com pu mülelu huaria mu, fei com langümfingün fütra cuchillo mu: pu huentru, pu domo, pu huechequeche ca pu fütaqueche. Ca langümfingün pu toro, pu ufisa ca pu burro.

22 Ti epu huentru ngüneduamfilu feichi mapu, Josué feipifi engu: “Conpumu ti cüri domo ñi ruca mu, fei entumefimu ca com tati pu che mülelu tañi ruca mu, chumngechi tamu feipicünufiel”.* 23 Fei feichi epu hueche amuingu, entumefingu ta Rahab ca tañi chau, tañi ñuque, tañi pu lamngen ca com tañi pu che. Femngechi rupai, entufingu com tañi pu familia. Fei huecuntu yefingu cheu ñi mülen pu Israel che ñi tolto ruca.

24 Fei hula lüpümfingün com chi huaria ca com mülelu üye mu. Huelu ti plata, ti oro ca fillque fillem cobre ca pañillhuengelu, com tüfa trapümfingün tati falinque fillem mülelu Chau Jehová ñi ruca mu. 25 Josué montulfi ti cüri domo Rahab ca tañi chau ñi pu che. Rahab ellcafi epu huentru Josué ñi huercüel tañi ngüneduamafiel Jericó mapu, feimu fantepu mu tüfachi domo mongelerpui Israel mapu mu.*

26 Feichi antü Josué eldungucünui tüfa:* “Jehová ñi adquiñ mu malisiangeai tüfachi huentru huiño deumatufile Jericó huaria. Feiti che huiño anümfile ti huaria, layai tañi hunen fotüm, ca deumafile ti puerta, ca layai tañi inan fotüm”.

27 Femngechi Jehová quellufi ta Josué. Feimu tüfachi dungu quimngerpui com mapu püle.

7 Pu Israel che feipingefui ñi apümcangeal quiñeque chemcün, huelu fei engün femlaingün chem tañi feipieteu Chau Dios. Quiñe huentru Acán pingelu, Judá troquiñche tuhun-ngelu, hueñei quiñeque chemcün. Acán chauyefi ta Carmí, Zabdí pingefui ñi lacu, Zérah ñi pu che mu tuhui. Acán ñi huesa femün mu, Jehová rume illcutufi pu Israel che.*

2 Petu mülelu Jericó huaria mu, Josué huercüfi quiñeque huentru ñi amual Hai huaria mu. Tüfachi huaria püllelei Bet-Aven huaria, tripahue antü püle Betel huaria mu. Josué feipifi ti pu huentru: “Huechuaimün, fei ngüneduamafimün ti mapu”. Feimu pu huentru huechuingün, fei ngüneduamfingün Hai huaria. 3 Huiñotulu feipipafingün ta Josué: “Duamfalngelai ñi huechual com pu che, 2.000 cam 3.000 huentru müten duamfali ñi huehuafiel Hai huaria. Pichin che müten mülei, feimu feipilayafimi com pu che ñi amual üyeu, re ngünam cansayaingün”.

4 Feimu huechuingün 3.000 huentru, huelu lefmahuingün tati pu Hai huentru ñi duam mu. 5 Tati pu Hai huentru langümfingün 36 huentru. Tati huaria ñi puerta mu inantucufingün pu Israel che puulu engün Sebarim lof mu.* Petu naglu engün rüpü meu hueufingün pu Israel che. Feimu fente tañi llicalen pu Israel che, nehuen-ngehuelafui tañi piuque engün.*

6 Pefilu tüfa Josué huichafcai tañi tacun,* fei pochongnagi mapu meu* itrotripa Chau Jehová ñi falin caja. Femngechi femi nagantülu hula, ca compañnieyu Israel ñi pu loncolelu. Fentecünulaingün ñi trufürtufiel tañi lonco. 7 Josué feipi: “¡Doi Fütra Ñidol Jehová! ¿Chumngelu* cüpalmuiñ com tüfachi rüpü meu? ¿Chemu femcünuimi taiñ rumeal Jordán leufü püle? ¿Taiñ hultucuaeteu pu amorreo che? ¿Taiñ langümaeteu engün? ¿Doi cümepeafui mai taiñ mülenagcüleal nometu Jordán leufü mu?* 8 Füreneen, Chau Jehová. Pu Israel che lefmahui tañi pu caiñe mu, fei ¿chem piafun iñche? 9 Pu Canaán che ca com pu troquiñche mülelu tüfachi mapu mu quimai chem ñi rupan, fei caiñetuaiñmu ca langümaiñmu. Inei no rume acordahuetulayai taiñ üi.* Eimi, ¿chumafuimi cai tami fütra üi mu?”.

10 Chau Jehová huiñoldungufi ta Josué:* “¡Huitrapürange! ¿Chumngelu* pochongnagcüleimi mapu meu? 11 Pu Israel che culpaingün.* Fei engün inalaingün tañi eldungu ñi feipifiel. Ngen-ngetuingün quiñeque chemcün felelu ñi apümcangeal. Hueñeingün ca ellcacünufingün* cheu ñi mülen tañi nieelchi fillem. 12 Feimu pu Israel che hueulayafingün tañi pu caiñe, doi mai lefmahuaingün fei engün meu. Quisu tañi duam mu condenahuingün tañi layal. Feimu mülei tamün apümcayafiel feitichi che condenangelu tañi layal.* Femnolmün, mülehuelayan eimün meu. 13 ¡Huitrapürange! Fei ñi pepicaucüleal pu che,* feipiafimi engün: ‘Pepicahuaimün ñi chem rupayal hule.* Tüfa ñi feipin Chau Jehová, pu Israel che ñi Ngünechen: “Pu Israel che, eimün meu mülei quiñe huentru condenangelu tañi layal.* Mülei tamün apümcayafiel feichi huentru. Femnolmün, hueulayafimün tamün pu caiñe. 14 Pulihuen, caque quisuque troquiñche cüpape Chau Dios ñi adquiñ mu. Feichi troquiñche Chau Jehová ñi dullifiel fülconpape* caque quisuque ñi familia engün. Feichi familia Chau Jehová ñi dullifiel fülconpape caque quisuque ñi ruca che engün. Ca feichi ruca Chau Jehová ñi dullifiel fülconpape caque quisuque pu huentru. 15 Feichi huentru nielu ti chemcün felelu ñi apümcangeal, lüpümngeai cütral mu. Femngechi femngeai quisu ca com tañi ngen-ngeel. Fei inalai Chau Jehová ñi eldungu. Yehuentucufali tañi femün pu Israel che ñi adquiñ mu”’”.

16 Ca antü Josué pulihuentu huitrai. Fei feipifi pu Israel che ñi fülconpayal caque quisuque pu troquiñche. Fei dullingei Judá troquiñche. 17 Fei hula feipi ñi fülconpayal pu familia Judá tuhun-ngelu, fei dullingei ti familia Zérah tuhun-ngelu. Ca feipi ñi fülconpayal ti familia Zérah tuhun-ngelu, caque quisuque pu huentru, fei dullingei quiñe huentru Zabdí pingelu. 18 Fei hula feipi ñi fülconpayal caque quisuque pu huentru Zabdí ñi ruca mu, fei dullingei ta Acán, Carmí ñi fotüm. Zabdí pingei tañi lacu, Zérah ñi pu che mu tuhui, Judá troquiñche mu. 19 Feimu Josué feipifi ta Acán: “Tañi saquin fotüm, füreneen, yamafimi* ta Chau Jehová, pu Israel che ñi Ngünechen. Quisu tañi adquiñ mu entudungunge. Füreneen, feipien tami chumün. Ellcalayaen”.

20 Acán feipifi ta Josué: “Feingei tati, iñche culpan* Chau Jehová ñi adquiñ mu, pu Israel che ñi Ngünechen. Tüfa tañi femün iñche: 21 com feichi dungu taiñ hueufiel, iñche pefiñ quiñe rume falichi tacun, Sinar mapu mu deumangei, rume adi. Cafei pefiñ plata epu kilo fanelu* ca oro* rangiñ kilo fanelu.* Iñche rume illufiñ, fei yetufiñ. Feula ponhuitu tañi tolto ruca mu mülei,* pülli meu ellcalei. Ca doi miñche püle mülei ti plata ca ti oro”.

22 Feimeu müten Josué huercüfi quiñeque huentru. Fei engün lefcülen amuingün feichi tolto ruca mu. Üyeu ellcalerquei ti tacun, ca miñche püle mülerquei ti plata ca oro. 23 Tati pu huerquen entufingün ti chemcün mülelu tolto ruca mu, fei yelelfingün ta Josué ca com pu Israel che, ca elcünufingün Chau Jehová ñi adquiñ mu. 24 Josué ca com pu Israel che yefingün ta Acán, Zérah tañi fotüm, Acor pingechi laf mapu. Cafei yefingün ti plata, ti rume falichi tacun, ti oro, tañi pu fotüm, tañi pu ñahue, tañi toro, tañi burro, tañi quechan culliñ, tañi tolto ruca ca com tañi nieel. 25 Josué feipi: “¿Chumngelu* eimi rume huesalcamuiñ?* Fachantü Chau Jehová huesalcayaimu ta eimi”. Fei hula com pu Israel che curatufingün ta Acán ca com tañi nieel, fei lüpümfingün cütral mu. 26 Üyeu huircocünulelfingün* cura Acán ñi la cuerpo,* petu mülehuei fantepu mu. Rupalu tüfa, tüngnagi Chau Jehová ñi fütra illcun.* Feimu fantepu mu amulei ñi feipingequen Acor pingechi laf mapu.*

8 Fei hula Chau Jehová feipifi ta Josué: “Llicalayaimi ca pellquelayaimi rume. Yeafimi com pu hueichafe, fei hueichayafimi Hai huaria.* Iñche deu hultuculeyu Hai ñi lonco ülmen, tañi pu che, tañi huaria ca tañi mapu. 2 Chumngechi tami femfiel Jericó huaria ca tañi lonco ülmen, ca femngechi femafimi ta Hai huaria ca tañi lonco ülmen. Huelu feula ngen-ngetuaimün tamün huehuel ca pu culliñ. Furitu huaria püle pepicahuaimün, fei lloftuafimün”.*

3 Feimu Josué ca com pu hueichafe amuingün ñi hueichayafiel Hai huaria. Josué dullifi 30.000 nehuen-ngechi hueichafe, fei pun huercüfi. 4 Ca feipifi engün: “Furitu huaria püle pepicahuaimün, fei lloftuafimün. Nehue püntütripalayaimün ti huaria mu.* Fei com pepicaucüleaimün. 5 Iñche ca com tati pu che tañi compañnieteu fülconpuaiñ ti huaria mu.* Chumngechi ñi rupan nehue chumül, fei engün lefcontuaiñmu ca iñchiñ lefmahuaiñ. 6 Tripale engün taiñ chaftuaeteu, püntütripayaingün ti huaria.* Fei feipiaingün: ‘Iñchiñ taiñ duam mu, lefmahuingün nehue chumül reque’ piaingün. Fei lefmahuaiñ. 7 Fei hula eimün tripayaimün cheu tamün lloftulen ca nüafimün ti huaria. Tamün Chau Dios Jehová eluaimünmeu. 8 Deu tamün nüfiel ti huaria, cütraltuafimün. Mülei tamün inayal com ñi feipin Chau Jehová. Tüfachi dungu feipihuiyiñ eimün”.

9 Fei Josué huercüfi tati pu hueichafe, fei amuingün cheu tañi lloftuafiel. Mülenagpuingün tripahue antü püle Hai huaria mu ca tañi conantü püle mülerquei Betel huaria. Huelu Josué rulpapuni ti mülehuechi pu hueichafe engün.

10 Fei ca antü, Josué pulihuentu huitrai. Trahulfi pu hueichafe. Fei ca Israel ñi pu loncolelu adniefi pu hueichafe ñi amual Hai huaria mu. 11 Com pu hueichafe mülelu Josué engün püraingün. Itrotripa huaria mu mülenagingün. Picun püle* Hai huaria mu anümingün tañi tolto ruca.* Ti laf mapu hudamentunieyu engün Hai huaria mu. 12 Fei Josué pepicacünufi 5.000 huentru ñi lloftumeal. Tripahue antü püle mülerqueingün, rangiñ püle cheu ñi mülen Betel ca Hai huaria. 13 Huelu epe com pu hueichafe feipingeingün ñi tucual tañi tolto ruca picun püle ti huaria mu. Ca tati pu hueichafe lloftumefilu ti huaria conantü püle mülerqueingün, feichi pun Josué puhui rangiñ laf mapu mu.

14 Hai ñi lonco ülmen pefi tüfa, fei ca com pu huentru feichi huaria mu mülelu matu amuingün. Fei pulihuen tripaingün tañi hueichameafiel pu Israel che laf mapu püle huellin mapu mu.* Huelu tati lonco ülmen quimlai ñi lloftumequengen furitu huaria mu. 15 Pu Hai huentru lefcontufingün ta Josué ca com pu Israel che. Com engün lefmahuingün, fei inafingün ti rüpü puuquelu huellin mapu mu. 16 Cafei feipingei com pu huaria che ñi inantucuafiel pu Israel che, huelu tañi inantucufiel ta Josué püntütripaingün ti huaria mu.* 17 Itrocom pu huentru mülelu Hai ca Betel huaria tripaingün ñi inantucuafiel pu Israel che. Inantucufilu pu Israel che, com nülacünufingün ti huaria ñi puerta.

18 Fei hula Chau Jehová feipifi ta Josué: “Tami cuhu mu mülei quiñe pichi huaiqui,* fei huitrañpüramfinge Hai huaria püle. Tami cuhu mu elcünulelayu”. Fei Josué huitrañpüramfi ti pichi huaiqui tati huaria püle. 19 Huitrañpüramfilu müten tañi cuhu, pu hueichafe lloftulelu huitrapürafemingün. Lefcülen coningün ti huaria mu, fei nüpufingün. Feimeu müten lüpümtucufingün.

20 Fei pu Hai huentru huiñoquintulu engün, peingün ñi fitrumequen* tañi huaria, huenu mu puhui ti fitrun. Fei nehuen-ngehuelai ñi lefmahual cheu püle no rume. Fei hula pu lefmauquelu huellin mapu püle huiñotuingün tañi hueichameafiel tañi pu inantucuqueteu. 21 Josué ca com pu Israel che pefingün pu lloftumequelu ñi nüfiel ti huaria ca ñi fitrulen ti huaria. Feica müten huiñotuingün, fei hueichafingün pu Hai huentru. 22 Tati pu hueichafe nüfilu ti huaria tripaingün ñi hueichayafiel pu Hai huentru. Fei engün pelaingün cheu tañi lefmahual. Pu Israel che epuñpüle hualloñmafingün ca langümfingün, quiñe Hai che no rume mongetripalai ca pepi lefmaulai. 23 Huelu mongelen nüfingün Hai ñi lonco ülmen ca yelelfingün ta Josué.

24 Fei pu Israel che langümfi com pu Hai che lelfün meu, fei tüfa huellin mapu cheu tañi inantucungen. Fütra cuchillo mu langümfingün itrocom che. Fei hula pu Israel che huiñotuingün Hai huaria mu ca fütra cuchillo mu apümcafingün pu mülehuechi pu che. 25 Feichi antü lai 12.000 huentru ca domo, com pu Hai che. 26 Josué fentecünulai ñi huitrañpüramfiel ti pichi huaiqui langümngelu hula* com pu Hai che. 27 Huelu pu Israel che ngen-ngetuingün pu culliñ ca tañi huehuel huaria mu. Femngechi femingün chumngechi Chau Jehová feipifi ta Josué.

