NAHÚM
1 Tüfachi lifru pengeli Nahúm* ñi afmatun dungu, ti Elcós che. Fei tüfa pengelelngei chumngechi ñi juiciantucungeal Nínive:
2 Chau Ngünechen Jehová ayüniei quisu müten tañi poyengeal
ca huiñolquei tañi huesa femngen.
Jehová huiñolquei tañi huesa femngen ca eluucülei ñi pengelal tañi fütra illcun.*
Jehová huiñoleltuquefi tañi pu chaftuqueteu tañi huesa femün
ca rume illcutuniefi tañi pu caiñe.
3 Jehová rume nehuen-ngei ca illcufemquelai,*
huelu Chau Jehová ca eluucüleai ñi castigayafiel pu huesa femquelu.
Fei trecalele, pimuquei ti fütraque cürüftucu mahun apümcaquelu
ca ti trufür tañi namun mu tromü reque püraquei.
4 Fei illcutufi ti lafquen ca arcümfi,*
com pu leufü ca arcümfi.
Basán ca Carmelo huincul tonfünagquei,*
Líbano müleyechi fillque rayen ca tonfünagquei.
Quisu tañi adquiñ mu müllmüllai ti mapu,
cafei ti cüme mapu ca com tañi pu che.
6 ¿Inei chaftuafui tañi illcun?
¿Inei nehuentuafui tañi fütra illcun mu?
Tañi fütra illcun lüpümai cütral reque.
Tati fütraque cura trafocangeai quisu tañi pin mu.
7 Chau Jehová cüme piuquengei.
Quiñe nehuen-ngechi mülehue reque felei cutrancahun antü meu.
Cuñiutucuniefi* pu ellcaucülelu* quisu mu.
8 Quiñe fütra mangin co mu com apümcayafi feichi huaria.*
Ti dumiñ inantucuafi tañi pu caiñe.
9 ¿Chumaimün cai tamün chaftuafiel ta Jehová?
Fei com apümcayafi.
Duamfalngehuelayai ñi huiño apümcangeal.
10 Nülcücaucülechi chacai reque* feleingün,
pu ngollicauquelu cerveza mu reque.
Huelu lüpümngeaingün anquen congilhue reque.*
11 Eimi mu tripayai quiñe che quintuquelu ñi huesa femafiel ta Jehová,
quiñe che hulquelu falinochi ngülamtun.
12 Tüfa ñi feipin Chau Jehová:
“Nehuencülele ca fentren-ngele rume,
apümcangeaingün, fei ngehuetulayaingün.
Iñche cutrancaeyu,* huelu femhuelayayu.
13 Feula trafocayafiñ ti yucu eimi mu mülelu.
Catrüafiñ tami cadena 2 troquiñ mu.
14 Chau Jehová huli quiñe huercün dungu eimi mu:*
‘Tami üi rumel mu mülelayai.
Eimi illamcafalimi, feimu deumalelayu quiñe rüngan’.
15 Huincul püle trecayauquei ti yeniequelu cümeque dungu,
ti huldunguquelu cüme felen.
Ahuem, Judá, femaimi tami fillque fiesta,
huechurpunge tami eldungucünuel.
Quiñe huesa che no rume huiño caiñetuhuelayaimu,
com apümcangealu cai”.
2 Tati püntülcachequelu* amui tami chaftuaeteu.*
Cuñiutucunieafimün ti nehuen-ngechi mülehue.
Ngüneduamnieafimün ti rüpü.
Pepicahuaimün, rume nehuencüleaimün tati.
Huelu Chau Jehová huiñoleltuafi ta Jacob ñi huiño afmatufalngeal,
tañi huiño afmatufalngeal Israel.
3 Tañi pu nehuen-ngechi hueichafe* ñi escudo quelülei,
tañi pu soltau ñi tacun rume quelülei.
Ti antü pepicaulu tañi hueichayal,
ti pañillhue* nielu tañi hueichan carretela* huilüfquei cütral reque,
ca pünengequei enebro huaiqui.*
4 Pu hueichan carretela rume matu amulei rüpü püle.
Matu amulei fill püle plaza mu.
Huilüfquei pelontuhue reque ca alofquei llüfqueñ reque.*
5 Fei trahulafi tañi pu loncolechi soltau.
Petu amulelu engün mutrurtucuhuaingün.
Lefcülen amuaingün ti fütra cura malal püle*
tañi nehuentucuafiel.
6 Pu leufü ñi fillque conhue nülangeai
ca ti ülmen ruca llihuai.*
7 Deu feipicünungei: tüfachi huaria ülmen domo reque felei, huelu yehuelcangei,
yengei ca tañi pu esclava aungen pimequeingün.
