RUT

1 Feichi antü cüdaumequelu* pu juez, acurumei quiñe fütra filla Israel mapu mu. Mülerquei quiñe huentru Belén huaria mu, tüfa Judá mapu mu mülei. Fei amui cañpüle tañi domo engu ca tañi epu fotüm. Huiñamtuhuingün Moab mapu mu. 2 Ti huentru Elimélec* pingefui, tañi domo Noemí,* ca tañi epu fotüm Mahlón* ca Kilión* pingefui engu. Tuhurqueingün Efrata mu, tüfa ca feipingequefui Belén Judá mapu mu. Fei puhuingün Moab mapu mu, tiye mu mülenagpuingün.

3 Petu ñi mülen üyeu, Elimélec lai. Feimu tañi domo Noemí ca tañi epu püñeñ quisulehueingün. 4 Rupachi antü, tañi epu püñeñ quintuingu domo Moab mapu mu. Orpá ca Rut pingefui engu. Üye mu mari tripantu mülepuingün. 5 Huelu Mahlón ca Kilión ca laingu. Feimu Noemí niehuetulai tañi huentru ca tañi epu püñeñ. 6 Mülelu Moab mapu mu, Noemí allcüi Chau Jehová huiño cümelcatufi tañi pu che ca elutufi iyael.* Feimu eluhui ñi huiñotual tañi mapu mu tañi epu nanüng engün.

7 Noemí ca tañi epu nanüng tripaingün cheu ñi mülequefel. Petu ñi amulen engün Judá mapu mu, 8 Noemí feipifi tañi epu nanüng: “Doi cümeafui tamu huiñotual tamu ñuque ñi ruca mu. Eimu piuqueyefimu* tañi epu püñeñ* ca iñche, fei Chau Jehová ca femngechi piuqueyeaimu. 9 Chau Jehová quisuque eluaimu tamu fütangeal ca tamu cüme feleal”.* Fei Noemí truyufi* tañi epu nanüng, feimeu müten eluhuingu ñi ngümacahual. 10 Fei feipingu: “Femlayayu, huiñotulayayu. Quisucünuulayayiñ ca müleayu tami pu che mu”. 11 Noemí feipifi: “Huiñotuaimu saquinque püñeñ. ¿Chumngelu am ta* femaimu? ¿Ca nieafun püñeñ tamu nieaeteu? 12 Huiñotumu saquinque püñeñ, amutumu. Iñche deu cusen tati, tañi huiño fütangeal. Tüfachi pun müten fütangefuli ca niefuli püñeñ, 13 ¿üngümcüleafuimu tañi fütraque huentrungeal, fei tamu nieafeteu? ¿Eluucüleafuimu mai tamu nienoal huentru fentren tripantu? Felelai tati, saquinque püñeñ. Jehová cutrancamequeneu.* Tüfachi dungu mu eimu ca cutrancaumequeimu, feimu iñche rume cutrantupiuquemequen”.

14 Fei huiño ngümacahuingün. Orpá truyufi* tañi nanüng, fei amutui. Huelu Rut pilai ñi elcünuafiel ta Noemí. 15 Feimu Noemí feipifi: “¡Tüfei! Orpá huiñotui tañi pu che mu ca tañi pu dios mu, inafinge”.

16 Huelu Rut feipi: “¡Feipiqueeli! Iñche elcünulayayu ca quisucünulayayu. Cheu rume amulmi, iñche ca amuan. Cheu umalmi, iñche ca umayan. Tami pu che, iñche tañi pu chengeai. Tami Dios, iñche tañi Dios ngeai. 17 Cheu lalmi, iñche ca layan, ca fei mu rüngaltucungean. Petu tañi mongelen elcünulayayu. Femli, Chau Jehová rume cutrancayaeneu”.

18 Rut pilai ñi quisucünuafiel ta Noemí, feimu Noemí chem dungu rume feipihuelai. 19 Fei trecacünuhuingu ñi puhual ta Belén mu. Quimlu tati pu che ñi acun engu, afmatuingün. Pu domo ramtuingün: “¿Rüfcünu ta Noemí?”. 20 Fei Noemí* huiñoldungufi* pu domo: “Chau Ngünechen* rume cutrantupiuquemequeneu, feimu Mara* pingean, Noemí pingehuelayan. 21 Tripalu iñche ta tüfa meu, niefun com tañi duamnieel. Feula huiñotun, huelu niehuelan chem no rume Jehová ñi duam mu. ¿Chumngelu* Noemí pingequen? Chau Jehová cutrancamequeneu, Chau Ngünechen rume hueñancülqueneu”.