28 Feimu Josué lüpümfi Hai huaria ca teifücafi turpu ñi mülehuetunoal. Femngechi felequei fantepu mu. 29 Josué langümfi Hai ñi lonco ülmen ca orcon mamüll meu* pültrücünufi ti cuerpo* nagantülu hula. Epe conlu chi antü, Josué huercüi ñi nacümngeal* ti lachi cuerpo orcon mamüll meu. Tati pu che ütrüftucufi ti cuerpo itrotripa ti huaria ñi puerta, fei huircopüramelfingün cura,* tüfa petu mülehuei fantepu mu.

30 Fei hula Ebal pingechi huincul mu, Josué deumalelfi quiñe altar ta Chau Jehová,* pu Israel che ñi Ngünechen. 31 Moisés, Jehová tañi cüdaufe, huercüfi pu Israel che ñi femngechi femal. Ti lifru nielu Moisés ñi ley dungu huirintuculei tüfa: “Quiñe altar nielu catrüngenochi cura, duamfalngelai ñi catrüngeal ti cura quiñe chemcün meu pañillhuengelu”.* Huente ti altar mu hultuculelfingün ta Chau Jehová lüpümngeelchi chalintucun* ca chalintucun quiñentrür ingequelu.*

32 Tiyechi cura mu Josué huirintucui ñi feipin Moisés ñi ley. Cuifi, Moisés huirintucucünui tüfachi ley pu Israel che ñi adquiñ mu. 33 Com pu Israel che, pu fütaqueche, pu loncolelu ca ti pu juez huitraleingün epuñpüle cheu ñi mülen ti falin caja. Cafei quisu ñi adquiñ mu huitraleingün pu sacerdote Leví tuhun-ngelu, fei engün yenieingün ti falin caja pengelquelu Chau Jehová ñi eldungu. Üyeu ca mülerqueingün che cañpüle cüpalu ca pu Israel tuhun-ngelu. Rangiñ tüfa engün itrotripa müleingün Guerizim pingechi huincul ca rangiñ itrotripa mülei Ebal pingechi huincul. Femngechi femi pu Israel che tañi cümelcangeal, chumngechi ñi feipin Moisés, Chau Jehová tañi cüdaufe. 34 Fei hula Josué nehuentu papeltui com ñi feipin Moisés ñi ley, tati cümelcan dungu ca tati malisian dungu, chumngechi huirintuculei tati lifru nielu ti ley dungu. 35 Com ñi huercüel ta Moisés, Josué com papeltui. Josué nehuentu papeltulelfi pu Israel che trahulelu, pu domo, pu pichiqueche ca tati pu che cañpüle cüpalu mülelu fei engün mu.

9 Com pu lonco ülmen mülelu conantü püle Jordán leufü mu allcüingün chem ñi rupan. Cafei allcüingün pu lonco ülmen mülelu mahuidantu püle, pu mülelu Sefelá mapu,* pu mülelu inaltu Fütra lafquen mu* ca pu mülelu itrotripa Líbano huincul mu, tüfa tati pu Het che,* pu Canaán che, pu amorreo, pu perizita, pu heveo ca pu jebuseo. 2 Fei quiñehuingün tañi hueichayafiel* ta Josué ca pu Israel che.

3 Pu Gabaón che ca quimingün Josué ñi femfiel ta Jericó ca Hai huaria. 4 Fei ñihualerqueingün. Huillhuillcalechi sacu mu* tucuingün tañi iyael engün, fei püramfingün tañi burro mu. Ca püramfingün ti pulcungechi trülque carpa huesañmalelu.* Feitichi carpa paucüi* ca lapatulei.* 5 Ca tañi ocota engün* huesañmaucülei ca lapatulei. Tañi tacun ca huesañmaucülei. Yenieingün iyael engün, huelu tañi cofque ancülei ca füntülcalei.* 6 Fei pemefingün ta Josué, cheu ñi mülen tañi tolto ruca* Guilgal huaria mu. Fei feipifingün ta Josué ca pu Israel huentru: “Iñchiñ camapu cüpaiñ. Fürenemuaiñ, feula eldungucünumuaiñ”. 7 Huelu pu Israel huentru feipifingün pu heveo che: “Pülle mülepelaimün chi, ¿chumngechi eldungucünuhuayiñ ta eimün?”. 8 Huelu huiñoldungungei ta Josué:* “Iñchiñ, eimi tami cüdaufengeiñ”.*

Fei Josué ramtueyu: “¿Inei am ta eimün? ¿Cheu cüpaimün?”. 9 Fei feipifingün: “Iñchiñ, eimi tami pu cüdaufe rume camapu cüpaiñ. Rume yamniefiyiñ* tami Chau Ngünechen Jehová ñi üi. Allcüiñ tañi rume pepiluhun-ngen, com ñi femün Egipto mapu mu, 10 ca tañi femfiel tati amorreo ñi epu lonco ülmen, fei engu müleingu nometu Jordán leufü mu.* Ca allcüiñ Chau Dios ñi femfiel ti lonco ülmen Sehón pingelu, mülelu Hesbón huaria. Ca ñi femfiel ti lonco ülmen Og pingelu, ngünenielu Basán troquiñ mapu, tüfachi huentru mülerquei Astarot huaria mu. 11 Feimu lle taiñ pu loncolelu ca com pu che mülelu taiñ mapu mu, feipieiñmu ‘Pemeafimün engün, yeaimün iyael tamün iñmual rüpü mu. Feipiafimün “Eimün tamün cüdaufengeaiñ. Eldungucünumuaiñ”’. 12 Feichi antü tripalu iñchiñ taiñ ruca mu, petu eñumcülefui tüfachi cofque. Cüpalfiyiñ tüfachi cofque taiñ iñmual rüpü mu, fei tamün pepayafiel. Huelu, ¡ngüneduamfimün! Feula ancülei ca füntülcalei.* 13 Hue trülque carpa mu* tucuiñ pulcu iñchiñ, huelu feula paucücalei. Taiñ tacun ca taiñ ocota* huesañmahui, rume camapu cüpalu cai iñchiñ”.

14 Feimu ti pu Israel huentru nüñmafi quiñeque tañi iyael engün, femngechi tañi ngüneduamafiel. Huelu ramtulafingün ta Chau Jehová chem ñi chumal. 15 Josué feipifi engün ñi cüme yeucüleal, fei eldungucünulelfi tañi mongeleal engün. Tüfachi dungu feipicünuingün* ñi chumal pu loncolelu ti pu che mu.

16 Fei cüla antü rupalu ñi eldungucünun engün, quimingün ñi pülle mongelen engün ca ñi carucatu chengen engün. 17 Feimu pu Israel che trecacünuhuingün, fei cüla antü rupalu puhui ñi huaria mu engün. Tüfachi huaria Gabaón, Kefirá, Beerot ca Quiryat-Jearim ürque. 18 Huelu pu Israel che hueichalafingün. Ti pu loncolelu eldungucünulelfingün Jehová ñi üi mu, pu Israel che ñi Ngünechen. Fei com pu che eluhui ñi dunguyenieafiel pu loncolelu. 19 Femngechi rupalu, com pu loncolelu feipifi ta com pu che: “Iñchiñ eldungucünufiyiñ engün Jehová ñi üi mu, pu Israel che ñi Ngünechen, feimu huesa femlayafiyiñ. 20 Femafiyiñ tüfa: eldungucünulelfilu am iñchiñ, mongelecape engün, femngechi taiñ illcutungenoal iñchiñ”.* 21 Ca feipingün: “Mongelepe engün, huelu quisu engün mülei ñi ñimitual* ta mamüll ca mülei ñi quintulelafiel co ta com pu che”. Fei tüfa ñi feipicünufiel pu loncolelu.

22 Fei hula Josué mütrümfi* ca feipifi engün: “¿Chumngelu* ‘Rume camapu cüpaiñ’ pimün? Pülle mülerquelu eimün, ¿chumngelu ngünencamuiñ? 23 Feula ca rumel meu malisian chengeaimün. Rumel esclavongeaimün, fei ñimituaimün mamüll ca huiñamcoaimün tañi Chau Ngünechen ñi ruca mu”. 24 Fei feipifingün ta Josué: “Iñchiñ, eimi tami pu cüdaufe, feipingeiñ tüfachi dungu: tami Chau Ngünechen Jehová feipicünufi tañi cüdaufe Moisés ñi eluafiel eimün com tüfachi mapu ca ñi apümcayafiel tati pu che eimün tamün adquiñ mu. Eimün tamün duam mu, llicaiñ taiñ langümngeal. Feimu femiyiñ tüfa. 25 Feula eimi ngüneniemuaiñ. Chem rume, cümelu ca norngelu troquifilmi, femmuaiñ”. 26 Femngechi femeyu ta Josué. Fei cuñiutucufi tañi langümnoaeteu pu Israel che. 27 Feichi antü Josué feipicünufi engün ñi ñimitumamüllal engün, quintulelafiel co tati pu che ca huiñamcoal cheu rume ñi dulliel Chau Jehová ñi müleal tañi altar. Fantepu mu amulei ñi femngechi femquen engün.

10 Fei hula ti lonco ülmen Adoni-Zédec, ngünenielu Jerusalén huaria, allcüi Josué ñi nüfiel Hai huaria ca ñi apümcafiel. Chumngechi ñi femfiel Jericó huaria ca tañi lonco ülmen, Josué ca femngechi femfi Hai huaria ca tañi lonco ülmen. Cafei allcüi pu Gabaón che ñi feipicünun ñi quiñeucüleal pu Israel che engün ca ñi quiñentrür mongeleal. 2 Feimu ti lonco ülmen rume huesa duami. Gabaón quiñe fütra huariangefui, trürcülefui quiñe fütra falin huaria cheu ñi ngünenieel quiñe lonco ülmen. Doicülefui Hai huaria mu, ca com tañi pu huentru hueichafengefui.* 3 Feimu Adoni-Zédec, ngünenielu Jerusalén huaria, feipifalfi ta tüfachi pu lonco ülmen: tüfa ta Hoham, ngünenielu Hebrón huaria, Piram, ngünenielu Jarmut huaria, Jafía, ngünenielu Lakís huaria ca Debir, ngünenielu Eglón huaria. Fei feipifalfi: 4 “Cüpamün, quellumupachi, fei quiñentrür hueichayafiyiñ pu Gabaón che. Feipicünuingün ñi quiñeucüleal ta Josué ca pu Israel che engün”. 5 Feimu pu amorreo ñi quechu lonco ülmen trahuingün, tati ngünenielu Jerusalén, Hebrón, Jarmut, Lakís ca Eglón huaria. Cafei compañnieyu tañi pu hueichafe. Fei amuleingün ca hualloñmafingün Gabaón huaria ñi hueichayafiel.

6 Fei pu Gabaón huentru feipifalfingün ta Josué, cheu ñi mülen tolto ruca* Guilgal huaria mu: “Iñchiñ, eimi tami pu cüdaufengeiñ, feimu quisucünumulayaiñ. ¡Matu cüpange! ¡Quellumuiñ ca montulmuiñ! Com pu amorreo ñi lonco ülmen, mahuidantu mapu püle mülelu, quiñehuingün taiñ hueichayaeteu”. 7 Feimu Guilgal huaria mu, Josué pürai tañi pu hueichafe engün, ca compañnieyu pu nehuen-ngechi hueichafe.

8 Fei hula Chau Jehová feipifi ta Josué: “Tami cuhu mu elcünuleleyu, feimu llicalayafimi engün. Inei no rume hueulayaimu”. 9 Quiñe pun trecaingün tripalu engün Guilgal huaria mu. Feimeu müten Josué malocontupueyu engün. 10 Pu Israel che ñi adquiñ mu, Chau Jehová huelulcafi pu amorreo che. Pu Israel che langümfingün fentren amorreo che Gabaón huaria mu. Ca feichi rüpü pürapulu Bet-Horón huaria mu inantucuniefingün. Fei Azecá ca Maquedá huaria mu puhuingün ñi langümfiel engün. 11 Pu amorreo che lefmahuingün pu Israel che ñi duam mu. Fei nagcülepulu engün Bet-Horón huaria, fei ñi puhual Azecá huaria mu, Chau Jehová huenu mu ütrüfnacümelfi fütraque pire,* cura reque felelu. Fei lai engün. Pu Israel che langümfingün fentren che fütra cuchillo mu, huelu doi fentren che lai tati fütra pire ñi duam mu.

12 Feichi antü pu Israel che pefingün chumngechi Jehová hueufi pu amorreo che. Fei Josué feipifi ta Jehová pu Israel che ñi adquiñ mu:

“¡Antü, mülenagnge Gabaón huaria mu!

¡Cüyen, ca mülenagnge Ayalón ñi laf mapu mu!”.

13 Ti antü mülenagi ca ti cüyen nengümuulai, pu Israel che castigafilu hula tañi pu caiñe. ¿Huirintuculei mai Jasar pingechi lifru mu? Rangi callfü huenu mülenagi ti antü, com antü conlai chi antü. 14 Cuifi ca rupachi antü, turpu ngelafui tiyechi antü reque. Feichi antü Chau Jehová quehuamequefui pu Israel che ñi duam mu. Chau Jehová allcütufi quiñe huentru ñi dungun.

15 Rupalu tüfa, Josué ca com pu Israel che huiñotuingün Guilgal huaria mu, cheu ñi mülen tolto ruca.

16 Huelu pu amorreo ñi quechu lonco ülmen lefmahuingün, fei ellcahuingün* quiñe lolo meu mülelu Maquedá huaria. 17 Fei feipingei ta Josué: “Pengei ti quechu lonco ülmen, ellcaucüleingün quiñe lolo meu Maquedá huaria mülelu”. 18 Josué feipi: “Huaichüfrulpayafimün fütraque cura, fei tucuafimün tati lolo ñi conhue püle ca mülepe huentru ñi lelinieafiel engün. 19 Huelu tamün mülehuechi hueichafe, afeluuquilpe. Inantucuafimün tamün pu caiñe, furi püle contuafimün. Elulayafimün ñi conal tañi huaria mu engün. Tamün Chau Ngünechen Jehová llemai elcünuleimünmeu tamün cuhu meu”.

20 Josué ca tati pu Israel che hueufi ca langümfingün fentren che. Epe com langümfingün. Huelu quiñeque lefmaulu montuingün ca conpuingün malaltuculechi fütraque huaria mu. 21 Com pu Israel che chem chumngelai rume, fei cüme puhuingün Josué mu, cheu tañi mülen tolto ruca Maquedá huaria mu. Quiñe huentru no rume huesa dunguyelafi pu Israel che. 22 Feimu Josué feipi: “Nülamün ti lolo ñi conhue, entufimün ti quechu lonco ülmen ca cüpalelmuchi”. 23 Fei entufingün ti quechu lonco ülmen tati lolo meu: tüfa tati ngünenielu Jerusalén, Hebrón, Jarmut, Lakís ca Eglón huaria. Fei yelelfingün ta Josué. 24 Cüpalelngelu tüfachi pu lonco ülmen, Josué trahulfi com pu Israel huentru. Fei feipifi pu loncolechi hueichafe tañi compañeteu: “Fülconpamün.* Tucuafimün tamün namun tüfachi pu lonco ülmen ñi huente topel”. Feimu fülconpuingün ca tucufingün tañi namun tañi huente topel engün. 25 Cafei Josué feipifi engün: “Llicalayaimün ca pellquelayaimün rume. Yafüluucülemün ca nehuen piuquecünuumün. Tüfachi dungu femafi Chau Jehová com tamün pu caiñe tamün hueichayaeteu”.

