GÁLATAS

1 Iñche ta apostol Pablo,* huirintuculeluhuiyiñ tüfachi carta. Chem huentru no rume dullilaeneu ñi apostolngeal, huelu mai Jesucristo ca taiñ Chau Ngünechen dullieneu. Fei huiñomongeltufi ta Cristo rangiñ ti pu layelu. 2 Quiñentrür taiñ pu peñi tüfa mu mülelu huirintuculeluhuiyiñ tati pu trahunche Galacia mapu mülelu.

3 Llellipulen tamün rume cutranpiuqueyeaeteu ca tamün eluaeteu cüme felen taiñ Chau Ngünechen ca taiñ Ñidol Jesucristo. 4 Fei hulcünui tañi mongen iñchiñ taiñ culpan mu,* femngechi montuleiñmu mapu müleyechi huesaque dungu mu. Femi ta tüfa taiñ Chau Ngünechen ñi duam mu.* 5 Rumel püramyengepe ta Chau Dios. Felepe mai.

6 Tamün rume cutranpiuqueyeteu Cristo, Chau Ngünechen dullieimünmeu. Huelu eimün matu* püntüumequeimün* ta Chau Dios mu. Cafei llouquefimün caque dungu, cümeque dungu troquifimün. Feimu afmatulehuen. 7 Cangelu cümeque dungu mülei pilayafuiñ. Huelu quiñeque che ayüniei tamün huesalcayaeteu. Cafei ayüniei ñi huelucünual Cristo tañi cümeque dungu. 8 Iñchiñ amuldunguleluhuiyiñ Cristo tañi cümeque dungu. Huelu quiñe ta iñchiñ, huenu mu cüpachi cümeque püllü cam inei rume amuldungufule caque dungu, condenangepe. 9 Ca huiño feipihuayiñ: inei rume amuldungufule caque dungu, huelu amuldungunofule ti cümeque dungu tamün deu llohuel, condenangepe.

10 ¿Cüpa ayühuelquefiñ tati pu che cam cüpa ayühuelquefiñ ta Chau Dios? Cüpa ayühuelfili tati pu che, Cristo ñi cüdaufe pingelayafun. 11 Pu peñi,* ayülen tamün quimal ti cümeque dungu tamün amuldungulelfiel, pu che ñi dungu no tati. 12 Chem huentru no rume elulaeneu ca quimeltulaeneu rume. Jesucristo mai ta pengeleneu tüfachi dungu, feita lloumafiñ.

13 Inaquefilu iñche pu judio ñi quimeltun, allcüntucuimün tañi femün iñche ca ñi rume caiñetufiel Chau Ngünechen ñi trahunche, ayüfun ñi apümcayafiel engün. 14 Tañi inaniefiel pu judio ñi quimeltun, iñche doicülefun ta caquelu huecheque judio mu. Com tañi piuque mu inaquefun tañi pu chau ñi huimtun. 15 Chau Ngünechen ñi duam mu choyüngen iñche. Fei rume cutranpiuqueyeneu, feimu dullieneu. Fei cümelu troquifi 16 iñche ñi huldungulelafiel ti cümeque dungu tati pu catripanche,* femngechi ñi quimafiel engün Chau Ngünechen ñi Fotüm. Dullingelu iñche ñi femal tüfachi dungu, ngülamtuen pilafiñ inei no rume. 17 Pemelafiñ rume tati pu apostol Jerusalén huaria mu mülelu, fei engün hune dullingei ñi apostolngeal ta iñche meu. Doi mai Arabia mapu amun, fei hula huiñotun Damasco huaria mu.

18 Fei cüla tripantu rupalu, pemefiñ ta Cefas* Jerusalén huaria mu. Mari quechu antü trür mülenagiyu. 19 Huelu pelafiñ caquelu pu apostol, Santiago müten, Ñidol tañi peñi. 20 Chau Ngünechen ñi adquiñ meu rüf feipihuayiñ: tüfachi dungu tamün huirintuculelfiel coila dungu no tati.