22 Femngechi Noemí elcünui Moab mapu, fei huiñotui tañi mapu mu. Compañeyu tañi nanüng Rut, Moab tuhun-ngelu. Puulu engu ta Belén, hue cosechamequengerquei ti cahuella.*

2 Noemí tañi füta yem, Elimélec pingefui. Niefui quiñe pariente, Boaz pingei. Ricu huentrungei.

2 Rut ti Moab domo feipifi ta Noemí: “Eluen tañi amual lelfün meu, femngechi quiñe che füreneafeneu. Fei iñche inaleafun quisu meu ca üñiftumeafun”.* Noemí feipieyu: “Amunge saquin püñeñ”. 3 Fei Rut amui ca inalen pu cüdaufe mu eluhui ñi üñiftual. Fei puhurquei Boaz ñi lelfün meu, Elimélec ñi pariente. 4 Feichi meu müten, Boaz cüpalu Belén mu, acurumei. Fei feipifi tañi pu cüdaufe: “Chau Jehová mülepe eimün meu”. Fei huiñoldungufingün:* “Jehová cümelcayaimu”.

5 Fei Boaz ramtufi tati loncolelu tañi pu cüdaufe meu: “Feitichi üllcha domo, ¿chem familia mu cüpai?”. 6 Ti loncolechi cüdaufe feipi: “Moab mapu mu tuhui, acui Noemí engu. 7 Ti üllcha domo feipieneu: ‘¡Füreneen! ¿Eluafen ñi üñiftual ti cahuella* pu cüdaufe ñi catrüfiel?’.* Pulihuentu ñi cüdaumequen, fentecünulai. Tüfa hula anücünuhui miñche llamasa* tañi pichi ürcütual”.

8 Fei hula Boaz feipifi ta Rut: “Allcütunge saquin ñahue. Cañpüle amulayaimi tami üñiftual. Mülecange tüfa mu. Inafülcülenge cheu ñi cüdaumequen pu üllchaque domo. 9 Ngüneduamnge cheu ñi cüdaumequen engün, fei ca amuaimi. Deu feipifiñ pu hueche huentru tami huesa femnoaeteu. Huihulmi, amunge cheu ñi mülen tati metahue co, fei pütocoaimi ti co ñi entuqueel pu huecheque huentru”.

10 Rut allcülu müten Boaz tañi feipieteu, pochongnagi.* Fei ramtui: “¿Chumngelu am* fente quelluen? Iñche cañpüle cüpan, ¿chumngelu am ta fente füreneen?”. 11 Boaz huiñoldungueyu:* “Allcün com tami femün tami nanüng meu deu lalu tami huentru. Elcünuimi tami chau, tami ñuque, tami mapu, tami puhual ca mapu, fei tami quimnofiel. 12 Chau Jehová cümelcayaimu tami femün mu. Chau Jehová, Israel ñi Ngünechen, eluaimu fütra cümelcan, quintufilu am eimi tami cuñiutucuaeteu”.* 13 Rut feipifi: “Ñidol, cutranpiuqueyeen, yafültucuen, feimu rume mañumeyu. Iñche, eimi tami cüdaufe no tati, huelu tami feipin yafültucueneu”.*

14 Puulu ti hora ñi yafütual engün, Boaz feipifi ta Rut: “Cüpange, nünge pichin cofque ca huifontucunge* cotrü pulcu mu”.* Fei Rut anücünuhui inafül pu cüdaufe meu. Boaz elufi cotülechi fün. Fei ilu, huedai ca sofranentui. 15 Rut huitralu ñi üñiftual, Boaz feipifi tañi pu cüdaufe: “Elufimün ñi üñiftual catrülechi cahuella,* chem pilayafimün. 16 Ca ütrüfnacümelafimün pichin cahuella deu tamün trapümnieel, quisu tañi üñiftual. Femlayaimi pilayafimün”.

17 Rut com antüi ñi üñiftumequen. Entuñmafi ñi fün ti lonco cahuella ñi üñiftuel, fei trapümi mari cüla kilo peno.* 18 Rut huiñotui tati huaria meu ca yeniei com tañi trapümel. Fei pengelelfi tañi nanüng com tañi üñiftuel ca elufi ti iyael ñi sofranentuel.

19 Tañi nanüng ramtueyu: “¿Cheu üñiftupeimi fachantü? ¿Cheu am cüdahuimi? Chau Dios cümelcape feichi che tami füreneeteu”. Fei Rut feipifi inei elueyu cüdau. Feipi: “Ti huentru tañi elueteu cüdau Boaz pingei”. 20 Allcülu müten Noemí, feipi: “Chau Jehová cutranpiuqueyefi* pu lalu ca mongelechi che. Cümelcangepe Boaz”. Noemí ca feipi: “Feichi huentru, tañi füta yem ñi pariente tati. Fei montulafeyumu tayu huesa rupan meu”.* 21 Fei Rut ti Moab domo amulei ñi nütramcaniefiel ta Noemí, feipi: “Cafei Boaz feipieneu: ‘Fülcülenge tañi pu cüdaufe meu fentepuule ti cosecha’”. 22 Noemí feipifi tañi nanüng: “Felei saquin püñeñ, cümecünuaimi cüdahulmi tati pu üllchaque domo engün. Femngechi chumngelayaimi rume cañpüle”.