26 Fei Josué allfülfi ca langümfi, fei hula pültrücünufi engün quechu orcon mamüll mu.* Pültrücünungei engün nagantülu hula. 27 Fei conlu ti antü, Josué feipi ñi nacümngeal engün* orcon mamüll meu, fei ñi ütrüftucungeal ñi cuerpo* lolo meu, cheu tañi ellcahun engün. Fei hula tucuingün fütraque cura ti lolo ñi conhue püle. Fantepu mu petu mülecai feichi cura.

28 Feichi antü Josué nüfi Maquedá huaria, fütra cuchillo mu apümcafi. Langümfi* tañi lonco ülmen ca com pu che* mülelu fei mu. Inei no rume mongetripalai. Chumngechi ñi femfiel Jericó ñi lonco ülmen, ca femngechi femfi Maquedá ñi lonco ülmen.

29 Fei hula Josué ca com pu Israel che tripatuingün Maquedá huaria, fei amuingün Libná huaria tañi hueichayafiel. 30 Chau Jehová ca elcünulelfi pu Israel che ñi cuhu mu feichi huaria ca tañi lonco ülmen. Fütra cuchillo mu apümcafingün ti huaria ca com pu che mülelu fei mu. Üyeu inei no rume mongelehuelai. Chumngechi ñi femfiel Jericó ñi lonco ülmen, ca femngechi femfingün Libná ñi lonco ülmen.

31 Feimeu müten Josué ca com pu Israel che tripatuingün Libná huaria, fei amuingün Lakís huaria mu. Üyeu anümingün tañi tolto ruca ca hueichafingün. 32 Chau Jehová tañi pin mu, pu Israel che hueufingün ta Lakís huaria. Epu antü müten hueungei. Fütra cuchillo mu apümcafingün ti huaria ca com pu che mülelu fei mu, chumngechi ñi femfiel Libná huaria.

33 Fei hula ti lonco ülmen Horam pingelu, ngünenielu Guézer huaria, pürai ñi quelluafiel ta Lakís huaria. Huelu Josué langümfi feiti lonco ülmen ca tañi pu che. Inei no rume mongelehuelai.

34 Fei hula Josué ca com pu Israel che tripatuingün Lakís huaria, fei amuingün Eglón huaria mu. Üyeu anümingün tañi tolto ruca ca hueichafingün. 35 Feichi antü nüfingün ti huaria ca fütra cuchillo mu apümcafingün. Feichi antü langümfingün* com pu che mülelu fei mu, chumngechi ñi femfiel Lakís huaria.

36 Fei hula Josué ca com pu Israel che tripatuingün Eglón huaria, fei amuingün Hebrón huaria mu ca hueichafingün. 37 Fütra cuchillo mu nüfingün ca apümcafingün ti huaria, tañi lonco ülmen, tañi fillque huaria püllelelu ca com pu che mülelu fei mu. Inei no rume montulai. Chumngechi ñi femfiel Eglón huaria, ca femngechi apümcafi tüfachi huaria com tañi pu che engün.

38 Af meu, Josué ca com pu Israel che huiñotuingün, fei amuingün Debir huaria mu tañi hueichayafiel. 39 Nüfingün ti huaria, tañi lonco ülmen ca tati fillque huaria püllelelu. Fütra cuchillo mu apümcafingün ca langümfingün com pu che mülelu fei mu. Inei no rume mongelehuelai. Chumngechi ñi femfiel ta Hebrón ca Libná huaria ca tañi lonco ülmen, ca femngechi femfi ta Debir huaria ca tañi lonco ülmen.

40 Josué nüfi com mapu: tüfa tati mahuidantu, com tati mülelu inaltu püle, tati Négueb mapu, tati Sefelá mapu* ca com tañi lonco ülmen. Quiñe che no rume montulai. Apümcafi ta com pu che chumngechi ñi feipin Chau Jehová, pu Israel che ñi Ngünechen. 41 Josué nüfi com mapu mülelu Cadés-Barnea huaria puulu ta Gaza huaria, cafei Gosén troquiñ mapu, fei Gabaón huaria mu puhui. 42 Josué nüfi com tüfachi pu lonco ülmen ca nüñmafi ñi mapu engün. Quiñe rupacünufi müten. Chau Jehová, pu Israel che ñi Ngünechen, quehuamequei pu Israel che ñi duam mu. 43 Fei hula Josué ca com pu Israel che huiñotuingün Guilgal huaria mu, cheu ñi mülen tañi tolto ruca.

11 Tati lonco ülmen Jabín pingelu, ngünenielu Hazor huaria mu, quimi chem ñi rupan. Feimu müten huercüfi quiñeque huentru ñi quimelafiel tati lonco ülmen Jobab, ngünenielu Madón huaria mu, ca ti lonco ülmen ngünenielu Simrón huaria, tati lonco ülmen ngünenielu Acsaf huaria, 2 tati pu lonco ülmen ngünenielu mahuidantu mapu picun püle,* pu ngünenielu tati laf mapu* huaihuen püle* Kinéret lafquen mu, pu ngünenielu Sefelá mapu* ca tati pu ngünenielu huincul püle Dor huaria mu conantü püle. 3 Ca tati pu Canaán che mülelu tripahue antü ca conantü püle, pu Het che,* pu amorreo, pu perizita, pu jebuseo mülelu mahuidantu mapu mu ca pu heveo inafülcülelu Hermón huincul, Mizpá troquiñ mapu mülelu. 4 Fei tripaingün com tañi hueichafe engün, rume fentreleingün cuyüm reque mülelu inaltu lafquen. Cafei yenieingün rume fentren cahuellu ca carretela* ñi hueichayal.* 5 Com tüfachi pu lonco ülmen feipicünuingün ñi trahuluhual. Fei amuingün ca tucuingün tañi tolto ruca* inafül Merom huaria mu cheu ñi mülen co, femngechi ñi hueichayafiel pu Israel che.

6 Fei Jehová feipifi ta Josué: “Llicalayafimi engün. Hule, fanten hora mu eluhuayiñ com engün tamün langümafiel. Cüntrocünuñmayafimün tañi pu cahuellu engün, lüpümafimün tañi pu carretela cütral mu”. 7 Feimu Josué ca com tañi pu hueichafe quehuarumefingün inafül Merom huaria cheu ñi mülen co. 8 Chau Jehová hultucufi engün pu Israel che ñi cuhu mu, hueufingün ca inantucufingün puulu hula engün tati Fütra Sidón huaria, Misrefot-Maim mapu ca Mizpé pingechi laf mapu tripahue antü püle. Pu Israel che langümfingün. Inei no rume montulai. 9 Josué femi com tañi feipieteu Chau Jehová. Cüntrocünufi tañi cahuellu engün ca lüpümfi tañi carretela cütral mu.

10 Doyelchi mai Josué huiñotui, nüfi ta Hazor huaria ca fütra cuchillo mu langümfi tañi lonco ülmen. Com tüfachi huaria nielu tañi lonco ülmen, Hazor tati doi falin huariangefui. 11 Fütra cuchillo mu langümfingün com tati pu che mülelu fei mu, femngechi apümfingün. Inei no rume mongelehuelai. Fei lüpümtucufi Hazor huaria cütral mu. 12 Josué nüfi com tüfachi pu lonco ülmen ca tañi huaria engün, fei fütra cuchillo mu com langümfi engün. Apümcafi engün, chumngechi feipi ta Moisés, Jehová tañi cüdaufe. 13 Huelu pu Israel che lüpümlafingün quiñe huaria no rume mülelu pichique huincul mu. Josué lüpümtucufi Hazor huaria müten. 14 Pu Israel che ngen-ngetuingün com ti huehuel ca tati pu culliñ mülelu huaria mu. Fütra cuchillo mu langümfingün com tati pu che, quiñe no rume montulai. Inei no rume mongelehuelai. 15 Chau Jehová ñi huercüfiel tañi cüdaufe Moisés, tüfachi dungu Moisés huercüfi ta Josué, femngechi femi Josué. Femi com tañi feipifiel Jehová ta Moisés.

16 Josué nürpui com tüfachi mapu: tati mahuidantu mapu, tati Négueb mapu, com Gosén troquiñ mapu, tati Sefelá mapu, Arabá mapu ca Israel ñi mahuidantu mapu ca tañi laf mapu üyeu mülelu. 17 Cafei Josué nüfi Halac huincul puulu Baal-Gad huaria mu. Halac huincul püllelei Seír pingechi mahuidantu mapu. Baal-Gad huaria püllelei Líbano laf mapu mu ca inafül Hermón huincul püle. Fei nüfi com tati pu lonco ülmen, hueufi ca langümfi engün. 18 Josué alüñmai ñi hueichafiel com tüfachi pu lonco ülmen. 19 Chem huaria no rume feipicünulai tañi quiñeucüleal pu Israel che engün. Pu heveo che müten mülelu Gabaón huaria mu femingün. Feimu pu Israel che hueichafingün ca hueufingün com feichi huaria. 20 Jehová ñi pin mu, tüfachi pu lonco ülmen cura piuquecünuhuingün, fei ñi hueichayafiel pu Israel che. Quisu cutranpiuqueyelafi engün, doi mai femi ñi apümcayafiel. Mülei ñi apümcangeal engün, chumngechi Chau Jehová feipifi ta Moisés.

21 Feichi antü mu, Josué apümcafi pu Anac che mülelu Hebrón, Debir ca Anab huaria mu mülelu mahuidantu mapu püle. Cafei apümcafi pu Anac che mülelu Judá ñi mahuidantu mapu ca com mülelu Israel ñi mahuidantu mapu. Josué apümcafi com engün ca tañi huaria. 22 Ngehuelai pu Anac che pu Israel che ñi mapu mu. Gaza, Gat ca Asdod huaria mu müten mülehuei pu Anac che. 23 Josué nüfi com feichi mapu, chumngechi Chau Jehová feipicünufi ta Moisés. Fei hula Josué elufi mapu tati pu Israel che tañi ngen-ngetual. Femngechi fei engün ñi hudamentuafiel quisuque tañi troquiñche engün, tunte tañi coneltulen engün. Fei ngehuelai hueichan feichi mapu meu.

12 Pu Israel che hueufingün tati pu lonco ülmen mülelu tripahue antü püle Jordán leufü mu. Cafei nüñmafingün tañi mapu engün. Tüfa Arnón pingechi laf mapu puulu Hermón huincul ca com Arabá mapu tripahue antü püle. Tüfa tati pu lonco ülmen: 2 pu amorreo ñi lonco ülmen, Sehón pingelu. Fei mülequefui Hesbón huaria ca ngüneniequefui Aroer huaria, tüfa mülefui inaltu Arnón laf mapu. Com ti mapu mülelu rangiñ Arnón pingechi laf mapu puulu Jaboc laf mapu ngen-ngefui tüfachi lonco ülmen. Cafei ngüneniequefui Galaad ñi rangiñ mapu puulu Jaboc laf mapu, üyeu fentepuhui pu Ammón che ñi mapu mu. 3 Cafei ngüneniequefui Arabá mapu ca puhui Kinéret lafquen,* tripahue antü püle. Ca fentepuhui Arabá lafquen mu, tüfa Cotrü lafquen pingelu.* Cafei tripahue antü püle mülerquefui Bet-Jesimot mapu, ca huaihuen püle* puhui inaltu Pisgá pingechi mahuida.

4 Huelu ca mülerquefui ti mapu ñi nieel tati lonco ülmen Og pingelu, ngünenielu Basán troquiñ mapu. Tüfa tati quiñelehuechi refaím che mülelu Astarot ca Edréi huaria mu. 5 Quisu ngüneniequefui Hermón huincul, Salecá huaria ca com Basán troquiñ mapu. Fei fentepuhui pu Guesur che ca pu Maacá che ñi mapu. Ca ngüneniequefui Galaad ñi rangiñ mapu ca fentepuhui feichi mapu ñi nieel ti lonco ülmen Sehón pingelu, ngünenielu Hesbón huaria mu.

6 Chau Jehová tañi cüdaufe Moisés ca tati pu Israel che hueufi engün. Fei hula Moisés, Jehová tañi cüdaufe, elufi tüfachi mapu tati pu che Rubén ca Gad tuhun-ngelu ca Manasés tañi rangiñ troquiñche, femngechi tañi ngen-ngetual engün.

7 Josué ca tati pu Israel che hueufingün tati pu lonco ülmen mülelu conantü püle Jordán leufü mu. Tüfa Baal-Gad huaria puulu Halac huincul mu. Baal-Gad huaria püllelei Líbano laf mapu ca Halac huincul püllelei Seír pingechi mahuidantu mapu. Fei hula Josué elufi tüfachi mapu tati pu Israel ñi troquiñche, tunte tañi coneltulen, femngechi tañi ngen-ngetual engün. 8 Tüfa tati mahuidantu mapu, Sefelá mapu,* Arabá mapu, inaltu mahuida, huellin mapu* ca Négueb mapu mu. Tüfa tati mapu ñi mülen pu Het che,* pu Canaán che, pu heveo che, pu amorreo, pu perizita, pu jebuseo. Tüfa tati pu lonco ülmen pu Israel che ñi hueufiel:

9 Jericó huaria ñi lonco ülmen, quiñe. Hai huaria ñi lonco ülmen inafülcülelu Betel huaria, quiñe.

10 Jerusalén huaria ñi lonco ülmen, quiñe. Hebrón huaria ñi lonco ülmen, quiñe.

11 Jarmut huaria ñi lonco ülmen, quiñe. Lakís huaria ñi lonco ülmen, quiñe.

12 Eglón huaria ñi lonco ülmen, quiñe. Guézer huaria ñi lonco ülmen, quiñe.

13 Debir huaria ñi lonco ülmen, quiñe. Guéder huaria ñi lonco ülmen, quiñe.

14 Hormá huaria ñi lonco ülmen, quiñe. Arad huaria ñi lonco ülmen, quiñe.

15 Libná huaria ñi lonco ülmen, quiñe. Adulam huaria ñi lonco ülmen, quiñe.

16 Maquedá huaria ñi lonco ülmen, quiñe. Betel huaria ñi lonco ülmen, quiñe.

17 Tapúah huaria ñi lonco ülmen, quiñe. Héfer huaria ñi lonco ülmen, quiñe.

18 Afec huaria ñi lonco ülmen, quiñe. Lasarón huaria ñi lonco ülmen, quiñe.

19 Madón huaria ñi lonco ülmen, quiñe. Hazor huaria ñi lonco ülmen, quiñe.

20 Simrón-Merón huaria ñi lonco ülmen, quiñe. Acsaf huaria ñi lonco ülmen, quiñe.

21 Taanac huaria ñi lonco ülmen, quiñe. Meguidó huaria ñi lonco ülmen, quiñe.

22 Quedes huaria ñi lonco ülmen, quiñe. Jocneam huaria mülelu huechuñ Carmelo mahuida, feichi huaria ñi lonco ülmen, quiñe.

23 Dor ñi huinculcülechi mapu mülei Dor huaria. Fei ñi lonco ülmen, quiñe. Goyim mapu mu mülei Guilgal huaria, fei ñi lonco ülmen, quiñe.