21 Fei hula amun ta Siria ca Cilicia mapu mu. 22 Huelu Cristo ñi pu trahunche Judea mu mülelu, turpu pequelafeneu engün. 23 Femngechi allcüquefuingün: “Feichi huentru cuifi inantucuqueiñmeu, ayüniefui ñi apümcayafiel ti trahunche.* Feula mai amuldunguyahui Chau Dios ñi cümeque dungu”. 24 Feimu quimlu chem tañi rupan iñche, eluhuingün ñi püramyeafiel ta Chau Ngünechen.

2 Deu rupalu mari meli tripantu, Bernabé iñchiu huiñotuyu ta Jerusalén huaria mu. Quiñentrür amuiñ Tito iñchiñ. 2 Pengelngen ñi amual ta Jerusalén, feimu amun. Feipifiñ tati pu peñi chem cümeque dungu nütramelquefiñ tati pu catripanche.* Huelu nütramcafiñ pu yamfal peñi müten. Ayüfun tañi quimal ñi cümen cam ñi cümenon tañi cüdau, femngechi ngünam amuldungulayafun. 3 Huelu tañi compañeteu Tito Grecia chengelu rume, feipingelai ñi circuncidangeal.* 4 Fei tüfachi dungu mu huesa feipiyahui tati pu peñi femfaluulu. Tüfachi pu huentru coningün trahunche mu taiñ lüyütuaeteu.* Cüpa peingün taiñ lifrelen ñi inaniefiel ta Cristo Jesús. Ayüniei engün taiñ huiño ngünenieaeteu Moisés ñi ley. 5 Huelu iñchiñ turpu allcütulafiyiñ engün,* femngechi piuquentucunieafimün ti rüf dungu Chau Ngünechen ñi cümeque dungu mu cüpalu.

6 Feichi pu yamfal peñi, falin che troquingequelu, chem hueque dungu pilaeneu rume tañi femal. Chem chengefule rume engün, iñche duamcülelan, Chau Ngünechen dullintuchequelai.* 7 Ngüneduamingün tüfachi dungu: chumngechi Pedro elfalcünungei ñi amuldungulelafiel ti cümeque dungu tati pu circuncidalelu, iñche elfalcünungen ñi amuldungulelafiel tati pu circuncidalenolu. 8 Chau Ngünechen elueyu pepiluhun ta Pedro ñi apostolngeal pu circuncidalelu meu. Fei ca elueneu pepiluhun ta iñche ñi apostolngeal pu catripanche mu. 9 Ngüneduamingün Chau Ngünechen ñi rume cutranpiuqueyeteu ta iñche. Fei ti pu fütraque loncolelu troquingelu,* Santiago, Cefas* ca Juan, man cuhu cünueyumu Bernabé iñchiu. Femngechi pengelingün ñi cümen tayu amuldungulelafiel pu catripanche, huelu fei engün ñi amuldungulelafiel pu circuncidalelu. 10 Duamtuafimu pu pofre feipingeyu müten. Feimu yafüluuquen ñi femal tüfachi dungu.

11 Quimfali ñi huelulcahun Cefas, feimu aculu Antioquía huaria mu cüme norümdungufiñ. 12 Cefas iquefui quiñentrür pu catripanche engün, huelu femhuelai aculu quiñeque huentru Santiago ñi huercüel. Llicaniefi tati pu circuncidalelu. Feimu püntühui* pu catripanche mu. 13 Caquelu judio inayentuñmaeyu tañi epu rume piuquengen. Bernabé ca inaconi chumngechi ñi femün engün. 14 Iñche ngüneduamün ñi inanofiel engün Chau Dios ñi rüf cümeque dungu. Feimu com pu che ñi adquiñ meu, feipifiñ ta Cefas: “Eimi ta judio, huelu pu catripanche reque miyahuimi, pu judio che reque no. ¿Chumngelu obligaquefimi* pu catripanche ñi inayal pu judio ñi huimtun tañi mongen mu?”.