Ngümacaumequeingün, fei allcün-ngei paloma reque.
8 Ellaca mu ta fantepu, Nínive quiñe fütra rünganco reque felei,* apolei co meu,
huelu feula pu che lefmahuingün.
Feipingei engün: “¡Huitracünuumün! ¡Huitracünuumün!”,
huelu inei no rume huiñotulai.
9 ¡Müntuñmafimün* ti plata! ¡Müntuñmafimün ti oro!
Tañi falinque fillem afquelai.
Apolei itrofill falinque chemcün meu.*
10 ¡Chem no rume niehuelai ti huaria, huellilei ca apümcangei!
Pu che rumeñma llicalei tañi piuque, nehuen-ngehuelai tañi lucu ca müllmülli tañi trutre.*
Com tañi ange engün fülangnagi.
11 ¿Cheu mülei pu trapial ñi lolo? Tiye mu imequei pu hueque trapial.
Tiye mu llicanon mu
tripaquei ti trapial tañi pichique trapial engün.
12 Ti trapial huirüfcaquefui* fentren culliñ tañi iyal ñi pichique trapial
ca langümquefui culliñ tañi iyal ñi pu domo trapial.
Tañi lolo apolerquei nüelchi culliñ mu,
cheu tañi ellcauquen* apolerquei la culliñ mu.
13 “¡Iñche lefcontupaeyu!” feipi Jehová, Ñidolcülelu pu hueichafe mu.
“Lüpümafiñ tami hueichan carretela, fitruncünuafiñ.*
Ti fütra cuchillo langümafi tami hueque trapial.
Iñche tañi pin mu malocontuhuelayaimi mapu mu,
huiño allcüngehuelayai tami pu huerquen ñi dungun”.
3 ¡Aungei pu huaria che langümchequelu!
Re ngünencachequei ca hueñequei.
¡Tüfachi huaria rumel langümchequei!
2 Pengei ñi huirafcülen pu cahuellu ca trefcü amulei pu carretela.*
Allcün-ngei ñi cultrafmequen* ti refenque ca trününcülei ti rueda.
3 Mülei pu püracahuellulelu, alofcülechi fütraque cuchillo ca huilüfcülechi huaiqui.*
Fentren che lai ca trapümcüleingün...,
com püle mülei la.
Pu soltau mutruringün pu la meu.
4 Com tüfa rupai ti domo pod mongen yenielu ñi duam mu.*
Fentren podngechi dungu femi.
Cüme ad domongei ca ayüfalngei. Adümuucülei calcu dungu mu.
Tañi podngechi dungu mu ngünencaquefi pu troquiñche
ca tañi calcu dungu mu ngünencaquefi pu familia.
5 “Iñche, lefcontupaeyu”* pi Jehová, Ñidolcülelu pu hueichafe mu.*
“Huitrañpüramafiñ tami pollera, ange mu puhuai.
Iñche ñi pin mu pu troquiñche peai tami triltrangcülen
ca pu gobierno peai tami yehuen-ngen.
6 Ütrüftuan pod eimi meu
ca ünufalcünuayu.
Iñche tañi pin mu yehuelcangeaimi pu che ñi adquiñ mu.
7 Inei rume tami peaeteu leftripayai, fei feipiai:
‘¡Nínive apümcangei!
¿Inei cutranpiuqueyeayu?’.
¿Cheu peafun inei tami yafültucuaeteu?
8 ¿Doicülepeimi mai No-Amón huaria mu?*
Tüfa mülefui inaltu Nilo leufü mu.
Ti co hualloñmanieyu.*
Lafquen ñi duam mu ülmen-ngefuingün,
cafei ti lafquen tañi cura malal* reque felefui.
9 Etiopía ca Egipto quelluquefui tüfachi huaria ñi rume nehuen-ngeal.
Put ca pu Libia che quelluquefeyu.
10 Huelu No-Amón che ca entungeingün tañi huaria mu,
fei camapu yengeingün.
Cheu ñi ellaconün fillque rüpü,
tañi pu pichiqueche rume allfülcangeingün.
Sortiaingün* ca dullingün tañi yamfalque huentru.*
Fei cadena mu traringei com tañi pu falinque huentru.
11 Eimi ca ngollicahuaimi Nínive,
fei ellcahuaimi.*
Quintuaimi cheu tami ellcahual tami lefmahual pu caiñe mu.
12 Com tami nehuen-ngechi mülehue, higuera nielu tañi hunenque afülechi fün reque felei.
Mütroufilmi, tañi fün trananagai pu iquelu higo tañi hun meu.
13 Tami troquiñ hueichafe domo reque feleingün.
Tami troquiñ mapu ñi conhue com nülangeai ñi conpual tami pu caiñe.