24 Tirzá huaria ñi lonco ülmen, quiñe. Com tüfa raquingen mu 31 lonco ülmen-ngeingün.

13 Fei hula Josué deu füchai ca deu fülpai ñi layal,* feimu Jehová feipifi: “Deu füchaimi ca fülpai tami layal, huelu petu fentrelei mapu ñi nürpual. 2 Petu mülehuei tüfachi mapu: com mapu ñi nieel pu Filistea che ca pu Guesur che. 3 (Feichi mapu tuhui cheu ñi mülen ti huitrunco* tripalu Nilo leufü mu. Mülerquefui tripahue antü püle* Egipto mapu mu ca puhui picun püle* cheu ñi tuntepuhun Ecrón huaria. Tüfa tati pu Canaán che ñi mapu fel). Cafei petu mülehuei tati quechu lonco ülmen ñi mapu pu Filistea che tuulu: tüfa pu Asdod che, pu Asquelón che, pu Gat che, pu Ecrón che, pu avim che ca pu gazeo ñi mapu. 4 Huaihuen püle,* com pu Canaán che ñi mapu. Meará, pu Sidón che ñi huaria ca puhui Afec huaria mu, cheu ñi tuntepuhun pu amorreo che ñi mapu. 5 Ti pu Guebal che ñi mapu ca com Líbano mapu tripahue antü püle. Cafei Baal-Gad huaria mülelu inafül Hermón huincul mu ca puhui Lebó-Hamat huaria mu,* 6 com mahuidantu mülechi pu che mülelu Líbano mapu puulu Misrefot-Maim huaria mu, cafei com pu Sidón che. Iñche huemünentuafiñ* engün pu Israel che ñi adquiñ mu, chumngechi feipicünueyu ta iñche. Eimi mülei tami hudamelafiel ti mapu pu Israel che tañi ngen-ngeal engün. 7 Feula mülei tami hudamelafiel tüfachi mapu tañi ngen-ngeal tati ailla troquiñche ca Manasés ñi rangiñ troquiñche”.

8 Manasés tañi rangiñ troquiñche ca tati pu che Rubén ca Gad tuhun-ngelu trür eluhuingün ñi ngen-ngeal ti mapu. Feichi mapu tañi elueteu Moisés tripahue antü püle Jordán leufü mu, chumngechi ñi adcünuleteu Moisés, Chau Jehová tañi cüdaufe: 9 Aroer huaria mülelu inaltu Arnón laf mapu mu, ca ti huaria mülelu rangi laf mapu mu, ca com ti huechuñ laf mapu mülelu inafül Medebá mapu mu puulu Dibón huaria mu. 10 Cafei com ti huaria nielu pu amorreo ñi lonco ülmen Sehón pingelu, tüfa ngüneniefui Hesbón huaria puulu cheu ñi tuntepuhun pu Ammón che ñi mapu. 11 Cafei Galaad mapu, pu Guesur che ca pu Maacat che ñi mapu. Tati Hermón huincul, com Basán troquiñ mapu puulu Salecá huaria mu. 12 Ca com ti mapu ñi nieel ti lonco ülmen Og pingelu, ngünenielu Basán troquiñ mapu. Fei Astarot ca Edréi huaria ngüneniequefui. Tüfa tati quiñelehuechi refaím che. Moisés hueufi engün ca huemünentufi tiye mu.* 13 Huelu pu Israel che huemünentulafi* pu Guesur che ca pu Maacat che. Fantepu mu petu mülecai pu Guesur che ca pu Maacat che rangi pu Israel che engün.

14 Huelu Moisés elulafi mapu tañi ngen-ngeal tati pu che Leví tuhun-ngelu. Doi mai chumngechi feipicünui Chau Jehová, pu Israel che ñi Ngünechen, fei engün elungeai quiñe troquiñ tati chalintucun* lüpümelngequelu ta Chau Dios.

15 Feimu Moisés elufi ti mapu Rubén ñi troquiñche tañi ngen-ngeal engün. Llohuingün ti mapu quisuque tañi familia engün. 16 Tañi mapu puhui Aroer huaria mülelu inaltu Arnón laf mapu mu, ca ti huaria mülelu rangi laf mapu mu, ca com ti huechuñ laf mapu mülelu inafül Medebá mapu mu. 17 Hesbón huaria ca com tañi troquiñche mülelu huechuñ laf mapu, Dibón, Bamot-Baal huaria, Bet-Baal-Meón huaria. 18 Cafei Jáhaz, Quedemot, Mefaat huaria. 19 Quiryataim ca Sibmá huaria, Zéret-Sáhar lof mülelu tati mahuidantu ñi laf mapu mu. 20 Bet-Peor huaria, inaltu Pisgá pingechi mahuida ca Bet-Jesimot mapu. 21 Com ti huaria mülelu huechuñ laf mapu mu, ca com ñi ngünenieel pu amorreo che ñi lonco ülmen, Sehón pingelu, fei Hesbón huaria mu ngüneniequefui. Moisés hueufi tüfachi lonco ülmen ca pu ñidolcülelu pu Madián che mu, tüfa ta Eví, Réquem, Zur, Hur ca Reba. Fei engün mülequefuingün feichi mapu mu, huelu eluuquefuingün ñi ngünenieaeteu ti lonco ülmen Sehón. 22 Tati pelontuchequelu Balaam, Beor ñi fotüm, tüfa mülerquefui tati pu che meu pu Israel che ñi langümeteu fütra cuchillo mu. 23 Cheu ñi tuntepuhun pu Rubén che ñi mapu, fei ta Jordán leufü ürque. Tüfachi mapu, tañi huaria ca tañi troquiñche. Tüfachi mapu ñi llohun pu Rubén che, quisuque tañi familia engün.

24 Cafei Moisés elufi ti mapu Gad ñi troquiñche tañi ngen-ngeal engün. Pu Gad che llohuingün ti mapu quisuque tañi familia engün. 25 Tüfa tañi mapu engün: Jazer huaria, com ti huaria mülelu Galaad mapu mu, ti rangiñ mapu ñi nieel pu Ammón che puulu Aroer huaria mu, Rabá huaria ñi adquiñ mu mülelu. 26 Hesbón huaria mu puulu Ramat-Mizpé ca Betonim huaria mu, cafei Mahanaim huaria puulu Debir huaria cheu ñi tuntepun tañi mapu. 27 Ca tati laf mapu mu, Bet-Haram, Bet-Nimrá, Sucot ca Zafón huaria, ca ti mülehuechi mapu ñi nieel ti lonco ülmen Sehón, ngünenielu Hesbón huaria, tripahue antü püle cheu ñi tuntepuhun Jordán leufü, fei doi nagaltu puhui Kinéret lafquen mu.* 28 Tüfa tati mapu, tati pu huaria ca tañi pu troquiñche ñi elungeel pu Gad che, quisuque tañi familia engün.

29 Fei Moisés elufi ti mapu tañi ngen-ngeal pu familia coneltulelu Manasés tañi rangiñ troquiñche. 30 Tañi mapu tuhui Mahanaim huaria puhui Basán troquiñ mapu mu, ca com ti mapu ñi nieel ti lonco ülmen Og, ngünenielu Basán troquiñ mapu, ca com Jaír ñi pichique huaria.* Tüfachi mapu niefui 60 huaria. 31 Cafei Galaad ñi rangiñ mapu, Astarot ca Edréi huaria, tati pu huaria ñi niefel ti lonco ülmen Og, ngüneniefulu Basán troquiñ mapu, tüfa Makir ñi pu fotüm ngen-ngetui, Manasés ñi fotüm. Makir tañi rangiñ pu fotüm llohuingün ti mapu quisuque tañi familia engün.

32 Moisés elufi tüfachi mapu tañi ngen-ngeal engün, ti huellin mapu,* ti laf mapu mülelu Moab huaria mu, nometu Jordán leufü mu, Jericó huaria ñi tripahue antü püle.

33 Huelu Leví ñi troquiñche, Moisés elulafi mapu ñi ngen-ngeal engün. Doi mai elungei engün ti falin cüdau tañi poyeafiel ta Chau Jehová, chumngechi ñi feipicünuel pu Israel che ñi Ngünechen.

14 Tüfa tati mapu ñi llohuel pu Israel che Canaán mapu mu. Ti sacerdote Eleazar, Josué, Nun ñi fotüm, ca tati pu loncolelu Israel ñi troquiñche mu, elufingün feichi mapu pu Israel che tañi ngen-ngeal engün. 2 Sortiangequefui ti mapu* ñi elungeal engün, chumngechi Chau Jehová feipifi ta Moisés. Fei ñi elungeal mapu ti ailla troquiñche ca rangiñ troquiñche. 3 Moisés deu elufi ti mapu cangelu epu troquiñche ca rangiñ troquiñche nometu Jordán leufü püle.* Huelu elulafi pu Leví che chem mapu no rume. 4 José tañi tuhun pu che, raquingei epu troquiñche mu: Manasés ca Efraín troquiñche. Huelu pu Leví che elungelai chem mapu no rume, doi mai elungei re huaria tañi müleal engün, ca tañi lelfün cachu ñi ütayal tañi pu culliñ ca tañi pu quechan. 5 Femngechi pu Israel che hudamingün ti mapu chumngechi Jehová huercüfi ta Moisés.

6 Fei pu Judá huentru fülcontufingün ta Josué* Guilgal huaria mu. Fei Caleb, Jefuné tañi fotüm, Quenaz tuhun-ngelu, feipi: “Eimi cüme quimnieimi chem ñi feipifiel Jehová ta Moisés, tüfa ta Chau Ngünechen ñi cüdaufe.* Mülelu iñchiu Cadés-Barnea lof mu, Chau Dios nütramcai iñchiu mu. 7 Iñche niefun 40 tripantu, fei Moisés, Jehová ñi cüdaufe, huercüeneu Cadés-Barnea lof mu ñi ngüneduamafiel ti mapu. Fei iñche huiñotulu, tañi peel com feipipatun. 8 Tañi femün mu pu peñi tañi compañeteu ñi pürayal, ti pu che rume llicaingün.* Huelu iñche inafiñ ta Chau Jehová com tañi piuque mu. 9 Feichi antü Moisés feipicünui:* ‘Eimi ca tami pu fotüm rumel ngen-ngeaimün tüfachi mapu cheu tami pünoel, com tami piuque mu inafilu eimi tañi Chau Dios Jehová’. 10 Chumngechi tañi feipicünun, Chau Jehová petu mongelnieneu. Deu rupai 45 tripantu, feichi Chau Jehová feipicünufilu ta Moisés ca pu Israel che miyaulu huellin mapu mu.* Fachantü petu mongelen, 85 tripantu nien. 11 Fachantü petu nehuencülen feichi antü reque tañi huercüeteu ta Moisés. Feichi antü reque, petu nehuencülen tañi hueichayal* ca caque rume dungu femal. 12 Feimu eluafen feichi mahuidantu mapu Jehová tañi feipicünueteu feichi antü. Allcülu rume eimi ñi mülen üyeu pu Anac che ca ñi nien fütraque malaltuculechi huaria, maneluucülen Chau Jehová ñi müleal iñche mu. Chumngechi ñi feipicünun Jehová, iñche huemünentuafiñ”.*

13 Fei Josué llellipufi ta Chau Ngünechen ñi quelluafiel ta Caleb, Jefuné ñi fotüm. Fei elufi Hebrón huaria tañi ngen-ngeal. 14 Feimu fantepu mu Hebrón huaria ngen-ngei ta Caleb, Jefuné tañi fotüm, Quenaz tuhun-ngelu. Fei com tañi piuque mu inafi ta Jehová, Israel ñi Ngünechen. 15 Cuifi mu, Hebrón huaria Quiryat-Arbá pingequefui (Arbá, quiñe doi falin huentrungefui pu Anac che mu). Fei ngehuelai hueichan feichi mapu mu.

15 Tüfa tati mapu elungelu* ta Judá troquiñche ca tañi pu familia: ti mapu fentepuhui Edom ñi mapu mu, Zin pingechi huellin mapu* ca doi huaihuen mu* puhui Négueb mapu mu. 2 Huaihuen püle, cheu ñi fentepuhun pu Judá che ñi mapu tuhui Cotrü lafquen mu,* cheu ñi fentepuhun huaihuen püle. 3 Ca puhui huaihuen püle ti rüpü püralu cheu ñi mülen Acrabim hufco mu,* amui ta Zin püle, fei pürapui huaihuen püle Cadés-Barnea lof mu, puhui Hezrón huaria mu, pürapui Addar huaria ca huiñoi Carcá lof püle. 4 Ca puhui Azmón lof mu, fei amulei Egipto ñi huitrunco püle,* ca tañi mapu fentepuhui lafquen mu.* Huaihuen püle, tüfa mu fentepuhui pu Judá che ñi mapu.

5 Tripahue antü püle, tati mapu fentepuhui Cotrü lafquen mu* ca puhui cheu ñi afpun ti Jordán leufü. Picun püle* tati mapu fentepuhui inaltu lafquen mu, fei afpui Jordán leufü mu. 6 Cafei Bet-Hoglá huaria mu pürapui ca fentepuhui ti mapu, fei rumerpui Bet-Arabá huaria picun püle. Fei hula ti mapu pürapui ca fentepuhui cheu ñi mülen Bohán ñi cura, Rubén ñi fotüm. 7 Ti mapu pürapui ca fentepuhui Debir huaria mu, Acor ñi laf mapu mu. Guilgal huaria mu picun püle huiñoi, itrotripa mülei Adumim pingechi rüpü pürapulu, mülei huaihuen püle huitrunco mu. Tati mapu amulerpui ca fentepuhui En-Semes ñi co püle, fei afpui En-Roguel pingechi rünganco.* 8 Ti mapu pürai ca fentepuhui Hinón laf mapu püle,* inaltu cheu ñi mülen pu jebuseo huaihuen püle, tüfa ta Jerusalén huaria. Ti mapu pürai ca fentepuhui huechuñ mahuida conantü püle, fei inafülcülei Hinón laf mapu mu, Refaím laf mapu picun püle fentepuhui ti mapu. 9 Tati mapu rupai ca fentepuhui huechuñ mahuida püle, fei puhui Neftóah pingechi huitrunco. Cafei puuquei feichi pu huaria mülelu Efrón huincul. Ca tati mapu amulei ca fentepuhui Baalá huaria, tüfa Quiryat-Jearim ca pingequei. 10 Ti mapu fentepuhui ca huiñoi Baalá huaria püle, fei puhui Seír huincul conantü püle. Fei rupai inaltu Jearim huincul picun püle, cheu ñi mülen Kesalón pingechi pichi huaria. Ca nagpui Bet-Semes huaria mu, fei puhui Timná lof mu. 11 Tati mapu fentepuhui ca rupai inaltu Ecrón huaria picun püle, amulerpui Sikerón lof mu, fei puhui Baalá huincul ca amulerpui Jabneel lof mu. Lafquen mu fentepuhui ti mapu.

12 Conantü püle tati mapu fentepuhui inaltu ti Fütra lafquen mu.* Tüfa mu fentepuhui ti mapu ñi hualloñmanieteu pu Judá che, quisuque ñi familia engün.

13 Chumngechi ñi feipieteu ta Jehová, Josué elufi ta Caleb, Jefuné ñi fotüm, quiñe troquiñ mapu cheu ñi mülen pu Judá che: tüfa ta Quiryat-Arbá huaria, Hebrón ca pingequei. Arbá fei Anac ñi chau em. 14 Üyeu Caleb huemünentufi* Anac ñi cüla fotüm: tüfa ta Sesái, Ahimán ca Talmái. Anac mu tuhui engün. 15 Fei Caleb huechui ñi hueichayafiel* pu Debir che. Cuifi Quiryat-Séfer pingequefui Debir huaria. 16 Fei Caleb feipi: “Ti huentru hueichafile ca hueufile Quiryat-Séfer huaria, eluafiñ tañi ñahue Acsá tañi nieafiel”. 17 Fei Otniel, Quenaz ñi fotüm, tüfa Caleb ñi peñi, hueufi ti huaria. Feimu Caleb elufi ta Otniel tañi ñahue Acsá, fei tañi nieafiel. 18 Fei amuletulu ruca mu, Acsá llellipufi ta Otniel ñi feipiafiel tañi chedcui ñi eluaeteu mapu. Fei Acsá nagi ti burro meu cheu ñi amulen.* Fei Caleb ramtueyu: “¿Chem duamimi?”. 19 Tañi ñahue feipi: “Füreneen, eluen quiñe falin yehun.* Deu eluen quiñe mapu huaihuen püle,* huelu ca eluen Gulot-Maim mapu”.* Feimu Caleb elueyu Gulot mapu, huechuñ ca nag mapu.