15 Iñchiñ ta judio che, pu catripanche reque femngelaiñ, fei engün ta culpaquei.* 16 Quimnieiñ tüfachi dungu: Chau Ngünechen nor che troquiquelafi quiñe che tañi inaniefiel müten Moisés ñi ley, doi mai tañi feyentuniefiel ta Jesucristo. Feimu feyentuleiñ Cristo Jesús mu. Femngechi nor che troquingeaiñ, huelu ñi inaniefiel Moisés ñi ley no, doi mai taiñ feyentufiel ta Cristo. Inei no rume nor che troquingequelai ñi inaniefiel ti ley. 17 Nehuentuqueiñ taiñ nor che troquingeal taiñ feyentufiel ta Cristo. Huelu femfulu rume, culpafe pingequeiñ.* ¿Ngüchaltucupeiñmu mai Cristo taiñ culpayal?* ¡Femlai llemai! 18 Huiño femfuli feichi dungu tañi elcünuel,* pengelafun tañi inaquenofiel ti ley. 19 Ñi lloufiel ti ley, lifrelen tati ley mu. Femngechi mongelen ñi serfiafiel ta Chau Ngünechen. 20 Clafantucungen reque orcon mamüll meu Cristo iñchiu. Iñche tañi duam mu ta mongelelan, doi mai tañi mongen quiñeucülei Cristo engu.* Felei llemai, tañi feyentufiel Chau Ngünechen tañi Fotüm mongelen iñche. Fei piuqueyeneu ca hulcünui tañi mongen iñche meu. 21 Iñche famentuquelafiñ Chau Ngünechen tañi rume cutranpiuqueyechen. Nor che troquingefule quiñe che tañi inaniefiel ti ley, ngünamfalngeafui ñi lan ta Cristo.

3 ¡Ay fotrü, pu Galacia che! ¡Cüme raquiduamlaimün! Eimün cüme quimelelngeimün Jesucristo ñi lan orcon mamüll meu, fei ¿inei am ngünencaeimünmeu? 2 Cüpa ramtuhuiyiñ* tüfachi dungu müten: ¿chumngelu* llohuimün Chau Ngünechen ñi nehuen? ¿Tamün inaniefiel Moisés ñi ley? ¿Cam tamün feyentufiel ti cümeque dungu tamün allcütuel? 3 ¿Rüfcünu cüme raquiduamlaimün? Ellaca mu maneluuquefuimün Chau Ngünechen ñi nehuen mu. Huelu feula, ¿inaqueimün pu che ñi raquiduam? 4 ¿Refalta rupaimün am* fillque cutrancahun mu? Rüfcünu quimnien ngünam cutrancaulaimün. 5 Tuchi tamün elueteu Chau Ngünechen ñi nehuen ca femquelu afmatun dungu eimün meu, ¿chemu cai femngechi femquei? ¿Tamün inaniefiel Moisés ñi ley? ¿Cam tamün feyentufiel ti cümeque dungu tamün allcütuel? 6 Feichi dungu mu rupai ta Abrahán, “feyentui Chau Jehová mu,* fei nor che pingei”.

7 Pu feyentuquelu Abrahán ñi pu yallngetui, ¿quimniepelaimün tati? 8 Fütra cuifi, Chau Ngünechen ñi huirintucuel pengelcünui ñi nor che troquiafiel tati pu catripanche* fente tañi feyentun. Feimu hune feipicünufi ti cümeque dungu ta Abrahán. Feipifi: “Eimi mu fürenengeai com pu troquiñche”. 9 Feimu tati feyentuquelu trür fürenengeai Abrahán engün, feiti feyentulu.