23 Petu cosechangelu tati cahuella ca tati quetran, Rut amulei tañi üñiftumequen tati pu üllchaque domo engün. Amulei ñi mülen quiñentrür tañi nanüng engu.

3 Noemí feipifi tañi nanüng Rut: “Saquin püñeñ, quintulelayu quiñe huentru, femngechi tami cümelcaleal. 2 Boaz, ¿taiñ pariente no am chi? Feichi üllchaque domo tamün quiñentrür cüdahun, Boaz tañi pu cüdaufe. Tüfachi pun Boaz liftuafi tañi cahuella.* 3 Fei müñetunge, tucunge cüme nümün-ngechi aceite ca cüme tucutuunge. Fei nagaimi Boaz cheu ñi cüdaumequen. Deu ile ca putule,* fei hula eluunge tami peaeteu. 4 Eluule tañi umautual, cüme ngüneduamfinge cheu tañi cudupual. Fei amunge, entuimpolmafinge tañi namun ca fei mu cudupunge. Quisu feipiaimu chem tami femal”.

5 Rut feipi: “Com tami feipiel feman”. 6 Fei Rut amui cheu ñi liftungequeel ti cahuella ca femi com ñi feipiel tañi nanüng. 7 Deu ilu ca putulu* Boaz, ayüucülei. Fei hula amui ñi cudupual cheu ñi trapümngequeel ti fün cahuella. Fei Rut ñücüfcülen amui, entuimpolmafi ñi namun, fei mu cudupui. 8 Rangipun mu Boaz trüntrünmequelu, anüpürai. Feimu müten pei quiñe domo ñi cudulen tañi namun püle. 9 Boaz ramtufi: “¿Inei am ta eimi?”. Ti domo feipi: “Ñidol, iñche ta Rut. Eimi tañi püñmo yem ñi pariente. Montulmuafuyu tayu huesa rupan meu, feimu cuñiutucuen”. 10 Boaz feipifi: “Chau Jehová cümelcayaimu, saquin ñahue. Tami femün ellaca mu pengeli tami piuqueyechefengen.* Huelu tami femmequen feula, doyelchi mai. Quintulaimi quiñe hueche huentru, ricu cam pofrengelu. 11 Feula saquin ñahue, llicaquilnge. Huaria mu deu quimniengeimi tami cüme domongen. Feimu feman com tami feipiel. 12 Iñche parienteyeniefiñ tami püñmo, huelu mülei quiñe doi familiayeteu. 13 Mülecange tüfachi pun. Pulihuen meu feichi huentru ayüle tami montulaeteu tami huesa rupan mu, fempe müten. Huelu pinole, iñche montulayu tami huesa rupan meu. Tüfachi dungu feipicünuayu* Chau Jehová ñi üi meu, taiñ mongelechi Ngünechen. Hunle hula amutuaimi, cudulecange”.

14 Rut cuducünuhui Boaz tañi namun püle. Fei tañi pengenoal, epe hunlu tripai. Boaz feipi: “Inei no rume mülelai ñi quimal ñi cüpan quiñe domo cheu ñi liftumequengeel ti cahuella”. 15 Boaz feipifi ta Rut: “Cüpalnge tami ücülla, huinüfcünufinge* ca cüme nüniefinge”. Rut huinüfcünufilu tañi ücülla, Boaz tucui 25 kilo cahuella peno.* Fei Boaz huitrañpüramelfi ti fün cahuella, elufi ta Rut ñi yetual, fei Rut amutui ti huaria mu.

16 Puutulu tañi nanüng ñi ruca meu, ramtueyu: “¿Chumngechi tripai ti dungu,* saquin püñeñ?”. Fei Rut quimelelfi com ñi femeteu ta Boaz. 17 Rut ca feipi: “Elueneu 25 kilo cahuella peno ca feipieneu ‘Re cuhu müten yelayaimi tami nanüng ñi ruca meu’”. 18 Fei Noemí feipifi: “Saquin püñeñ, üngümcüleaimi müten tañi chum tripayal tüfachi dungu. Fachantü Boaz cansatulayai ñi cüme elcünuafiel ti dungu”.