20 Tüfa tati mapu elungelu Judá troquiñche tañi ngen-ngeal, quisuque ñi familia engün.

21 Huaihuen püle Judá troquiñche mu, cheu ñi fentepuhun Edom ñi mapu, mülei tüfachi huaria: Cabzeel, Éder, Jagur, 22 Quiná, Dimoná, Adadá, 23 Quedes, Hazor, Itnán, 24 Zif, Télem, Bealot, 25 Hazor-Hadatá ca Queriyot-Hezrón, tüfa ta Hazor, 26 Amam, Sema, Moladá, 27 Hazar-Gadá, Hesmón, Bet-Pélet, 28 Hazar-Sual, Beer-Seba, Biziotías, 29 Baalá, Iyim, Ézem, 30 Eltolad, Kesil, Hormá, 31 Ziclag, Madmaná, Sansaná, 32 Lebaot, Silhim, Ain ca Rimón. Tüfa ta epu mari ailla huaria ca tañi pichique huaria.

33 Tüfa tati huaria mülelu Sefelá mapu:* Estaol, Zorá, Asná, 34 Zanóah, En-Ganim, Tapúah, Enam, 35 Jarmut, Adulam, Socó, Azecá, 36 Saaraim, Aditaim ca Guederá engu Guederotaim.* Mari meli huaria ca tañi pichique huaria.

37 Zenán, Hadasá, Migdal-Gad, 38 Dileán, Mizpé, Jocteel, 39 Lakís, Bozcat, Eglón, 40 Cabón, Lahmam, Kitlís, 41 Guederot, Bet-Dagón, Naamá ca Maquedá. Mari cayu huaria ca tañi pichique huaria.

42 Libná, Éter, Asán, 43 Iftá, Asná, Nezib, 44 Queilá, Aczib, Maresá. Ailla huaria ca tañi pichique huaria.

45 Ecrón huaria, tañi püllelechi huaria ca tañi pichique huaria. 46 Ecrón huaria conantu püle, com tati mülehuechi mapu mülelu inaltu Asdod huaria mu ca tañi pu pichique huaria.

47 Asdod huaria, tañi püllelechi huaria ca tañi pichique huaria. Gaza huaria, tañi püllelechi huaria ca tañi pichique huaria. Fei puhui Egipto ñi huitrunco püle,* ti Fütra lafquen* ca tañi inaltu lafquen.

48 Tüfa tati huaria mülelu mahuidantu püle: Samir, Jatir, Socó, 49 Daná, Quiryat-Saná, tüfa ta Debir, 50 Anab, Estemó, Anim, 51 Gosén, Holón ca Guiló. Mari quiñe huaria ca tañi pichique huaria.

52 Arab, Dumá, Esán, 53 Janim, Bet-Tapúah, Afecá, 54 Humtá, Zior ca Quiryat-Arbá, tüfa ta Hebrón. Ailla huaria ca tañi pichique huaria.

55 Maón, Carmelo, Zif, Jutá, 56 Jezreel, Jocdeam, Zanóah, 57 Cayín, Guibeá ca Timná. Mari huaria ca tañi pichique huaria.

58 Halhul, Bet-Zur, Guedor, 59 Maarat, Bet-Anot ca Eltecón. Cayu huaria ca tañi pichique huaria.

60 Rabá ca Quiryat-Baal, tüfa ta Quiryat-Jearim. Epu huaria ca tañi pichique huaria.

61 Tüfa tati huaria mülelu huellin mapu mu: Bet-Arabá, Midín, Secacá, 62 Nibsán, Chadi Huaria ca En-Guedí. Cayu huaria ca tañi pichique huaria.

63 Jerusalén huaria mu mülefui pu jebuseo, huelu pu Judá huentru pepi huemünentulaeyu engün.* Feimu fantepu mu, Jerusalén huaria mu petu mülehuei pu jebuseo ca tati pu Judá che.

16 Tüfa tati mapu elungelu José ñi pu che: tuhui Jordán leufü Jericó huaria püle, fei puhui Jericó ñi huitrunco mu tripahue antü püle. Cafei amulerpui huellin mapu* itrotripa Jericó huaria ca puhui mahuidantu mapu püle Betel huaria mülelu. 2 Fei rupai Betel püllelelu Luz huaria mu, fei amulerpui cheu fentepuhui pu arkita ñi mapu mülelu Atarot huaria mu. 3 Fei hula nagpui ca fentepuhui pu Jaflet che ñi mapu conantü püle, fei fentepuhui nag Bet-Horón huaria ñi mapu ca Guézer huaria mu, lafquen mu afpui.

4 Feimu José ñi pu che, Manasés ca Efraín tuhun-ngelu, ngen-ngetuingün quisu tañi mapu engün. 5 Tüfa fentepuhui ti mapu elungelu pu Efraín tuhun-ngelu ca ñi pu che engün: tripahue antü püle tañi mapu engün fentepuhui Atarot-Addar huaria ñi mapu mu, afpui huechuñ Bet-Horón huaria mu. 6 Cafei pu Efraín che ñi mapu fentepuhui lafquen mu. Micmetat lof mülefui picun püle.* Fei ti mapu fentepuhui ca huiñoi Taanat-Siló lof tripahue antü püle ca amulerpui Janóah lof tripahue antü püle. 7 Janóah lof mu ti mapu nagpui Atarot ca Naará huaria mu, fei puhui Jericó huaria ca fentepuhui Jordán leufü mu. 8 Tapúah huaria mu ti mapu amulerpui ca fentepuhui Caná ñi huitrunco conantü püle, fei afpui lafquen mu. Tüfachi mapu ngen-ngetui Efraín troquiñche ca tañi pu che engün. 9 Efraín troquiñche ca elungei caquelu huaria ca pichique huaria. Tüfachi huaria mülefui rangiñ ti mapu ngen-ngelu Manasés ñi troquiñche.

10 Huelu huemünentulafingün* pu Canaán che mülelu Guézer huaria mu. Fantepu mu quiñentrür mülehuei pu Canaán che ca pu Efraín che. Huelu elungei pu Canaán che ñi femal fütraque cüdau.

17 Fei sortiañmangelu,* Manasés ñi troquiñche elungei quisu tañi troquiñ mapu. Manasés fei ta José ñi hunen fotüm. Manasés ñi hunen fotüm, Makir pingei, chauyefi ta Galaad. Makir hueichafengefui,* feimu elungei ta Galaad ca Basán mapu. 2 Tati mülehuechi pu che Manasés tuhun-ngelu elungei tañi troquiñ mapu quisuque ñi familia engün. Tüfa ta Abí-Ézer ñi pu fotüm, Hélec ñi pu fotüm, Asriel ñi pu fotüm, Siquem ñi pu fotüm, Héfer ñi pu fotüm ca Semidá ñi pu fotüm. Tüfachi pu huentru loncolequefui tañi familia engün, Manasés mu tuhuingün, fei ta José ñi fotüm. 3 Huelu Zelofehad nielafui fotüm, re ñahue müten. Tüfa tañi üi ñi pu ñahue: Mahlá, Noá, Hoglá, Milcá ca Tirzá. Zelofehad chauyefi ta Héfer, Héfer chauyefi ta Galaad, tüfa chauyefi ta Makir, quisu chauyefi ta Manasés. 4 Zelofehad ñi pu ñahue pemefingün ti sacerdote Eleazar, pu loncolelu ca Josué, fei ta Nun ñi fotüm. Feipifingün: “Jehová llemai huercüfi ta Moisés taiñ eluaeteu mapu taiñ pu lamngenhuen iñchiñ”. Fei chumngechi Jehová ñi huercüel mu, tañi chau ñi pu peñi engün elungei ta mapu.

5 Manasés deu elungei Galaad ca Basán mapu mülelu nometu Jordán leufü püle,* huelu ca elungei mari troquiñ mapu. 6 Manasés tañi pu ñahue ca tañi pu fotüm quiñentrür llohuingün ti mapu. Pu mülehuechi pu che Manasés tuhun-ngelu ngen-ngerpuingün Galaad mapu.

7 Manasés ñi mapu amulerpui ca fentepuhui Aser ñi mapu mu, fei puhui ta Micmetat lof mu, Siquem ñi adquiñ püle. Ti mapu amulei ca fentepuhui huaihuen püle,* cheu ñi mülefel pu che En-Tapúah huaria mu. 8 Tapúah ñi mapu Manasés ngen-ngerpui. Huelu Tapúah ñi huaria mülei cheu fentepuhui Manasés ñi mapu, Efraín ñi pu che ngen-ngefui. 9 Ti mapu nagpui ca fentepuhui Caná ñi huitrunco huaihuen püle. Manasés ñi troquiñ mapu mu ca mülefui Efraín ñi pu huaria. Manasés tañi mapu fentepuhui picun püle* ti huitrunco mu, lafquen mu aftui. 10 Huaihuen püle Efraín ngen-ngefui ti mülehuechi mapu. Picun püle Manasés ngen-ngefui ti mülehuechi mapu ca fentepuhui ti lafquen mu. Picun püle Manasés ñi mapu puhui* Aser troquiñche püle, ca tripahue antü püle puhui Isacar troquiñche püle.

11 Isacar ca Aser ñi mapu mu, Manasés llohui Bet-Seán ca tañi pu püllelechi huaria, Ibleam ca tañi pu püllelechi huaria, Dor ñi pu che ca tañi pu püllelechi huaria, En-Dor ñi pu che ca tañi pu püllelechi huaria, Taanac ñi pu che ca tañi pu püllelechi huaria, Meguidó ñi pu che ca tañi pu püllelechi huaria. Manasés ca llohui cüla mahuidantu mapu.

12 Huelu Manasés ñi pu che pepi nülafingün com feichi pu huaria. Pu Canaán che pilaingün ñi elcünual feichi mapu. 13 Doi nehuen-ngerpulu pu Israel che, elufingün pu Canaán che fütraque cüdau ñi femal, huelu huemünentulafingün* com pu Canaán che.

14 José ñi pu che feipifingün ta Josué: “Cuifi ta fantepu mu Chau Jehová rume fürenequeiñmu, feimu fentreleiñ iñchiñ. Fei sortiañmangelu ti mapu, ¿chemu elumuiñ* quiñe troquiñ mapu müten taiñ ngen-ngeal?”. 15 Josué huiñoldungueyu engün:* “Efraín ñi mahuidantu mapu rume pichilei tamün müleal. Feimu rume fentrelelu cai eimün, huechuaimün mahuida mu, fei pu perizita ca pu refaím che ñi mapu mu liftuaimün mapu tamün ngen-ngeal”. 16 Feimu José ñi pu che feipingün: “Duamnieiñ doi mapu, ti mahuidantu müten no. Cafei com pu Canaán che mülelu laf mapu mu nieingün hueichan carretela* ca tañi rueda meu yeniei fütra cuchillo,* ca femngechi femquei pu che mülelu Bet-Seán huaria ca tañi pichique huaria ca tati pu che mülelu Jezreel huaria ñi laf mapu mu”. 17 Feimu Josué feipifi tati pu che José tuhun-ngelu, tüfa ta Efraín ca Manasés: “Eimün rume fentreleimün ca rume nehuen-ngeimün. Quiñe troquiñ mapu müten elungelayaimün, 18 ca ngen-ngeaimün ti mahuidantu mapu. Anümcahuengei, huelu liftuafimün. Tüfa mu fentepuhuai tamün mapu. Huemünentuafimün* pu Canaán che nehuen-ngefule rume ca niefule rume engün hueichan carretela yenielu fütra cuchillo”.*

18 Fei hula com pu Israel che trahuluhui Siló huaria mu, fei engün deu nüfingün feichi mapu. Üye mu anümingün ti trahunhue tolto ruca.* 2 Huelu pu Israel che meu, petu mülehuei regle troquiñche elungenolu mapu tañi ngen-ngeal. 3 Feimu Josué feipifi pu Israel che: “Chau Jehová, tamün cuifiqueche ñi Ngünechen elueimünmeu feichi mapu, fei ¿tunteñmayai tamün amual ca ngen-ngerpual feichi mapu? 4 Cüpalelmuchi cüla huentru caque troquiñche mu. Huercüafiñ engün ñi huall püle miyahual mapu meu ca huirintucual ñi chumlen ti mapu tañi ngen-ngeel engün. Fei hula pemupayan. 5 Regle troquiñ mu hudamafimün ti mapu. Judá ñi troquiñche mülenagai huaihuen püle,* fei José ñi pu che mülenagai picun püle.* 6 Cafei huirintucuaimün ñi chumlen ti mapu ca hudamafimün regle troquiñ mu. Fei hula cüpalelmuan tamün huirintucuel, femngechi taiñ Chau Jehová ñi adquiñ mu, iñche sortiañmayan* tamün hudamelafiel ti mapu. 7 Huelu eimün tamün mapu meu, pu Leví che coneltulayai engün, doi mai Chau Jehová dullieyu engün ñi sacerdotengeal. Cafei tati pu che Gad ca Rubén tuhun-ngelu ca Manasés ñi rangiñ troquiñche deu llohuingün tañi mapu tripahue antü püle Jordán leufü mu. Moisés, Chau Jehová ñi cüdaufe, elueyu engün feichi mapu”.

8 Pu huentru pepicahuingün ñi amual, fei Josué feipifi pu huentru huirintucualu ñi chumlen ti mapu: “Amumün, huall püle miyahuaimün mapu mu ca huirintucuaimün ñi chumlen. Fei pemupayan fau Siló huaria mu. Femngechi Chau Jehová ñi adquiñ mu, iñche sortiañmayan tamün hudamelafiel ti mapu”. 9 Fei amuingün pu huentru, huall püle miyahuingün mapu mu, huirintucuingün ñi chumlen, fei regle troquiñ mu hudamfingün ti mapu tunten huaria ñi mülen. Cafei quiñe lifru mu com huirintucuingün. Dehuelcalu engün, pemefingün ta Josué, cheu ñi mülen tolto ruca Siló huaria mu. 10 Fei hula Siló huaria mu, Josué sortiañmai ñi hudamelafiel ti mapu, femi tüfa Chau Jehová ñi adquiñ mu. Üyeu Josué hudamelfi ti mapu pu Israel che, tunte tañi coneltulen.

11 Sortiañmangelu, elungei tañi mapu Benjamín ñi troquiñche, quisuque tañi familia engün. Feichi mapu mülerquei cheu ñi mülen ti mapu elungelu ta Judá ca José ñi pu che. 12 Picun püle Jordán leufü mu tuhui tañi mapu. Tati mapu pürapui ca fentepuhui inaltu Jericó huaria picun püle. Conantü püle pürapui mahuidantu mu, fei puhui huellin mapu* püllelelu Bet-Aven huaria mu. 13 Üyeu tati mapu amulerpui ca fentepuhui Luz huaria mu, inaltu huaihuen püle Luz huaria mu, tüfa ta Betel. Ti mapu nagpui ca fentepuhui Atarot-Addar huaria püle, fei amulerpui huaihuen püle mülechi mahuida nag Bet-Horón huaria mu. 14 Cheu ñi fentepuhun ti mapu amulerpui conantü püle. Huaihuen püle cheu ñi mülen ti mahuida ca Bet-Horón huaria, ti mapu huiñoi huaihuen püle. Fei afpui Quiryat-Baal huaria mu, tüfa ta Quiryat-Jearim, quiñe Judá huaria. Tüfa ta conantü püle.