10 Com tati pu maneluuquelu tati ley meu condenangei. Chau Ngünechen ñi huirintucuel feipilei: “Condenangepe tuchi inanienolu com ñi huiriconcülen Moisés ñi ley meu”.* 11 Ca feipilei Chau Ngünechen ñi huirintucuel: “Tañi feyentun meu mongeleai tati nor che”. Quimfali llemai, inei no rume nor che troquingelai Chau Ngünechen ñi adquiñ meu tañi inaniefiel ti ley. 12 Moisés tañi ley feipiquelai ñi duamfalngen nieal feyentun. Doi mai Chau Ngünechen ñi huirintucuel feipilei: “Tati inaniefilu ti ley, nieai mongen tati ley ñi duam mu”. 13 Ca feipi Chau Ngünechen ñi huirintucuel: “Condenalei com pu clafantucungelu* orcon mamüll meu”. Huelu Cristo ngillanentueiñmeu, femngechi lifrenentueiñmeu tati ley ñi condenachequen. Fei eluhui ñi condenangeal iñchiñ taiñ condenangeafel. 14 Fei Cristo Jesús ñi duam mu pu troquiñche fürenengeai chumngechi feipicünungei ta Abrahán. Femngechi taiñ feyentun mu llohuafuiñ Chau Ngünechen ñi nehuen, chumngechi feipicünungeiñ.

15 Pu peñi, nütrameluhuayiñ quiñe pengelün dungu ñi rupaquen ta che: quiñe che amulcünule quiñe eldungu, inei no rume falilai pilayafui, ca doi amultuculayafui tañi feipin. 16 Cafei Abrahán ca tañi cüpanche elungei Chau Ngünechen ñi feipicünuel. Chau Ngünechen ñi huirintucuel feipilai “tami pu cüpanche”, fentren chengelu reque. Huelu mai feipilei “eimi tami cüpanche”, quiñengei müten: Cristo. 17 Ca feipihuayiñ tüfachi dungu: deu rupalu 430 tripantu hulngei Moisés ñi ley, huelu famentuquelafi Chau Dios ñi eldungucünuel. Feimu falilai ti feipicünuelchi dungu pingelayafui. 18 Duamfalngele inayal ti ley taiñ llohual chem ñi elcünuel Chau Ngünechen, duamngehuelayafui ti feipicünuelchi dungu. Huelu mai ti feipicünuelchi dungu mu Abrahán llohui chem ñi elcünuel Chau Ngünechen.

19 ¿Chumngelu* hulngei Moisés ñi ley? Elungei* ñi quimfalcünual pu che ñi culpan* acule hula Abrahán ñi cüpanche, feiti elungelu ti feipicünuelchi dungu. Chau Ngünechen adcünufi ti cümeque püllü, fei engün elufi ti ley ta Moisés. Fei Moisés quimelelfi ti ley tati pu che. 20 Quiñe che müten concülefule ti eldungu mu, duamfalngelayafui rangiñelhue. Ca femngechi Chau Ngünechen hulcünulu tañi feipicünuel, fei müten concülerquei. 21 Ti ley, ¿famentupefi mai Chau Dios ñi feipicünuel? ¡Femlai llemai! Elungefule pu che quiñe ley hulquelu mongen, tati ley ñi duam mu nor che troquingeafui engün. 22 Huelu Chau Ngünechen ñi huirintucuel pengelcünui pu che ñi ngünenieteu ti culpan,* femngechi tati pu feyentulelu llohuafuingün cümeque dungu. Feichi cümeque dungu feipicünungei ñi llohual pu feyentulelu Jesucristo mu.

23 Petu taiñ feyentunofiel ta Cristo llihuatuniefeiñmeu* ca ngüneniefeiñmeu ti ley, üngümniequefuiñ chem ñi quimfalcünual Chau Dios. 24 Moisés ñi ley adcünueiñmu taiñ puhual ta Cristo meu,* femngechi nor che pingetuaiñ taiñ feyentun mu. 25 Huelu feula feyentuquefiyiñ ta Cristo, feimu duamfalngehuelai taiñ adnieaeteu ti ley.