Cafei lüpümngeai tami fillque conhue ñi tranca.*
14 ¡Entunge co! ¡Pepicaunge hualloñmangelmi!
Nehuentucufinge tami fütraque cura malal.*
15 Tiye mu ti cütral lüpümaimu.
Langümngeaimi fütra cuchillo mu.
Lümüngeaimi, chumngechi lümüquei pu hueque saltamonte.*
¡Elufinge tami pu che ñi alün-ngerpual hueque saltamonte reque!
¡Felei, alün-ngepe engün saltamonte reque!
16 Elufimi tami pu negociaquelu ñi alün-ngeal.
Doi alün-ngeingün huenu müleyechi huangülen reque.
Hue saltamonte llochonentui ñi trahua, fei müpütripai.*
17 Hutrengen mu pu saltamonte ellcauqueingün cura malal mu.
Huelu eñumtripalu antü müpütripaqueingün,
inei no rume quimlai cheu ñi amuquen.
Ca femngechi tami pu soltau saltamonte reque femqueingün
ca tami loncolechi soltau fentren saltamonte reque femqueingün.
18 Ahuem, Asiria ñi lonco ülmen, tami pu camañfe* añitumequei.
Tami pu ülmen che mülenagcülei quisuque tañi ruca mu.
Tami pu che fillque püle müleingün mahuida mu,
inei no rume trahul-laeyu engün.
19 Quellungelayaimi tami cutrancahun meu.
Tami allfen pepi tremotulayai.*
Com pu che cutrancahui tami huesa femquen mu,
feimu allcüle engün tami rupan,
com cultrafcultraftucuai ñi cuhu* fente ñi ayühun”.
Tüfachi üi cüpa feipi “yafültucuchequelu”.
Ca lof mu: “Lladcün”.
Cam: “Ñom piuquengei”.
Ca lof mu: “Ancümfi”.
Ca lof mu: “Peufünagquei, penfünagquei”.
Ca lof mu: “Nüyüncauquei”.
Ca lof mu: “Lluuquei”.
Cam: “Raquiduamtucuniefi”. Hebreo quehun feipilei: “Quimniefi”.
Ca lof mu: “Llumcülelu”.
Tüfa ta Nínive huaria.
Ca lof mu: “Huayun, püllin, huai reque”.
Ca lof mu: “Rastrojo reque”.
Cutrancangei ta Judá.
Tüfa ta Asiria.
Ca lof mu: “Imagen”. Diccionario mu ngüneduamnge “adentun; poyeafiel coilaque dios ñi adentun”.
Ca lof mu: “Hierro”.
Ca lof mu: “Hudalcachequelu”.
Chaftungei ta Nínive huaria.
Apümcangei ta Israel.
Ca lof mu: “Choyon”.
Ca lof mu: “Quehuafe, aucafe”.
Ca lof mu: “Hierro”.
Ca lof mu: “Carro”.
Ca lof mu: “Lanza”.
Ca lof mu: “Relampago reque”.
Ca lof mu: “Muralla püle”.
Ca lof mu: “Lluhuai”. Cam: “Tranapuhuai”.
Ca lof mu: “Hufco, pozoco reque felei”.
Ca lof mu: “Montuñmafimün”.
Ca lof mu: “Fillem meu”.
Ca lof mu: “Huentelli”.
Ca lof mu: “Catrücaquefui”.
Ca lof mu: “Llumuuquen”.
Ca lof mu: “Pitruncünuafiñ”.
Ca lof mu: “Carro”.
Ca lof mu: “Litrafmequen”.
Ca lof mu: “Lanza”.
Cam: “Prostituta ñi duam mu”. Diccionario mu ngüneduamnge “prostituta”.
Lefcontungei ta Nínive.
Ca lof mu: “Quehuafe, aucafe mu”.
Tüfa ta Tebas huaria.
Ca lof mu: “Hueltañmanieyu”.
Ca lof mu: “Muralla”.
Ca lof mu: “Suerteingün”.
Ca lof mu: “Respetafalque huentru”.
Ca lof mu: “Llumuhuaimi”.
Ca lof mu: “Sechuhue”.
Ca lof mu: “Muralla”.
Ca lof mu: “Chapad, pele mu”.
Ca lof mu: “Fotra”.
Hebreo quehun feipilei: “Langosta”. Diccionario mu ngüneduamnge “saltamonte”.
Ca lof mu: “Ipüntripai”.
Ca lof mu: “Pu cuidaquelu ufisa”.
Ca lof mu: “Mongetulayai”.
Ca lof mu: “Trapartrapartucuai, cutrafcutraftucuai, pitrapitratucuai ñi cuhu”.