4 Boaz amui tati huaria mu, anücünuupui cheu ñi conpuquen pu che. Pefilu ñi cüpalen ti pariente ñi doi familiayefiel ta Elimélec, fei Boaz mütrümfi: “Eimi,* cüpange, anüpange tüfa püle”. Ti huentru amui, anücünuhui. 2 Fei hula Boaz mütrümfi mari loncolelu ti huaria mu. Feipifi: “Anücünuumün tüfa mu”. Fei anücünuhuingün.

3 Fei Boaz feipifi Elimélec ñi pariente: “Noemí mülequefui Moab mapu mu, huelu cüpatui. Feimu mülei ñi fendeal ti mapu ñi ngen-ngefel taiñ peñi yem Elimélec. 4 Raquiduamün tami quimal tüfachi dungu, feimu feipiayu: ‘Eimi doi familiayefimi ti la, feimu ngillafinge ti mapu. Tüfachi pu che ca pu loncolelu ti huaria mu adquintuleaingün. Ngillayafiñ pilmi, femcange. Huelu ngillalayafiñ pilmi, feipien. Iñche inalen eimi meu ñi ngillayafiel feichi mapu’”. Ti huentru feipi: “Iñche ngillayafiñ tati”. 5 Fei Boaz ca feipifi: “Huelu Noemí müten ngen-ngelai tüfachi mapu mu. Ca ngen-ngei Rut, ti Moab lantu domo. Feimu mülei tami ngillañmayafiel ti mapu tüfachi epu domo. Femngechi tati mapu amuleai ñi ngen-ngen tati huentru em ñi pu che”. 6 Allcülu müten, ti huentru feipi: “Ngillalayafiñ. Femli, pofrengerpuafun. Eluayu tami ngillayafiel ti mapu, iñche femlayan tati”.

7 Cuifi mu Israel meu mülequefui quiñe huimtun. Quiñe huentru eluafui ta cangelu huentru ñi ngillayal quisu tañi ngillayafel. Fei ñi pengelcünual tüfa, mülefui ñi eluafiel quiñe tañi ocota.* Femngechi eldungucünuquefuingün pu Israel che. 8 Feimu Elimélec ñi pariente entui quiñe tañi ocota,* fei elufi ta Boaz ca feipifi “Eimi ngillafinge”. 9 Fei hula Boaz feipifi tati pu loncolelu ca tati pu che: “Feula com eimün allcüimün iñche ñi ngillañmayafiel ta Noemí com ñi ngen-ngefel Elimélec, Kilión ca Mahlón. 10 Cafei nieafiñ ta Rut ti Moab domo, Mahlón yem ñi domo. Femngechi Mahlón ñi pu che amuleai ñi ngen-ngen tañi mapu meu. Fei tañi pu peñi ca pu huaria che ngüyünentulayaingün* tati huentru yem ñi üi. Fachantü eimün allcüimün com tüfachi dungu”.

11 Fei pu loncolelu ca com pu che mülelu tati huaria ñi conpupeyüm püle feipingün: “¡Iñchiñ com allcüiñ llemai! Jehová cümelcape ti domo tami nieafiel. Raquel ca Lea reque fempe, fei engu mu cüpai com pu Israel che. Cüme felenge Efrata mu ca cüme üitungeaimi Belén mu. 12 Tüfachi domo mu Jehová eluaimu fentren cüpanche. Pérez tañi pu che reque alün-ngepe, Tamar ca Judá tañi fotüm”.

13 Fei Boaz niefi ta Rut, cudumuhui engu, fei Chau Jehová elufi ta Rut ñi nieal quiñe huentru püñeñ. 14 Tati pu domo feipifingün ta Noemí: “Püramyengepe Chau Jehová, fei elueimu tami quelluaeteu tami huentru ñi pariente. ¡Püramyengepe tañi üi* com Israel mu! 15 Tüfachi pichi huentru huiño nehuentucueimu.* Tami nanüng ñi püñeñ cuñiutucuaimu cuselmi. Rut piuqueyenieimu, doi fali regle huentru püñeñ mu”. 16 Noemí metafi ti pichiche, fei eluhui ñi tremümafiel. 17 Pu domo* tuculelfingün üi tati pichiche. Feipingün “Choyüngei Noemí ñi püñeñ”. Fei Obed üituculelfingün. Quisu fotümyefi ta Jesé, David ñi chau.

18 Tüfa Pérez tañi cüpanche: Pérez, feita Hezrón ñi chau; 19 Hezrón, feita Ram ñi chau; Ram, feita Aminadab ñi chau; 20 Aminadab, feita Nahsón ñi chau;

Nahsón, feita Salmón ñi chau; 21 Salmón, feita Boaz ñi chau; Boaz, feita Obed ñi chau; 22 Obed, feita Jesé ñi chau; ca Jesé, feita David ñi chau.