26 Com eimün feyentuquefimün ta Cristo Jesús, feimu Chau Ngünechen ñi pu yallngeimün. 27 Inayentuquefimün ta Cristo.* Eimün fautizangeimün tamün quiñeucüleal Cristo eimün. 28 Com eimün quiñeucüleimün tamün inaniefiel ta Cristo Jesús. Feimu falilai ñi judio chengen cam Grecia chengen, tañi esclavongen cam lifre chengen, tañi huentrungen cam domongen. 29 Tamün inaniefiel ta Cristo, Abrahán ñi cüpanchengeimün. Feimu llohuaimün chem ñi feipicünungeel ta Abrahán.

4 Feula feipihuayiñ: petu pichicalu feiti llohualu ñi elcünulelngeel, quiñe esclavo reque trürcülei, ngen-ngelu rume ti itrofillem. 2 Caquelu che mülei ñi cuidayaeteu ca ñi adnieaeteu tañi ruca puule hula ti antü ñi elcünuel tañi chau. 3 Ca femngechi petu pichicalu iñchiñ, inaniequefuiñ mapu müleyechi pu che ñi femün ca tañi raquiduam. 4 Huelu puulu ti medin antü, Chau Ngünechen huercüi tañi Fotüm, quiñe domo ta choyüeyu. Fei inaquefui ti ley. 5 Ngillanentupafi ca lifrenentupafi tati pu che ñi ngünenieteu ti ley, femngechi taiñ yallyeaeteu Chau Ngünechen.

6 Eimün Chau Ngünechen ñi pu yallngeimün. Fei elueiñmu tañi nehuen taiñ piuque mu chumngechi deu elufi tañi Fotüm. Feimu Chau Ngünechen ñi nehuen mu feipiqueiñ: “¡Abba,* Chau!”. 7 Feimu esclavongehuelaimi, Chau Ngünechen ñi yallngetuimi. Chau Ngünechen ñi yallngelmi, fei femcünueimu tami llohual chem ñi elcünuel.

8 Huelu mai petu tamün quimnofiel ta Chau Dios, eluucülefuimün tamün ngünenieteu coilaque dios. 9 Huelu feula quimniefimün ta Chau Dios, doi mai Chau Dios quimnieimünmeu. Feimu, ¿chumngelu* cüpa huiño inatufimün feichi ngünam dungu mülelu mapu meu? ¿Chumngelu* ayünieimün tamün huiño ngünenieaeteu feichi dungu? 10 Fiestañmaquefimün antü, cüyen, saquinque antü* ca tripantu. 11 Fill raquiduamcülen, ngünam yafüluhun chi tamün quelluafiel.

12 Pu peñi, iñche ca femquefun eimün reque. Huelu feula llellipuhuiyiñ, inayentumuchi. Eimün huesalcamulan. 13 Ti hunen rupa tamün amuldungulelfiel ti cümeque dungu, iñche cutrancülefun. Eimün quimnieimün tati. 14 Eluhuiyiñ cüdau tañi cutran mu, huelu eimün illamcamulan ca ünumulan.* Doi mai Chau Ngünechen ñi cüme püllü reque lloungen, Cristo Jesús reque. 15 Feichi mu ayüucülefuimün, huelu ¿chumngelu* feula ayüucülehuelaimün? Rüf quimnien cuifi tamün quellumuafiel, nentuhuafuimün reque tamün nge, fei tamün elumuafiel ta iñche. 16 Huelu feula, ¿caiñe troquimun cai tamün feipifiel ti rüf dungu? 17 Tüfachi pu huentru chem rume femqueingün ñi tuteucüleal eimün meu, huelu ayünielaingün tamün cüme feleal. Doi mai ayüniei tamün püntünentuaeteu iñche meu,* femngechi tamün inanieafiel engün. 18 Inei rume ayüniele ñi tuteucüleal eimün meu, cümei tati. Huelu cüme duam mu fempe, iñche tañi mülen meu müten no. 19 Saquinque pu yall, eimün tamün duam mu ca quiñe rupa cutrancaumequen, chumngechi cutrancauquei quiñe ñuque epe püñeñlu. Inayentufilmün ñi chumngen ta Cristo, fei müten fentecünuan tañi cutrancaumequen. 20 Feula mai ta ayüniefun taiñ quiñentrür müleal, fei ñochi dunguhuafuyiñ. Rüfcünu mai afmatulehuen ta eimün meu.