15 Huaihuen püle ti mapu tuhui cheu ñi puhun Quiryat-Jearim huaria mu. Cafei cheu ñi fentepuhun ti mapu amulerpui conantü püle, fei amulerpui Neftóah pingechi huitrunco. 16 Tati mapu fentepuhui ca nagpui cheu ñi puhun ti mahuida mülelu Hinón ñi laf mapu mu,* tüfa mülei picun püle Refaím ñi laf mapu mu. Fei nagpui Hinón ñi laf mapu mu, inaltu pu jebuseo huaihuen püle ca nagpui En-Roguel pingechi rünganco.* 17 Tati mapu fentepuhui ca amulerpui picun püle, fei puhui En-Semes lof mu ca amulerpui Guelilot lof mu, mülelu itrotripa Adumim pingechi rüpü pürapulu ca nagpui Bohán ñi cura püle, Rubén ñi fotüm. 18 Cafei picun püle amulerpui inaltu huincul mu itrotripa Arabá mapu mu, fei nagpui Arabá mapu mu. 19 Cafei ti mapu amulerpui ca fentepuhui inaltu Bet-Hoglá huaria picun püle. Fei afpui inaltu ti Cotrü lafquen picun püle,* tüfa mülefui tati doi huaihuen püle Jordán leufü mu. Tüfa mu fentepuhui ti mapu huaihuen püle. 20 Tripahue antü püle ti mapu fentepuhui Jordán leufü mu. Tüfachi mapu ngen-ngefui Benjamín ñi pu che ca tañi familia engün, cheu ñi fentepuhun ti mapu tañi hualloñmanieteu.

21 Tüfa tati huaria nielu Benjamín ñi pu che ca tañi pu familia: Jericó, Bet-Hoglá, Émec-Queziz, 22 Bet-Arabá, Zemaraim, Betel, 23 Avim, Pará, Ofrá, 24 Kefar-Amoní, Ofní ca Gueba: mari epu huaria ca tañi pichique huaria.

25 Gabaón, Rama, Beerot, 26 Mizpé, Kefirá, Mozá, 27 Réquem, Irpeel, Taralá, 28 Zelá, Ha-Élef, Guibeá, Quiryat ca Jebusí, tüfa ta Jerusalén: mari meli huaria ca tañi pichique huaria.

Tüfa tati mapu ñi ngen-ngeel pu Benjamín che ca tañi pu familia.

19 Epuchi rupa sortiañmangelu,* elungei tañi mapu Simeón ñi troquiñche, quisuque ñi familia engün. Ti mapu elungelu tañi ngen-ngeal engün mülerquei rangiñ Judá ñi mapu mu. 2 Tüfachi huaria ngen-ngetuingün: Beer-Seba engu Seba, Moladá, 3 Hazar-Sual, Balá, Ézem, 4 Eltolad, Betul, Hormá, 5 Ziclag, Bet-Marcabot, Hazar-Susá, 6 Bet-Lebaot ca Saruhén. Mari cüla huaria ca tañi pichique huaria. 7 Cafei Ain, Rimón, Éter ca Asán. Meli huaria ca tañi pichique huaria. 8 Ca com tati pichique huaria hualloñmaniefilu feichi huaria puulu ta Baalat-Beer huaria, tüfa huaihuen Ramá pingequei ca.* Com tüfa ngen-ngetui Simeón ñi troquiñche, quisuque ñi familia engün. 9 Judá ñi troquiñche fentren mapu elungei. Feimu tañi troquiñ mapu mu ca hudamelngei mapu ñi ngen-ngeal Simeón ñi troquiñche. Feimu Simeón ñi pu che llohuingün mapu tañi ngen-ngeal cheu ñi mülen Judá ñi troquiñche.

10 Fei hula cülachi rupa sortiañmangelu, elungei tañi mapu Zabulón ñi troquiñche, quisuque ñi familia engün. Tañi mapu elungelu engün fentepuhui Sarid huaria mu. 11 Conantü püle tañi mapu pürapui ca fentepuhui Mareal lof mu, ca puhui Dabéset huaria mu, fei hula puhui laf mapu mu mülelu itrotripa Jocneam huaria. 12 Cafei Sarid huaria mu tañi mapu amulerpui tripahue antü püle, fei fentepuhui Kislot-Tabor huaria mu. Ca triparpui Daberat huaria, fei huechui ta Jafía lof mu. 13 Feita mu ti mapu amulerpui tripahue antü püle, fei puhui Gat-Héfer huaria, fei hula ta Et-Cazín lof, triparpui Rimón huaria ca puhui Neá pichi huaria. 14 Cafei ti mapu huiñomei ca fentepuhui picun püle,* amulerpui Hanatón huaria, fei afpui Iftá-El pingechi laf mapu. 15 Ca mülefui tüfachi huaria, Catat, Nahalal, Simrón, Idalá ca Belén. Mari epu huaria ca tañi pichique huaria. 16 Com tüfachi mapu elungei ñi ngen-ngeal Zabulón ñi pu che, quisuque ñi familia engün. Cafei elungei engün feichi huaria ca tañi pichique huaria.

17 Meli rupa sortiañmangelu engün, elungei tañi mapu Isacar ñi pu che, quisuque ñi familia engün. 18 Tañi mapu fentepuhui tüfachi huaria mu: Jezreel, Kesulot, Sunem, 19 Hafaraim, Shion, Anaharat, 20 Rabit, Quisión, Ébez, 21 Rémet, En-Ganim, En-Hadá ca Bet-Pazez. 22 Cafei tañi mapu fentepuhui ta Tabor, Sahazuma ca Bet-Semes mu, fei afpui Jordán leufü mu. Mari cayu huaria ca tañi pichique huaria. 23 Com tüfachi mapu elungei ñi ngen-ngeal Isacar ñi troquiñche, quisuque ñi familia engün. Cafei elungei feichi huaria ca tañi pichique huaria.

24 Fei quechu rupa sortiañmangelu, elungei tañi mapu Aser ñi troquiñche, quisuque ñi familia engün. 25 Tañi mapu fentepuhui tüfachi huaria mu: Helcat, Halí, Beten, Acsaf, 26 Alamélec, Amad ca Misal. Cafei conantü püle tañi mapu fentepuhui Carmelo mahuida mu ca Sihor-Libnat pingechi leufü. 27 Cafei tripahue antü püle tañi mapu amulerpui Bet-Dagón huaria mu ca puhui cheu ñi mülen Zabulón ñi troquiñche. Cafei picun püle ti mapu puhui Iftá-El pingechi laf mapu, ca Bet-Émec ca Neiel huaria mu. Cafei amulerpui huele püle Cabul huaria mu. 28 Ca puhui ta Ebrón, Rehob, Caná ca Hamón huaria, puulu ta Fütra Sidón huaria. 29 Tañi mapu fentepuhui ca huiñoi Ramá huaria ca puhui ti malaltuculechi huaria, Tiro pingelu. Cafei amulerpui Hosá huaria mu, fei afpui lafquen mu. Tüfachi troquiñ mapu mu mülefui tüfachi huaria: Aczib, 30 Umá, Afec ca Rehob: 22 huaria ca tañi pichique huaria. 31 Tüfachi mapu elungei ñi ngen-ngeal Aser ñi troquiñche, quisuque ñi familia engün. Cafei elungei feichi huaria ca tañi pichique huaria.

32 Cayu rupa sortiañmangelu, elungei tañi mapu Neftalí ñi pu che, quisuque ñi familia engün. 33 Cheu ñi fentepuhun tañi mapu tuhui Hélef mapu, cheu ñi mülen ti fütra anümca Zaananim mapu mu, amulerpui Adamí-Néqueb ca Jabneel mapu, fei puhui ta Lacum ca afpui Jordán leufü mu. 34 Conantü püle tañi mapu fentepuhui ca amulerpui Aznot-Tabor huaria mu, cafei puhui Hucoc huaria, fei puhui cheu ñi mülen Zabulón ñi troquiñche huaihuen püle.* Cafei conantü püle tañi mapu puhui cheu ñi mülen Aser ca Judá ñi troquiñche, Jordán leufü mu ñi tripahue antü püle. 35 Ca mülefui tüfachi malaltuculechi huaria: Zidim, Zer, Hammat, Racat, Kinéret, 36 Adamá, Ramá, Hazor, 37 Quedes, Edréi, En-Hazor, 38 Yirón, Migdal-El, Horem, Bet-Anat ca Bet-Semes. Mari ailla huaria ca tañi pichique huaria. 39 Tüfachi mapu elungei ñi ngen-ngeal Neftalí ñi troquiñche, quisuque ñi familia engün. Ca elungei feichi huaria ca tañi pichique huaria.

40 Regle rupa sortiañmangelu, elungei tañi mapu Dan ñi troquiñche, quisuque ñi familia engün. 41 Tüfa mu fentepuhui ti mapu elungelu engün: Zorá, Estaol, Ir-Semes, 42 Saalabín, Ayalón, Itlá, 43 Elón, Timná, Ecrón, 44 Eltequé, Guibetón, Baalat, 45 Jehúd, Bene-Berac, Gat-Rimón, 46 Me-Jarcón ca Racón. Cafei tañi mapu fentepuhui itrotripa Jope huaria mu. 47 Huelu Dan ñi mapu rume pichin-ngefui. Feimu püraingün Lésem huaria ñi hueichayafiel,* nüfingün, fei fütra cuchillo mu apümcafingün. Fei ngen-ngeingün ca mülenagpuingün Lésem huaria mu, huelu feula Dan pingetui chi huaria, femngechi pingequefui tañi cuifi lacu yem engün. 48 Tüfachi mapu elungei ñi ngen-ngeal Dan ñi troquiñche, quisuque ñi familia engün. Cafei elungei feichi huaria ca tañi pichique huaria.

49 Femngechi hudamfingün feichi mapu, fei ñi eluafiel pu Israel che tañi ngen-ngeal. Fei hula pu Israel che elufingün mapu ta Josué, Nun ñi fotüm. Feichi mapu ñi elungeel mülefui rangiñ cheu ñi mülen pu Israel che. 50 Jehová tañi pin mu elungei ta Josué feichi huaria tañi ngillatuel, Timnat-Sérah pingefui. Ca mülefui Efraín ñi mahuidantu mapu püle. Josué huiño deumatui chi huaria, üye mu mülenagpui.

51 Tati sacerdote Eleazar, pu loncolelu Israel ñi troquiñche mu ca Josué, Nun ñi fotüm, hudamingün ti mapu ñi eluafiel pu Israel che. Fei engün sortiañmai ti mapu Siló huaria mu. Femingün tüfa Jehová tañi adquiñ mu, conhue püle ti trahunhue tolto ruca mu.* Femngechi hudamcafingün ti mapu.

20 Fei hula Chau Jehová feipifi ta Josué: 2 “Feipifinge pu Israel che: ‘Dulliaimün huaria cheu ñi ellcahual che.* Tüfachi dungu feipifiñ ta Moisés, fei tamün nütramcalelafiel eimün. 3 Femngechi inei rume langümfile quiñe che,* fei ñi pinon ca tuntucufiel mu,* lefmahuai üye mu. Tüfachi huaria mu cuñiutucungeaimün, femngechi tamün penoaeteu ti langümngelu ñi pariente.* 4 Ti langümchelu mülei ñi lefmahual quiñe feichi huaria, fei huitracünuhuai huecun püle huaria ñi puerta mu ca mülei ñi feipiafiel chem ñi rupan tati pu loncolelu mülelu feichi huaria mu. Fei engün mülei ñi llohuafiel feichi che huaria mu ca eluafiel cheu tañi mülenagal, feitichi che mülenagai quisu engün meu. 5 Ti langümngelu ñi pariente* inantucuniefile tati langümchelu, fei engün ngelai ñi feipial “Tüfa ñi mülen, yetufimün”. Feichi che langümfi tañi chafche* tuntucufiel mu,* fei ñi üdenofiel mu. 6 Ti langümchelu mülenagai feichi huaria mu puule hula tañi juzgangeal ti trahunche ñi adquiñ mu.* Mülei ñi mülenagal feichi huaria mu lale hula ti hunen lonco sacerdote mülelu feichi antü mu. Fei hula ti langümchelu huiñotuafui tañi huaria mu cheu tañi lefmahun, fei conpuai tañi huaria ca tañi ruca mu’”.

7 Feimu tüfachi huaria huichucünulelfingün ta Chau Dios: Quedes, tüfachi huaria mülei Galilea troquiñ mapu, Neftalí ñi mahuidantu mapu püle. Siquem, tüfachi huaria mülei Efraín ñi mahuidantu mapu püle. Cafei Quiryat-Arbá, Hebrón ca pingequei, tüfachi huaria mülei Judá ñi mahuidantu mapu püle. 8 Ti troquiñ mapu tripahue antü püle Jordán leufü mu, püllelelu ta Jericó, dullingei ta Bézer, tüfachi huaria mülei huellin mapu,* huechuñ laf mapu cheu ñi mülen tañi mapu Rubén ñi troquiñche. Ramot, tüfachi huaria mülei Galaad mapu mu cheu ñi mülen tañi mapu Gad ñi troquiñche. Ca Golán, tüfachi huaria mülei Basán troquiñ mapu mu, cheu ñi mülen tañi mapu Manasés ñi troquiñche.

9 Tüfa tati pu huaria dullilelngelu com pu Israel che ca pu che cañpüle cüpalu mülelu quisu engün meu. Femngechi inei rume langümfile quiñe che, fei ñi pinon, lefmahuafui üye mu. Fei langümngelayafui petu ñi juzgangenon ti trahunche ñi adquiñ mu, ca ti langümngelu ñi pariente* diturpulayaeyu.

21 Fei hula pu loncolelu Leví tuhun-ngelu fülcontufingün* tati sacerdote Eleazar, pu loncolelu Israel ñi troquiñche mu ca Josué, Nun ñi fotüm. 2 Fei Canaán mapu, Siló huaria mu feipifingün: “Chau Jehová feipifi ta Moisés taiñ elungeal huaria cheu taiñ mülenagal ca taiñ elungeal püllelechi lelfün cachu ñi ütayal taiñ pu culliñ” pi engün. 3 Feimu Chau Jehová tañi pin mu, pu Israel che elufingün pu che Leví tuhun-ngelu quiñeque tañi elungeelchi huaria ca tañi lelfün cachu hualloñmalelu.

4 Fei sortiañmangelu engün,* hune tripai pu familia Cohat tuhun-ngelu. Ca pu Leví che tuulu ti sacerdote Aarón mu elungei ñi ngen-ngeal mari cüla huaria mülelu Judá ñi troquiñche, Simeón tañi troquiñche ca Benjamín ñi troquiñche mu.

5 Ca tati mülehuechi che Cohat tuhun-ngelu elungei mari huaria. Tüfachi huaria ngen-ngefui pu familia Efraín ñi troquiñche, Dan tañi troquiñche ca Manasés ñi rangiñ troquiñche.

6 Ca tati pu che Guersón tuhun-ngelu elungei mari cüla huaria. Tüfachi huaria ngen-ngefui pu familia Isacar ñi troquiñche mu, Aser tañi troquiñche, Neftalí tañi troquiñche ca Manasés ñi rangiñ troquiñche mülelu Basán troquiñ mapu mu.

7 Tati pu che Merarí tuhun-ngelu elungei mari epu huaria, quisuque ñi familia engün. Tüfachi huaria mülefui Rubén tañi troquiñche mu, Gad ñi troquiñche ca Zabulón tañi troquiñche mu.

8 Deu sortiañmalu engün, pu Israel che eluyefingün pu Leví che tüfachi huaria ca tañi lelfün cachu hualloñmalelu. Femingün chumngechi Chau Jehová huercüfi ta Moisés.