21 Eimün tati cüpa inaquefilu ti ley, feipimun, ¿allcütuquelaimün ñi feipin Moisés ñi ley? 22 Quiñe pengelün dungu: Chau Ngünechen ñi huirintucuel feipilei Abrahán epu fotüm nierquei, quiñe ñi choyüel tati domo ñi cüdahuelqueteu, cangelu ñi choyüel ti lifrelechi domo. 23 Tati domo cüdaufe choyüi tañi püñeñ chumngechi choyüngequei com pu pichiche. Huelu ti lifrelechi domo choyüfi tañi püñeñ Chau Ngünechen ñi feipicünun mu. 24 Tüfachi dungu adentun reque felei. Tüfachi epu domo adentulei epu eldungu: quiñe femngei Sinaí huincul mu. Com pu coneltulelu tüfachi eldungu mu esclavongeingün, Agar reque. 25 Agar adentulei ti Sinaí huincul, Arabia mapu mülelu. Ca adentulei ta Jerusalén huaria fantepu mu mülelu. Tüfachi Jerusalén ca tañi pu püñeñ esclavongeingün. 26 Huelu huenu mülechi Jerusalén lifrelei, fei iñchiñ taiñ ñuque tati.

27 Chau Ngünechen ñi huirintucuel feipilei: “Eimi domo niepüñeñquenolu, ayüucülenge. Eimi domo choyüpüñeñquenolu,* huirarnge fente tami ayühun. Tati domo quisucünungelu, doi niei püñeñ tati fütangechi domo mu”. 28 Pu peñi, eimün tati pu püñeñ choyüngelu Chau Dios ñi feipicünun mu, Isaac reque. 29 Feichi mu ti püñeñ choyüngelu chumngechi choyüngequei com pu pichiche, caiñetufi tati choyüngelu Chau Ngünechen ñi nehuen mu. Ca femngechi rupamequei famülque meu. 30 Huelu, ¿chem pi Chau Ngünechen ñi huirintucuel? Feipi: “Huemünentufinge* ti domo cüdaufe ca tañi püñeñ. Ti lifrelechi domo ñi püñeñ lloule chem tañi elcünulelngeel, ti domo cüdaufe ñi püñeñ coneltulayai tüfa mu”. 31 Feimu pu peñi, iñchiñ ti domo cüdaufe ñi pu püñeñ no tati. Ti lifrelechi domo ñi pu püñeñngeiñ.

5 Cristo montuleiñmu taiñ femngechi lifreleal. Feimu nehuentulemün ca eluulayaimün tamün huiño ngüneniengetual quiñe yucu mu reque.

2 Iñche Pablo, feipihuayiñ: circuncidahulmün, turpu cümelcangelayaimün Cristo tañi femün mu. 3 Ca huiño feipihuayiñ, tuchi circuncidalelu mülei ñi inayal com ñi feipin Moisés ñi ley. 4 Eimün tati pu ayünielu ñi nor che troquingeal tañi inaniefiel ti ley, püntüleimün Cristo meu.* Famentufimün Cristo ñi rume cutranpiuqueyechen. 5 Huelu iñchiñ, Chau Ngünechen ñi nehuen mu, rume ayünieiñ nor che troquingeal taiñ feyentun mu. 6 Quiñeucüleliyiñ Cristo iñchiñ, falilai taiñ circuncidalen cam taiñ circuncidalenon. Ti feyentun mai ta falin-ngei, tüfa ta pengelngei piuqueyehun mu.

7 Eimün cüme amulecafuimün,* ¿inei catrütueimünmeu tamün feyentuhuenoal ti rüf dungu? 8 Feichi raquiduam Chau Dios mu cüpalai, feiti tamün dullieteu. 9 Quiñe pichin fayümhue* fayümquefi com ti masan. 10 Quiñeucüleimün ta Ñidol eimün, feimu maneluucülen tamün ca raquiduamnoal. Huelu inei rume tamün huesalcamequeteu, castigangepe. 11 Pu peñi, iñche amuldungufuli ñi circuncidangeal pu huentru, ¿chumngelu* caiñetungequen? Femngechi femfuli, illculayafui* pu che quimeltulu iñche Jesús ñi lan orcon mamüll meu.* 12 Feichi pu huentru ayülu tamün hueluraquiduamelaeteu, doi huesa femuupe engün.*

13 Pu peñi, eimün dullingeimün tamün lifreleal. Huelu tamün lifrelen mu, allmalltulayaimün ñi inayal tamün huesaque illutun. Doi mai hueluquentu serfihuaimün piuqueyehun mu. 14 Moisés ñi ley com femtripaquei tüfachi huercün dungu mu: “Piuqueyefinge tami chafche* chumngechi piuqueyehuimi ta eimi”. 15 Hueluquentu cutrancamequehulmün ca caiñetumequehulmün, hueluquentu huesalcahuaimün, cuñihun-ngei tati.

16 Feimu llemai feipihuayiñ tüfachi dungu: amulepe tamün adnieteu Chau Ngünechen ñi nehuen. Femngechi femlayaimün chem huesa illutun rume. 17 Tati huesaque illutun caiñetuquefi Chau Ngünechen ñi nehuen. Cafei Chau Ngünechen ñi nehuen caiñetuquefi ti huesaque illutun. Epuñpüle caiñetuuquei engu, feimu pepi femquelaimün chem tamün ayünieel. 18 Doi mai eluucülelmün tamün adnieteu Chau Ngünechen ñi nehuen, duamfal-lai tamün inayal tati ley.

19 Quimfali ñi femquen tati pu inaquefilu tañi huesaque illutun. Fei tüfa femquei pod cudumuhun,* ünufal dungu, quim yehuequelai ñi huesaque femün mu,* 20 püramyequefi pu coilaque dios ñi adentun,* fülmauquei pu huesaque püllü mu,* caiñetuchequei, yafcauquei caquelu che engu, lladcütuchequei,* rume illcuquei, notucachequei, püntülcachequei,* ngüchaltucuchequei ñi inayal che ñi quimeltun, 21 ütrirchequei, ngollicauquei, pofolcahun mu fiestaquei, caquelu femngechi dungu femquei. Deu feipicünuhuiyiñ, huelu ca huiño feipihuayiñ: pu femngechi femquelu conpulayai Chau Ngünechen ngünenietule ta mapu.

22 Huelu Chau Ngünechen ñi nehuen adniefilu ta che, femngechi chengeingün: pengelqueingün piuqueyehun, ayüucülequei, tüng chengei,* ñochi duamngei, fürenechequei, cüme piuquengei, niei feyentun, 23 ñom piuquengei, quim ngünenieuquei. Ngelai quiñe ley no rume condenaquefilu tuchi femngechi femlu. 24 Doi mai tati pu inaniefilu ta Cristo Jesús, elufingün ñi layal reque* tañi culpafe cuerpo,* chem tañi illutuqueel ca ñi rume ayünieel.