9 Judá ca Simeón ñi troquiñche mu elungei pu Leví che tüfachi huaria. Femngechi üitungequefui ti huaria. 10 Fei elungei pu familia Cohat tuhun-ngelu, quisu engün Aarón mu tuhui, Leví tañi troquiñche mu. Sortiañmangelu, fei engün hune tripaingün. 11 Elungeingün Quiryat-Arbá huaria ca tañi lelfün cachu hualloñmalelu. Quiryat-Arbá pingequefui Arbá ñi duam mu, Anac pingefui ñi fotüm. Feichi huaria Hebrón ca pingequei, mülefui Judá ñi mahuidantu mapu püle. 12 Huelu ti huaria ñi lelfün ca tañi pichique huaria elungei ñi ngen-ngeal ta Caleb, Jefuné ñi fotüm.

13 Ca tati sacerdote Aarón ñi pu fotüm elungei ti huaria cheu ñi ellcahual* pu langümchelu. Elungei ta Hebrón huaria ca tañi lelfün cachu hualloñmalelu, ca Libná huaria ca tañi lelfün cachu hualloñmalelu. 14 Cafei elungei Jatir huaria ca tañi lelfün cachu hualloñmalelu, Estemoa huaria ca tañi lelfün cachu hualloñmalelu, 15 Holón huaria ca tañi lelfün cachu hualloñmalelu, Debir huaria ca tañi lelfün cachu hualloñmalelu, 16 Ain huaria ca tañi lelfün cachu hualloñmalelu, Jutá huaria ca tañi lelfün cachu hualloñmalelu ca Bet-Semes huaria ca tañi lelfün cachu hualloñmalelu. Tüfa ailla huaria mülelu tüfachi epu troquiñche.

17 Benjamín ñi troquiñche mu elungei tüfachi huaria: Gabaón huaria ca tañi lelfün cachu hualloñmalelu, Gueba huaria ca tañi lelfün cachu hualloñmalelu, 18 Anatot huaria ca tañi lelfün cachu hualloñmalelu ca Almón huaria ca tañi lelfün cachu hualloñmalelu. Tüfa meli huaria.

19 Feimu pu sacerdote Aarón tuhun-ngelu elungeingün mari cüla huaria ca tañi lelfün cachu hualloñmalelu.

20 Ca tati mülehuechi pu familia Cohat tuhun-ngelu Leví ñi troquiñche mu elungeingün huaria mülelu Efraín tañi troquiñche mu. Sortiañmai tañi elungeal. 21 Elungeingün ti huaria cheu ñi ellcahual pu langümchelu. Elungei ta Siquem huaria ca tañi lelfün cachu hualloñmalelu, tüfa mülefui Efraín ñi mahuidantu püle. Ca elungei Guézer huaria ca tañi lelfün cachu hualloñmalelu, 22 Quibzaim huaria ca tañi lelfün cachu hualloñmalelu ca Bet-Horón huaria ca tañi lelfün cachu hualloñmalelu. Tüfa meli huaria.

23 Dan tañi troquiñche mu elungei tüfachi huaria: Eltequé huaria ca tañi lelfün cachu hualloñmalelu, Guibetón huaria ca tañi lelfün cachu hualloñmalelu, 24 Ayalón huaria ca tañi lelfün cachu hualloñmalelu ca Gat-Rimón huaria ca tañi lelfün cachu hualloñmalelu. Tüfa meli huaria.

25 Manasés tañi rangiñ troquiñche mu elungei tüfachi huaria: Taanac huaria ca tañi lelfün cachu hualloñmalelu ca Gat-Rimón huaria ca tañi lelfün cachu hualloñmalelu. Tüfa epu huaria.

26 Feimu tati mülehuechi pu familia Cohat tuhun-ngelu elungei mari huaria ca tañi lelfün cachu hualloñmalelu.

27 Cafei pu familia Guersón tuhun-ngelu Leví tañi troquiñche mu ca elungei huaria cheu ñi ellcahual pu langümchelu, feichi huaria mülefui cheu ñi mülen tañi mapu Manasés ñi rangiñ troquiñche. Tüfa ta Golán huaria ca tañi lelfün cachu hualloñmalelu, tüfa mülefui Basán troquiñ mapu mu. Ca elungei Beesterá huaria ca tañi lelfün cachu hualloñmalelu. Tüfa epu huaria.

28 Isacar tañi troquiñche mu elungei tüfachi huaria: Quisión huaria ca tañi lelfün cachu hualloñmalelu, Daberat huaria ca tañi lelfün cachu hualloñmalelu, 29 Jarmut huaria ca tañi lelfün cachu hualloñmalelu ca En-Ganim huaria ca tañi lelfün cachu hualloñmalelu. Tüfa meli huaria.

30 Aser tañi troquiñche mu elungei tüfachi huaria: Misal huaria ca tañi lelfün cachu hualloñmalelu, Abdón huaria ca tañi lelfün cachu hualloñmalelu, 31 Helcat huaria ca tañi lelfün cachu hualloñmalelu ca Rehob huaria ca tañi lelfün cachu hualloñmalelu. Tüfa meli huaria.

32 Neftalí tañi troquiñche mu elungei ti huaria cheu ñi ellcahual pu langümchelu, tüfa ta Quedes huaria ca tañi lelfün cachu hualloñmalelu, feichi huaria mülefui Galilea troquiñ mapu mu. Cafei elungei Hamot-Dor huaria ca tañi lelfün cachu hualloñmalelu ca Cartán huaria ca tañi lelfün cachu hualloñmalelu. Tüfa cüla huaria.

33 Feimu pu familia Guersón tuhun-ngelu elungeingün mari cüla huaria ca tañi lelfün cachu hualloñmalelu.

34 Ca tati mülehuechi familia Merarí tuhun-ngelu, Leví tañi troquiñche mu, fei engün elungei tüfachi huaria mülelu Zabulón tañi troquiñche mu: Jocneam huaria ca tañi lelfün cachu hualloñmalelu, Cartá huaria ca tañi lelfün cachu hualloñmalelu, 35 Dimná huaria ca tañi lelfün cachu hualloñmalelu ca Nahalal huaria ca tañi lelfün cachu hualloñmalelu. Tüfa meli huaria.

36 Rubén ñi troquiñche mu elungei tüfachi huaria: Bézer huaria ca tañi lelfün cachu hualloñmalelu, Jáhaz huaria ca tañi lelfün cachu hualloñmalelu, 37 Quedemot huaria ca tañi lelfün cachu hualloñmalelu ca Mefaat huaria ca tañi lelfün cachu hualloñmalelu. Tüfa meli huaria.

38 Gad tañi troquiñche mu elungeingün ti huaria cheu ñi ellcahual pu langümchelu, tüfa ta Ramot huaria ca tañi lelfün cachu hualloñmalelu, feichi huaria mülefui Galaad mapu mu. Ca elungei Mahanaim huaria ca tañi lelfün cachu hualloñmalelu, 39 Hesbón huaria ca tañi lelfün cachu hualloñmalelu ca Jazer huaria ca tañi lelfün cachu hualloñmalelu. Com tüfa meli huaria.

40 Feimu tüfachi pu familia Merarí tuhun-ngelu elungeingün mari epu huaria. Fei engün mülehuechi familia Leví tuhun-ngelu.

41 Fei tati pu Leví che elungeingün 48 huaria ca tañi lelfün cachu hualloñmalelu. Tüfachi mapu ñi elungeel engün mülei rangi pu Israel che mu. 42 Com tüfachi huaria nierquefui quiñe lelfün cachu hualloñmalelu. Feichi huaria com femngechi felefui.

43 Femngechi Chau Jehová elufi com tüfachi mapu pu Israel che, chumngechi tañi feipicünufiel* tañi cuifiqueche yem engün. Fei ngen-ngetuingün ca mülenagingün tüfachi mapu mu. 44 Cafei Chau Jehová elufi tañi tüngcüleal engün* fill mapu püle, chumngechi ñi feipicünufiel tañi cuifiqueche yem. Fei quiñe caiñe no rume pepi caiñetulaeyu. Chau Jehová elcünulelfi tañi pu caiñe pu Israel che ñi cuhu mu. 45 Com ti cümeque dungu ñi feipicünufiel Chau Jehová pu Israel che com huechutripai, quiñe no rume femtripalai pilayafuiñ.

22 Fei hula Josué trahulfi pu che Rubén ca Gad tuhun-ngelu, ca Manasés ñi rangiñ troquiñche. 2 Feipifi engün: “Eimün femqueimün com tamün feipieteu Moisés, Chau Jehová ñi cüdaufe. Ca inanieimün com tamün huercüfiel iñche. 3 Com tüfachi tripantu ca fantepu meu quisucünuquelafimün tamün pu peñi. Ca femürpuimün com ñi huercüel tamün Chau Jehová. 4 Feula tamün Chau Jehová elueyu tüngün* tamün pu peñi, chumngechi tañi feipicünuel. Feimu feula huiñotuaimün tamün tolto ruca mu,* huiñotuaimün tamün mapu tamün elungeel nometu Jordán leufü.* Feichi mapu elueimünmeu Moisés, Chau Jehová tañi cüdaufe. 5 Huelu eluucülemün tamün cüme inayal Chau Ngünechen ñi huercün dungu ca tati ley dungu tamün elueteu Moisés, Chau Jehová ñi cüdaufe. Piuqueyenieafimün tamün Chau Jehová, rumel miyauqueaimün tañi rüpü mu, inanieafimün tañi huercün dungu, quiñeucülequeaimün quisu meu ca cüdahuelnieafimün com tamün piuque ca com tamün mongen mu”.*

6 Fei hula Josué ngillatuñmafi engün ca peucayal pifi. Fei amutuingün tañi tolto ruca mu. 7 Moisés deu elufi mapu ñi ngen-ngeal Manasés ñi rangiñ troquiñche, feichi mapu mülei Basán mapu mu. Ti cangelu rangiñ troquiñche, Josué elufi mapu conantü püle Jordán leufü mu, femngechi ñi quiñentrür müleal tañi pu peñi engün. Cafei huiñotulu tañi tolto ruca mu engün, Josué ngillatuñmafi 8 ca feipifi: “Huiñotumün tamün tolto ruca mu, itrofillem yeaimün, fentren culliñ, plata, oro,* cobre, pañillhue* ca rume fentren tacun. Yeñmutumün chem tamün hueufiel tamün pu caiñe ca hudamelafimün tamün pu peñi”.

9 Rupan mu tüfa, pu che Rubén ca Gad tuhun-ngelu ca Manasés ñi rangiñ troquiñche huichuingün pu Israel che engün. Elcünuingün Siló huaria mülelu Canaán mapu mu, fei huiñotuingün Galaad mapu mu. Tüfachi mapu elungeingün ñi ngen-ngeal ca fau mülenagingün chumngechi Jehová feipifi ta Moisés. 10 Tati pu che Rubén ca Gad tuhun-ngelu ca Manasés ñi rangiñ troquiñche puhuingün Canaán mapu mu püllelelu Jordán leufü püle. Üyeu deumaingün quiñe altar inaltu Jordán leufü mu, quiñe afmatufalchi fütra altar. 11 Pichi rupalu, caquelu pu Israel che allcüntucuingün tüfachi dungu: “¡Tüfei! Pu che Rubén ca Gad tuhun-ngelu ca Manasés ñi rangiñ troquiñche deumaingün quiñe altar, mülei cheu ñi fentepuhun Canaán ñi mapu. Feichi mapu elungei pu Israel che ñi ngen-ngeal conantü püle Jordán leufü mu”. 12 Quimlu pu Israel che, com engün* trahuluhuingün Siló huaria mu ñi hueichameafiel engün.*

13 Feimu pu Israel che huercüfingün ta Finehás, ti sacerdote Eleazar ñi fotüm, Galaad mapu mu. Tüfa mu mülefui pu che Rubén ca Gad tuhun-ngelu ca Manasés ñi rangiñ troquiñche. 14 Ca compañeyu mari loncolelu caque quiñeque Israel troquiñche mu. Caque quiñeque familiahuen* Israel mu, com engün ngen familiangeingün chau püle. 15 Puulu engün Galaad mapu mu, cheu ñi mülen pu che Rubén ca Gad tuhun-ngelu ca Manasés ñi rangiñ troquiñche, feipifingün:

16 “Tüfa ñi feipin Chau Jehová ñi pu che: ‘Tamün femün meu, ¿chumngelu* caiñetuquefimün pu Israel che ñi Ngünechen? Eimün deumaimün quiñe altar, fei caiñetuquefimün ta Chau Jehová, feimu fachantü inahuelafimün ta Chau Jehová. 17 ¿Pichin dungu troquifimün am taiñ fütra culpan* Peor huaria mu? Castigangelu rume Jehová ñi pu che quiñe huesa cutran mu, fantepu meu petu cutrancaucüleiñ taiñ huesa femün mu. 18 ¡¿Eimün inahuelayafimün ta Chau Jehová?! Fachantü caiñetufilmün ta Chau Jehová, hule Chau Dios illcutuafi* com pu Israel che. 19 Huelu raquiduamülmün ñi podcülen tamün mapu Chau Ngünechen ñi adquiñ mu, amuaimün Chau Jehová ñi mapu mu, cheu ñi mülen Jehová ñi tolto ruca. Fei iñchiñ mu mülenagaimün. Huelu caiñetulayafimün ta Chau Jehová. Taiñ Chau Jehová niei quisu ñi altar, duamfalngelai cangelu. Eimün tamün femün mu Chau Dios ñi caiñe troquingeafuiñ. 20 Acán, Zérah ñi fotüm, culpaconi.* Fei nüi feiti felelu ñi apümcangeal. Femngechi femlu, Chau Ngünechen illcutufi* com pu Israel che. Tüfachi huentru müten lalai tañi huesa femün mu’”.

21 Fei hula pu che Rubén ca Gad tuhun-ngelu ca Manasés ñi rangiñ troquiñche feipifingün pu lonco Israel ñi familiahuen:* 22 “¡Chau Jehová doi alüpüralei caquelu pu dios! ¡Chau Jehová doi alüpüralei caquelu pu dios! Quisu quimi, pu Israel che ca quimai. Chau Jehová, caiñetuuliyiñ ca feyentuunoliyiñ ta eimi, montulmulayaiñ fachantü. 23 Deumaliyiñ quiñe altar taiñ inahuenoafiel ta Jehová, fei tüfa mu hul-liyiñ lüpümngeelchi chalintucun,* fillque fün ca chalintucun quiñentrür ingequelu, Chau Jehová castigayaiñmeu taiñ feyentunon mu. 24 Huelu iñchiñ femngechi femlaiñ. Ca dungu huesa duamelqueiñmu, feimu femiyiñ. Fei feipiyiñ: ‘Cüpalechi antü mu, eimün tamün pu yall feipiafingün iñchiñ taiñ pu yall: “¿Eimün chumconpaimün* Jehová mu, pu Israel che ñi Ngünechen? 25 Chau Jehová elcünufi ti Jordán leufü, tüfa mu fentepuhui eimün ca iñchiñ taiñ mapu, pu Rubén che ca pu Gad che. Eimün chumconpalaimün* Jehová mu”. Tamün pu yall catrütuafi taiñ pu yall ñi poyeafiel* ta Chau Jehová’.