25 Taiñ mongen mu eluuliyiñ ñi adnieaeteu Chau Ngünechen ñi nehuen, amulepe taiñ miyahun chumngechi taiñ adnieteu Chau Ngünechen ñi nehuen. 26 Quisu duamuulayaiñ müten, ngüchaltucuchelayaiñ ñi hueluquentu notucahual ca hueluquentu ütriruulayaiñ.

6 Pu peñi, eimün eluucüleimün tamün adnieaeteu Chau Ngünechen ñi nehuen. Feimu ñom piuque mu norümtuafimün ti huentru cüme miyaunolu, ngüneduamnole rume. Huelu caque quiñeque eimün ngüneduamuupe, femngechi ngüchaltucungelayaimün tamün huesa femal. 2 Hueluconque quelluniehuaimün cüdaungechi dungu mu, femngechi huechunentuaimün Cristo ñi ley. 3 Tati checaulu, falin chengenolu rume, quisu ngünencauquei. 4 Caque quiñeque che ngüneduamuupe quisu tañi femün. Fei ayühuai quisu tañi dungu mu, trürümuulayai caquelu che engu. 5 Caque quiñeque che fempe quisu tañi dungu.

6 Inei rume quimeltulelngele Chau Dios ñi dungu, misaupe* itrofill cümeque dungu tañi quimeltueteu engu.

7 Quisu ngünencaulayaimün, inei no rume ayentulayafui ta Chau Ngünechen. Chem ñi nganel quiñe che, fei ta cosechayai. 8 Tati raquiduamtucuniefilu tañi culpafe cuerpo* ñi illutuqueel, ¿chem cosechayai tañi ngan mu? Huesaque dungu cosechayai tañi culpafe cuerpo* ñi illutuqueel. Huelu tati raquiduamtucuniefilu Chau Ngünechen ñi nehuen, ¿chem cosechayai tañi ngan mu? Rumel mongen cosechayai Chau Ngünechen ñi nehuen mu. 9 Feimu llemai fentecünulayaiñ taiñ cüme femün. Afeluunoliyiñ, puuchi antü mu cosechayaiñ. 10 Feimu pepi quelluliyiñ ta iñchiñ, quelluqueafiyiñ com pu che. Doyelchi mai quelluqueafiyiñ taiñ pu chaf feyentulelu.*

11 Ngüneduamaimün, iñche tañi cuhu mu huirintuculeluhuiyiñ tüfachi carta fütraque letra mu.

12 Feichi pu huentru ayünielu tamün circuncidangeal, re ayüniei ñi tuteucüleal caquelu che engün, femngechi inantucungenoal Cristo ñi duam mu.* 13 Tati pu circuncidalelu rume, inaquelafi ti ley. Huelu tüfachi pu huentru ayünieingün tamün circuncidangeal, femngechi ñi mallmahual engün eimün tamün duam mu. 14 Iñche cai turpu mallmaulayan. Huelu saquihuan Ñidol Jesucristo ñi duam mu, feiti langümngelu orcon mamüll meu.* Jesucristo ñi duam mu mapu mülechi pu che condenangei ñi layal piquen iñche. Huelu pu che raquiduamquei iñche condenangen ñi layal fei ñi duam mu. 15 Falilai ñi circuncidalen cam ñi circuncidalenon quiñe che. Rüf falin-ngei Chau Ngünechen ñi huecünutufiel tati che. 16 Com pu inaniefilu tüfachi dungu coneltulei Chau Dios ñi Israel troquiñche. Fei engün niepe cüme felen ca cutranpiuqueyengepe.

17 Jesús tañi esclavongen iñche, marcalei reque tañi cuerpo. Feimu llemai ngelai ñi huesalcangeal iñche.

18 Pu peñi, cüme raquiduam nieimün. Feimu llellipuquen tamün rume cutranpiuqueyeaeteu taiñ Ñidol Jesucristo. Felepe mai.