26 Feimu feipiyiñ: ‘Eluhuaiñ taiñ deumayal quiñe altar, huelu hultuculayafiyiñ lüpümngeelchi culliñ ca chalintucun no rume, 27 doi mai tüfachi altar pengelaiñmu iñchiñ, taiñ pu cüpanche ca eimün, taiñ serfiniefiel ta Chau Jehová. Chau Ngünechen ñi adquiñ mu hulqueiñ lüpümngeelchi culliñ, taiñ chalintucun ca chalintucun quiñentrür ingequelu. Femngechi cüpalechi antü mu, tamün pu yall feipilayafi taiñ pu yall: “Eimün chumconpalaimün* Jehová mu”’. 28 Feimu feipiyiñ: ‘Cüpalechi antü mu tüfachi dungu feipingeliyiñ cam taiñ pu cüpanche, iñchiñ feipiafiyiñ engün: “Peaimün ti altar ñi deumael taiñ pu fütaqueche, trüri Chau Jehová ñi altar mu. Deumangelai ñi hulal lüpümngeelchi culliñ ca chalintucun no rume. Doi mai pengeleiñmu iñchiñ ca eimün taiñ serfiniefiel ta Chau Dios”’. 29 ¡Iñchiñ turpu caiñetulayafiyiñ ta Chau Jehová! ¡Turpu elcünulayafiyiñ taiñ inanieafiel ta Jehová! Itrotripa Chau Ngünechen ñi tolto ruca mu mülei Chau Jehová ñi altar, huelu iñchiñ deumamequelaiñ cangelu altar taiñ hulal lüpümngeelchi culliñ, fillque fün ca chalintucun” pi engün.

30 Pu loncolelu ca ti pu lonco Israel ñi familiahuen* conpañniefingün Finehás, ti sacerdote. Fei com engün allcüingün ñi feipin pu che tuhun-ngelu Rubén, Gad ca Manasés tañi troquiñche mu. Fei cüme duamcülehueingün. 31 Fei Finehás, ti sacerdote Eleazar tañi fotüm, feipifi pu che Rubén, Gad ca Manasés tuhun-ngelu. Tüfa ta feipi: “Feula quimiyiñ Chau Jehová mülei iñchiñ mu. Eimün caiñetulafimün ta Jehová. Eimün montulmuiñ taiñ castiganoaeteu Chau Jehová”.

32 Fei hula pu loncolelu ca Finehás, ti sacerdote Eleazar ñi fotüm, elcünufingün pu che Rubén ca Gad tuhun-ngelu Galaad mapu mu. Fei huiñotuingün Canaán mapu mu ca feipipatufingün chem ñi rupan caquelu pu Israel che. 33 Fei pu Israel che cüme duamcülehueingün chem tañi feipingepatun. Fei pu Israel che püramyefingün ta Chau Ngünechen. Ca chem feipihuelaingün ñi hueichameafiel pu che Rubén ca Gad tuhun-ngelu, fei ñi apümcayafiel engün.

34 Fei pu che Rubén ca Gad tuhun-ngelu üituculelfingün ti altar.* Tüfa feipingün: “Tüfachi altar pengeleiñmu taiñ serfiniefiel Chau Jehová, tati rüfngechi Ngünechen”.

23 Fentren antü rupalu, Jehová elufi pu Israel che ñi ürcütuleal com tañi pu caiñe mu ñi hualloñmanieteu. Fei Josué rume füchai ca fentren tripantu yeniei ñi mongelen. 2 Josué trahulfi com pu Israel che, pu fütaqueche, pu lonco, ti pu juez ca pu loncolelu ti pu che mu. Fei feipifi engün: “Deu rume füchan ca fentren tripantu mongelen. 3 Eimün penieimün com ñi femfiel tamün Chau Jehová tüfachi pu troquiñche, eimün tamün duam mu. Tamün Chau Ngünechen Jehová hueichaquefui eimün meu.* 4 Peaimün, iñche hudamfiñ mapu* tamün troquiñche ñi ngen-ngeal. Feichi mapu ñi niequefel tati mülehuechi troquiñche ca pu troquiñche iñche ñi apümcafiel. Fei tuhui Jordán leufü ca puhui ti Fütra lafquen* conantü püle. 5 Tamün Chau Ngünechen Jehová nehuen mu püntünentufi feichi troquiñche eimün tamün adquiñ mu. Eimün tamün duam mu, huemünentufi.* Fei hula eimün ngen-ngetuimün feichi mapu, chumngechi tamün Chau Jehová feipicünueimünmeu.

6 Feula eimün mülei tamün nehuen piuquecünuhual, fei ñi inayal ca femal com chi dungu huirintuculelu ti lifru nielu Moisés ñi ley dungu, femngechi turpu huelu amunoal man püle cam huele püle no rume. 7 Ca turpu reyüconlayaimün* tüfachi troquiñche rangiñ mülelu eimün meu. Üituñmalayafimün tañi dios engün, quisu engün mu feipicünulayaimün,* turpu poyelayafimün ca pochongnaglayaimün quisu engün mu.* 8 Huelu mai mülei tamün quiñeucüleal tamün Chau Ngünechen Jehová, chumngechi tamün femmequen ta fantepu mu. 9 Eimün tamün adquiñ mu, Jehová huemünentuafi* fütraque nehuen-ngechi troquiñche. Cuifi ca fantepu mu inei no rume pepi chaftuquelaeimünmeu. 10 Quiñe che müten eimün mu huehuafi huaranca che,* tamün Chau Ngünechen Jehová hueichamequei eimün mu, chumngechi tamün feipicünueteu. 11 Feimu rumel llihuatuleaimün* ca piuqueyenieafimün ta Jehová, tamün Chau Ngünechen.

12 Huelu eimün huelu amulmün ca quiñehulmün tati pu mülehuechi troquiñche mülelu eimün meu, fei epuñpüle niehulmün ca epuñpüle hueniyehulmün tüfachi troquiñche engün, 13 rüfcünu quimtucunieaimün Chau Jehová tamün Ngünechen huemünentulayafi* tüfachi troquiñche mülelu eimün meu. Tüfachi pu troquiñche llasu ca huachi reque feleai eimün meu, huimaca reque feleai tamün furi püle ca chacai reque feleai* tamün nge mu, fei ngehuetunolmün hula tüfachi cüme mapu tamün elueteu tamün Chau Jehová.

14 Allcütumuchi, feula epe lalen iñche, huelu eimün com tamün piuque ca com tamün mongen meu* quimnieimün tüfachi dungu: com tati cümeque dungu tamün feipicünueteu tamün Chau Jehová, com huechutripai. Com femtripai eimün tamün duam mu. Quiñe no rume femtripalai pilayafuiñ. 15 Felei llemai, chumngechi femtripai com ti cümeque dungu tamün feipicünueteu Chau Jehová, ca femngechi Chau Jehová eluaimünmeu com tati huesaque dungu tamün feipicünueteu ca apümcayaimünmeu. Fei mülehuetulayaimün tüfachi cüme mapu mu tamün elueteu tamün Chau Jehová. 16 Chau Jehová elueimünmeu quiñe eldungu tamün femal, huelu femnolmün, eluhulmün tamün serfiafiel caquelu dios ca pochongnagülmün quisu engün meu, fei Chau Jehová rume fütra illcutuaimünmeu.* Feica müten ngehuetulayaimün tüfachi cüme mapu mu tamün elueteu Chau Dios”.

24 Fei hula Josué trahulfi com Israel ñi troquiñche Siquem huaria mu, cafei trahulfi Israel ñi pu füchaqueche, pu loncolelu, pu juez ca tati pu loncolelu pu che mu. Fei engün huitrapuingün Chau Ngünechen ñi adquiñ mu. 2 Josué feipifi com pu che: “Tüfa ñi feipin Chau Jehová, pu Israel che ñi Ngünechen: ‘Fütra cuifi mu tamün cuifiqueche mülefuingün nometu Leufü mu.* Fei engün poyequefuingün caquelu dios. Quiñe tüfa Taré, Abrahán ca Nacor ñi chau.

3 Rupalu ta antü, nometu Leufü mu cüpalfiñ tamün lacu Abrahán. Feipifiñ ñi miyahual com Canaán mapu mu ca femün ñi doi alün-ngerpual tañi pu che. Elufiñ ta Isaac, 4 fei hula Isaac nietui epu fotüm, Jacob ca Esaú pingei engu. Iñche elufiñ ta Esaú ñi ngen-ngeal Seír pingechi huincul. Fei Jacob ca tañi pu yall amuingün Egipto mapu mu. 5 Rupan mu ta antü, huercüfiñ ta Moisés ca Aarón, fei huercüfiñ huesaque dungu Egipto mapu mu. Fei hula entuhuiyiñ üye mu. 6 Iñche entumequefun tamün pu chau Egipto mapu mu, fei eimün puhuimün lafquen mu. Feichi mu pu Egipto che inantucufingün tamün pu chau puulu hula Quelü lafquen mu, yenieingün carretela* ñi hueichayal* ca ti pu püracahuellulelu. 7 Tamün pu chau eluhuingün ñi llellipuafiel ta Chau Jehová, feimu Chau Dios tucui quiñe tromü dumiñcülelu rangiñ eimün mu ca pu Egipto che, fei tacucünufi engün lafquen mu. Eimün cüme pefimün tañi femün iñche Egipto mapu mu. Fei hula fentren tripantu* mülequefuimün huellin mapu mu.*

8 Cafei yehuiyiñ ta eimün nometu Jordán leufü püle,* cheu ñi mülen pu amorreo che. Fei engün hueichaeimünmeu. Huelu hultucufiñ engün eimün tamün cuhu mu, femngechi eimün tamün ngen-ngeal tañi mapu engün. Fei eimün tamün adquiñ mu, apümcafiñ engün. 9 Huelu Moab tañi lonco ülmen, Balac pingei, Zipor pingei ñi chau, hueichafi pu Israel che. Fei quisu mütrümfalfi* ta Balaam, Beor ñi fotüm, tamün malisiangeal. 10 Huelu iñche cüpa allcütulafiñ ta Balaam. Feimu iñche tañi pin mu, quisu fentren rupa füreneeimünmeu, femngechi iñche montuluhuiyiñ quisu tañi cuhu mu.

11 Eimün noimün ti Jordán leufü, fei puhuimün Jericó huaria mu. Fei hula hueichaeimünmeu pu loncolelu* Jericó huaria mu, pu Canaán che ca pu Het che,* pu amorreo, pu perizita, pu guirgaseo, pu heveo ca pu jebuseo che. Huelu iñche hultucufiñ engün eimün tamün cuhu mu. 12 Eimün tamün adquiñ mu, femün ñi ngañhuadnagal engün.* Feimu feiti pu che lefmahuingün eimün mu, chumngechi ñi femün pu amorreo che ñi epu lonco ülmen. Tami fütra cuchillo ca tami arco meu no rume leftripalaingün. 13 Cüdautulaimün rume, fei eluhuiyiñ tamün mapu ca fillque huaria tamün deumanoel. Tüfa mu mülenagimün. Anümlaimün ofad anümca ca olivo anümca no rume, huelu imequeimün ñi fün’.

14 Feimu rume yamnieafimün* ta Chau Jehová, lif piuque mu serfiafimün* ca rumel feyentunieafimün.* Tamün cuifiqueche serfiquefuingün caquelu dios nometu Leufü mu ca Egipto mapu mu, huelu entuafimün feichi dios, fei serfiafimün ta Chau Jehová. 15 Huelu cümenolu troquifilmün tamün serfiafiel ta Chau Jehová, fachantü dulliaimün inei tamün serfiafiel: feichi pu dios tamün cuifiqueche ñi serfiquefiel nometu Leufü mu cam pu amorreo che ñi pu dios, fei engün ngen-ngefuingün feichi mapu cheu tamün mülen. Huelu iñche ca tañi pu che serfiafiyiñ ta Chau Jehová”.

16 Feimeu müten tati pu che feipingün: “Turpu raquiduamlayafuiñ taiñ elcünuafiel ta Chau Jehová, fei ñi serfiafiel caquelu dios. 17 Taiñ Chau Ngünechen Jehová entueiñmu iñchiñ ca taiñ pu chau Egipto mapu mu, feichi mapu mu esclavongefuiñ. Chau Ngünechen femi fütraque afmatun dungu iñchiñ taiñ adquiñ mu. Ca cuñiutucueiñmu com ti rüpü taiñ miyauquefel ca com tati huaria taiñ rupaquefel. 18 Chau Jehová huemünentufi* com pu troquiñche ca pu amorreo che. Fei engün mülefuingün feichi mapu petu taiñ puunon iñchiñ. Feimu iñchiñ serfiafiyiñ ta Chau Jehová, quisu taiñ Ngünechen ngen”.

19 Fei hula Josué feipifi tati pu che: “Eimün, ¿rüf serfipeafimün mai ta Jehová? Chau Ngünechen lifngei, Chau Dios iñche müten poyemuchi piquei. Rulpacünulayai tamün huelulcan* ca tamün culpan no rume.* 20 Cuifi, Chau Ngünechen femi cümeque dungu eimün tamün duam mu, huelu eimün elcünufilmün ta Chau Jehová, fei poyefilmün pu ca cüpanche ñi pu dios, fei castigayaimünmeu ca apümcayaimünmeu”.

21 Huelu tati pu che feipifi ta Josué: “¡Turpu femlayaiñ, iñchiñ serfiafiyiñ ta Chau Jehová!”. 22 Fei Josué feipifi tati pu che: “Eimün cüme quimnieimün, quisu tamün pin mu dullimün tamün serfiafiel ta Chau Jehová”. Fei tati pu che feipingün: “Mai, quimnieiñ tati”.

23 Fei hula Josué feipi: “Feimu llemai, entuafimün pu ca cüpanche ñi pu dios rangiñ eimün mu mülelu, fei com tamün piuque mu serfiafimün ta Chau Jehová, pu Israel che ñi Ngünechen”. 24 Tati pu che feipifi ta Josué: “¡Serfiafiyiñ taiñ Chau Jehová, allcütuafiyiñ ñi dungun!”.

25 Feichi antü, Josué eldungucünui tati pu che engün. Fei Siquem huaria mu elufi engün quiñe ley ca quiñe huercün dungu tañi inangeal. 26 Fei Josué huirintucui tüfachi dungu tati lifru nielu Chau Ngünechen ñi ley. Ca miñche fütra anümca tucui quiñe fütra cura, tüfachi fütra anümca inafülcülei feichi mülehue huichucünulelngelu ta Chau Jehová.

27 Josué amulei ñi feipifiel tati pu che: “¡Ngüneduamaimün! Tüfachi cura allcüi com taiñ feipieteu Chau Jehová. Pefilmün tüfachi cura acordayaimün* Chau Dios ñi feipin, femngechi iñche quimlafiñ ta Chau Dios pilayaimün”. 28 Fei hula Josué peucayal pifi tati pu che, fei quisuque engün amutui tañi mapu mu.

29 Rupalu tüfachi dungu, Josué, Nun ñi fotüm, Chau Jehová ñi cüdaufe, lai nielu 110 tripantu. 30 Rüngaltucungei Timnat-Sérah huaria mu. Feichi mapu elungei ta Josué, mülefui Efraín ñi mahuidantu mapu mu ca picun püle* mülefui Gaas pingechi huincul. 31 Tunten tripantu ñi mongelen Josué, pu Israel che serfifingün ta Chau Jehová. Ca femngechi femingün, com ti tripantu ñi mongelerpun pu loncolelu mülelu deu ñi lan ta Josué. Tüfa engün quimniefuingün com ñi femün Jehová pu Israel che ñi duam mu.

32 Egipto mapu mu, pu Israel che cüpalingün José ñi foro. Fei rüngaltucufingün Siquem huaria mu, Jacob ñi ngillaelchi mapu. Jacob cullifi pataca troquiñ plata Hamor ñi pu fotüm, Siquem tañi chau. José ñi pu fotüm ngen-ngetuingün feichi mapu.

33 Cafei lai Eleazar, Aarón tañi fotüm. Feimu rüngaltucungei tati huincul ngen-ngelu tañi fotüm, Finehás pingelu. Feichi huincul elungei Efraín ñi mahuidantu mapu mu.